SUICIDE NOTE | The Confession

.(THUHMAHRUAI)..


.Nî chu khawthlang lamah a liam dâwn ruâi tawh a.....

Hun kha leh chen lo tualchai zâ țhin țhian hlui rei tak in hmu tawhlo, chutia dam tak maia kan han inhmukhawm leh thei ta mai chu a hlimawm rualin, a lehlam zâwnga han ngaihtuah erawh chuan a lunglen thlak angreng thung viau mai.

A ngaite bawkin Lalrinawma- chuan Sap sendâng miril ho thu leh hla khirh leh un pui pui mai chu ala buaipui chhunzawm zêl niâwm tak ani, Muankima erawh Aizawlah thâwmhnaw dâwr lian tak neiin a lo khawsa lian tawh khawp mai a, ----- amah bawk chu a ni zanriah pawh min buatsaih sak tu chu ni.

Kan zanriah kîl ho chu a hlimawm teh fahranlo viau nâ in Mizo tlangval, chutia ramdang a kan han in hmukhawm tâ chu a nawmdân a danglam fahran ve hrim hrim chuan ka hria...

A enga pawh chu lo nise, Lû a kêlsam pawh ala țo hma a țhian hlui dam tak a kan han inhmu leh thei chu thil lawmawm tak chu ani ve pakhat in a hriat.

 Ka lo hriat fo țhin angin Muankima chu Pa ti kher kher leh sûm leh pâi lama meng ve lam deuh niin ka hre thar leh a, Lalrinawma erawh chu ka ngaina ngang mai. Tûnhma a ka lo hriat fo țhin, naupang chêr ve țhîk țhiak, eng emaw midang nen a buaina neih chânga pâwr ve thei deuh, chhan leh ngai ziah țhin anih vang pawh kha ani ta ve ang. Tunah chuan alo țhang duhawmin, a dul lam pawh in hma a hruai ve ta deuh anih si hi.

 Mahsela kan zanriah kîlho chu chuti tak a nuamlo erawh a nilo. Hetia zanriah kan kîlho na hi HUB Shopping Mall piah lawk ah a ni a, Guwahati, Bhangagarh- vêng ah a ni. Kei hi Lalrinawma nen hian kan tuizâwng a in ang deuh a, Aizawl ah Thlakip chanchinbu sawngnâwi zet mai enkawl in Stationery dâwr te reuhte Bâwngkâwn ah kan nei bawk a, kan nû erawh High School zirtirtu a ni thung.

Hetia Guwahati a ka kalna chhan ber pawh hi kan Dâwr bungrua la tûr leh keimah in Checkup pah tûrin a ni a. Mizoram House- a room âwl a awmloh avang leh zinkawng thui tak zawh tûr ka nih avânga nuamsa deuh taka hâw ka rilrûk deuh avangin Capital-a ka hâw ka tum a, Chuvangin Bus- chân na bulhnai deuh ah thlenin ka dap chawp a.

Muankima- pawh hi an dâwr bungrua la tûr leh eng eng emaw ti a zin ve tho a ni a, Lalrinawma erawh chu zin vâk mai mai, ama tuina ang ang, India ram a hmun hlui leh hmakhawsâng a thil lo siam tawhte tlawh tûr niâwm tak a ni.

 Khua alo tlâi zêl a, thimhmulah phei chuan êng chi hrang hrang hi kan awmna ah chuan an chhî a, Vâi ram a nih ang ngeiin lemchanna hmun cheimawina chhûnga awm te pawh kan ang thei rum rum mai.

 Tîti eng eng emaw vawrh chunga Zanriah kan ei lai mêk chuan Lalrinawm chuan,

." Thudanga lai chuan, Guwahati ah hian Chester- kha a lo khawsa nek tawh asin." arawn ti chhuak hlawl a.

 Muankima chuan, " Khawsa tawh e, Zanriah kan kîl dûn nghe nghe tawh asin, mahse a rei leh tawh..." a lo tih zawm a.

Lalrinawma bawk chuan mak tih hmêl angreng deuh hian, " Zanriah a, Engtik kum bâwr vêlah nge, ila hre thei mai em..." tiin a lo zâwt nghal var a.

 "Ka hre mai tawh lo, kum ngâ emaw vêl lai chu aliam tawh ang, a hming i rawn sawichhuah tâkah khân ka hrechhuak zawk mai mawlê..." Muankima chuan ati liam puat a, a thil ei lai chu a ei zawm leh nghal daih a.

Kei chuan, " Guwahati ah hian maw..." tiin an hriat zahve pawh hre lo tih hriat tak hian ka lo zâwt deuh hû a.

 " Ni ang chu mawle, Hmanah, Guwahati ka zin ṭumin an Hotel-ah ka thleng tawh a, Kan in be ve zauh zauh nâ in chuti takin kan in kâwm êm êm lo, in in hre ṭhin em ni ?".. tiin Muankima chuan Lalrinawma chu a zâwt leh ta a.

Lalrinawma chuan, " High School kan kal lai khân ka hre ve deuh e tih mai a nia, a hnû ah pawh kan in hmu leh zauh zauh ṭhin? Nang zâwk? i ngainat zâwng a ni emaw chû." tiin a lo zâwt lêt leh a.

Muankima chuan hul hak hian, " Mifêl tak chu niin ka hria, mahse chuti tak a biak tlângnêl theih nî pawh in alang lo, bâkah, amah khâ chîk deuh chuan a pangngai zân lo deuhin a hriat..'' a ti a.

.Ka lam rawn hawi pah hian Lalrinawma chuan, " Mi mak danglam ve tak chu niin ka hria, Muankima sawi ang a nihna lai pawh kha a awm tho," ring fahran lo hian a ti thâwp sat a.

Kei chuan, " Thu leh hlâ lamah a kal viau dâwn emaw tih hnu ah a tâwpsan leh nge maw ni, ka chanchinbu ah pawh vawi tam arawn thâi kûr tawh asin, " ka lo ti a.

" Facebook leh Chanchinbu vêla a thil ziah hi ka chhiar ve zauh zauh a, thu thiam tak chu niin ka hria kei pawh hian, Mahse amah kha a eng emaw ti tlat, ka sawi thiamlo, a chiang chiah lo emaw ni.." Muankima chuan a rawn ti leh a.

 Lalrinawma lam hawi pah hian, " Chester- chu i hre chiang viau em ni?" a ti hul hak a.

 Dik tak chuan chu kan thil sawilai chu Muankima chuan a ning thawkhat hle tawh tih a mitmeng leh a chezia ah chuan a lang reng a.

" Kan zirna hmun a inang a, chubâk lo chu, a khãt mâwi tâwk a in hmuh leh zauh zauh hi a ni mai, chu lovah tunlai ah Social Media a lâr tawh a, a thuziak tam tak pawh ka chhiar zauh zauh ṭhin," Lalrinawma chuan a rawn ti leh a.

 Kei chuan, " Pa fing tak, Mahse inthlahdah angreng tak niin ka hria, " tiin ka lo tuihnih a.

Nui chung hian Lalrinawma chuan, " Ni chiah, Lehkha chu a thiam êm êm lo nâ in, a thiam dân erawh a danglam chi, mî tihloh dân leh zir loh ang chi in a zir a, zir sânna lam ah amah hniam mahse thiamna lamah erawh mî chung a lêng a ni tlat lawi si, a thiamna kha chu chhuanawm tak a ni asin. Thil chi hrang hrang kha a thei pâwl a ni zêl mai a, Pa zei chikim ve tak chu a ni, mahse a thiamna te kha eizawn nan erawh a hmang leh hauh chuang silo." a ti deuh duah a.

Muankima bawk chuan, " Chu tak chu a nia a pangngai zân loh deuhna chu, " a lo ti bung leh deuh nghut a.

A ni chiah mai, Chutianga titi phunglêng vawrh chu Muankima chuan nuam a ti vak lo tih chu Lalrinawma pawh chuan a hrethiam mai a, kal tûrin a ding a.

 A tlâi tawh deuh avângin kei pawhin kal ka duh thû ka sawi a. Chutianga han inhmuhkhâwm leh chu hun dang atân Muankima chuan rawt leh mah se a hawiher leh chezia aṭanga ṭawngkam ṭha ûm mai kan nihna lai a awm deuh dâwn avângin atân a nuam lo ni miah lo tûr erawh chuan tih nawn leh a châkawm thu te sawiin kan inṭhen darh ta hlawm a.

A tûk tlai lama Mizoram lama haw tûr ka ni a, ka thlenna riahbûk lam a hâw tûr a Ulubari kawngpui sîr a Auto ka nghah lai chuan Lalrinawma chuan a thlenna Mizoram House-a lêng tûrin min sâwm a. Ka hnial viau nâ in ani chuan, " I ning tawh viau a nih loh chuan Chester-a chanchin kha kan sawi zui leh dâwn nia," a ti a.

Chester-a chu ka hrechiang teh fahran lo nâ in ka nin loh thu ka hrilh a. A hnenah chuan, " Ka chanchin phêk a a thuziah ka chhuah dâwn hian a rawn kal zauh zauh a, kan in be tam lo nâ in a rawn kal hnuhnun ber ṭum a a thawmhnaw hâk lai pawh ka la theihnghilh hauh lo a ni," ka ti a.

Lalrinawma chuan, "Engtik kum vêlah nge," khîk deuh sak pah hian a lo ti thuai a.

Kei chuan, " Kum riat lai a liam tawh.." tiin ka chhâng a.
"Thil nih dân tûr rêng a nih chu.."  nuih sak pah a ti chung hian Auto- lo tlân chu a lo phar a.

Auto-a kan luh hnu chuan eng emaw chen chu kan han ngawi dun vang vang a, kan tân a mi pawimawh tak pakhat chu kan ngaihtuah tih a hriat theih mai.

Chester- kâwm tawh tu leh a hre tute reng reng chuan amah chu an hrereng zui ziah mai a. Inhmuhna pangngai mai mai leh inkawmna mai mai pawh nisela, an theihnghilh thei tlat lo.

Ngawi renga engemawchen kan tlân hnu chuan Lalrinawma bawk chuan, "Zanin tlai chu nuam ka tiin hlawk ka ti khawp mai, Muankim-ana a chungchâng a rawn sawi na kha chhân enah ka en lo na chungin, a ni ang inlâk fel tum lutuk leh mahni indah pawimawh lutuk chi ina khatia a sawi kha ka beng hian ngaihthlâk liam mai a thei lo anih kha.." a rawn ti chhuak leh hlawl a.

Kei chuan, " A dik chauh chuan Muankima hi chu a naupan lai rilru ang pu a tar tûr ah ka lo ngai deuh sâ hrim hrim a.." tiin ka lo tuihnih ve leh a.

Mizoram House- kan thleng a, a pindan lam pan a kan kal lai chuan,
 " Khatia Muankim-an a â deuh leh rilru lam chiang lo ang deuh a a sawi kha a dikna lai a awm ve tho in ka hria, Guwahati-a a hmuh lai khan keipawh in ka hmu ve tho a, khami hnu khan Muankima- khan hmu leh se chuan â chhiava tak takah angai tawh ngei ang.." Lalrinawma bawk chuan a ti leh ta a.

Kei chuan, "A thuziak pawh i chip hneh viau lo maw?" ka lo ti a.

A ni chuan, "Nasa lutuk ringawt, ê tak a, Guwahati ah chuan an Hotel- ah ka thleng a, kan in kâwm nek tawh tak asin." a rawn ti deuh hluai a.

"Chuan..." ka lo ti deuh var a.

Ani chuan a pindan kawngkhâr hawn pah hian, " A thuziak i chhiar ṭhin emaw a nih chuan engkim mai kha a thuziakah a zep tel vek asin." a ti ta mai a.

Pindana kan luh a, meizial leh intûr nen a kan inchhawp fel hnu chuan,

 " Hmân aṭanga ka tuina leh nuam ka ti ber kha tunah pawh ka la chhunzawm char char a, chuvanga Chester- nen pawh a inkáwm kan ni deuh ber, a chhan chu ka tui ang kha a rawn tui ve tlat a..Nasa tak in.." a rawn ti leh a.

Kei chuan, " Amah kha a hawi zau ve angreng a, A thuziah ah pawh Hmanlai thawnthu un pui pui leh thlarau lam thil eng emaw tak tak chu ka chhiar nual tawh" ka lo ti a.

Lalrinawma bawk chuan, "Chhiar zau tih lamah chuan a chhiar zau in a fing bawk a, mahse kha chu thudang lo nise, Piannawn lehna chungchâng leh Khawvêl a Sakhaw hrang hrang chanchin ka ziah te kha a lo chhiar ve a niâwm a, khami lam chungchâng kha a buaipui ve alawm, Piannawn lehna chungchâng hian a rilru a tibuai ve khawp asin." a ti deuh hluai a.

" Engtia buaipui in maw.." hriat belh châk hmel fahran hian ka lo ti thuai a.

Ani chuan, A bulṭhûm aṭangin kan sawi ange, mahse..mahse naktûk a Motor a insawh nilêng tûr ini si a...

Aw, Amah khân rilru lam natna (depression) a vei deuh niin alang, Guwahati - a kan inhmuh hnu kumhnih na ah Aizawl ah kan in hmu leh a, chu chu kan inhmuh hnuhnûn ber ṭum a ni.

Chumi hnu a a thuziak ka chhiar ka chhiar leh te avang chuan hmuh tumin ka zawng titih deuh a, mahse vanduaithlâk takin hmuhna remchâng ka la nei thei lo. kei lah hi Mizorama awm hman in ka khawsa meuh mang silo a..

Chester Ralte- hi chuan thû leh hla lamah chhun tûr a nei ṭha a, hmân deuh lawk a boral ta Tluangte Hnamte (tluangtea hnamte) kha a pú a ni bawk a, amah tak hi chuan a tleirawl lai leh High School a kal lai aṭang tawh khân hla phuah leh lehlin bâkah Sawrkar lamhawi, Political Articles leh Essay- te a ziak deuh ber ṭhin a, Novel- a ziah pawh in a hmanhmawh chi,  a hlimawm leh hnuchhui lam te a ziak deuh ber ṭhin a, mahse kum a liam zel a, kum 2010- chho vêl aṭang khân a thu leh hlâ hi a inlet thawk a tih theih hial ang, thawnthu muang chi leh hmanlai thawnthu un pui pui te leh Paranormal lam te a ziak deuh ta thung a nih kha.." tiin a sawi ta duah a.

A thusawi ngaihnawm tih hmêl deuh hian, " Chu chu alawm, mi special bîk a nihna chu, " ka lo tih zawm a.

Ani pawh chuan thâwp sat hian, "Ani ang mihring kha chu kan khawtlângah hian an chhuak tam vak lo.." tiin ka thusawi chu arawn tuihnih ve leh bawk a.

Amah bawk chuan sawi zawm lehin, "A thawnthu ziah ' The Bride Of Dracula' kha i chhiar tawh em? '' a ti leh a.

Kei chuan âw tih nan a lu bu nghauh nghauh pah hian, " Lal fapa in a ngaihzâwng Thisen dãwt hmang nula a zawn lehna chanchin kha a ni lãwm ni, Ka chanchinbu ah ka chhuah sak tawh alawm.." ka ti a.

A mah bawk chuan, "Kha kha a ma chanchin vek a ni asin.." ring fahran lo hian arawn ti a.

Kei chuan mak tih hmêl deuh, " Eng a..ama chanchin iti elaw.." ka lo ti deuh hluai a.

Muangchâng hian ama zâwn a a meizial chu ban in a ṭan a, muangfân raih a a híp vang vang hnu chuan,

Ring fahran lo tê leh fiah deuh si hian,

" The Bride Of Dracula thawnthu kha ama nun awmzia leh hun tawn mêk a ni alawm, Greek Lal fapa Marcus- kha amah angin han kuai her la, tichuan a awmze thurûk chu i hrethiam thei mai ang.
Thisen dâwt hmang nula Vivienne, Marcus- ana a zawn kha Lucy, amah Chester-a ngaihzâwng hlui a ni alawm.." a ti ta ta.

Kei chuan mak ti fahran hian, "Chuti maw, chutiang a lo ni maw!! Ka hrethiam deuh ruai ruaiin ka inhria.." tiin ka chhâng a.

A Whisky rawn chhawpchhuah chu tlêm thlîin, ani pawh chu ka thlit sak ve bawk a, tichuan mangchânga lem pah hian a sawi ngai bawk chu a sawi chhunzawm leh ta a.

"Heti hian kan sawifiah hmasa anga i hrethiam awlsam deuh ang, Guwahati ah Chester- hi a awm tawh ka tih kha lo hre reng la.

Lucy- nen a an in ngaihzâwn lai hian a thawnthu leh Articles- tam zâwk chu a ziak a, mahse chûng ho chu a hlimawm zâwnga tâwp vek chi an ni a, thawnthu hmanhmawh chi (fast novel) deuh vek an ni thung.

Tin, a Articles- ziah hrang hrang te, hmangaihna lam te pawh a ni ang, chûng ho pawh chu a tlângpuiin nuihpui theih chi leh a hlinzawm chi vek an ni.

A ngaihzâwng nen an inṭhen hnu ah Guwahati ah, a pû te hnenah a awm ta daih a, chu pawh chu a nun ning lutuk awm thawven châk pawh a ni ta ve ang.

Guwahati ah kum engemaw zah a awm hnuin Mizoramah a rawn chho leh a,

Hetia mizorama a rawn chhoh hnu hian a ngaihzâwng hlui chu zawn hmuh leh tumin Social Network lam a khawih ta vak a, tichuan chumi a zawn lehna leh a nun chu thawnthu ah phuah chhuakin, The Bride Of Dracula- kha a lo piang ta a ni.

Lucy mizia leh a hmêl put hmang te chu Vivienne- pianhmang ah a hmang ta a, Chu chu The Bride Of Dracula, Chapter Two 'VIVIENNE' tih ah khân chiang takin i hmu thei ang.

A thawnthu a Vivienne- zawn chhuah a tumna kawng a Marcus-a zin veivâk ina tleirâwl, Penelope-i, Dâwi hmanga an hrem a chhanchhuah kha i hria ang a.

A zinkawng chu Penelope-i avâng chuan a pêng ta daih a, a dâwi sût sak thei tu tûr Dawithiam a zawn pui a, chu lovah, An pahnih chuan in zui zêlin, indona râpthlâk tak tak te a hmachhawn phah a nih kha.

Penelope-i  chu Lucy- a zawn lai a a ngaihzâwng chhar thar a ni a, a hming kha ka hre ta mai lo.
Chu chu The Bride Of Dracula, Chapter Three 'THE CURSED OF WEREWOLF( the maiden of the condemn) - i chhiar chuan i hrethiam mai ang.

Tin, a thawnthu ziah pakhat THE CLASSIC- i chhiar chuan, The Bride Of Dracula nen a in ang tho tih i hria ang." tiin a sawi ta ṭeuh a, kei lah chu ka awmdânah hmanhnawh angreng deuh si, la ngaihthlâk châk sî ang deuh hian ka lo awm ni ngei tûr a ni.

Lalrinawma chuan a sana a'n en a,
Glass no tung a a Whisky thlit sa chu muangchânga lem pah hian a thusawi chu a tâwp ṭêp tawh thu leh, Zan reh ah pawh Auto - emaw hman tûr a tlêm loh thu min hrilh a. Tichuan a thusawi chu a chhunzawm leh a.

" Chumi hnu, Guwahati aṭanga Mizoram-a a rawn hâw dâwn hnaih lamah ania, ka Bhutan- kal hâw lam, an Hotel-a ka thlen chu, ka thlen zân chuan ka pindanah rawn lêngin kan ti ti a, a thawnthu ziah chungchâng kan sawi a, chumi a kan sawi chhuah leh amah in a a thawnthu awmzia min hrilh a ni a.

Guwahati aṭanga a haw hnu hian vawikhat Mizoramah- kan inhmu leh ka tih tawh kha.

Ka nî fapa motor accident buaipui a Synod Hospital, Durtlâng, a ka kal ṭumin ania kan in hmuh chu, Rilru lam chungchânga harsatna a neih deuh vâng leh taksa lama engemaw dam lohna a neih avângin Damdawiin ah chuan a lo awm ve reng a.

Tuma awmpui pawh duh lovin, Cabin ah a lo awm a, chumi Damdawiin a ka kal zân chuan vanneih thlâk tak maiin ka Nurse- ṭhiante zârah ka Damdawiin a a awm ve thu leh a awmna te thlengin ka hriat phah a, chumi zân chuan a Cabin ah ka lêng a.

A hma a kan inhmuhna kha kumhnih liam ta mai kha ania, mahse a rilru hah emaw vâng ani ngei ang, a hmêl a danglam tawh kher asin, naupang tê siin a chal sam te a lo tla kawlh nasa tawh kher mai.

Chumi zán chuan thil awmdân leh thil thleng chungchângte min hrilh a. Thil lungngaihthlâk tak mai, chuti maia reh mai thei lo tûr tuar ang chiah hian a hmêlah chuan lungngaihna a awm tlat a.

A lungngaihna chu ama mimal thil liau liau a nih avângin thil awmdân leh thil thleng chungchângte chu zâwt duh lovin amah ina a duhdân ang têa a sawi theih hun ka lo nghâk zêl a.

Tichuan, a khum sîr, a lu bul chêt ah chuan ṭhuthmun remin a thusawi lungchhiat thlãk tak mai leh danglam tak mai chu ka ngaithla ta a.

Zan tîr a lêng kha ka ni a, a pindana ka lên luh hnu lawk, khawthim rual deuhthaw aṭanga sawi ṭan kha a ni a, a sawi zawh meuh chuan zanlai a lo pêl daih tawh a.
A sawi zo ka'n tih chuan sawi tûr a awm tawh lo tihna a ni lo. A tûk zîng, tûkṭhuan eikham a a pindan a ka va lên luh leh chuan a sawi kârlaka thu pawimawh tak tak, a tîr a a sawichhuah si loh chu a sawi chhunzawm a, A rilru a hlim lo êm êm a, engtik lai mai pawh chuan a rilru a kâwm a tih theih hial ang.

Chumi hnu chuan kei chu ka hna avângin damdawiin lamah chuan ka kal hman ta lo a, khami ṭum a kan in hmuh kha amah ka hmuh hnuhnun ber ṭum a ni."  tiin a thusawi chu a tlip leh a.

Kei chuan, "A va han mak in a va lungchhiat thlâk kher êm...!!" zâwi fahran hian ka lo ti a.

Ani chuan, " A ni asin, kan tui záwng a lo in an mai bâkah a thu leh hlâ ang hi ka chhiar nasa a, chuvangin a thusawi pawh kha ka lo hrethiam zung zung thei a ni." a lo ti a.

Eng emaw chen kan ngawih dun vang vang hnu chuan ka no leh a no chu a thli khat leh a.

" Keipawh hian ka hrethiam ta deuh in ka hria, a hma te kha chuan ka chanchin phêkah ka lo chhut mâwl sak ve tawp ringawt a, a thuziak ngaihsân avânga chhiar liam ve deuh puat ka ni ber, Mahse i sawi tâkah chuan a thuziak te kha ka lo hre bel ve tho mai a nih hi, Anih chuan a chanchin zawng zawng leh a thuziah chungchângte chu a vaiin a hrilh vek che in ka ring a..." ka  ti bah deuh nuaih a.

Lalrinawma chuan, " Min hrilh nual alawm, Chu leh chen thil awmdan ka hrilh tawh hnu che a han zêp leh rih pawh chu thil tih âwm a ni love. Mahse thawnthu sei tak a ni tih kha lo hre phawt la.

Naktuk nilêng leh zankhua a Motor-a insawh tûr ini bawk sia, chuvangin a tlângpui chauh pawh sawi dâwn ila zankhua pawh in kan sawi zo thei dâwn emaw ni tih a nia." tih pah in a tho deuh thurh a, a khum hnuaia a savun Suitcase- tê khâi chi chu hnûkchhuakin, a chhûng aṭang chuan khâwla lehkha chhut chhah tak mai intêl hi a rawn la chhuak a.

" Kan in kawm tirh khân a thusawi pawimawh lai leh ka chhinchhiah duh lai chu ka ziak mai mai a, mahse a hnu lamah chuan ngaihnawm ka tih tâk êm avângin thil awmdân leh thil thleng te, a thuziah bâkah a nun a thil thleng leh a thawnthu nena a inzawmna lai te chu a indawtin ka ziak ta a.

Chutia ka tih avâng chuan thil awmdan leh a chanchin te hi ka hmaih chuang hauh lo ania. A rilru buai viau mahse pa titi thiam tak leh mî hneh chi a ni ve hrim hrim a..

Hei hi lâ la, i chhiar ve chhin dawn nia, Kei chuan thaawnthu phêna thu ril thuhrûk ( behind the story), ropui leh lungchhiat thlâk tâwp khâwk niin ka hria.." a ti ta a.

Kei chuan, "  Inpuanna (confession) ." tiin ka lo tuihnih a.

.Chu a thuziak chu ka keng a, Guwahati aṭanga ka rawn haw lai chuan uluk takin Capital- ah chuan ka chhiar ta a.


LEKHA ZIAL CHU :


Kum 1997 March thla chawhnu lam chuan chu chhûngkaw hlim tak mai zînga an pâ ber chuan Motor Accident râpthlâk tak mai a tâwk hlauh mai a. A thiam loh pawh ni lo, tum rêng vânga a two wheeler khalh lai rawn su tu Khawlian khaw Middle School Head Teacher chapo tak mai chuan chu ami sut pa chu bawihsawm reng reng a tum lo nia.

Chumi hmun chu Tuirial Airfield bul lawk, Tuikhurhlu khaw lai, kawng kawi ah tak a ni, Khua a thim thet theh tawh a.

Kut themthiam tak mai chuan a Silai chhe repair, Seling khua ah a han pe a, chutianga a pe zo hlim tak a a haw leh lai chuan Setana- fâ ni mai âwm a sualna leh chapo na a khat chuan tum reng vangin a ngal ruh veilam pahnih chu a sut tliah sak ta a ni.

Rang takin chulai hmun a an thâwm leh hmu tu fel tak tak te chuan an lo bawihsawm vat a.

Amah su tu leh bawihsawmna chang pawh hre lo, thiamna pakhat mah nei lo chu a ngaidam mai pawh ni lovin.

"Engmah a na love, Mizo leh mizo kan ni a, ṭhat leh ṭhat a inlâwm tûr kan ni alawm," tiin ala thlah thei zâwk lehnghal anih chu.


A tûk a zaina room a an nawrluh dâwn ruai ah chu a su tu pa chuan Squash- ûm khat a rawn ken sak a, chumi hnu chuan vawikhat tê mah a hmel a rawn lan leh tawh ngai lo a.

Lâk bo ang hlauh in a reh ta vang vang a.

Chutianga pâ ber ina hliam pui
a tuar tâkah chuan Damdawiin lama awmpui leh riahchilh tûrin an nu pawh chu a inbuatsaih a.

 An fa naupang të tê pathum, hmeichhe pahnih leh mipa pakhat, pawnto rual vêl lek te chu nû ber chuan an inpui lam, a unau te hnenah a dah ta ngawt a.

Kum thum lai An pa damdawiin a a awm chhûng chuan an fâ te chuan hrehawm takin chu kum thum chu an lo hmang liam ve a.

An nû unau te ngei chuan engtin nge an lo enkawl le.
Zân tin deuhthaw khuma an mut phal lovin khum aṭangin an tlawh thla a, an ṭah leh kutthlâk in chhuat ah, an hâk lai nen chauh an riah tîr a.

Chumai ala ni lo, Kum thum chhûng deuh thaw chu Zantin khum hnuaiah an hâk lai nen ṭap chung in an riah tîr ṭhin a nih chu.

Zanreh a pâwn an dah a, zân thim hlau a naupang ṭap chu ngaithei lovin an duhthâl in an sawisak zawm leh ṭhin a.


Inchhûngah thil engpawh an hmu lo emaw, a bo emaw anih chuan an anmahni mawhpuh in kut an thlâk âwl lo, chutiangin engpawh chhia sela, anmahni awm loh lai a thil thleng pawh nise, an ni lo chu an mawhpuh ngai chuang lo.

An in thingphel chhuat tle tak mai chu uluk tak a chhuat nawhna a nawh tlêt ni lovin, unau pathum te chhîp sam a ṭhâm a, chûng unau te sawisa chunga an hnuhna vanga tlê a ni zawk.

Chumi kum thum chhûng chuan Chhiahhlawh pawh an tluk lo, Kutthak hnawina tûr a Sal lei ang chauh an ni.

Chaw kaw puarin an ei ngai lova, an ei phal sak an ni hek lo, eng anga rilṭâm pawh nisela, chaw khawrh khat chu an vawikhat chaw dawn zât tûr in kum thum chhûng chuan an ring ve mai a.

Chung naupangte chuan an nû an ngai a, mahse an kiangah a awm reng thei silo, a rawn hâw châng a a fa hmangaih tak tak te tân a a thil rawn hawn te chu an nu awmlai a an ei loh chuan a hnuah  eitûr an chang ngai tawh lo.



Chu erawh a bulṭanna chauh a ni.


Hun aliam a, An naupan lai hun aliam in tleirawl nun a rawn hmang chho ve bek bek a, chûng hun lai chuan a ni a thawnthu tam zawk leh Articles te, Political Essay te a ziah tâk vak hunlai chu.

Mahsela eng emaw vângin a nu leh a pa a hmangaih tak mai te chu an awmhran alo ngai a. Chuvangin a pi leh pu te bulah a hun a hmang chho ta a.

Chulai chu a hun tawn a thil mak tak thlenna leh atân a rahbi inṭanna chu a lo ni ta.

Kum 2007 a lo in herchhuah meuh chuan a nun zawng zawng thlâk danglamtu a tawng ta a, ṭhiante zîng ah pawh hmeichhe ngaihsak lo ber leh hmangaihna awmzia hre pawh la hre lo leh la tawng ngai lo ber ina ngaihzawng amah hmangaihtu a tawng ve ta chu amah ai mahin aṭhiante an hlim zâwk hial âwm e.

Chutiang chuan kumhnih dâwn lai chu an in zui ve a, mahse ani pawh chuan duh viau mahse tleirawl in hmangaihna ang bâk lo chu ala hrethiam lo kher mai.

Nitin zantin inbe ṭhin mahse, a thinlung ah erawh hlimna tak tak a nei thei lo tlat si. A naupan laia a thil tawn bâkah a nu leh pa te chuan a rilru an luah reng a, a theihnghilh thei ngai lo. Chuvang chuan chu râwlthar khawhar tak chuan nunbul aṭan dâwn chauh emaw tih laiin  nun châk lohna a nei ta hial a, Nitin chu a thinlung baihvâi tak chu a buai telh telh in a mah pawh chu a thinchhiat phah ta khawp mai.

Chuvang chuan a ngaihzawng nen a an nundante a ngaihtuah a, an chhûngkaw khawsak in an loh lutuk leh in sân hleih te chuan a rilru a tibuaiin engtikah mah nei thei dawn chuangin a inhre lova.

Chu lovah ani erawh nu leh pa kãr a a awmloh avâng chuan a ngaihzawng lakah chuan a inkiltawih thar leh ta thut a.
Kâr tam tak chhûng chu a thinlunga a vei chuan a tibuai hial a.

Chutianga an inzui ve det det chhûng chuan kum aliam a, 2008AD pawh an lo chuang kaiin an hmang zo leh ta ṭêp
a.

 Rilru khingbai tak a neih tawhsa na kârah a ngaihzawng chu a ṭhian bul ve ngawih ngawih nen chuan phone hmangin an lo inbe ve fo ṭhin tih a hrechhuak a, a hnuah amah pawhin Lucy- chu a zâwt leh a, mahse amah chuan a ngaihzâwn loh thu leh an inkârah engmah a awm loh thu in a chhâng zêl a.

Mahsela hun alo rei a, an in be lai ngei mai chu a man chhuak ta nge nge a.


A thil tawn avânga a nun/ a rilru hahna te chuan mahni insitna leh in kiltawihna  nasa tak in a thlen a.

A ni lah nula lampang ngaihsak ngai reng reng lo leh zantin deuhthaw a kawtthlêr leh hmeichhe rîm lam ngaihtuah lova, ṭhian hova awmkhâwm leh zâi ho tlut tlut an ni a.

Articles tam tak, english hla hmang te a a ziah leh a behchhan zîng ami chu Lucy chuan a lo chhiar ve ni ngei tûr a ni.


Kum sâwm lai liam tawh mahsela ala hrechiang ém êm, zan khat chu an ṭhian hova an zai lai hian Chester-a phone alo ri a, number ala hriat ngai loh hi a lo ni a.


Chutah chuan khawvela aw mawi leh nalh a tih ber mai ṭawng ri chu a vawikhat nan a ngaithla ta anih chu.


Chu aw chuan sâp hla hmanga a thu ziah pakhat, chanchinbu a a chhuah chu a lo chhiar ve ni ngei tur a ni a.

 A hla a leh a sa tu a duh zia te bâkah ka thuziah chu ngaihnawm atih thu te rawn sawi a. A ngaihsan thû a sawi te phei chuan a bâwl ni hial in a hria a. Mahse a bawl chu ani lo.

 Bâwl ahnêk in a hla duhzâwng te a hrilh a, chumi hmanga thu ziak tûr te chuan  ala ngen zui lehnghal a.

Chutiang chu an bulṭan dan a ni a. Tunlai ṭhalai tam tak chuan an hrethiam ve kher lo mai thei a, chu chu SMS Chhâs- a neih dân lo ni ta chu a ni.

Chumi hnu aṭang chuan nitin deuh thaw hian a rawn bia a, a lo rei deuh hnu phei chuan zîngah arawn kaitho a, mut dawn ah a rawn mangṭha leh bawk a.

Amah ina a biak hmasak loh pawn rawn biak a ṭhulh ngai chuang lo.

Chutiang chuan kum khat vel lai chu hmel in hmu miah lo in an inkawm ṭhin. A mak khawp mai,
Nitin zantin a in be ta na na chu zawi zawi in an lo in nêl a, a thurûk te, an chhungkaw chanchin a chhia a ṭha te thleng thlengin a rawn hrilh ve mai ta ṭhin a. A thinrim châng te, a lungngaih leh rilru nat chângte hian a bulah engkim a sawi a.

Vawikhat an inbiak chhûng te hi darkar khat vêl zel ah a chawhrual theih hial ta ve ang. Mahse kham lo tak chung hian an inbe tâwp leh ziah tho ṭhin.

A chang hi chuan ka rawn phone ngun bîk che, rawn phone ve tawh rawh te hi arawn ti leh tawp mai ṭhin bawk a.
Chutiang a an inbiak tâk hnu chuan in hmuh puiah a sâwm ta nge nge a, mahse a buaithlak thei khawp mai.

An hmuh hmasak ber ṭum chuan a nau nen an motor arûk in an lo khalh chhuak a, a nau kha amah zawk alawm ala ti char char zui lehnghal anih chu.

A hnu a a sawi leh chuan, ka zak alawm i hmelṭha em anih kha te a ti zui lehnghal a.

Chuta ṭang chuan phone ah mai nilovin a takah pawh an lengchhuak dun ta fo va, mahse vêng kâr a hlat êm avângin abuaithlâk na lai a awm ve tho ṭhin.


Vawikhat phei chu tlai lam ruah sur cherh cherh lai hian a rawn phone a, a ṭap nasa khawp mai a,  a pa chunga a lungawi loh thu leh tlan bo a tum thu te sawiin, a pa hi apa hrawn anih avanga an in mil tehchiam loh thu te pawh.


Chutiang chuan kum hnih bawr vel chu an inzui a, a hlimna leh lungngaihna thlenna ber a ni ang, a châng phei chuan a nau hmeichhia hian phone hi alo pick up khalh ṭhin a, a u anga insawiin a rawn be leh vak zel a, ani lah in an aw a in an êm avangin a hre hrang mai thei bik si lo a, a khât tãwk hian abulah a lo inpuang leh vak mai ṭhin.
 thinrim chi ani bawk si lo a, a chang phei chuan an hlim thei ṭhin hle bawk.


Tin, a thinlunga ala hriat reng mai chu, chutianga anau ina phone alo pick up khalh ṭhin avang chuan Password siam ang a tia, chu an Password chu 'Serenade' tih a ni a, an phone apiangin enge Password an inti hmasa ziah ṭhin.

Hetih lai vel hian an la naupang dûn ve êm a, Chester- hi kum sawmhnih pakhat a ni a, ani Lucy- chu  kum sâwm paruk chauh la niin, Class 10 ala kal mek a, a ngaih thu te,  hmuh a chak zia thu te ringawt sawi te hian zan rei taj tak thleng bâkah, buai lai lai ten avrawn phone chamchi ṭhin a, nangnen a kan in lo inhria hi pathian remruat ani ang a ti hial ṭhin.


Mahse khatih lai a a lo ngaihtuah tel ngai miah loh leh a inchhîr tâwp theih loh na chu ani fahrah leh mi tla hlang lutuk ina a neihtheih ngai reng reng loh tur leh a phu loh pui a lo hmangaih kha a ni, hriat pawh lo in hriat malek tur kha ania, an inhriat tirh kha chuan chutiang tih reng a hre silo.



Chutiang mi hausa chhungkua a lo hmangaih avang chuan hlim ve ṭhin hle mah se, a thinlung tak erawh chu ahlim lo telh telh a, a bula awm thlahlel hle ṭhin mahsela, insit rûkna a nei lian telh telh a, hetiang a a rilru a hah ṭan aṭang hian mahni a awm nuam a ti ṭan a, a châng chuan zan rei tak tak ah te kawtlai ah te a tei chhuak a, hmun reh lai deuh leh thlanmual ah te kal in a hun tam tak a hmang ral a, an nun chu a ngaihtuah ṭhin.

 Ani chu a ngaihzâwng hmasa ber a ni a, chutiangin tleirawl in hmangaihna leh in ngaihzawnna ang chauh hmelhriat ni mahsela, a nun lo pal chhoh tawh buaina tam tak chuan a rilru a tih buai belhchhah lehzual a, chu chuan thil tam tak a ngaihtuah tel tîr avangin, nei thei dawn in a inhre si lo a, a nun leh khawsak sâng tak chu tihchhiat sak a hlau a, lo in nei ta tehreng pawh ni sela, atir ah nuam ti mahse, hun alo kal zel ang a, an in ang a nuam leh duh duh ang khan a nung reng thei dawn silo, ama pindan tiat lek an in ah khan dam chhûng in hlim tak in a cheng reng thei lovang.

Ni chiah mai, tleirawl inhmangaihna bâk hmelhriat lo khân a nun a a thiltawn tam tak avangin ngaihtuahna mak pui pui a nei ta fo mai a.
Ch chu a hma aṭang rêng a a rilru kap tu leh tibuai tu a lo ni tawh sa reng a, chutih lai akarah a ṭhianpa ve ngawih ngawih, a thlum a al ei za leh unau ang maia a lo en ṭhin nen chuan arûk in an lo inbe ṭhin ani tih a hriatchhuah leh phei chuan a rilru a buai hle a,  Chu a thianpa chuan k
an in biak dan te, kan nun dân te leh engkim a hre vek a, mahse chuti chung chuan a ṭhianpa ngaihzawng chu a lo la beisei tho a nih chu.

Tichuan a tâwp chuan an inbe lai ngei chu a man chhuak ta nge nge a.

"Ka hmangaih che a, engkim ka hrilh tawh che chungin ka thusawi engahmah i ngai lo a, ka thusawi engahmah ngai lo tu chuan engahmah min ngai lo tihna a ni, engahmah min ngai lo tu chu eng atanmah ka ti lo." tiin  thu tâwp chu a hrilh ta a.

Mahse Lucy chuan," Chester, ka hmangaih che, nangmah chauh hi ani ka hmangaih, i ṭhianpa nen chuan kan inngaizawng lo, ka sawi tawh ang khan amah chuan min ngaizawng a, kan inbiak dan pawh ka hrilh vek zel che kha, kei chuan iṭhian anih avang chauh a biak ka ni." ṭap ṭeuh chung hian phone aṭang chuan a rawn ti a.

Mahse Chester erawh chuan engmah a ngaithla lo, " Ka sawi tawh chu ka sawi tawh a ni, Ka thusawi engahmah i ngai lo a, be tawh suh ka tih hnuah i be leh a ni lawm ni, tikhan inbe rawh u, ka rawn tibuai leh tawh ngai lo ang che u"  tiin phone a ti tâwp nghal hmak a.

Mahsela rei a rial lo, vawi engemaw zât Lucy chuan a rawn dial leh ngat ngat a, mahsela a ani erawh chuan a hmet tâwp nghal zêl a.

Chumi zân chuan ani pawh a mu thei bík chuang lo. A khum ah chuan rilru buai tak hian a inlet a inlet a.

Chutianga zanlai pelh tawh hnu thleng buai nuaiah a a awm lai chuan a message tone a rawn ri ral ral a, peih leh peih lo a a en chuan Lucy message a lo ni a.

Phone Call a pick up duh loh avânga beidawngin message a rawn thawn a ni ngei ang.

" Chester, min ngaidam rawh, vawikhat chauh chance min pe leh rawh, nang lo chu ṭhian ka nei lo a, nang lo chu hmangaih ka nei lo, ka hmangaih hmasa ber ini asin, khawngaih in chance vawikhat chauh min pe hrâm rawh, tichuan i duh ang in ka awm ang, nikhat chauh pawh, nikhat lek pawh nangnen a awmdun a, inbiak leh hi ka duh a ni, nikhat chauh tal pawh.."  tih hi a lo ni a.


Message chu chhân lêt a tum zuau a, mahse a in ngaihtuah a, a rilru thil tam tak avangin a buai nuaih reng, chutih lai chuan message a rawn thleng leh a.

Chu message chu a ni, an inbiak pawh hnuhnun ber na chu.


" Engtik niah mah nangmah ang hi ka tawng leh tawh ngai lovang, ka engkim ini asin, ka thiam lo tih ka hria, i thusawi ka lo awih lo a, mahse engtik ni ah emaw chuan kan la inhmu leh êm êm ang, chutih hunah chuan ka hmangaih zia che leh ka rilru zawng zawng hi ita anih zia chu i la hria ang. ' a tih chu ani. .
................................................................................................................


Chutia an inṭhen chu a duhdân ni tho mahse, a naupan lai hun a a thil tawn tam tak te leh Lucy vang chuan rilru hahna a nei chho ta a, mal riau a inhriatna te, beidawnna te chu a thinlung luahtu ber a ni.

Chumi avang chuan ruihhlo a khawih ta hial a, a nun tih thawven nan leh hlim nan nawmsakna tinreng a chên a, engtiklai mai pawh a harhfîm lo a awm reng mai te a duh ṭhin avang chuan a taksa pawh in a tuar nasa kher mai.

A ruihhlo khawih an hriat avang chuan a chhûngte chuan in aṭangin an hnawtchhuak a, a tîrah phei chuan kalna tur pawh hre lovin khawilai mî in kâwmkâr ṭawp tak takah te a riak a, chaw eitûr a neih miau loh avangin chhangthâwp te leiin ni eng emaw zah chu chaw ah a ring hial a.


Chutiang chuan kum hnih vel lai chu ruihhlo bawihah tângin a nun a hmang a, mahse hlimna a hmu chuang lo.

Mahse chutianga baihvai taka a awm chu a ṭhian bul tak pakhat hian an inah hruaiin an inah chuan a chên tir ve a.

A ṭhianpa nu pawh chu a fel kher mai, a thil chîn ṭha lo te sim tîr tur chuan nasa tak a zilh in a fuih a, chutiang chuan a ruihhlo tih chu sim tum in leh boruak thar dawng tûrin Guwahati- ah a pû te hnena chêng turin a chhukthla ta nge nge a.

Guwahati a a awm lai hian Damdawi ruihhlo erawh a khawih tawh lo thung, khawih rei viau mahse a ning a, ruihhlo tinreng mai chu a kham hluah hluah avang leh bânsan a tum ruh êm avangin harsa ti tak chungin a kalsan thei hrâm a.

Hetia Guwahati a awm lai hian Pathian thu lam te zirin, sakhaw chungchang te a buaipui ta vak a.

Hei hi a chhan ni a lang chu, ruihhlo khawih tawh lo mahse nun beidawnna a nei a, a nun a thil thleng tam tak te chu a tân phurrit leh nun ti ning tu an nih avangin Pathian a aû a, vawi tam tak ṭawngṭaiin a beidawnna leh harsatna te chu Pathian hnenah thlen mahse chhânna reng reng a hmuh loh avangin Pathian lakah pawh a beidawng hial a.

Christian zirtirna tam tak phei te chu hnawl in Thih hnu piahlam phei chu a ring ta hauh lo mai.


...................   ...........  ......



 A ruihhlo tih te a sim hnu chuan Guwahati chhuahsan in Mizoramah a lêt leh a, mahse an in ah erawh a haw chuang lo.

Kum khat dâwn lai chu, a ruihhlo tih lai chhûng zawng a hmangaih tak a enkawl tu a ṭhuanpa te inah chuan a khawsa ve leh a.

Mahse a chhûngten a nun ṭha lo sim a, ruihhlo a bânsan thu an hriat avangin an ko haw leh a.
Châk lo teh mahsela mahni in awm reng, a miin a khawsak reng chu a mawi loh avângin a haw leh ta nge nge a.

Mahse inah pawh chuan nuamsa in a khawsa leh thei chuang lo, a chênpui a nu unau te nen hian thinlung takin an in pawh thei tawh tlat lo.
A naupan laia a chunga an thiltih kha a theihnghilh theih bîk loh avângin inchhûng chu nuam a ti lo a, a tâwpah chuan rilru hahna ngai bawk chuan a uai leh ta a.

Chuvangin an chi leh kuangte sâwmna angin JC Security Guard- ah a nu û hian ṭantír in, Icfai University, Durtlang North ah a duty ta daih a.

Hemi a a duty lai hian a nun a thil thleng tam tak chu a ngaihtuah kîr a.

Zankhat chu a lung alêngin a khawhar êm êm, a duty pui, a ṭhiante hlim taka an inkawm lai chuan ani erawh chu ama room lamah khawhar takin a ṭhu ngui ruai a.

A ngaihtuahna a rawn lang hmasa ber chu Lucy-kha a ni, an inṭhenna pawh kum lî lai a ni tawh a, mahse a theihnghilh thei tlat lo, a thiam lohna ni miah lovah a kalsan lui a, nikhat chauh hun min pe rawh a tih lai khan chhân pawh a chhâng lêt duh lo a nih kha.

Thil tam tak angaihtuah a, an inṭhen aṭanga vawikhat tê pawh ala theihnghilh theih loh Lucy- chu a lo hmangaih zia a hrechhuak a, a hmangaih hmasa ber leh hnuhnung ber chu a ni ngei kha a ni.

Mahse tunah hian khawnge a awm anga, enge a tih tâk ang tih te chu a ngaihtuah a.
Tichuan a inchhír thu te, inṭhen a duhchhan tak te, a rilru zawng zawng, a hmangaih zia thu te, a inpuanna thu chu amah Lucy- ina a lo hmuh miap takin, a hmuh hun chuan a rawn biak pawh leh ngei a ring ta a.

Tichuan Articles, Lucy- zawn chhuah leh a tumna thu ' THE CONFESSION OF LETTER'  chu a ziak ta a.

Social Network lâr hun lai anih tawh avangin chu a thuziah chu Facebook a Group hrang hrang ah te chuan a Post darh ta a.

Tichuan hun a lo kal zêl a, Lucy- a ngaihtuahna chuan a nun pumpui chu a luah in engtik lai mai pawh chuan angaihtuah ngut ngut reng a.


Zânah te hian tukverh hawng in pawnlam ral lehlam hla tak te chu thlîr in a ding zankhua leh ṭhin, a chang chuan beisei theih loh beisei a, nghâk tlat ni te hian a inhria a, chu a khawharna chu sangha nula ina tuipui râl lam a mihring pangngai, kumkhua a aneih theih loh tur tih a hriat reng, beiseina nen a zantin maia lungpui chung a ṭhu chung a khawhar tak a lo châng ang mai ni hian ka inhria a, chu ka lunglenna thu chu ' A MERMAID WINTERTALE ' ti a vuah in a ziak a leh ta a.


Hun aliam zêl a, kum sâwm dâwn lai a vei hnu pawh chuan Lucy- chu ala theihnghilh thei lova, kum tam tak a liam a, engtin nge a nun ahman ang a, engtin nge a khawsak tâk zêl ang, Ruihhlo te lo khawih ve in a nun pawh a lo chhe ve vek tawh maithei a, mahse chûng  thil, a ngaihtuahna vâkvêl te chu a tak pawh lo ni ta se, a hmangaihna ala reh lo a, nitinin a hmangaihna chu a la zual zêl ṭhin zâwk a, chuvangin engpawh tâwk in Lucy-chuan a nun chu eng ang pawh in lo hmang khawlo tawh pawh nise ala hmangaih reng thu tih " NEVER TOO LATE" - tih Articles ah chuan a ziak leh a.

Chumi hnu pawh in Lucy- a ngaih êm êm reng avang chuan, IF TOMORROW NEVER COMES tih te, THE CLASSIC  tih te chu a ziak leh a.


..Chumi hnu chuan chu a lunglenna chu thisen dawt hmang Dracula nula ina mihring tlangval a hmangaih avanga lungleng taka a Lalin (castle), kulh hlui rup tawh a alo lan hun beisei taka a nghak anga in chan in, ' THE BRIDE OF DRACULA ' tih chu a ziak leh ta a,  Lucy-
a hmangaih na chu nasa hle mahse, a naupan têt aṭanga a phurrit, a nun tibuaitu chu a la reh mai bîk lo, chutiang chuan Lucy- chu zawnchhuah leh châkin beisei hle mahse a châng chuan insitna leh beidawnna chuan a tibuai fova.

Mitthi nung thisen dawt hmang leh minung chu engtikah mah an in nei thei ngai lo ang bawk in ani rethei leh fahrah mai hian mi hausa fanu chu engtikah mah nei thei ngai dawn lo tih a te chu angaihtuah tel ve tho a, chuvangin he thawnthu a tîrah lemchan thawnthu angin a ziak a, mahse a hnuah thawnthu pangngai angin a ziah chhunzawm leh ta a.

Hetih hunlai hian amah duh deuh tu pakhat a tawng veleh nawlh mai a, mahse a rilru tak tak a pe thei chuang lo, Lucy- nen a an chanchin engkim pawh hrilh in, ' Ka hmangaih hmasa ber chu ka theihnghilh thei ngai dawn lo, ilakah hian ka rilru zawng zawng ka pe thei ngai lo ang' tia a hrilh hnu pawh chuan a kalsan duh tlat loh avângin an in zui chu a ni veleh mai a.

.Chung chu The Bride Of Dracula thawnthu ah chuan ziak telin,

A nun chu Greek Lal fapa Marcus- ana a ngaihzâwng Vampire nula Vivienne- a zawn leh dân angin a ziak ta a.

Lucy- a zawn leh mêkna kawng a hmeichhe pakhat a tawn thu pawh (The Bride Of Dracula, Chapter 2) chu chu thawnthu ah chuan ziak telin, Lucy pianhmang leh hmel te chu Vivienne- pianhmang ah a hmang a, Tin, A hmeichhe tawn thar pawh chu Penelope-i anga lantîrin, a pianhmang leh hmel te pawh a hmang zui bawk a.

Mahsela, chu amah hmangaihtu hmeichhia erawh chu a thinlung tak taj a pe thei tawh ngai lo.

A rilru a pêk dawn apianga a rilru a Lucy- a lo lan ziah thu te chu a thawnthu ah chuan ziak telin.

Penelope- i nena an awmdun apiang a Dracula Vivienne- i hlimthla lo lang ṭhin leh Vivienne- aw ina rawn ko tlat ang ten a hriat ṭhin kha.


Chuvangin ngaihzawng thar pawh chu a kalsan leh thu a thawnthu ah pawh a ziak tel leh thlap a.

Chumi hnu chuan a thinlung chu Lucy- ai mah chuan beidawnna in a luahkhat hneh zawk ta hial awm e..

Chuvangin Lucy- laka a beiseina te chu alo reh tial tial a, a chanchin engmah hriatzui tûr a hmuhchhuah theih loh avang chuan pasal anei tawh emaw, a boral tawh emaw a nih aring a, amah azawnna thuziah zawng zawng te chu a hnenah kir leh vek nimaiin a hria a.

Tichuan a beidawnna thu 'THE DEAD LETTER' tih chu a ziak leh ta a.
Chumi hnu aṭang phei chuan a rilru hi a buai a tih theih tawh hial âwm e.

Lucy nen khân kum 2007 ah in ngaizawngin 2008 kum tâwp lamah anin ṭhen leh a,  kum 2012 ah ṭanga zawng ṭanin kum sâwm vel lai a lo ni ta der mai, 2018AD a lo herchhuah meuh chuan Lucy- lak a a beiseina te chu a tâwp a tih theih hial ang, Lucy- laka a beidawnna chuan a naupang lai a sawisak a tuarna te, a thil tawn hahthlak tak te avanga a beidawnna leh rilru hahna te chu a ti zual sauh a.

Tichuan a thuziah hnuhnung ber nitûrin 'SAIL AWAY' - tih chu a ziak leh ta a.

A nunhlui hlimawm leh buai tak te chu tawng leh ngai dawnin a in hre lova, chûng nunhlui te pawh chu rawn her let leh dawn pawh nise a damlai ni chuan an rawn kîr leh hman a beisei lo.
A beiseina te chuan an thlawhbo san vek ni hian a hria a, Chuvangin atan chuan thih mai loh chu hmabâk engmah neiin a inhre lo. ..


.TLANGKAWMNA :



Lalrinawma nen chuan Vellore ah kan inhmu leh a...


Damdawiin chhûng lamah kan nu a awm tho avângin ka teihawi e tiin khawi khawi ah emaw ka vahkual chiam hnuin kawng kam Thingpui dâwr tereuhte ah hian ka châwl a, chutia ka in hnawhpuar fel a, ka kal dawn lai mêk chuan hnunglam aṭang hian ka dârah hian kut pakhat hian arawn bêng thuk a, kan lehhawi chuan Ṭhianpa Lalrinawma lo ni rengin.

A nui deuh vur vur a.

"Engtia... heti lam lamah te..."  a tih chuan, bah deuh nuaih hian,

"Ni e, Nia, hei kan nû nû Damdawiin lamah kan kalpui alawm le" tiin ka chhang a.

Ani chuan, " A va pawi ve, keipawh nimin khân ka rawn thleng chiah, eng emaw tihtur ka nei a,..

I hmanhmawh lêm loh chuan ka thlenna Hotel lamah lo kal la, no hnih khat chu i dawm dûn ang hmiang, "  a ti leh a.

Kei chuan ka hmanhmawh vak loh thu a chhângin kan nu chu ka kalna tûr leh Lalrinawma nena kan inhmuh thu te ka phone ka hrilh zawm ve nghal a.

Vellore khawpui lum huk maiah chuan motor pakhatah chuang dûnin kan tlân ta a, A Hotel thlenna pindan kan thlen chuan,


" Khatia Guwahati- aṭanga ka haw hnu lawk khân kan nû nû zunthlum nei chu eng emaw natna dangin a tlâkbuak belh deuh nual a, upa lam a lo ni bawk sia, Heti lamah enkawlna a ran zãwk beiseiin kan tlang thla nghal deuh mai." ka han ti a.

Ani chuan, " Upat lamah hi chuan natna hian a bawm in min bâwm emaw tih mai tûr hi a ni a, keipawh khatia kan inhmuh hnu khan thla hnih vêl lai chu Orissa- ah ka awm deuh reng a, chumi hnu in Mizoram ka rawn chuangkai leh a, hei kár hmasa lawk aṭang khân zinchhuah beihpui ka thlâk leh ṭan dawn a nih hi.." tiin min chhang a.

Kei chuan, " Kan thudang alai chuan i lehkha min pêk kha ka chhiar e ka tia, rawn thawn kír leh che ka tum viau na in i phone number leh thawnna tûr che i address- ka hre mai si lo a...." ka tih lai chuan ka thusawi chu lo pawtchat in.


"Enge i ngaihdân ni ve rêng réng a.." a rawn ti leh a.

Kei chuan, " Ka thuziak chhiar tawh ah chuan ala ropui ber maiin ka hria, a thu in chherchhuan dan kha a mak ve bawk êm a ni, Chester-a hrilh che a ni chãwk ang chu ka ti mai a.."  ka ti a.

Ani chuan, " Chu zawng, min hrilh dân ang chiah chiahin ka ziak tih ka hrilh ngam che. Engmah ka phuah belh lova, a ṭawngkam takngial pawh ka irawm chhuak la telh mang lo. Ka hriatrengna hi a ṭha ve a, Chester-a lah thil sawi thiam mi tak a lo ni bawk si a. " a ti a.

Kei chuan, "A mak hle a ni."  ka ti ringawt a.

Lalrinawma chu a'n ṭhu âwn a, a nui a, "
A mak lai ala tel lo zâwk mawle.."  ala rawn ti ta deuh deuh.

" A makna lai a..i thusawi awmzia...."

Ani chuan, " Guwahati aṭanga i haw hnu khan a chanchin i hre leh réng rêng em? " a ti a.

Kei chuan," Hre lo, hre hman pawhin ka khawsa lo, Khatia ka haw hnu khân kan nû nû a zual thut a, kan nû chi leh kuangte thawhna College vêng a Redeem Hospital lam daih daih ah kâr hnih vel lai chu kan va awm rên râwn a, chumi hnuah Vellore lamah hian kan thlâwk liam zui lehnghal a ni mai a, hei rin aiin kan awm rei ta phian a, hmâ erawh kan sâwn ve deuh deuh chuan ka hria..." tiin ka chhâng a.

Min chhâng lawk lo, reife hi a in ngaihtuah deuh vung vung a.

" Redeem Hospital a in awm lai chuan Nurse hmelhriat emaw, i nei hman lo maw..." a rawn ti chhuak a.

Kei chuan nui chung hian, " Chutiangin kan nû ṭhiante bâk lo chu han hmelhriat thar ka neih âwm pawh ka hre lo, engtia chuti lam daih daih..."

" Eng lo ania, Chester-ana a sawi Lucy- kha khami Hospital ah khân a thawk alawm, Nurse ania..." tiin ring fahran lo hian a rawn sawi leh a.

Mak tih hmel deuh hian, " Lucy maw...Ka hria a lawm, Ka pizawn enkawl tu deuh ber alawm anih, chu chu...a va han mak ngai êm...tinge kan inhmuh hmasak khân i sawi loh..." ka ti deuh hluai a.

Ani chuan dam zet hian, " Khatih lai khan ka la hre bîk hleinem.." a ti mai a.

"Chuan..engtikah nge i hriat..." tiin ka zawt nghal a.

Ani chuan, " Thla khat lai aliam tawh ang, keipawn a hma khan lo hria ila ka ti ngawt asin," a ti a.

" Anih chuan, Chester nen chuan an inhmu leh em..."  phûr deuh sûrh hian ka lo ti a.

" Hmu lo, an in hmu tawh ngai lo ang.." zâwi fahran hian a rawn ti a.

Kei chuan ner sak pah hian, "A eng vâng chuan maw?.."  ka lo ti deuh hû a.

Ani chuan, " Chester te chu a thi daih tawh alawm.." a ti mai a.


"Thî a...Chester- a thi maw...engtin..."  ka ti buai nuaih a.

" A mah leh amah mawle, a pindanah a inâwkhlum alawm, "  a ti leh a.

 " A pawiin ava han mak tak êm, " ka ti vawng vawng a.

Ani erawh chu pawi ti hmêl pû pawh in ka hre lo, a meizial a'n ṭan a, " A thih tûr thu kha a lo sawi lâwk daih tawh asin, "  chuai raih hian arawn ti chhuak a.

"Sawi lâwk a, a engah chuan maw,"  ka ti deuh hû a.

Ani chuan dam thlap hian, " Ka thuziak kha i chhiar thuak thuak lo'm ni?" a ti a.

Kei chuan, " Chhiar thuak thuak lovin ngun takin ka chhiar mawle. Mahse a thih tur chungchâng erawh ka hrethiam pha tawp lo mai." tiin ka chhâng a.

Lalrinawma chuan, "Ṭhian duhtak, A bulṭhûm aṭangin kan sawi ange.

Khatia ka thuziak, Sakhaw lampang leh piannawn lehna chungchâng alo chhiar ve avânga kan in kawm khân A buaipui tak erawh chu Piannawn lehna chungchâng leh thih hnu piahlam thil vel kha a ni a.

A thuziak hnuhnung lam i chhiar chuan khatiang Paranormal, Reincarnation leh Supernatural lam thil a ziah vak kha i hria anga, kha kha a chhan chu amah khân a nun lo tawn hrehawm leh buai tak tak kha phurrit ang maiin a delh bet tih i hmu ang a.

A damchhûng zawnga khatiang phurrit a phurh avangin a thihhnu ah chuan nunthar neih a, nun bul ṭan ṭhat leh theih a in beisei tlat a.
Chumi thih hnu khawvelah chuan a damlai a a rilru hahna te, a nun buaina te chu awm tawh lo tûrah angai a, chuvangin Piannawn lehna chungchâng kha hriatfiah a duh a, a buaipui rêng a ni.

Tin, The Bride Of Dracula chapter tâwp lam i chhiar chuan, Marcus-a kha zawlneiin a thih tur thu a hrilh kha.

Chumi hnu chapter dawt chiah, Chapter tâwp ber i chhiar chuan Chapter hming kha ' Eclipse'  a ni tih i hria ang a, Eclipse anihna ang rêngin a Marcus-a kha a thi a, amah bei tu misual tak tak te kha a thihsan a nih kha, chutiangin a thih rual chiah khân thla âwklem- a awm bawk kha.

Chumi awmzia chu, Thla êng tak kha thimin a hliah angin Chester-a damlai nun chu thihna thim in a rawn nang ta a ni..." a ti ta a.

Uluk fahran hian ka lo ngaithla a.
"A va han mak êm, " tiin ka phun sep a,

Amah bawk chuan a sawi lai chu sawizawm lehin, " Final Destination - a ziah kha i hria ang a, khami awmzia chu, Amah khân nun a nin êm avângin A nun kha Thihna in a veh reng niin ka hria a, chu thihna sawi chu a phurrit a nun hahthlâk tak kha a ni.

Engtik niah emaw a phurrit avânga a thih hun ala thleng dâwn in a hria a, chuvangin kha thawnthu ka a ziak ta a ni. A ngaihnawm dân tura a siam kha chu a hnu a a her rem leh mai mai zâwk a nih kha." a ti leh ta a.

Kei chuan, " Chutiang thu chu lehkha ah khan i ziak tel si lo.." ka lo ti a.

Ani chuan, "  Ni e, khami hun lai khan hetiang hi ani ang tih ka lo hre bîk lo alawm, a thih thu ka hriat hnuah a thuziak hrang hrangte te ka lakhâwm leh chauh a, chuta ṭang chuan ka chhuidawn leh chauh zâwk.."  a ti leh a.

"Anih chuan Lucy- chu..."

"Kha pawh kha a boral hnu daih ah ka hmuchhuak chauh, chupawh ka hna kal tûrin School naupang pakhat City Bus ina a sut ka hmu a, ka hmuh khân a lo su deuh chiah ani âwm e, hmanhmawh takin Ka motor in Damdawiin hnai berah kan hruai a, Redeem Hospital ah chuan.

Kan han dahfel a, a chhûngte ka biak sak sawk sawk a, chumi hnuah ka hmanhmawh avângin kal mai tum a Casualty ka chhuahsan mêk lai hian, Lucy- chu chulai a Nurse- ṭhenkhat chuan an aû ri kha hria a.

Chu hming ka hriat chuan ka rilru ah thil tam tak a rawn lût nghâl a.

Hmanhmawh deuh in mipui zi nuai nuai kârah chuan Lucy- ni ngei a ka rin chu ka han aû ve ringawt a.

Chu nu Lucy- ngei mai chuan min rawn en deuh hâ a.
kei chuan rang fahran hian, "Lucy maw inih, Chester-a i hria em?" ka ti deuh tlawng a.

Chester- a hming ka lam rîk chuan amah pawh chu a tiphu deuh zawk a, a bandage kenlai pawh chu a thlauh phah hial lehnghal.

Chîk tak a min en chung hian, buai deuh nuaih hian, "Aw,...Aw..hria e, Chester-a chu...,  tiin min chhâng a.

A chanchin eng eng emaw, Chester-a ṭhiannu anih nge ni lo tih hriatna ang tûr chi  ka sawi nual a, amah ngei chu a lo ni.

Mahse, an buai êm avâng leh duty lai anih avângin "min lo nghâk lawk hman em, ka hman veleh kan inbe leh dawn nia, min lo nghâk lawk rawh.."  a ti na chungin, chutia mi buai lai lai a rilru buaina dang han siam sak kha ka ti lo deuh a, ka hmanhmawh deuh bawk avângin nidanga kal nawn leh turin ka in sawi a, chu chu a ni mai..."  a ti leh ta a.

Kei erawh chuan sawi tûr dang pawh ka hre lo, pawi ti leh mak ti chung hian ka ṭhutna chu thawhsanin tukverh bul lamah chuan ka phei ta daih a.


Ngawi rengin tukverh bulah dingin páwnlam ah ka hawi chhuak a, ani lah chu a melh ngai melh reng chung hian a ṭhutna ngaiah chuan a ṭhu reng a, chutianga inbe lova minute sâwm emaw vel kan ngawih reng hnu chuan ring fahran lo té hian.

" Thil Pakhat, ka la sawi miah loh a awm,  Ka thil hriat zîngah chuan ka hrethiam har ber ta ve ang.

Khatia Damdawiin Khum a Chester-a a mut lai a, kan inkawm khân, ka kal dâwn ṭêp ah he thu hi arawn sawi a.

.Zân ah vân lam i hawi chuan Arsi sâng tam tak, êng phe tuarh i hmu ang a, chûngte chuan an ênna chhuah in zân êng mawi tak an siam ṭhin, Hêng arsi te hian thih hun/ tâwp hun an nei vek a, engtik hunah emaw hetianga an ênna hi a la ral ang a, Arsi thî an la ni dawn,

Chutiang chuan Khîng ênna ropui tak nei sâng tamtak zîngah khian Arsi pakhat in a ênna hlauh ta se, tuman an hre lo ang.

Arsi êng sang tam tak zînga pakhat lek ênna chuai ta chu tuman an hre tham lo ang tih hi." a rawn ti a.

Kei chuan thâwk halh pah hian, " Chu chu..." tiin a sawifiah hun ka lo nghâk a.

Ani chuan, "Chu chu a boral hnuah a awmzia ka hrethiam ta chiah a ni.

Arsi sâng tam tak a tih chu amah anga thuziak mi te an ni a, Amah chu thi mahse thuziak mi sâng tam tak anla awm a, chuvangin ani thih thu erawh tuman an hre tham dawn lo a ni.  tih niber in ka hria." a rawn ti leh a.

"Mahse a thihna chu tupawh in an hria a, an in ui ani lawmni, " tiin ka lo chhâng leh a.

Ani chuan, "A thuziah hnuhnüng ber ka haichhuah ah chuan, Ka hun a lo thlen hunah chuan ka thiltih dik loh leh ka tihsual te kha theihnghilh ula, ka thil tih te ni lovin, keimah hi min lo hre reng dawn nia, tiin a lo sawi asin" tiin min chhâng a.

Kei chuan ka chhâng lo, eng emaw sawi tuma alam ka hawi lai chuan ka lam hawi hian ṭhutthleng a lo her rem a.

"Tukverh lam saw han thlîr teh," a  tih avangin pâwn lam chu kan hawi chhuak a.

Chu Vellore khawlum tak hnuaiah chuan Ni erawh alang hauh lo thung, thlifîm hi a rawn thaw heuh heuh reng a.

Tukverh pawn lam ka hawi chhuah chuan hla tak maiah hian vân chung sâng takah chhûm duk reih ruih hi a bâwr tup a.

Lalrinawma chuan meizial vâp chu a'n piai thla fak a. Chutah,

" Khawchhak lam a ni maw, a hla tawh lo hle mai, engtikni ah emaw chuan Khawchhak lam aṭang hian Ruahthim-pui nasa tak chu a rawn la thawk thla dâwn anih hi"... a ti leh a.

Kei chuan, " A hla tawh lovang, khawvel pum mai hi ala tuam chhuak ngei ang..."  tiin ka lo chhâng lêt a...