SULTANA : THE LOVE BETWEEN WAR. (CHAPTER- 1) THE DESERT STORM.

"Danny," ti a kawngpui sir lungpui phên chunga an rawn auh lai chu a hre ruai ruai a, mahse a taksa chu chêt pawh a chêt thei lo, thei leh thei lo in a lû a beng kâng a, mahsela minute khat emaw lek hnu chuan nikhawhre lovin a awm zui nghal ta daih a.


Hmanhmawh baklênga silai mu sûr zawih zawih hnuaia kawngthlang lungpui kâr a aṭhiante in saseng mêk  chu an Sipai Motor Hammer let bui phên chung hian a lo vêng a.

Anchhe lawh mawlh mawlh chung hian lo lambuntu, kawngchhak lam mual pâwng behchhan a rawn kâptu Islam- hel bawrchhawr tak tak ho lamah chuan a silai hmanthiam M16- kah na tak mai chu a tlir ri zawih zawih a, a silaimu tawng tawh chu an vir nawk zel.

.Mahse hmunkhat aṭang chauh a rawn bei an lo ni hauh lo.

An rawn kalna lo lam aṭang chuan Jeep- ṭâwng angreng tak tak pathum lai hi silai keng Iraqi- khat ṭân a  phur chung hian chak mangkhêng hian an rawn tlân a.

Hla deuh tak a dingin chûng Silai keng ho pawh chuan an Motor chu inphên nan hmangin an rawn kah zawm ve nghal a.

Chutianga Silaimu rapthlâk tak tak lêng kârah chuan rawn kal thar ho lam aṭanga RPG(Rocket Launcher) rawn thlâwk phei chu Danny chuan a hmu hauh lo.

A ṭhianten a an rawn auh mawlh mawlh lai chuan a in phênna motor chu ring fahran a puak in a alh zui nghal a, a khû dum tak chu vân lam hawiin a khu chho zui nguah nguah a.

Iraqi- hel ho RPG- kahchhuah chuan a tum a ṭhelh lo chiang kher mai.



********************************************************************************

Thlaler thli lum tak chu a thaw deuh vûk vûk reng a, kawngpui chu blacktop- vek nimahse a chhia in a khuar nasa kher mai.

Chhûn nisat vânglai tak chuan chu kawngpui reh takah chuan Supply thiar Sipai Truck lian pahnih hi Humvee- pali hian an hnunglam leh hmalamah pahnih ve ve hian an rawn kârcheh a.
Kawngpui sîr tawn ve ve chu lungbang rualrem lo taka in chherchhuan tup mai leh khawkrawk tak mai anih hlawm vek avâng chuan hmahruaitu Hammer- jeep chunga Machine Gun- pû African-American palian tak mai Murphy- chu in râlring tak hian hawikual pah reng a.

A dik chauh chuan chulai Highway- paltlang tûr chuan inralrinna dâr khâwn rîk reng pawh a ngai ta hial ve ang.

Mi nunrâwng Islam hel ho chêttlatna hmun ni miau hek.(!)


Chak fahran lova an Camp lampan a Tikrit- khua aṭanga Squad Leader, Corporal Josh Kelly- hova rawn chhuak te chuan an hmalamah enge an tawh dâwn tih reng an ngaihtuah phâk lo.

Chutianga inrâlring tak chunga an tlan lai chuan an hmâ lawk hla vak lo, kawngsîr lungpui piahlam aṭang hian Iraqi- putar pakhat, kêl rual kâwi duah duah hi a rawn chhuak hlawl a.

Hmahruaitu Hammer Jeep- chu ding khu luihin, a kawngkhâr aṭang chuan silai hûm rân chung hian Sipai pakhat hi arawn chhuak zui nghal a.


Hnunglam hawi a a bân a'n vai thuak thuak hnu chuan an hnungzuitu Motor dang pawh chu an ding zui ve vat a.

"Steve, engmah a nih loh saw ." motor chhúng aṭang chuan pakhat hian a rawn ti a.

A ni chuan a silai a an hmâ lawk a putar  tin chung hian,
"Ka va check reng reng ange.."

Chu putar lamah chuan hawi kual zak zak chung hian a phei nghal a.

Putar lah chu hrilhhai hmel deuh hian a lam pan a Sipai silai keng lo phei en hû chung hian a lo ding mawl ve tawp a.
A cellphone ken erawh a puanbah ina a hliah avângin chu sipai chuan a hmu hauh lo.

A hrethiam nge thiam lo tih pawh ngaihtuah lo niawm tak hian chu sipai Steve-a chuan English in a'n be vak ringawt a.

A silai erawh a la thla hauh lo.

An in dinchilh mêk lai chuan Machine Gun pû Murphy chuan, " Eng thil nge Steve, hmanhmawh la," tiin a rawn aû lâwng lâwng mai lehnghal.

Iraqi- thiam hek lo le..!

"Khawi aṭanga lo kal nge inih, khawiah nge i awm..." tiin kut zaizir nen a be luam a.

Chu putar lah chuan a awmzia hriat loh hmel deuh hian eng eng emaw hi a sawi ve nuah nuah a.

Ṭawng inhre tawn lo in eng emaw chen chu an in be ve ang nawk nawk a.


A rei êm avang chuan an hnung motor a chuang pakhat hi inring taka silai tin kual chung hian an lamah arawn phei ve mêk a.


An lam hawi pah hian Steve chuan, " Tûn ang ni sa lutuk hnuaiah hian helai ram palai lêngah hian tunge ran thlah peih rêng rêng ang ni. Pa taima tak anih dawn hi, Murphy..i tluk lo hle mai.." nui deuh huah huah chung hian a ti a.

Murphy pawh chuan khêk deuh tuarh pah hian, " I mawnga ka kah nghal loh, Kan dinhmun hi inthleng dâwn ila a peih bîk kher lo ang, kan pu nisa ngama chu.." tiin a chhâng a, an vai mai chuan an han nui leh rih te te a.

Chutianga an nuih thlêr duai duai lai chuan chu Putar chu a in her vut a, a puan bah siamṭha in a kal nghal a.

"Steve, Steve...Putar kha, a kut..."  an lama rawn tlân phei pah hian Motor aṭanga rawn chhuak pa chuan a rawn aû a.

"Engmaw..itih a.."

Hey..,Ding rawh, ding nghal rawh, Hey..Mihring, ka thusawi chu i hre lo ami ."  rawn tlân phei nghâlin a silaia tin chung hian chu putar chu a aû a.


"Steve, John..."  motor lama awm te pawh chu an lo phusa nasa mai.

"Hey.".. Steve - pawh chuan a silai chuan chu putar chu a tin ve nghal in, muangchâng hian an ṭhian dûn chuan an pan a.

Chu putar pawh chu hauhthawn hmel fahran a ding châwih in,   an pahnih chuan a melh tawn zak zak a.

"Steve, Cellphone a keng.."  ring fahran lo a ti chung in an bul vêl lung chhawrdawh lam chu a hawikual vut vut a.

" i kut kha..Cellphone kha min pe rawh...tunah..Cellphone. Cellphone kha.."  vîn deuh ṭhak a Steve an a tih tâkah chuan eng emaw sawi nuah nuah chung hian an lamah a rawn theh phei a.

An tawlhsawn rang kher mai.
Zai zir a thil a sawi pawh chu an ngaihsak lo.

" Bomb pawh a ni thei, "

"Enchiang teh John,  a pangngai em kan zâwnga thil mai mai chu.."

Motor lama awm an ṭhiante pawh chuan an hmalama thil thleng chu enge tih an hre châk kher mai.

Wireless chu a ri mawlh mawl reng a.

"Cellphone, Cellphone mawle.."

A silai a zaizir in Steve chuan, " Kal rawh, hmêl phak.." a tih rual chuan chu putar chu hlauh hmel deuh hian a kal nghal nal nal a, reilo te an kawngsîr lungpui kârah chuan a liam a.

"Cellphone pangngai a ni" a pheikhawk chhah tak chuan a rapkeh nghal rawp a.

" A kut lo en nachang ka hre lo alawm le,"

" Keipawn ka hmu lawk lo, a kal dâwn khan ka hmu chiah alawm, a puanbah khan hliah miau hek.." John chuan a ti a.

"Kal ang, kan kal thei.."

An ṭhiante'n a an rawn auh tâkah chuan an ni pawh chu Motor lamah chuan an phei ve leh ta a.

********************************************************************************


Motor a an luhfel hnu chuan an tlân chhuak leh ta nghal a.

Mahse thui pawh anla tlân hman lo, an Camp lampan an nih avângin main road aṭang chuan an pêng a, thui lo te an kawng a lo kawiin ruâm angreng deuh hi an va pawh a, blacktop pawh ni lo, thlalêr leichãr sa tak mai an zawh ṭan mêk.


kawng sír lehlam chu lung chhawrdawh ko rem lo fahran mai in zawm deuh pût a ni a, a sîr lehlam ah erawh chuan thlaler thing, thingbuk te reuhte te hi a awm deuh fur a, lungpui lian vak lo sawrbâwk angreng hi a awm nual na in a zâwl deuh duai a, mahse kawng erawh chu a zau angreng khawp mai.

Chu ruam an tlân lût fel deuh chauh tih chuan thâwklehkhatah hmahruaitu Hammer jeep- hmalam dârthlalang chu  rawn khi phawk phawk in a keh zui nghal chuaih a.


Hmêl hmuhtlâk awm lo khawp hian Driver- chu silai mu chuan a dêng chik hneh kher mai.

 Chumi rual chuan kawng chhak lam ko pang lung kâr aṭang hian silai rî a rawn chhuak nghal zawih zawih a.

Chunglam aṭanga rawn kâp an ni bawk a, second hnih vêl lekah hmahruaitu motor driver leh a bul a ṭhu chu kâ pawh chhâwn lovin an boral nghal.


Driver ber a thih avângin kawng sîr a lungpui chu na tak mai a sû in a let thawk a.

An hnunga rawn zuitu jeep pawh chu a bâng bîk chuang lo. Driver erawh an kâp fuh lo nâ in a bula ṭhû erawh in saseng thei lo khawpin a hlam a, a bân leh a malpui a silaimu in a fuh miau avângin.

Rei lo te an an motor bang chu silaimu luhna in a chik nghal hrup a,

"Steve, Marlin, Lance.."

Hmahruaitu Hammer let bui chu phénin lo lambuntu te chu an kâp zui ve bawk a, mahse ṭanhmun erawh duh angin a rem lo kher mai.

An hnung chiah a Hammer rawn tlân pawh chu dingin kawngka lehlam aṭangin rem leh rem lovin an vâkchhuak a, motor chung a Machine Gun erawh râpthlâk khawp hian Lance chuan a kâp ri zawih zawih a.

"In saseng ru, thlanglamah,....."

"Lungpui phên khan, tunah..Danny.."


An hnung a rawn tlan motor te pawh chu rem lo fahran hian an ding ve ṭhup a.

Bungraw phurtu Truck pakhat zâwk driver erawh an kahhlum avângin kopang sû in a ding he bûi a, driver nen pahnih chauh an chuang thung.
Nasa takin kâp lêt ve mah se chu sipai huaisen chuan, a silaimu lêt aia tam mah in an kah rawn avângin a dam khawchhuak zo bîk lo.

Truck pakhat erawh an him hlauh thung a, A chuang pahnih te chu kawngka lehlam a zuangchhuakin, an motor inphên chungin an kâp lêt nghal a.

Hnungdâwltu Hammer pahnih erawh an huaisen kher mai, motor chunga Machine Gun- pai ve ve an ni bawk a.

Driver te chuan anchhe lawh bawrh bawrh chung hian chak fahran hian an rawn khalh tlang a.

Machine Gun pû te chuan ṭe ruai ruai chunga lo lambuntu te lama hmet puak zêl in kopang lungte chu an kãp khu rem rum a.

Hmalam ami te erawh silai mu lêng vêl kârah chuan an in saseng pah zel thung.

Chutih lai chuan an hmalam thlaler lungpui kâr aṭang chuan Jeep ṭâwng angreng tak tak pathum hi silai keng khat ṭân a phur chung hian an la rawn thlen belh lehnghal.

"Hmanhmawh rû.."

"Danny..Danny.."

An motor phên in chûng ho chuan an rawn kâh rawn ve nghal a.

An motor  tlânsanin an thlanglam lungpui phên aṭang chuan an kâp lêt ve mawlh mawlh a, A ṭhiante insaseng lai vêng a motor phên aṭanga lo kâp lêt tu Danny- erawh aṭan invên sên a har ta.

Kawngchhak lam aṭanga rawn kâp tute pawh mi sâwm aia tam mah a silaimu chuan kâp chik hrup in an nunna alâk sak tawh a.

Chutianga a kah mek lai chuan lo thleng thar te chuan RPG lekchhuak in Danny-a inphênna motor chu an rawn kâp puak ta dur mai.

A per dâwrh a, lei chârah chuan  tla khu luih in rûm ṭuah ṭuah a, mahse a kekawr thlêr hawk khawp a hliam, a châwn ti lang huang mai avâng chuan nikhawhre lovin a awm zui ta daih a.


"Danny, Danny.."

Chhântu erawh a awm tawh lo.

Chûng lambun tâwk sipai huaisen te chu an thinrim kher mai.

Anchhia an lawh bawrh bawrg a, an silai kahna tak mai chuan lo lambuntu te chu nasa tak a an han kah rawn tak tak mai chu, an thal phawk phawk mai zu nia leh(!)

Lo lambuntu te, kawngchhak lung kâr behchhan a lo kâptu te erawh an chan a ṭha thei ta vak bîk lo. Hammer pahnih, Machine Gun pâite chuan hlau map lova pan hnai chung zêl a an rawn kah rawn ve avang chuan a ṭhen chu an in saseng hial a.

Machine Gun bâkah motor tukverh aṭang te chuan châwl lo lêk M16- rual hi a rawn ri chhuak zawih zawih reng a.

Kawng chhak lam ami te chu rei vak lo an an let phung a, in saseng tum mêk te pawh chu dim miah lo hian Machine Gun chuan an taksa a kâp chik hrup hlawm a.

Chutiang chuan hmalam ah an rawn tlan phei zêl a. An hnungah inphen nan a an motor hmang chung zêl hian ṭhenkhat an rawn kal ve zel bawk a.

Che hlek tawh apiang chuan silaimu tak tham tak an dawng nghâl zel.

An ṭhian ten a kawngthlang lungpui phen aṭanga an kah lêt mêk lai chuan Hammer tlan hmasa zawk chuan lo kal thar kawnglai a Jeep ding chu Machine Gun-a kâp chung zel hian a su her sawk a.

Motor chhûng aṭanga chhuak in hmun leh hmunah an in kah chilh tak tak mai chu a râpthlâk kher asin.

A hnung zâwk Hammer pawh a rawn thleng chawpchilh ve nghal a.

Thinrimna zawng zawng nen, Lungpui phen a mi te ho chuan muangchângin an rawn charge phei zui ve nghal bawk a.

Chûng hel bawrchhawr tak tak ho pawh chuan an chan achhia tih hria an an theih ang angin, insaseng pahin an rawn  kâp let ve tho va.

Mahse Machine Gun pû erawh a thinrim dâwn chauh mai.

"Tlân rawh, an vaiin..Zâwng hmelchhe ho chu, thi phiar rawh se..."

Tumah damchhuak an awm lo, insaseng te pawh chu Hammer chuan ûmzuiin Machine Gun- chuan dimna tel miah lo hian an taksa a kâp chik hrep hruk vek hlawm a.

Thi tawh ruang te pawh chu M16-mû chuan an lû a kâp phirsi hneh hlawm kher mai.