FINAL DESTINATION : THE BEGINNING

( CHAPTER 1) ..


DATE : 11. 5. 2013.

A hmâ nî lâwk in Arel Khawlhring leh Julie Chhangte ten a Abbra Ririni- lo haw hmuak in, Ririn-i hi Julie Chhangte te inah a riak zui nghal a.

..Abbra Ririn-i hi Singapore lama hnathawh nei niin, chawlh hmangin a rawn hâw a,  Singapore aṭangin thlawhna a rawn hâw in, Goa- an rawn direct- a, Goa aṭangin Rêl leh motor nen, chutah Guwahati aṭangin thlawhna bawkin Lêngpui-ah an rawn thlâwk hâw leh a.

Lêngpui ah hian Julie Chhangte leh Arel Khawlhring ten lo hmuak in Arela motor in an rawn haw a ni a.

Social media lam aṭanga inhmelhriat mah nîse rin aî daihin an in nêl hlawm khawp mai.

Julie sâwmna angin Ririni chu an khaw lama hâw tlang nghal lovin Julie te inah chuan a in vawmlût a.

Thû leh hla lam buaipui tu leh thuziak mî ṭheuh ni tâ chu an khaw lama a hâw hmâ in tî a Arela- rawt angin, an ṭhian ṭhenkhat, thuziak mi te chu sâwm in Zanriah buatsaih an tum chawpchilh nghal ta rum rum a.

A tûk zân chuan Arel-a ṭhian pakhat, Thingtlang lam mî, Aizawl a lehkhazir a rawn awm inluahna, Laipuitlâng ah chuan Zanriah an eikhâwm a. A in neitu ber hi an khaw lama a hâw avângin anmahni ho chuan in neitu chan an chang nghâl a ni ringawt mai.

Hemi hunah hian Facebook lama an thuziah pui thiam tak tak, Arel Khawlhring, Noah Hringngen, Julie Chhangte, Haylor Remruati, Sentei Chhakchhuak, leh Jennifer te bâkah Basta Tlâu pawh Aizawl a a awmlai anih avângin a rawn telve bawk a.

An Zanriah ei chu an hlimin hlawm kher mai, Chumi zân chuan in neitu ber a awmlo bawk nen riahkhawm pawh tum chuanglo chuan eng eng emaw ti a in kâwm in zanlai an meng thleng dêr mai lehnghal.

Zînglam dâr thum arîk dâwn ruai pawh chuan Basta Tlau leh Jennifer-i tihloh chu CarromBoard te pen in pah in anla ri laih laih reng a.
Anni erawh chu Sofa pakhat ah hian rem leh remlovin an muhil dûn tawh a.

Chutih lai chuan ruah tlêm arawn tla sek a, a phingphisiau hian a rawn zui nghal a. Hê an awmna in hi Assam Type anih avângin bengchheng viau lo mahse Ruah thâwm chu a hriat theih tho mai.

Reilo tê an  Julie Chhangte pawh chu hâm bâi bâi in Basta te mutna lamah chuan pheiin, anmahni delh chuan, " Ka mit a kham lutuk, kan chhîng vê zuai lâwk aw,'' tih leh remlo fahran hian a ṭhu mu zui ta nghal a..

**Chutia Julie mut hnu lawk chuan Noah- chuan, "Rîrin, Thingpui han lum la, K'u Arel-a pawh hian a in châk tawh ang chu, Thingpui dâi chî kan nei bawk silo a, a lum chî tal kan in mai loh te chuan" a ti a.

Ririn-i pawh chu a tho thurh a, " K'u Arel-a chuan a pum a bum dâwn a ni maw" tih pah hian choka lamah chuan thingpui lum tur chuan a phei nghal a.

Remruat-i leh Sentei erawh chuan TV en in, Fifty Shades Of Grey Movie an entui kher mai, A khãt tâwk in Noah chu an kâp zauh zauh reng a.
(Noah Hringngen hian Fifty Shades Of Grey- thawnthu hi mizoṭawngin a letling  tawh rêng bawk a.)

Ririni thingpui lum zo chuan sitting room a rawn phei pahin Noah leh Arel-a te Carrom Board pen te ṭhutna hnung a tukverh chu ruah phingphisiau a rawn luh avângin a rawn khâr pah a, Chutih lai chuan Eng emaw ni hi a rawn ri deuh ṭhawt ṭhawt a, In chu a rawn nghing deuh der der a.

" Chu chu enge a, " Ririni chuan mak tih hnel deuh hian a ngaithla deuh hû a.

A reh lehnghal mai avâng chuan Noah leh Arel-a te phei chuan an hre lo hrim hrim, an Carrom Board pen ah ringawt chuan an rilru an dah ani ta hial ve ang.

Sentei leh Remruati te pawh chuan mak antih hmel angreng hle a, an TV enlai chu a chêt deuh dar dar avang chuan muangchang hian an tho a, mitmeng a "Engnge a?" ti niawm tak hian Arela te bula Ririni- ding chu an en deuh hû a.

Chutih lai chuan thâwm ri nasa tak hi an awmna in chhaklam pang aṭang chuan arawn chhuak a, chumi rual chuan an awmna in pawh chu a in sâwi nghîng nghãl luai luai a.

Second tam pawh a kal hman kher lo ang. An awmna in chu chhaklam aṭanga lei rawn min chuan hnawl in a delh zui ta nghal a.

Mangang tak hian an ṭê chûl hlawm a,
Ririni chu tukverh bul a awm anih avângin an awmna in insâwi chê avâng khân vawmchhuah ang mai hian dârthlalang dêng keh chuaih chung hian tukverh ah chuan a per chhuak nghal lawp a, chumi rual chuan an awmna in chu chhak lampanga Building in chim chuan rawn delh in, leimin chuan a hnâwl zui nghâl a.

An awmna in chhak a Building in lian tak mai, Luah tlâk loh an tih leh ṭhiah tûr an tih reng PWD- ho Office chu a chim alo ni a, chû in awmna lei chu a min tel bawk avângin a thlanga in tam tak chu a hnâwl chhe nual bawk a.

Tukverh aṭanga Ririni per chhuah rual khan an awmna in chu a chim zui ve nghal a, lei a thlen rual chuan an inchung rângva tawlh chuan a nghâwngah tak rawn tlâk in a lû chu a ât bung nghal hmawk a, a taksa pawh chu chawplehchilh in leiin a rawn chhilh hnan zui lehnghal.

Arel-a leh Noah te chu an ṭhutna aṭang chuan an tho kâng hman bîklo. An taksa hmuh tlak loh khawp in chhaklam Building ban tlû chuan a delh pêr chhe hneh hle mai.

Remruati leh Sentei te pawh chu an din lai tak anih avangin khatia an awmna in arawn chêt rual khan Arela te lamah an han tlân dawn ruai a, mahse an che hman bîk lo, Sente-i chu chhuat keh kârah tla lûtin in ban tlû tûr chuan thluak per chuaih khawp hian alo hlap a. Remruati- i pawh chu chhuat ah tlu bawk thlawp in inchung rel thingzai bung tlâ chuan a hnungzâng ah tak mai hian a rawn chhun tlang hmawk bawk a.

Basta Tlau, Jennifer-i leh Julie te pawh chu an him bîk lo, an mutna Sofa chawp chuan Building chim chuan a delh sâwp vek hlawm a.

Tichuan an zavai chuan Chhak lampang a Building chim leh leimin chuan an awmna in chawp chuan a hnâwl ta vek hlawm a...**

.."Ka duhlo, ka duhlo...." tiin Julie- chu a rawn ṭê chhuak chiam a,

An vâi mai chuan ka hau hian an rawn en  hû hlawm a,

Julie lah chuan abul a mû te pahnih Basta leh Jennifer-i te chu a sâwi nawk nawk a.

"Engtizia nge Julie"  tih pah hian Remruati leh Sentei chu rang fahran hian Julie bulah chuan an rawn tawlh hnâi a, Rîrini pawh chuan mak tih hnel deuh hian Julie- chu a en hau a,

"Enge ni a Julie.." Remruati chuan ngaihṭhatloh hmêl  deuh hian a ti a.

Julie chuan a mit hup pah hian, "Englo...Englo ania, mumang  râpthlak lutuk mai ka nei, mumang pawh a ni lo ang, ka muhil pawn ka hre lo." a ti bah niaih a.

"Mutthilhna hman pawh ala awmlo, Enge ni reng reng  a, U Julie," alam a phei pah chuan Ririni chuan alo ti ve bawk a.


Chutih lai chuan Noah- chuan, "Rîrin, Thingpui han lum pah nghâl la, K'u Arel-a pawh hian a in châk tawh ang chu, Thingpui dâi chî kan nei bawk silo a, a lum chî tal kan in mai loh te chuan" a rawn ti liam puat a.

Ririni chuan, "Aw, kan lum dawn nia, lawk aw, " tiin Julie bulhnai ah chuan a kal hnai a, a chal a te chu an khawih sak a.

Chutah Julie chuan mak tih hmel deuh a Noah- en pah hian, " A ni chiah, a ni chiah mai, a dik chiah a nih dawn hi.." a ti zui lehnghal a.

Ṭhut hnaih sauh pah hian Sentei chuan, Julie, engmaw i sawi awmzia chu, tinge a, i nuamsamlo ami." a ti a.

"Nuamsam e, englo ania, ka muhil hmanlo tunah khan," tiin Julie chuan a chhang nghal a.

Remruati chuan, "Mutthilhna hman pawh ani hleinem, i han mu deuh chiah anih kha, Enge ni a, han sawi chiang teh,"  Chîk deuh a Julie en rân pah hian a ti a.

Choka lama thingpui lum tûr a kal pah hian Ririni chuan, "Ni e, U Julie, han sawi teh, awm iti nuamlo alawm," alo ti ve bawk a.

"

Ririn-i pawh chu a tho thurh a, " K'u Arel-a chuan a pum a bum dâwn a ni maw" tih pah hian choka lamah chuan thingpui lum tur chuan a phei nghal a.

"Ka va in phih harh lawk ange" tiin hmanhmawh deuh hian Julie chu a tho vut a, Bathroom lamah a kal ta daih a.


Ririni thingpui lum zo ina Sitting Room-a  Noah leh Arel-a te Carrom Board pen te ṭhutna hnung a tukverh a khâr lai mêk chuan Julie chu a arawn phei ve leh chiah a, a hmai pawh chu a rawn hru hul lo lehnghal a,

An ṭhutna ngai a lo la ṭhut reng pah hian Remruati leh Sentei te chuan TV ah Fifty Shades Of Grey Movie-  anlo en mêk a.

 Chutih lai chuan Eng emaw ni hi a rawn ri deuh ṭhawt ṭhawt a, In chu a rawn nghing deuh der der a.

" Chu chu enge a, " Ririni chuan mak tih hmel deuh hian a ngaithla deuh hû a.

Chu veleh Julie chu a ṭe ṭhawt a, '' A dik chiah, Ka hmu lâwk, In hi a chim dâwn," tih leh Basta tlau leh Jennifer-i te mutui lai chu a phih tho lawp a.

"Chhuak nghal ang u, Tunah...Hmanhmawh rû... Tunah..tunah..!!"

Ṭê tengtung chung hian Basta leh Jennifer-i te chu a kai a, an ni lah chuan engmah hre ve hek lo, hmanhmawh deuh hian an tlân chhuak ve mai bawk a.

Midang ho pawh chuan ngaihṭhat loh hmel deuh hian an zui chhuak ve nghal vat a, TV pawh off lo leh kawngkhar pawh khâr ta chuanglo chuan an tlân chhuak ta dial hlawm a.

An tlân chhuak deuh chiah tih chuan awmna chhak a Building lianpui chu a ri ṭhawt a, a rawn chim thla zui nghâl a, leimin nen in pawlh in an tlânchhuahsan tâk in chu rawn delh in leimin chuan rapthlak tak mai hian a rawn hnâwl ri thla hum hum a, chutah mihring mangang ṭê rî tuarh tuarh thâwm in a zui lehnghal bawk a.

An ni erawh chu an him hlauh mai.

An tlân lai mek a chim a ni a, hrilhhai tak hian an hawilêt a, hmeichhe ho phei chuan rapthlak an tiin an sarâk chiam chiam hlawm a.

A mipa awmchhun pahnih  te pawh chu eng teh ual an ni bîklo, an hrilhhai in chu thil rapthlak tak chuan a ṭhâwng tak meuh meuh bawk tlat a...


Chu in chim leh leimin râpthlak tak thâwm chu a ring bawk a, a hria apiang anlo tlânkhâwm a, a him chin aṭang chuan khûr zawih zawih chung hian an hlîr ṭhap hlawm a.

Mi inkawt zau laiah hian anni ho chu thaw hlawp hlawp chung hian an ṭhu nguai hlawm a, hmeichhe ho phei chuan rapthlak antih êm avangin leh an hlauh êm avangin an hawichhuak ngamlo hrim hrim mai.

Julie erawh chu a ṭap zawih zawih a, An kiang vela mipui lo pungkhawm te pawh chuan an ni ho chu mak an tih hmel hlawm kher mai..


DATE :12. 5. 2013.

Inrinni tûk zîng dâr thum vêl a Laipuitlang leimin chuan mihring chênna in Sâwmlehpakhat bâkah motor Sâwmlehparuk ati chhia a.
Nunna chân hi hriattheih chinah mî Sâwmlehpahnih lai an ni.

Khâ leimin leh in chim kha PWD SDO Office niin, chhâwng thum lai a ni a, luah ngamloh leh ṭhiah tûr a anlo tih tawh sâ kha a ni a.

Mahse an ṭhiah hmâ in a chim ta a nih kha...



 .
(CHAPTER - 2)..



Chu Leimin râpthlak tak avang chuan mû leh mal pawh an neilo, an vâi mai chuan thlaphâng tak mai hian an chu thil thleng mêk chu an thlîr ṭhap mai hlawm a.

"Julie, Julie"..
ti a Haylor-ina Julie a koh vak vak tâk ah chuan rang tak mai hian an rawn tlânkhâwm thuai a,
"Arel, Julie- hi, Julie- hi..."
Chutih lai chuan Julie- chu biaktheiloh hian a zawi vek a, Arel-an a hming a kova a sâwi bawrh bawrh lai chuan
Noah chuan," A ṭhâwng lutuk ani ngei ang, u Arel, tirû inin lamah i chhuk vat mai teh ang u, midang ho pawh hi buaipui ngai an awm leh hlauh ange." alo ti a. Jennifer-i pawh chuan, "Ni e, helai hmun hi i chhuahsan vat teh ang u, a râpthlâk ê mai," tiin arawn tuihnih ve bawk a.

Tichuan mipui zi nuai nuai kârah chuan Arel-a chuan Julie chu pawmin an chhuak ta hlawm a.

........................................................................................................................ .........................




.Chumi zán, a tûk zîng ani zâwk mah tawh âwm e, Arela- te in, Ramthar ah chuan an riakkhâwm ta ringawt a.


Kâr aliam a, Thlâ aliam a, Kum pawh aliam zel a, Chûng ṭhianho te pawh chu anmahni hnâ ṭheuh ah an buai leh tawh in an thil tawn râpthlâk tak pawh chu anlo theihnghilh hlawm leh tawh a.

Abbra Ririn-i pawh chu Singapore lamah a kal leh tawh in, Basta Tlau pawh a hnathawhna Delhi lamah a kalna a rei leh tawh.

Chutiangin Haylor-i pawh in azirna lam zawmin Agartala lama kal tûrin a inbuatsaih leh mêk bawk a.


( Date : 11. 05. 2015.
Haugang, SINGAPORE)

.Rîrini hi Singapore a a awmna ala reilo angreng viau nâ in tuna a awmna te hi chu an fel khawp a, rin aiin a vânnei khawp mai. Singapore-a awm tamtak te hi chu an awmna te nen eng emaw buaina an nei duh khawp a, in report ngai hial pawh aj awm zeuh zeuh rêng a nih kha.

Mahse Rîrini- hi chu a vânneiin, a awmna te pawh hian fâ ang maiin an en hial a ni a, a kum aia a rilru puitling vâng pawh a ni pakhat ang.

 Singapore, Haugang, Pasir, 51 Street, a awm an ni a, An in luah hi sawrkâr in ang deuh leh Hotel ang deuh chi a luahhawh ang hi a ni a, a Building hi Block hrang hrangin an ṭhen a, Rîrini te hi chu Block 554- na ah an awm thung a.

 An awmna hnunglam piah deuh, an compound pâwn chin chu kawngpui pangngai Pasir Ris Street in a tan tlang a, lehlam ah erawh Building pakhat awm in, a piah lawk ah tuichhe paihna ang deuh hi kâwr 12feet vêl a thûk sei angreng tak a awm a, a tui tak erawh chu a tam ngai meuhlo, 3 feet vêl chauh arawn chîm tlângpui.

Chu luikawr chungah chuan Lei zâu vaklo a in dawh a, chumi piahlam ah chuan phûl hmun leh Pasir Ris Town Park, a awm thung.

Tin, Chumi ep piah deuh ah chyan kawngpui tlangin a piah lawk ah Tampines Eco Green- a awm bawk. An awmna lai hi a nuam in a thawveng angreng hle a, an Building luah bul lawk lawk ah chuan thingkung lian tak tak hi a awm nual bawk a.

Rírini hnâ ber chu an putar ber enkawl kha a ni mai a, chu pawh chutianga enkawl êm êm a ngailo lehnghal. Chu putar chu Akong- tiin an ko mai a, an pitar pawh Ahma- ti a kovin, Anmahni enkawltu nûpa an awm bawk a, tin tlangval fel tak mai, Kevin-a a awm ve bawk a, chu chu anmahni ṭawngin Koko- tiin Ririni hian a ko mai a, chu chu û mipa kohna a ni a, Kevin ti in an ko bawk, Ririni pawh hi Rini tiin an ko ve bawk.

Laipuitlâng leimin aṭangin an dam chhuak a, chumi aṭang chuan hun alam a, kum hial alo vei a, khâ hun râpthlak tak aṭang khan an ni ho zîngah nunna chân awmlo mahse an nitin nun/ thiltih ah erawh chuan eng emaw buaina an tâwk zauh zauh thung a, chu erawh thil thleng pangngai leh nunphung pangngai niawm tak a ni, mahse....

 An nitin thiltih ang in, Breakfast ei hmâ a Washing Machine a a thawmhnaw sûk chu an ei leh inna a tihfel zawh in tukverh a pho tûrin bucket ah a thun sawk sawk a.

 Bucket thum lai a nih avângin an tlangval Kevin- chuan a rawn khai pui a, an pahnih chuan puan pho tûr chuan an phei a. An puanpho na hi a mak angreng khawp a, Tukverh hi chu namtawlh theih ang chi kha a ni a,

Chu tukverh pâwnlam bangah chuan Pipe an vuah thliah thliah a, chu pipe chu ti pawp in, insûk sâ zârna tûr mau pum sei tak tak hi Pipe kua ah chuan an thun chhâwng leh a, tichuan mâu ah chuan thawmhnaw clip sa vek in an thil lût leh ṭhin.

He an puanpho dan hi a hlauhawm hle a, Tukverh aṭanga tla palh tam tak an awm tawh avangin Ririn-i pawh hi a chhûngte hian a puanpho apiang hian fîmkhur tûrin an chah ziah a, tukverh pâwnlamah phei chuan chhuah an phallo bur a, chuvangin tukverh chhunglam aṭangin a zâr mai ṭhin. Hemi tûk pawh hian fîmkhur tak in thawmhnaw a zâr malh malh a, a zâr zo ṭêp tih chuan thli a thãwt êm avângin a thawmhnaw zâr chu a che dul dul a.

 Chutah thâwklehkhat ah eng emawni hi a ri tuarh a, a bul tukverh a ṭhû Kevin-a chuan, "Rini- khâ .. . mau kha, a dawk dâwn nia, ka lo siam ang, lo va lût rawh inchhûngah.." a tih rual chiah chuan an an thawmhnaw zârna mau chu Pipe- aṭang chuan a dawk chhuak zawk a, an thawmhnaw zâr ho chuan Ririni chu a rawn tlâk hnan a, ani Ririni tukverh tlânga ding chu alo in ring hman silo.

 Tukverh tlâng chu rap pial in an thil zârna mâu nen, an thawmhnaw zâr nen lam chuan tukverh aṭang chuan an tla chhuak ta vawn vawn a. Kevin-a pawh chu a tla teuh kher mai.

Thâwklehkhat a thleng thut anih avângin a hamhaih kher mai. Ririni chu an in hnuai kawngpui ah chuan a thawmhnaw sûk sa nen chuan a tla thúm dawt a, A chhîp vit zâwng a tla a nih avângin a hmêl erawh hmuh tlâk a awm lo.

Lei a thlen rualin a ri rawp a, A luruh phei chu a sawh keh nasa kher mai, A thluak te leh thisen te chu kawngpui ah te, a thawmhnaw sûk sa ah te chuan a per darh nuaih hlawm a.

 A taksa pawh a chhe nasa in a bân dinglam ruh phei chu a tlãkna a sân êm avângin a kiu aṭang hian a rawn lâwr vûn mai lehnghal a.

A chhûngte mangang ṭe rî leh an thâwm hre phâk an ṭhenawm hnai ami te bâk ah kawngpui a lo awm te chuan râng tak hian an buaipui nghal a, a nunna chhan theih ni tawhlo mahse ṭanpui tu nih inchuh ang mai hian an buaipui sawk sawk hlawm a. Ririni hian a thawnthu ziah chhiartu leh hlutsak tû a ngah êm avângin ui tu pawh a ngah kher mai.

An Building luahlai hi a sân êm avângin tukverh hawn hi chuan thlî hi chu a thaw nasa ve pangngai reng a, ngaiah an nei mai tawh zawk.

Khatia thlî a thãwt záwng khan an thawmhnaw zâr rit tak mai khan a zârna mâu sei kha a uai a, a kum têl a anlo hman tawh pipe kua a mâu inrawlh lût kha a chêt reng avângin mau kha a dawk ta a ni a, chu chu thil thleng reng reng leh fîmkhur a ngaihna tak pawh chu a ni.


A thawnthu TEDOY - a ziah tâwp hnû lawk leh A thawnthu Hit tak mai, Night Change- Season hnihna a buaipui lai mêk a ni a, mahse Season hnihna erawh chhiar tûr a awm tawh ngai dawnlo a ni ..



(CHAPTER - 3)..


Abbra Ririni boral thû chu a thang chak kher mai, Singapore a awm a nih avangin aruang pawh chu Mizorama kalpui dân turah a buaithlak hle a, Thil tihfel neuh neuh ngai a lo tam zêk aniang chu, chawlhkâr hnih pumhlum tawp mai Morgue- (ruang dahna in. CR) reh tak maiah a awm hial mai lehnghal a.

 A ruang chu an khua Ngopa lama hâwnpui tûr nimahse Singapore aṭangin Flight in Goa- ah an rawn thlawhpui phawt a, Chumi hnuah Lêngpui Airport- ah an rawn thlen leh chauh a ni. Goa Mizo Welfare te phei chuan aruang an lo hmuak in anlo buaipui nasa hle a, Aizawl lam thleng a a ruang rawn zui haw te pawh an awm hial a ni, hei hian ramdang ah pawh mizo chu mizo kan nihna ati lang chiang in mizo tlâwmngaihna hi a la nung reng a ni tih a lantir hle in a hriat.

 Lengpui Airport ah pawh ruang hmuak an tam kher mai, Social media lam aṭanga amah hre tu leh a thuziah âtchilh tu tam tak te leh a chhûng leh khat ten lungchhe tak in an lo hmuak a, a lehlam zâwnga ngaihtuah phei chuan ropui tak a ni.


.An ṭhiannu leh an sangâwi zâwnpui boral thu chuan a thu ziahpui ṭhinte pawh chu a ṭhâwng hle a, an thuziak an pholan na ber Facebook Group pakhat Story Fb creator J.Zahngaia ho in ruang hmuak tûr chuan an kal ve ta hlawm a.

 Lengpui mai bâkah an khua Ngopa lam thlengin a thuziahpui ṭhian tam zâwk chuan ruang chu zuiin an ṭâwiawm ve zel a...


DATE : 27. 5. 2015 (Night) :

Ar el- an motor thawhchhuahpuiin Noah nen, Jennifer leh Julie bâkah an ṭhian hmeichhe pakhat te nen ruang zui chuan a zân a zân in Ngopa lam an pan ve a.

Ririni ruang hi Zîng lama Singapore aṭanga lo thlawhchhuahpui nimahsela, Goa-ah Mizo Welfare leh Mizo Zirlaiten a thlahna te nei a an lo chelh khawtlai bawk avângin Aizawl an rawn thlenpui leh meuh chuan khua a tlai tawh hle a ni. Group Admin J.Zahngaia leh Pasalṭha thawnthu ziak ṭhin Hriat te-a te erawh chu Two Wheeler a inzuiin Ar el-a te hma an hruai thung a. Chutianga eng engemaw sawi a zânthim hnuaia an tlân mêk lai chuan Ar el-a te motor ke chu a puncture hlauh mai a.

................................. ........................... .............................................................
........................  ....................................


A hmá nî a a handyman zu ruiin thiam leh thiamlova an Motor a lo khalh chhuah ringawt avangin a break a ti chianglo a, anmahni ina anthiamna zawng zawng sâwmkhâwm a an beih fê hnu ah pawh duh ang zân chu ala ni thei chuanglo, chutichuan workshop hnâivâi a awm mai bawk si lo a, chuvangin chiang leh chiang lo chungin Ngopa an rawn inkhalh thleng a.

Chalân chungchânga a motor neitu te nen a an in tihthiamloh avâng leh an buhfai phurh hralh rûk an lo report avangin chu Truck Driver- chu a thinrimin, Aizawl thlen thuai thuai a in sawifel dân  tûr ringawt ngaihtuahin a hmanhlel a.

Chutih lai kârah a handyman zei lo lutuk ina an Motor a lo khalh chhuak ringawt chu a thinur tâwp thei lo bawk.

Ngopa an rawn thlen hian khua a thim ruai tawh a, Hotel ah chaw ei sawk sawk in an rawn chhuak lehnghal a, Ngopa a an siamtîr chuan zân riah angai dawn si a, chuvangin chumi zân chuan tlânchhuah a, a tûk khaw êng a khaw danga siam tîr law law a rilrûk zawk a.

 Zân tlân ta se, chhuk zâwng deuh char char a nih bawk dâwn avângin, load lâ nimahse a huphurh lutuk lêm lova.

Ngopa an rawn chhuahsan fel hnû lawk, Ngopa aṭanga 3Km báwr vel a hlá, Ngopa Petrol Filling Station an tlân pêl chiah tih chuan rin ang ngeiin an motor break chu a rawn chianglo leh ta tial tial a.

Mahse Driver Senior a ni bawk a, motor zeizia chu a man rang kher mai,  chiai hauh lo in tlêm tlêmin a break a, a break nasa duh lo a.

A tîr ah chuan Jâm kam a an tihdin mai thei a in ring a, mahsela an motor chu a ruak ang ngawt chu a ni si lo, buhfai an phur khat tlat si mai sî a.

Tichuan mangang angreng tak chungin an tlân ta zêl a, ruang phur motor Morgue Van- leh a zuitu motor tê tlêm azâwng tihloh chu chumi zân tlai chuan lîrthei dang tawh an neih meuh loh avâng chuan Driver chu a lâwm angreng hlê a.

Mahse a break mai a ni ta lo, achângin a steering chu a rawn sak leh deuh tlut ṭhin a, an tlân rei tial tial a, an in phurh rit ang hû in an tlân muang thei ta lo tawp mai.

.............................. ..................................


"A va han hun lo ṭhin tak ém, " Motor tih din pah hian Ar el-a chuan  a ti a.
Noah chuan, "Kan thlêng ṭêp tawhin ka hria, Tubeless- a ni tho a ni lâwm ni" tiin a lo chhâng a.

Ar el-a chuan rûm hak pah hian, ' Ni nâng le, Tube ngai chî alawm, a ke spare ka pái tho a, thlâk lawk mai ang," a ti a, Motor kawngkhâr hawn leh pâwn a chhuah a rual nghal a.
Noah- pawh chu ihê lovin a chhuak zui ve nghâl a.

"Kan lo chhuak ve dâwn em?" Julie- ina tih rual chuan, Noah bawk chuan, "Aw, lo chhuak rawh u, In rit lutuk ang." a lo ti var a.
An motor ke hmâ ding lampang chuan perek a rap chu lo niin, Ar el-a chuan motor ke thêp chu a check vel luam a.

"Noah- enteh, perek anih hi, hei kawng a hi perek dang pawh ala awm nual mai, tû fa lubâwk chuan nge maw kawnglai a perek lo bun rêng rêng ni, tûl lo leh lutuk," tih pah in motor hnung lamah a ke spare la tur in a phei nghal a.

Noah- pawh chuan uluk hmêl deuh a motor ke chhia thlêk pah hian arawn ṭhutchilh a,  Ar el-a motor ke spare leh jack rawn keng phei hnenah chuan,
" K'u Ar el, Perek chauh pawh a ni lo, hei thingzai nawi(phuai) te pawh a baw deuh a nih hi, tu emaw chuan kawngpuiah tawlailîr an siam a nih ngei dawn hi, Lo a feh nan emaw, ram kal nan emaw tawlailîr an hmang aniang," zângkhâi ang reng deuh hian a lo ti a..

An hmeichhe hruai pathum te pawh chuan motor chhuahsanin kawngsîr fâi lai deuh ah hian eng eng emaw sawi pahin Ar el-a te motor ke buaipui chu an lo nghâk ve tawp a.
Ar el- an a Motor ke a thlawn mêk lai chuan Noah chuan,
"U Ar el-a chû, kawngsîr deuh ah hian park  ṭhat âwm tak hi a nia, kan siam kawnglai deuh a nih hi," a ti a.

" Ka zo a ni mai, a ke chhia hi lo va dah la,"
A ke spare chu Ar el-a chuan a vuah zui nghal a.
Motor hnung lama a ke chhia dah tûr a Noah- phei leh rual chiah chuan an hmalam hla vak lo kâwi aṭang chuan Truck pakhat hi a rawn lang ve chiah a, a tlân chak angreng khawp lehnghal.

Ar el-a chuan chu Truck chu a melh zauh a, a ke vuah lai chu a buaipui zawm leh daih a.
Truck horn chu a rawn ri ruai ruai a, hriat fiah hleihtheih loh a aû ri leh motor bang bêng rî inpawlh kâr a an piah lawk aṭanga an hmeichhe hruai ten a,

" U Ar el, u Ar el.."  ti a an rawn auh vak vak rual chuan an hawi chhuak a.

A hmâ lawk feet 20 vêl a hnâi ah chuan Truck awmze nei lo fahran a chak mangkhêng a rawn tlân chu a hmu phê ruai a, leh(!) pawh ti hman lo lêk chuan kawng thlanglam ah a zuang thla nghal a.

Chumi rual deuhthaw chuan a ri hrâwk a, a ri deuh rum rum a, hmeichhe ho chu mangang takin an ṭê nghal chêl chûl a.

Thil thleng thut anih bawk avâng chuan kawng thlang lam âwih ah chuan a zuang thla liam teuh ngei mai.

Chianglo ruai a tho chhuak in a hawikual a.
An Motor bang chu a khuar in a râng deuh ruai a, a hma a a dinna aṭanga feet chanve vêl hian kawng chhak lamah a insâwn deuh dáwrh lehnghal.
Hmeichhe ho chu kawngthlang lamah chuan khûr deuh hlawk hlawk hian leiah an lo ṭhu deuh niaih a.
A beng chu a kiu deuh vûng vûng mai.
Kawngpuiah chuan thisen a baw phei nuaih a, eng emaw ni hi a pherh deuh niaih bawk a.

An piah lawk feet 50 vel, kawng chhak lampang hawi vûng hian Truck a lo ding a, an buhfai bag phurh te chu kawngpui ah chuan a baw neih nuaih a.

Eng emaw chen chutia hrilhhai tak a kawngpui a a din reng lai chuan Aizawl lam aṭanga lo kal Private Car pahnih leh Sumo pakhat hian an awmna lai chu an rawn thleng ve chiah a.

Truck chhûng aṭang chuan mangang tak mai hian an rawn au chhuak bawk a.

Chutiang thil thleng râpthlak tak mai avang chuan chûng motor lo kal thar te pawh chu an ding chawt a, rang takin an rawn chhuak khâwm nghal a.

A ṭhen chuan Truck ami te chu an buaipui a, a ṭhen chuan Hmeichhe ho leh Ar ela- te chu an buaipui hlawm bawk a.

Thil awmdan pawh zâwt sa teh mahse fumfê a chhâng thei pawh an awm meuh lo.
"Khawnge...khawnge Noah, Noah- hi khawnge." tiin Ar ela-a chu  chianglo ruai hian a phun deuh sup a.

Hmeichhe ho ṭap leh la khûr zawih zawih te chu mî lo kal thar te chuan motor ah an hruailût hlawm a, Ar ela- pawh chu awmze nei lova a bân vai ruai ruaiin nikhaw hre lovin a awm zui ve leh ta a.

A harhchhuah leh meuh chuan Ngopa Community Health Centre- khum nuam fahran lo ah hian a lo mu dêr tawh a.
A lû chu ala hai bûr mai. Thei leh thei lovin a in beng kâng a, a piahlawk khum ah chuan a ṭhian hmeichhia te chu dawldâng tak mai hian an lo mu bêm hlawm a.
Mipui lah chu an tam angreng zêk lehnghal.


*Khatia an hma hruai a Ngaia leh Hriat Tea- two wheeler-a kal te khan zun zung tûr leh Ar el-a te lo nghah pah in an eitûr pâi te an lo ei in an lo in a. Dârkâr chanve vêl lai chu an lo nghak hial ang.
 Mahsela, an rawn thlen har êm avâng leh ruang phur Motor ber a kal tawh avângin muangchânga kal tûrin an in buatsaih leh ta a.

A eitûr pâina, a hnathawh rackshack, tih pawh tifai lova hmanhmawh tak a a ah chhuah chu Hriat Te-a chuan a aruah tawh tho avâng chuan lip in a thing fâi a.
A ni thing mistiri na ngang chuan thil nawi ah a lo nei nual lehnghal.
A perek hman bâng leh a thingzai nawi rackshack  mawng kil a awm te chu a thing chhuak nawlh nawlh hlawm a.
Tichuan chak fahran lo hian Ruang phur motor ûm chuan an tlân chhuak leh ta a.
Heta a rackshack bal a tihfaina, kawngpui a perek leh phuai tlâ kha Ar el-a te khan an liam fel deuh tih in an rawn rap leh chiah a, perek rah avâng chuan an motor kê a puncture ta rêng a nih kha.*


.Noah- ruang chu Ririni- ruang phur tû bawk khân a zân la la in Aizawl lamah a phur kîr lehnghal a.
Hriat Te-a leh Ngaia- te pawh chu an awmrei lo khawp mai, a tûk ruang vûi zawh ah, a tlai a tlaiin an hâw lehnghal a.
Ar el-a leh hmeichhe ho erawh chu nithum lai an châm thung a, an motor kha a hmêlhem viau nâ in a bang vêl bâk tih loh chu a lo chhe lo hlauh a.
Mahse khatiang thil râpthlak leh thinṭhâwng an tawn avâng khan anla pangngai lo nasa hle a.

Ar el-a phei chu motor la khalh thei chi zia zâng ala nih loh avangin midang ho nen chuan Sumo in an thlah ta ngawt a.
An motor erawh midangin an rawn khalh hâw sak thung a.


...Khatia aû ri a hriat a a hawi chhuah khân Truck break fail tlân chak lutuk khân a rawn su ṭêp a ni a.
A hmuh rual rual a kawngthlang lam a a zuanthlâk avâng khan Truck khân Ar el-a kha arawn su lo chauh hi a ni a.
Khatiang thâwm ri a hriat rual khân motor hnunglam a motor ke chhia dah mêk Noah-chu kawngpui lâi lam, an motor thlanglam ah chuan rang deuh hian a rawn pên chhuak a.
Truck Driver khân theihtâwp a a motor control ve avângin an motor chu hma zâwng a rawn su lovin, a hrûl chiah chiah ah a rawn khalh phei a ni a.

Chuvangin chutia an motor thlanglam a  Noah- rawn pên chhuak chiah chu na tak mai hian a rawn hnáwl phei a, a ke hma lam chuan a lû chu hmuhtlâk loh khawp a chîl pêr in, a ke hnung chuan a âwm chu a rawn chîl zui leh ta kha a ni a.

A taksa hmuh tlâk rêng rêng awm lovin a thluak leh sam ṭhenkhat te chu Truck ke ah chuan a bet nuaih a, a thisen te phei chu motor bang leh hnuai bãk ah kawngpui ah te chuan a tling in a per nasa kher mai...


Theihtâwp tak meuh meuh chhuahin kawngthlanga tlân liam ai chuan tiin a steering - chu a herh vak a, tichuan kawngchhak, kopang chu nasa fahran in an su zui tâ a ni.

An pahnih in, a Handyman nen chuan ngaihtuahawm lutuk chu an ni lo nâ in, an na thawkhat ve tho mai....



(CHAPTER - 4)

.
Cable TV LPS leh Zonet ten a chanchinthar leh Nitin chanchinbu tên a Ngopa dâi a motor accident thu an puan a, an ziah kûr nguai lai chuan Ar ela te ṭhianho erawh chu tawhsual an tawh aṭang khân inah anla tawmim reng a, khatiang thil râpthlak leh thinṭhâwng an tawn aṭang khân kâr khat vêl lai chu ngai an awh thei lo hial a.

An ṭhianpa Noah- vûina ah pawh ankal theihloh avâng chuan Julie- te chuan nuamlo an ti ang reng hle a, amah tak phei chuan khatiang thil an tawn aṭang phei kha chuan phone phei chu a khawih peih tawh lo hial a, kâr khat aliam meuh chuan hmuh theihin a taksa ina a tawrh zia a alang chhuak hial.

An thil tawn kha engtik laipawhin a ngaihtuah a, zânah ni se a muhil thei ngai lo, a mutthilh ve chhunah pawh a mumang ah thil râpthlak tak tak a hmu reng a, amah phei chuan depression a nei emaw a ti hial a, mahse in check up tûr pawhin a vâkchhuak peih chuang si lo.

.. Khatia Noah- boral tâ vûina ah khan Hriat Te a leh Ngaia chauh an ṭhian ho zîngah chuan an va lang ve hman a, a ni pawh Social network lam a hming chher khawp hial a western ho thu leh hla letling nasa leh thiam tak mai a nih avângin hriatloh lam aṭangin ui tu leh  sûntu a lo ngah zêk a. ...


..... Zanlama a mutṭhat theihloh avang chuan a tho tlai kher mai,  lu na bûrin zîng lam dâr 9:40 vel ah a tho chhuak chauh va.

Amaha a  a awm avâng chuan a tûkṭhuan rawngbâwl peih lovin Noodles- a chhûm leh ringawt a.

Chutiang a TV en pah a a tûkṭhuan Noodles - a ei mêk lai chuan Doorbell a rawn ri ral ral ral a.

Thawh pawh tho peih lo in a ṭhuthmun aṭang chuan lût tûrin a âu ringawt a.

Kawngkhar arawn inhawng a, inchhûnga rawn pên luh pah chuan Ngaia chuan, " Julie chu, engtizia nge,  phone pawh i chhâng thei si lo, ngaih iti ṭha lo hman alawm le," a ti a.

"Ekhai, nangni maw..." mak tih hmel zet hian Julie chuan a lo ti hau a. Ngaia bâkah Ar ela, Jennifer leh Sêntei te chu
nui var var chung hian an rawn inzui lût bawk a.

"A rem rem ah khan lo ṭhu tawp rawh u, ka tho tlai lutuk a," Bowl a a noodles- eilai lekchhuah pah hian, " Hei hi ka zîng châw ve a nih hi, mahni chauh a eitur han bâwl vak hi chu a ninawm ṭhin."  tiin, a tho zui nghal a.

A thil ei lai chu va dah ṭha in an bulah chuan arawn ṭhu ve leh a.

" Engti zia a..in vai vai a.."

Jennifer-i chuan, " Eng lo ania, U Noah vûina ah khan kan tel ve thei si lo a, hei U ngaia te hian va râl ve ila  an tia, keipawh nuamsamlo chungin ka rawn chhuak anih hi. " a lo ti var a.

Ar ela-a pawh chuan lo tuihnih ve in, " Ni e, keini ber kan lang thei lo kha a zahthlâk lek lek in ka hria, kal tûr âwm ngawih ngawih kan ni ve a." a  lo ti ve bawk a.

Julie chuan, " Ni e, keipawh ka lo ngaihtuah a, mahse khami hnu aṭang khan kei hi ka nuamsam thei meuh lo a,  inah hian ka tawm ngar ngar mai a nia, " tiin a chhâng a.

A hma zâwn a Ngaia bula ṭhu Sêntei nuih sak pah hian, " nang hi..Singapore-ah ila awm daih emaw tia, ..engtik ah nge..." a ṭawng lai chu Sêntei chuan lo pawtchat in,

"Nia, eng lo... Ririni ruang zuiin ka rawn haw ve zawk alawm, ka Aunty- ten an phal hlauh a, Lêngpui Airport ah pawh khân ka hmu che u a, mahse kan hun nei dán kha a buaithlâk êm a.."  a lo ti a.

" Tak takin, Julie, insiam la, i va kal vat teh ang u, kan tlai lutuk chuan amawi lo ange,.." Ngaia chuan a lo ti a.

Julie pawh chu a insiam sawk sawk a, Ar ela - motor bawk chuan an in phurchhuak leh ta hlawm a.

Chutiang chuan an ṭhianpa Noah- râlna te chu tluang takin an va nei a, an rilru erawh chuan kha chêtsualna râpthlâk tak mai kha an hre chhuak thar leh hlawm a, an hâw lam chu an ngui deuh ruai hlawm a.

Julie an thlah tûr Khatla kâwn an tlân mek lai chuan Jennifer-i chuan,

"U Julie- ina thingpui hmeh tûr lei ila, " a ti a.
Tichuan motor tâwt tak kâr ah rem leh rem lovin Ar ela-a chuan a car chu dahin, Jennifer-i leh Sêntei chu thingpui hmeh lei tûr chuan an chhuak vat a.

Jennifer-i te an chhuah hnu lawk chuan Julie chu tukverh ah hawichhuakin thli thaw chu a in chhêm tîr a, a rûk tak chuan Motor seat hmalama ṭhu te pahnih Ar ela leh Ngaia- te hla play ring lutuk chu a ning kher mai, a lû a ti nâ in a rît lûk in a hria.

Chutihlai akârah an kiang vêl a mipui ṭawng ri leh motor ri te chu a bengah chuan a ri hum hum in a hria a.
Dik tak chuan amah pawh chu a in hre deuh tho mai, a zân mu tlêm lutuk leh thil ei tlêm avânga a taksa chaklo chu.

An piah lawk, motor kawngsîr lehlam a hawkers- nghâktû nuthau pui mai bul a a fapa niawm tak, naupang kum thum emaw kum li mi vêl ina a ball( football ) lian vak lo kawngpui a ati sawt tlauh tlauh rî chu a bengah chuan a rawn ri tlut tlut a, chutihlai kâr a dâwr kawngkhâr thîr pawhtawlh chi an khâr ri leh motor tlan thawm te chuan a lu a ti hai kher mai.

Rûm hak pah hian seat nghenchhan chu a nghéng chawrh a.

"An va rei tak e aw, ka lû a na asin le," zâwi fahran hian a ti chhuak a.

Ar ela chuan, " Saw an lo chhuak chiah alawm,"  a lo ti vat a.

Ngaia pawh chuan motor tukverh a dahchhuah pah hian, "Tui deuh lo lei teh se, ril aṭam tawh alawm le," tep chuap chuap pah hian a lo ti zui ve bawk a.


Chutih lai chuan Kawngpui lehlam sîr a  naupang ball khâl chuan a ball chu kawngpui ah a lo ti lîr a. Chu a ball, kawngpui a lîr phei lãk tum chuan chu naupang chu kawngpui ah chuan arawn tlân phei a, ball chu a rawn ûm a.

Motor veivâk tam nên, Chutia thingpui hmeh tûr chhang an lei zo dâwr aṭanga an rawn chhuak deuh chiah chuan kawngpui sîr lehlam a naupang tê ina kawngpui a ball a ûm chu an hmu a.

Chu veleh, Jennifer-i chuan an thil lei, polythene-a akhai lai chu Sentei pe in rang tak hian naupang lamah chuan a tlân phei a.

Motor tlân reh lai tak chuan Ball chu chhar in Naupangte pawh chu a pawm nawlh a.

Chutia naupang a pawm rual deuhthaw chuan Sente- ina a auh rî hria in a hawilêt a.

A hawilêt rual chiah chuan Sentei- chuan a rawn nem sawn vak a, kawngsîr ah chuan a naupang pawmlai nen chuan an bawk dün thlawp lehnghal.

Mak ti leh hrilhhai deuh chung hian a rawn hawi chhuak a, chumi rual chiah chuan an bul lawk ah hian 207 motor hi  a rawn ding ri hrâwk a.


Sentei- lam a hawi chiah tih chuan, chu an bul a 207motor ding chung aṭang chuan Iron rod- tam fahran mai hi a rawn lawr chhuak thut a, Sentei- lû tak chu a rawn chhun tlang hmuk a.

Sentei hmâi chu hmuh tlâk reng reng a awm lo, chu iron rod têl khat hmâwr chuan a hmai chu an rawn chhun tlang a, amah chu a tlu thei chuang silo, alû a Iron rod- ina a chhun tlang avang chuan   amah chu tlu thei si lovin a ding reng a, a in khâi deuh hnuang a.

A thisen chu motor hma leh dârthlalang bâkah kawngpui ah te chuan a per nuaih a, a lû aṭang chuan a rawn chik tur tur bawk a. A thawmhnaw te chu thisen chuan a bual hneh kher mai.

Jennifer-i chu a râk ṭhawt a, a hmai leh kawr ah te chuan Thisen chuan a per nuaih bawk si avang chuan a khûr zawih zawih a.

Amah chauh pawh a ni lo, chulai hmun a mihring veivâk te pawh chu an ṭê nasa kher mai.

An kianga mi te chuan Jennifer-i chu an rawn kâitho in an rawn bawihsawm vat a.

Chutih lai chuan hrilhhai hmêl tak hian Ngaia te pathum pawh chu an rawn tlân phei ve nghal a.

Julie phei chu nasa tak a ṭap leh ṭe a, Sentei ko vak vak chung hian arawn tlân phei a, Chutia Iron Rod- ina a thil tlang, kawngpui laia a ṭhiannu ruang khawngaihthlâk tak chu kuah tumin a a pan a,

Mahse Ar ela chuan lo dangin, a lo pawmbet vat a, Ngai erawh chu Jennifer-i lamah chuan a tlân phei zui nghal a.

Ar ela pawmbeh na lak ata chu talchhuah a tum nasa kher mai, ring deuh deuh hian a ṭe ruai bawk a.

Ar ela- an a, " A tawk tawh e, chhan hman a ni tawh lo, insum hram hram rawh,"  ti a a hnem hnu chuan a zawi hnawk a, nikhawhre lovin a awm zui leh ta a.

An kiang hnai a mi te chuan lo puiin, motor chhungah chuan Julie chu an zâwn lût a.

Chutih lai chuan Police te pawh lo thlengin ruang chu an rawn buaipui nghal a. Mipui engmah tithei hlei lo,  hâwk dâk tak tak te chu thlalak phêt tumin an lo phi buai ve sek hlawm a, ṭanpui emaw bawihsâwm ai chuan chu thil râpthlâk tak mai thlalak tum chu an tam zawk ta hial ve ang.

Ngaia pawh chuan Jennifer-i nikhawhre mang lo chu a rawn kaihkuah phei a...


*Khatia Jennifer-in a naupang a bul a thlen chiah khân Bungkawn lam aṭanga 207 motor, iron rod phur, chak tak a rawn tlân chu a hmu a, Jennifer-i te khan kawngpui an kân hman dawn lo a a hriat avangin a ko vak a, a namsawn hman lâwng maw tiin a va tlân ve ta nghal a.

A namsawn rual khan 207 pawh chu a ding ve nghal a, mahse chutia a din thut avang chuan a hnung a iron rod an phurh, a chung thleng a rawn lawr chu an phuar ngheh tawk loh avangin hmalam ah arawn tawlh thut a, chu chuan Sentei, motor hmazawn tak a ding chu a lû ah tak a rawn chhun ta a nih kha.*. .




..
(CHAPTER - 5)..


"Julie inah khan lo zu kal mai rawh u, lo buaipui mai rawh," Ngaia chuan motor hnung seat a Jennifer-i ṭhut mut tír pah chuan Ar ela- hnenah chuan a sawi a.

Sentei- lam hawi pah chuan," Saw Police ho pawh an rawn thleng tawh a lawm, ka va sawifel ange, ka lo buaipui mai ang, duhleh ka tlai viau loh chuan ka rawn kal dawn nia, lo zu chhuk pui phawt mai rawh, an ngaihtuahawm emai,"  tiin a tuihnih leh a.

Rilru hah hmel deuh a rûm hak pah hian motor ah chuan Ar ela chu a lût a,
"Anih phawt le, a va han pawi tak e aw, kan vânduaina akal tluang kher mai,"
ti chung a motor tinung in Julie- in lam pan chuan an tlân chhuak ta nghal a.

Bungkawn a Julie-in luah an thlen veleh Ar ela chuan rang takin Jennifer-i thawmhnaw thisen kai nuai chu thlâk sakin ṭhutthlengah chuan a mut tîr a.

Julie erawh an tlân chhûng khân a lo harh leh hman tawh avângin in phihfai tûrin bathroom lamah a lût tlang nghal daih a.

Ar ela pawh chu a chau in a rilru a buai ve kher mai, han tih hmasak tur leh ṭawng chhuah dân tur thlengin a buai vêp vek ni berin a hriat.

Fridge-a tuivawt chu la in Jennifer-i mutna ṭhutthleng nghêng chuan chhuatah a ṭhu deuh nuaih a, eng emaw ngaihtuah niawm tak a a melh ngai melh vung vung chung hian tui chu tlem tlemin a in zauh zauh a.

Julie- bathroom awm chu a rei kher mai, a tîr a a buai tehreng nen rin aiin a rilru a harhfîm hma ang reng hle a. A lu hai avângin bathroom chhuat ah chuan rei fe chu a ṭhu reng a.

A tiril a la khûr dar dar chungin  muangchang a a hmai phih in a lu te chu a ti huh a, chumi hnu ah a rawn chhuak chauh.

Jennifer-i erawh chu ala harh lo, a chângin a rawn rûm chhuak leh deuh ṭhawt ṭhawt ṭhin a.

Ngui tak a Ar ela lo ṭhu sawp deuh nuaih bul ah chuan Julie chu chauh hmel deuh a rawn phei chhat chhat in Ar ela hmazâwn ṭhutthleng tâwiah chuan a rawn a.

"Thil mak tak a ni, thip mak tâwpkhâwk".. zawi fahran hian a ti zuai raih a.

Ar ela chuan angaihna hriatloh hmel deuh a Julie en hâ chung hian,
"Eng maw itih a, Julie" a lo ti ve sup a.

A ṭhut ṭhat te te hnu chuan aw khûr dar dar hian, "Ar el, thil mak tak a ni, ka awih thei lo hulhual, mahse thil ni thei a ni tho bawk si"..

Ar ela chuan, "Eng thil maw, han sawi chiang teh," ngaihṭhat loh hmel deuh hian a lo ti a.

Rûm hak pah hian, "Laipuitlang a chaw kan eikhâwm kha ila hria em, nikum hmasa ami kha.." a ti chuai raih a.

"Aw, Leimin zân kha maw.."

"Aw ni e, kha kha... khami zân aṭang khan engkim hi bul a inṭan vekin ka hria...khami zân aṭang chiah khân..." Julie chuan ring fahran lo hian a ti leh a.

Ar ela chuan ṭhuthmun rem ṭhat pah hian, " Engmaw inṭan a, a eng a chu maw..han sawi chiang teh.." mak tih hmel fahran hian a lo ti vat a.

Julie bawk chuan, "Khami zân a ka mut khân Mumang nge maw ni ka neih kha i hria em, leimin vel kha..." Ar ela en chung in, thutak deuh hian a ti thâwp sat a.

"Leimin a, i tho â emaw kan tih kha maw, i mu lai i rawn aû vak vak na kha.." Ar ela chuan a lo ti deuh hluai a.

Ṭhut hnaih sauh pah hian Julie chuan, "Chiang deuhin lo ngaithla teh, ka rilry chu a buai miah lo ania, ka thil ngaihtuah dân leh ka rindân hi a dik mai thei..."

Ar ela chuan âw tih nan a lu a lo bu nghauh a.

"Khami zân, Abbra Ririni lo haw chaw kan eipui zân khan leimin tûr leh khami leimin a kan thih dân kha ka hmu lâwk asin, chu chu ka rawn ṭê chhuah vak khân ania.

I awihloh chuan, in aṭanga tlânchhuak tûr a ka tih che u kha ila hria ang a, khami ka tih chhan chu leimin tur kha ka hmuh lâwk vâng a ni." a ti hluai a.

Ar ela chuan ngaihtuah mûk hmel deuh hian, "Chuan khâ leimin ah khan kan thi vek amaw.."  a ti leh a. Aw tih nan Julie chu a lo bu nghauh a.

Ar ela vêk chuan, "Chuan...Chuan, kan dam chhuak ta vek si a..." a ti zui leh a.

Rilru tâwt hmel deuh hian Julie chuan, " Ni e, khami ah khân thi vek tur kan ni a, mahse kan thih tâk si loh avângin khâ thihna khân keini a damchhuak ho kha amal te te in min thih tîr leh a tum a, sa pêlh angin min pêl mêk a nih hi..." a ti zâwi leh sap a.

Minute sâwm vêl lai chu an in en ang hê hâw a, sawi tûr hre lo hian an han ngawi deuh vang vang a..

" Khami zân a ka mumang ah khân Ririni kha a thi hmasa ber a, chumi hnuah, Nang leh Noah a ni leh a, chuan Sêntei, Remruati, Basta, Jennifer- i leh kei..."

Sawi leh chuan tûr an vân dun hmel kher mai, Ar ela chu rilru hah hmel deuh ha rûm nghut in a tho thurh a, inchhûng dungah chuan muangchâng hian a vei tawn sek a. Julie pawh chuan ṭhutthleng nghenchhan chu delh in a hmai a hup reng a.

" Tichuan kan thihna ngei ngei tur ah chuan thi lo mahila, chu thihna chuan min zui ta zel a, Ririni thihna ka hmu hmasa ber a, chuan chutiang chiah chuan kan zîng ah, khâ leimin laka damchhuak zîngah khan Ririni a boral hmasa ta ber a nih kha, chuan chumi hnu ah nang leh Noah- boralna ka hmu leh a, mahse nangin thihna i pumpelh leh a, i pumpelh avângin i dawt a thi tur Noah- in a tuar ta a nih kha, chumi hnuah Sêntei-.. vawiin ah..." sawi pawh sawi zo theilo in a hmai a hup a, lungchhe takin a in sût leh hlawp hlawp a.


"Chuan...chuan...chuan....a va han mak tak êm...i thil hmuh chu... i ngaihdan chu thil ni thei tho a ni... mahse..mahse".. rilru buai ru tak chung hian rang deuh deuhin a vei tawn sek a.

"A dawt leh, a dawt leh chu tunge, i mumang anchhedawng chu.." rilru chiai avânga thinrim âwka lek lek hian a aû deuh ṭhawt a.

A kuta a hmai la hup chung hian zâwi fahran in Julie chuan, " Remruati.." a ti chuai raih a.

Ar ela pawh chu a ṭhutna ngai bawk, chhuatah chuan a ṭhu leh hnawk a, a kut pahnih a a lû dawm chungin a kûn deuh ngal a.

"Remruati a boral chuan ..chumi zawh ah Basta, Jennifer-i, Nangmah...chuan.." a ti chuai ve raih a.

"Nangmah i ni leh ang, thihna chuan phuba alâk zawh hma loh chu a thiltih a bânsan lo tawp ang" Julie chuan a lo ti a.

Chutih lai chuan Jennifer-i chu a rawn che hret hret a, ring fahran lo hian a rawn phun deuh nuah nuah a, mahse a thusawi erawh a hriat theih loh.

Julie hrilh angin Ar ela chuan, tuilum a chhuang vat a, a so hnu chuan Julie chuan Bedroom a ama face towel chu va la chhuakin, Ar ela tui lum ah chuan face towel chu chiah huh in, Jennifer-i hmai leh chal vêlah te chuan a hrûk sak a.


Chutianga Jennifer-i an buaipui lai chuan,
"Ka theihnghilh...Ar el, Remruati..kha phone lawk teh, hmanhmawh in...'' Julie chuan a ti leh chûk chûk a.

A bul a ṭhutthleng sei a ṭhut pah chuan a phone chu muang fahran hian a phawrh a. Remruati chu a phone zui nghal a, mahsela a tlang har kher mai, vawithum lai a call nawn hnu chuan  phone a pick up thei ta hrâm a..

A pick up veleh Ar ela chuan phone chu Julie- a pe a.

"Remruat, ." a ti chiah a, a ṭap nghal ringawt a. A va biak Remruati chuan mak a tih hmêl kher mai...

"Julie ami.., Julie, enge ni ta..."

" Englo...Aw Julie ka nia, Khawnge i awm, Mizoramah i awmlo tiraw.." a ti bah deuh nuaih a.

Remruati chuan, "Aw awmlo, College ka kal leh tawh alawm, Agartala ah ka awm daih..'' tiin a chhâng a.

Julie chuan, " Anih chu, Ririni leh Noah te boral thu te kha i hre ve em...'' a ti bah deuh niah a.

"Aw, hria e..Ka rawn kal ve hman si lo a,  a pawi tak tak a ni, ka inthiam lo khawp mai..."

"  ...sawi tur a tam, thil pawimawh lutuk hrilh tur che ka nei a,..Sentei pawh kha vawiin ah a boral a, eng lo...tawhsual a tawk a..." a ṭawng ring fahran lo kher mai.

A reh deuh vang vang a, chumi hnuah, " Sentei maw...a va pawi ve le, a van mak ve..." Remruati chuan a ti bah deuh nuaih a, Sentei boral thu chuan a ṭhâwng ve deuh a ni.

"Remruat, Nia, a pawi tak tak a ni, chuan tunah khawnge i awm, enge itih..eng lo....'' sawi hmasak ber tûr pawh hre lo niawm zet hian a dangâwk ṭawng deuh tut tut a.

"Tunah maw, Axis Bank ah kan kal lawk a, kan lêt leh ṭêp, ruah a sûr duh lutuk a.."

Remruati bawk chuan, " kan kal dawn chiah e, nakin ah kan inbe leh mai dawn nia, College kan thlen hunah, Auto a rawn kal a, ruah asur bawk sia..."'
 a phone chu a ti tâwp ta daih a.

"A van mak tak êm, ka â zo tawh a nih hi, engmah ka sawi lo, a pawimawh ber pawh ka sawi lo reng reng..a va han ât thlâk tak.." phone hmet mial mial chung hian Julie chuan a ti a.

Ar ela chuan, " Khawnge a awm a, engtinnge in inbiak..." a lo ti vat a.

" An kal chhuak lawk a, College kan thlen hunah kan inbe leh dawn nia a tia..."

-------------------------------------------------------------    -----------—------------------------------------------------
 A college kalpui Assamese nula Sonali- nen a kal an ni a. An kalna Axis Bank hi an College piah deuh lawk a mi a ni.

Remruati- hi RIPSAT(Regional Institute Of Pharmaceutical Science And Technology) Abhoynagar,  Agartala, Tripura- a College kal lai a ni a.


Tripura Mission Field pawh an College aṭanga hla lo te ah a awm a, Tin, a building ep deuh lawk ah GBP Hospital lian tak mai a awm bawk a ni.

An College hi GB Road in a paltlang a, an College hnunglam piah deuh ah a ni tuna an kalna Axis Bank chu a awm.

Ruah a sûr thut avang chuan Auto rawn kal remchâng chu lo phar in an tlân zui nghal a.

An kalna Axis Bank hi ITI Road a ni tawh na chungin, tawite ah Gb Road an pawh phei a, minute rei lo te chhûngin an College Campus chu an thleng phei a.

Ruahsur hnuaiah chuan hmanhmawh takin College tualzawl zau tak maiah chuan tlân pheiin Building ah an tlân lût nghal a.

Inchunglam chhohna kailâwn ah rawmawl a in hru hul thuak thuak chungin an tlân chho rawk rawk a.


..Chutih lai chuan a bag a a phone chu a rawn ri leh ral ral a, a ṭhiannu nen a inbe pah zêlin phone pick up tum chuan a bag chu zen rak rak a.


Hetih lai hian inchunglam kalpawhna kailawn(step) aṭanga rawn chhuk College student tho, Manipuri hmeichhe pahnih hi an rawn chhuk ve mêk a, pakhat zâwk chuan lehkhabu a pawm deuh ṭûn a, pâwnlam a chhuah an tum a ni ngei ang, pakhat zâwk erawh chuan nihliap lianpui mai, folding pawh ni lo hi kengin kaihparh a tum mêk a.
 Anni pawh chuan kawng pawh an en chuang lo, inbe mawlh mawlh pah hian chak fahran lo in an rawn chhuk a.

Remruati phone pick up tum, kûn deuh paha a bag zen rak rak chung a hmanhmawh deuh a step a tlânchho chuan nihliap keng zâwk chu a han su deuh pawp a.

Hmanhmawh a step a tlânchho a ni bawk a, a su na angreng kher mai.

Chu Manipuri- nû chu a phar deuh lawp a, a ṭhiannu lehkhabu pawmlai chu a bân a vai lawp in, lehkhabu chu a tla darh nghal vek a. A nihliap ken lai pawh chu thlauh in a vawrh kâng dâwrh a.

Chutia chumi te a han sut rual a an lehkhabu thlauh darh chuai nen, a phone pawh chu a paih dâwrh lehnghal.

"Awi ." tih pah in hnunglam ah Remruati chu âwn in, step chuan a tlu thla nghal deuh vut a, a tlûk lai tak hian thil thleng thut a nih avângin a mah pawh chu in her vut in step ah chuan a tlâk in a tla thla a ni ber zâwk âwm e.

A tlûk rualin a bân vai vêl chuan hmeichhe pakhat, lehkhabu pawm zâwl chu a pawt a, an pahnih chuan step ah chuan an tlu thla dûn a.


Chulai hun tak chu a rang kher mai.(!)

Manipuri- nû nihliap thlauh, per thla pawh chu lei a thleng deuh chiah a, mahse vanduaithlãk takin nihliap lei thleng chiah, a tlûk hmâ si chuan a hmâwr zum lam chu Remruati tlu thla chuan zu delh in, A mit dinglam ah tak hian a lo chhun a.

Chu nihliap hmâwr zum chuan a mit dinglam chu chhun tlangin, a tukkhum ah arawn lawrchhuak deuh vûn a.

A pawh tlûk nû erawh chu a in sawh na vak lo hlauh thung. Mahse chutia a bul a Remruati let reng a hmuh chuan a hau leh râp lutuk chu a ṭe tuarh aṭ nikhawhrelovin a awm zui ta daih a.

Chu thilthleng lo hmu tu chulai a lo awmhnai te chuan an râp hlawm hmêl kher mai.

An sarâk chiam chiam a, anmahni hnam ṭawng niawm tak tak hian an aû deuh chiam chiam a.

A tu mai pawh chu an phili vek mai a nih chu.

Mangang tak a ṭe ruai ruai chung hian Remruati ṭhiannu chuan rang tak hian a rawn bawihsâwm a.

A sut nû, Manipuri Student te erawh chu mak ti bawk si, chiai tak a a hmai hup chung hian step ah chuan a ṭhusawp deuh nuaih a.

Mitkhapkâr lek an Student dang tamzâwk leh Office Staff te chu an rawn thleng ve nghal a.

Hmanhmawh takin Class room âwl lai, a hnai ber ah chuan an pahnih chuan an pawm lût a, an han bawihsawm viau nâ in Remruati erawh chu chhan hman a ni tawh lo.

Khatia a tlu thla kha nihliap hmâwr zum ina a mit a a chhun khân a thluak a chhun fuh tel a, a tukkhum a nihliap hmâwr zum rawn lawr tlang ah pawh khan a thluak nawi a rawn in thil chhuak deuh niaih a. Vânduai thlâk thil thleng tak meuh meuh a ni....



(CHAPTER - 6)


"Call han tum leh chhin teh, " Ar el-a chuan rilru buai hmel deuh hian Julie chu a ti a.

Vawihnih lai a tihnawn hnu pawh chuan, "A tlang thei lo rêng rêng, a pawimawh asin le, Remruati chu aw ." tiin ṭhutthleng ah chuan a phone chu Julie chuan a dah tâu deuh sawk a.

"State dangte a ni bawk si a, bâkah ruah a sûr a ti a ni lawmni, khua a chhiat chuan biak tlang chu a har deuh ang ." Ar el-a chuan a lo ti a.

Chutihlai chuan Jennifer-i chu rawn che hret hret in, a rawn meng a, Ar ela chuan lo dawm vat in, a rawn ṭhu chhuak ve ta hlawl a.

"Mumang mai mai ni se ka va ti tak êm, a va han râpthlâk zo zai tak êm.." a hmai hup chung hian aw khûr deuh dar dar hian a rawn ti chhuak a. A awka chhuak chu a zâwi kher mai.

Rûm deuh hak pah hian Jennifer-i bul chêt ah chuan Julie chu a ṭhu hnai a.
"Thil mak tak a ni, Jennifer, tunah khân Remruati kan be zo deuh chiah a, thil thleng eng emaw a awm chuan a rawn phone mai chu ka ring deuh a ." zâwi fahran hian a ti chuai raih a.

A hmai la hup chung hian Jennifer-i chuan ṭah aw deuh ṭuai hian, " Thil thleng a..eng thil maw.." tiin a zãwt lêt a.

Julie chuan Ar el chu a mitsîr zauh a, chuveleh ani pawh chu an kiangah a rawn ṭhu ve a.
"I rilru ala buai deuh nuaih maithei a, mahse hei Ar el a nen hian kan lo sawi dûn tawh a, thil mak tak mai a thleng mêk a ni..."

"Eng thil maw.." Jennifer-i chuan a ti deuh hû a.

"Eng lo ania, He kan ṭhianho chunga thihna thleng ta vak hi a bulṭanna chu, Ririni te nen a Laipuitlâng- a chaw kan eikhawm zân aṭanga inṭan kha ania...." Julie ina a tih lai mêk chuan Jennifer-i chuan lu nâ ti âwm deuh a achal dawm vang vang chung hian,

"Laipuitlâng a, Engtia inṭan maw ni a..." a hriatthiam loh hmêl kher mai.

"Tunah hian a pawimawh a, chuvangin chiang deuhin lo ngaithla teh, i awih lo anih pawh in..." Julie chuan alo ti a,

"Khâ Laipuitlâng a chaw kan eikhawm zân khan mumang emaw ni, ka nei anih kha, ila hria ang a, Lei a min dâwn ti a âu vak vak chungin inchhûng aṭangin ka kâichhuak che u a nih kha.

Khami zân khân mumang angreng ka nei a, chutah chuan khami leimin tûr kha ka hmu lâwk a, khâ leimin ah khân kan vaiin, a indawt in kan thi vek a, chuvangin leimin dâwn ṭêp khân kan tlânchhuak ta vek a, kan him ta a nih kha
Mahse, khâ leimin a boral vek tûr kan nih avâng leh kan damchhuah tâk si avângin Thihna chuan min zui ta zêl a.

A tâwi zâwngin, ...A indawt in, pakhat te te in kan thi ta mêk zêl a nih hi, mumanga ka hmuh dân chuan Ririni a boral hmasa ber a, chumi dawt ah Ar ela leh Noah, mahse Ar ela hian Ngopa dâi a tawhsual kan tawhna ah khân a thihna tûr a pumpelh avângin Noah a boral ta zâwk a, chuan Sêntei, Remruati, Basta, Nang, kei leh Ar el-a te hi a indawt a thi tûr kan ni ta a nih chu." tiin a sawi deuh duah a.

"A mak in ava han râpthlâk tak êm.."
Jennifer-i chuan a ti vawng vawng a.
"Chuan, Remruati chu..." a ti zâwi leh sap a.

Julie chuan, "Nichin khân kan inbia a, Tripura ah a awm leh daih tawh a, College- a zawm leh tawh a, min rawn phone leh ang.." tiin a chhâng a.

"I hrilh vek em, eng lo...tuna i sawi kha, thihna vêl chungchâng chu.." Jennifer-i chuan a ti leh a.

Ar ela chuan lo chhângin, "La hrilh lo, a rawn phone leh dâwn alawm, kan hrilh dâwn nia." a lo ti a.

"Engpawhnise, haw mai ka duh, a tlai tawh emai, khua a thim dâwn ruai tawh a nih hi," Jennifer-i chuan a tih zawm zat a. Jennifer-in a, "I chhûngte kan phone mai dawn nia, zanin chu hetah riak mai la.'' a tih pawh chuan a hnar tlat a, chauh hmel deuh a muangchânga thovin rei fê chu Bathroom-ah a va in silfâi a.

Julie chuan rawn aû vin, "I kawrlum kha chu dah mai rawh, ka lo su mai dawn nia, ka kawrlum i ha haw mai dawn nia.." tih pah in Bedroom ah Jumper- a va la a, Jennifer-i chu a hâk tir a.


"Ka lo thlah ang che, i chhûngten thil awmzia te an lo zâwt che ang a, a buaithlak, bâkah in in hriat nan hrim hrim pawh, lo kal rawh," Ar el-a chuan a lo ti a.

An pathum chuan an inzui chhuak a, Ar el- an a motor a tih nun dâwn lai chuan Julie phone chu a rawn ri leh ral ral a.

"Ngaia anih hi.." Julie chu a phun sep a.

"Aw, enge ni ta, I haw tawh em ni"


"Aw, in ka thleng deuh chiah, eng lo...Remruati kha a boral a ni âwm e,"..

"Engtin a ...Remruati maw..."
Julie chuan a phone chu a thlauh lek lek a, hrilhhai deuh hian a melh ngai a melh vung vung a.

Phone a Ngaia ṭawng mawlh mawlh leh  a a koh te pawh chu hre âwm pawhin alang lo.

A motor tihnun tum pawh chu Julie- phone hmang a ngaihchân deuh avângin a ṭhulh leh a, Chutia Julie- a awm thut chu eng emaw dik lo a awm leh anih ringin motor aṭanga chhuakin a bulah va tlân phei vat a.

Julie- koh pah chuan a phone cu laksak in, a be zawm a.

"Ar ela ka nia, enge ni ta Ngaia.."

"Aw, Remruati kha nichin lawk mai khan a boral a ni âwm e, whattsapp ah min rawn hrilh a, a ṭhian ten.."

"Remruati a, a va mak ve, a ni thei dâwn em ni, nichin deuh lawk khân Julie nen an inbia a, rawn call leh a tum a, a call kan châng deuh asin, a ni tak tak maw, a chiang em,"! Ar ela chuan a ti bah deuh nuaih a.

"Aw, chiang ang, an College aṭangin a chhûngte an rawn hrilh ani âwm e, a pawi ngawt mai..." Ngaia chuan a ti a.

Ar ela chuan zâwi sap hian, "Engtia boral nge ni.." a ti leh a.

"Step ah a tlusual a ni âwm e, an College ah.."

"A nih chu mawle, step a tlûksual avâng ém a nunna han hloh mai chu aw, a va han vânduai kher êm..! '' Ar ela chuan a ti vawng vawng a.

Ngaia chuan, " Ruangte pawh kan zu hmuak ve ang chu, A chhûngte thû hlâ han ngaichâng deuh ila, an in awmna pawh ka hre lo hrim hrim a..."

"Aw le, kan tum dâwn nia, Zemabawkah Jennifer-i ka va thlah lawk anga, ka lo kal kâwi dawn nia,"

"enge a an a, a ṭha maw Jennifer-i chu.."

"Aw, ṭha tawh a ni mai e, kan va kal lawk ange, a nih phawt.." tiin Ar ela chuan phone chu a titâwp a.

Rilru hah âwm tak hian a thaw hawk a,
"Julie, Engpawh nise, Jennifer-i hi ka va thlah phawt ange, a tlai tawh angreng si a, Zânah duh leh Ngaia nen kan rawn kal dawn nia.." a ti a.

Julie chu Ar ela âwmah chuan a bei thlawp a, a ṭap nghal hawm hawm a.
Ar ela chuan a theihtawp a hnêm in, inchhûng lamah a kaihkuah lût a, tichuan hnêm chung zêl a chhuahsan in Motor chu a tinung vat a, an tlânchhuak ta a.

Jennifer-i erawh chu motor a a luh rual deuhthaw khân muhil leh hil lo fâwm in, chau tak hian Motor Seat- ah chuan ṭhu hnawk a, thil thleng engmah pawh chu a hriat loh hmel êm avangin Ar ela chuan a hrilh duh ta lem lo a.

.......................................... ............................. ..  ......................... .........................................


DATED 11. 08 .2015.
VASANT VIHAR, NEW DELHI...


Remruati boral aṭang khân thla hnih lai a liam leh tawh...

Khua chu chuti tehchiamin a vawt lêm chuang lo kher mai, Ruah pawh chu a hmâ nî a tlêm a sûr tih loh kha chu, lâkbo vang vang ang a ni leh dêr tawh a.

An duty hun a zawh meuh chuan an lo rêl ho tawh angin Basta Tlau leh a thawhpui Khawzawl khua Nunmawii bâkah, Shillong a chêng Nepali nula, Binda Thapa- te pathum chuan an Aparment- luahhawh kawtkai mai ah chuan nalh fahran a in cheiin Taxi- an châng mêk a, mahse an châng rei lo kher mai.

Taxi chuan minute 15 vêl lai an tlân hnu in Metro- chak fahran ah rei lo tê an tlân leh a.

Tichuan an kal tumna, Lakme Salon (Beauty Parlour) pawh chu hlim takin an thleng ta a.

He Parlour- hi an ṭhiannu Binda-i chuan a hre tawh in, a lo kal fo tawh ṭhin a, Basta- leh Nunmawii te erawh an vawikhat kalna a ni thung.

Basta tlau hi New Delhi ah hian kum hnih lai a awm tawh a, a Hotel thawhna hi 7 Star ni pha chiah lo mahse changkâng leh pui tak erawh a ni thung a.

He Parlour awmna lai hi a hmun anuamin, a felfâi angreng hle a, chubâkah Kawngpui bul lawk mai anih avang pawh hian a pan leh a kal pawh a hahdam angreng hle.

Vasant Lok Market- building changkâng leh lianpui mai hi a piah lawk ah a ding ruau a, Kawngpui lehlam ah erawh Canara Bank a awm thung.

Tin, he Parlour hnunglam ah hian Park ropui leh nuam tak tak, Vasant Kunj Garden te, Priya Park te bâkah District Park te a awm a.

Foreign Embassy hrang hrang, Colombia Embassy te, Bahrain Embassy te, Chile Embassy leh Iragi Embassy te bâkah Embassy tam tam tak pawh he Lakme Salon- bulhnai lawkah hian an awm bawk a.

A ṭhiante pahnih ina Body Massage- an tih lai chuan Basta erawh chuan a sam steam tîr tumin room dangah a kalsan a.

Tumah ti an lo awm lo hlauh mai, a khâwl enkawl tu pa Naga hmêl pu deuh reuh, chêr sâng angreng tak mai chuan Lunch ei pah hian, hmel hlim tak hian Basta chu a lo chiau au a.

(Heta Sam Steam-na hi kan hriatthiam dân tûr chuan chair a ṭhu mu deuh chung a, a khum a an khum ṭhin ang, kha a ni a. CR)

In zai kawr ang deuh hi a lo hâktîr a, Revolving Chair nuam tak a ṭhuttîr in, a sam ah chuan damdawi a hnawih mawlh mawlh a, chumi hnu chuan lehkha ang deuh hi Basta samah chuan bel leh in, sarâng langtlang thei lukhum a khum tîr leh a.

Steam na khâwl tak hi chu darthlalang lang tlang thei, room zau leh nuam tak a ni thung a, a kawngkhâr pawh darthlalang tho a ni a. tuna a sam an sawisakna bul chiah room chu a ni.

Sam steam na khawl a vaiin sâwm a awm a, mahse a âwl lai vek a ni thung a.

Chu ṭhutthleng nuam takah chuan Basta- i chu ṭhut tîrin a sam Steam na khâwl, khum tûr pawh chu a khum tîr a.

Chutih lai chuan chu pa chu chulai Parlour-a thawk ve tho pakhat hian hmanhmawh deuh hian a rawn ko a.

Rang zet zet a chu pa biak pah chuan a khâwl chu on in,  en mang hlei lo hian Basta- i khum, Steam-na sîr pang a Meter Adjust-na (Sam Steamna khâwl, a sat / lum zâwng adjust-na) chu a herh pawp a, ṭawng zawt zawt chung hian room chu a chhuahsan ta a.

Steam-na room kawngkhâr lah chu chhuah ah hian a khâr ang hmuk lehnghal.

A ṭhutna ngaiah chuan ṭhu leh in a thil lei lai chu a ei chhunzawm leh nuap nuap a, a bulah chuan a mi biak pa pawh chu a ding ve reng.

An hnathawhna chungchâng vel leh an Customer nula chhe lo deuh deuh te chungchâng sawi chuan an phûl deuh hlut a.

Minute ngâ vel lai chutiang a nui thler duai duai chung a an ti ti lai chuan Steam na room a thil khu luai luai chu a va hmu thut a.

Chu veleh a thil ṭhial lai pawh lem hman lo chuan a tho lawk a, a ṭhianpa su her lawp in Steam- room ah chuan rang tak hian a tlân lût thuai a.

Basta-i ṭhutna vel chu a khûk nasat mai bâkah, thil kâng rimchhe tak, hmui rum rum chuan room chu a luahkhat hneh kher mai.

A kut lehlam a thil khû vai kiang chungin a kut lehlam chuan Steam-na lukhum chu a her sawn a... Mak tih hmel deuh hian a meng kâwk a, Che châng lo hian a ding reng a.

Chutih lai chuan a ṭhianpa pawh chu a rawn thleng ve a, Phut dâwrh pah hian a ṭe ṭhawt lehnghal.

An pahnih chuan bawihsawmna châng pawh an hre lawk lo, an hrilhhai leh mak ti chu an sarâk vak vak ringawt a.

Chutia an ṭê thâwm chu hria in chulai hmun a thawk leh an Customer- ṭhenkhat te pawh chu an rawn tlânkhâwm ṭuk ṭuk a.

An zîngah chuan Basta- i ṭhiante pawh chu an tel ve bawk a.

Chutia an ṭhiannu hmêl hmuhtlâk loh khawp a kâng nasa an han hmu thut chu an hrilhhlai kher mai, an va sâwi nawk nawk a, lungchhe tak hian an ṭap hawm hawm a.

Vâi chu Vâi nge nge an ni tih chu a langchiang kher mai, a tu amah chuan bâwihsâwm pawh tum chuang lo chuan  lungchhe tak a nula pahnih ṭap hawm hawm leh Basta-i ruang chu ngawireng hian an tuipui lian thlîr vung vung ringawt a, ṭhenkhat an thlâ lo la tâwk lah bo lo.!!

Chutiang an thâwm rî hria a rawn tlân lût ve Customer tho, Sâp tlangvâl pahnih lian tak tak te chuan an rawn thlen rual chuan rang takin an bawihsâwm nghal zung zung thung a.

Pakhat chuan nula pahnih te chu kaihkuah in, room aṭang chuan a chhuahpui vat a, pakhat chuan Basta-i ruang chu dîm tak a la chhuak in a pawm sawn a, chhuatah chuan mut in puan in a khuh a,  Ambulance ko vat tûrin chulai a thawk te chu a hrilh zui nghal bawk a.

*Khatia a ṭhianpa ina a rawn biak lai khân en mang hlei lo in Steam na sat zâwng kha a sa rang thei ber tûrin a full in a lo herh a ni a, amah phei chuan titi pah a khawih anih avângin a hre lo hrim hrim.

Room a chhuahsan pah a kawngkhar a khâr avâng khân Basta-i ṭe rî kha an hre lo hrim hrim a.

An kal hnu lawk aṭang khân Khawl chu a rawn sa nghal deuh vut vut a, Basta-i ngaihṭha lo leh sâ tiin a steam-na khawl khum namsawn a tum chuan a khawl chu a lo sa vek tawh a, a kut pawh a kâng deuh hial a, a theih patâwp a a nem leh a ben vak vak avâng khan khâwl chu a bêng chhia in, a khawih leak a.

Thawh a tum leh a sam a damdawi hnawih anih avângin khâwl sâ khân a hîp bet tlat a, a mangang ṭe ruai ruai chung a abân vai kual vêl chuan Steam-na khâwl tui awmna pipe chu vai phâwiin current a tih leak phah a.

Current chuan a man zui mai bâkah Steam-na lukhum sa lutuk chuan a lû chu a ti kâng zui leh hi a ni a.

A tui tih leak ina a taksa a tihhuh avângin a taksa chu Current chuan a man a, han khawih hlek pawh in a taksa khawilai mai pawh chu a pilh duai duai thei hial a, a taksa chu a hmin vek ani ringawt mai.

A sam pawh chu a kâng ral deuhthaw a, a luvun te chu a in lip duai mai bâkah a hmêl te chu a kâng ût thual mai lehnghal.*



.

(CHAPTER - 7)


Nuamsam vak lo chung chung a kâr hnih lâi châm a Lunglei lama a zin hnu chuan a rilru pawh a hahdamin a taksa pawhin hma a sâwn angreng tawh khawp mai.

An thil tawn râpthlâk tak avâng khán hun eng emaw chen chu a buai phah deuh hial a nih kha.

Khatia Sêntei- accident tawh hnû kha chuan tumah pawh a be ngai tawh meuh lo. A chhuak vâk ngai lo in, inlamah a tawm deuh châwt a.

A rilru buai lutuk tih thawven nân Lunglei lama zin pawh a ni rêng a, Aizawl lama a rawn haw leh aṭang phei chuan Ar vulh lam a tui thar thut a, Broiler- a lei nghek a, aman a in tûr sa leh in nitin rilru hah pawh nei hman mang lovin a buai nilêng zak zak a.


DATED. 09. 10.2015..
ZEMABAWK..


.Kâr tluan âr in ringawt buaipui rêng rêng a a buai avâng chuan a room pawh a hnawk tawh kher mai.

Chuvângin a âr in sak a zo tawh bawk a, a room chingfel tûr chuan chumi tûk zîng aṭang chuan a in buatsaih a.

A hmâ zân a khum a ṭhu chunga a Nail Polish hnawih bân, khum sîr a a dah chu a khum thlep fel che vêl chuan chhuatah vai thla in chhuatah chuan a baw deuh niaih a.

Mahse chutianga chhuat a a vai tlâk chu a hre hauh lo.

Tichuan a khum chu thlep fel in chaw a ei sawk sawk a, a chhûngte an kalchhuah vek avângin ring tak in DVD a play a, hmun a phiat vat vat a. Chhuat nâwt tûr chuan a in buatsaih a.

Tukverh zawng zawng hawng dar in a room chhuat chu a nawt a, mahse a Nail Polish- tih buak erawh chu chhuat Carpet-a a lo khal hman tawh avângin chhuat nawhna chuan a nâwt fai zo lo.

A chhuat nawhna( chhuat nawhna hi a kuang thing, a hmawr a pawnchhe zai sîn ṭawn khâwm ang kha. CR)
chu a khum bul a dawhkân bulah chuan tung tawp in, a pa hmanraw dahna box lian tak chu a va hai rawk rawk  a. Thinner- bûr lian tak hi ava la chhuak a.

Puanchhia nen, chu a Nail Polish- rawng kai chu nawh reh tum chuan a hru hliau hliau a.
A beh ngheh tawh avâng chuan Thinner  - chu tam deuh deuhin puanchhia ah chuan vawi engemaw zah a hnawih a, a hnawih nawn sek avang chuan Thinner bûr (Mineral water bûr) lah chu chhîn nghet chuang lo hian a khum bul dawhkân chungah chuan a dah tawp a.

Minute sâwmleh panga lai chutianga a hrûk hnu chuan a reh ve ta hrâm a.

Thâwk huai pah hian a khum sír a filter tui chu no ah thli in chhuat a ṭhu sawp nuaih chung in muangchâng hian a in a.

Chutianga a ṭhutsawp nuaih lai chuan a phone a lo ri a. Sitting room lama phone a charge daih avângin a tui inlai no chu chhuatah hûng tawp in, hmanhmawh tak hian phone pick up tûr chuan a phei vut a.

Julie- a ni maw..
"Hello, Julie..."

"Jennifer, i dam em, i va reh ve.."

"Nia, âr in sâ in ka buai thei lutuk a, enge ni ta, i ṭha zâwk maw"..tiin Ṭhutthleng a ṭhut pah chuan a chhâng a.

Julie chuan, "Eng lo... i dam chuan a lawmawm e, Basta boral thû kha i hre ve em." a rawn ti a.

Mak tih hmel deuh hian, "Basta a..Basta Tlau maw...avan...ka..ka hre lo, ka hre lo...Basta Tlau a boral amaw"... hrilhhai leh a ngaihna hriatloh hmel tak hian a ti bah deuh nuaih a.

"Aw, keipawh ka hre mai lo va,.. "

"A va mak ve..Delhi ah a ni lawmni a awm daih khâ.." a ti chuai leh raih a.

"Aw ni e, Ka....." a ṭawng lai chu lo pawt chat in, " Engtia boral nge..." a lo ti a.

Julie bawk chuan, " Parlour a an kalna ah a chesual a ni âwm e, current leak vâng an tia, keipawn ka hre chiang lo.."  tiin a chhâng a.


Chutiang a Sitting room a phone a hman mêk lai chuan, a room tukverh a hawn vêk avângin inchhûng a thlifîm rawn thaw lût chuan a tukverh parda chu a chhêm lêng leh siau ṭhin a.

Mahse thli rawn thaw lût reng a nih avângin chutianga tukverh parda in zâp vel chuan a room dawhkân bul a a chhuatnawhna tun chu a vai tlu ta nge nge a.

Chhuatnawhna tlû chuan dawhkân chung sír deuh a Thinner bûr, chhîn nghet lo tak chu vaw tlu in a baw nghál a.

A hnuai zâwn chhuat a a kalsan, a tui in lai, no chhûngah chuan thinner chu a baw lût nghek a.

Mahse, thli thaw reng avâng chuan thinner bûr erawh a lîr a lîr a, dawhkan sîr dinglam ah a lîr sawn leh daih a...


A rilru chu hlauhthawnna in a man nge maw ni, phone la hûm reng chung chuan aṭhutna aṭang chuan muangchânga thovin a room lamah chuan a phei chhut chhut a.
Chutianga a ngawih tâk reng avâng chuan Julie ngaihṭha lo chuan a ko vak vak a.

"Aw, nia, a mak êm a...a va han pawi ve, engtinge..engtin nge a ruang te, engtikah nge a boral a..." bah deuh nuaih hian a chhâng lêt a.

"Thla khat a tling ṭêp tawh alawm, an khua ah aruang chu an phur haw a, Ngaia te pawh an kal a ni âwm e.." Julie chuan a rawn ti a.

"Hre hma ilang chuan kan han kal ve tûr a nia.." a ti chuai raih a. Julie pawh chuan, " Ni e, keipawhin ka hre tlai lutuk a, tunlai chu ka nuamsam lo leh lutuk a..rawn lêng phei la, vawiin lam te chu.."
a tih chuan,

"Vawiin chu ka hman lo ang, ka chhûngte hian keimah chauhin in min nghahtîr a, Room vêl ka singsâ e ka tia, nangni rawn lêng phei zâwk rawh u, naktuk lamah te pawh..." tiin a chhâng lêt a.

Julie chuan, "Aw le, Ar ela te ka lo hrilh ang a, kan lo tum dawn nia, a nih leh phawt le.." tiin phone a dah zuinghal a.

Jennifer-i erawh chu a rilru ala buai hmêl kher mai, Julie- phone dah hnu fê chuan zawi sap hian, " Nangpawh le.." a ti chuai raih a.


Rilru hah âwm deuh a thaw ri hak chung hian chhuat a a tuiin lai, a no dah chu en pawh en chuang lo hian a la vut a, tukverh bulah chuan thil tam tak ngaihtuah niawm tak hian pâwn lam hawi hian a ding ta veng veng a.

Reife chutianga mûk tak a a in ngaihtuah vung vung hnu chuan a tui ken lai chu rang fahran hian a tlâk pawp a.

A tlâk rual deuhthaw chuan a uak tuarh a, a glass no ken lai pawh chu chhuatah a thlauh keh chuaih a.

A hrawk a hnawhtu awm ang mai hian tukverh ah chuan kûn in a uak tuarh tuarh a, a hrawk chu na ti âwm deuh hian a dawm bawk a.

Mahse luak tûr engmah a awm lo, Rang takin thaw ri bawrh bawrh chung hian bathroom lamah a tlân pei phei dâwr dâwr a.

European Type- Toilet a an hman avângin, inthiarna  hma ah chuan a ṭhingṭhi hnawk a, Comode -chung zâwn ah chuan kûn in a uak leh nghek nghek a.

Thinner- ina a kawchhûng a ei avânga a na ti bawk si chu uak tuarh tuarh pah hian awmze nei lo hian hian a bân te chu a vai buai nuaih a.

Chu abân vai chuan bang sîr a sahbon bâwm leh nawhfe te, innawhlung te chu chhuatah te chuan a vai tla nuaih a.

Chutia rei vak lo a uak vak vak hnu chuan thisen hi a phuh chhuak ta ṭhawt ṭhawt a.

A na ti chu a mittui a tla pûr tawh lehnghal.

Chutia thisen a phuhchhuak ta ṭhawt ṭhawt chu a hlauthâwng a, rilru buai nuaih leh thlaphâng tak a ṭe chung hian a tho rawk rawk a, chiai tak chung a tlânchhuah a tum lai chuan a bân vai ina chhuat a avai thlâk sahbon chu rap pial in ke váwr ṭhuai in a tlu thlawrh a, a tlûk pah chuan bathroom chhûng bang a invuah,  in enna dârthlalang sei lian tak chu a bêng keh chuaih a.

Tukkhum vaw chawrh a a tlûk avâng chuan a lu a hai kher mai.
Chutih lai chuan a dârthlalang ben keh chuan a nghâwng ah tak a rawn tlâk a, a nghâwngah chuan a bûr vû a, a hrawk aṭang chuan thisen a rawn chik chhuak nghal tuarh tuarh a.

Dârthlalang keh dang te pawh chuan a lû ah te, a pumah te chuan an rawn tlâk bawk avâng chuan thisen a chhuak nasa in, Bathroom chhuat chu a sen zûih tawh a.

Chutiang tawrhna râpthlâk tak avâng chuan a thaw zâwi tial tial a, minute khat emaw hnu lekah chuan a boral ve ta a.
.


..(CHAPTER - 8).


Chhiatna râpthlâk tak tak a thlen chhoh mawlh mawlh hnu chuan chu thihna thlarau vâkvêl pawh chuan a duhtâwk a hmu tawh emaw tih mai tûr hian a reh leh ta vawng vawng a...

Rilru thlaphâng leh manganna te, an lungngaihna mittui luang zo zai te pawh chu an theihnghilh in nun bul an ṭan thar leh ta mêk a.


DATED : 22. SEPTEMBER. 2017.
PARK EDEN, FALKLAND...


 .Abbra Ririni te, Noah te, Sentei leh Remruati te bâkah Basta Tlau leh Jennifer-i te boralna leh thihna te pawh chu hunin a her liampui a, Anni ṭhian dûn chuan kum hnih deuhthaw lai chu thlamuang leh hlim takin nun an hmang ve ta...

September Ni sawmhnih leh pahnih (22) nî chuan Facebook Group pakhat, STORY FB- chuan Park Eden, Falkland vêng ah Group Picnic an nei a.....


Julie Chhangte pawh chu a thuziak ngaisang tu leh chhiartu te a hmuh dâwn avâng chuan nalh fahran hian a inchei a.

A Car thar Eon- Dum tle nalh tak mai, a hmâ ni a uluk tak a a sil tîr chu chak fahran mai hian a khalh chhuak leh ta a.

Park Eden a thlen chuan Hunserh an lo hmang dâwn chiah a, chutianga kalkhawm te chu a thuziak chhiar tu leh amah ngaisang ve tak tak tute ni mahse amah ngaisang tak a an han kawm te chuan nuamti viau mahse a rûk tak chuan a zak angreng hle a.

A thuziah pui, Nutei Tuahzo te, Sangpuia khawlhring leh Maengi Ralte te bâkah Muantea leh Jasper Duati- te pawh chu an lo kal ve bawk a. Tin, A ṭhianpa Ar el Khawlhring pawh chuan hlim tak mai a a lo nuih vur vur avâng chuan a rilru chu a hlim sawt in a hria.

Hunserh hlimawm tak an hman lai chuan an thuziahpui ṭhin Chester Ralte leh a ṭhianpa pawh an rawn thleng ve leh bawk a.

Tichuan chu Group Picnic hlimawm tak chu nuamsa takin hmang a.

A thuziah chhiar tu te nen a thlâ an lâk ho lai chuan Ar el Khawlhring chuan Julie chu a rawn au vak a.

Swimming Pool hnunglam Rihmim kûng hnuai daihlim nuam tak a ṭhu chung a rawn auh pah hian a kut in a rawn hûi zuk zuk a.

A bul a va thlen chuan a ṭhu ve nghal sawt sawt a.

"Engkim hi i ngaihtuah ngai em.." ring fahran lo hian Ar ela chuan a ti a.Julie chuan a Lays bâwm hawn rak rak pah hian,

''Engtia...Kan chungchâng kha maw.." a ti hâ a. Ar ela- chuan, " Aw, ni tho mai, mak ka ti ṭhin, tikhân chhiatna kha a thleng indawt chho char char a, mahse hei kum hnih lai chu a reh ta vang vang rih a nih hi..." a lo ti a.

Julie chuan Lays ei pah chuan, " Ni e, keipawh ka ngaihtuah nasa ṭhin khawp asin, mahse...aw..keipawh in a tâwp tawh a nih ka ring.." a ti a.

"A hnathawh rãpthlâk tak tak te kha nasa a ti a ni ang, thisen a luang hnem tawh bawk a, a duhtawk tawh a ni chiah mai, a zo tawh e.." tih pah hian Ar ela chuan a kut dinglam chu lekchhuak in,
" He thil thleng hian min tâwp san tawh, a duhtâwk tawh e, keini chu kan him tawh a nih chu, chuvangin a lawm nan leh a thlah nan in chibai ang.." a ti a.

Nuih var var pah hian Julie pawh chuan a bân lekchhuak in hlim tak hian an in chibai a...


A ṭhen in Tui an chêng a, ṭhenkhat lah chu Car tape play in an lâm suau suau bawk a. Buaina erawh a chhuah loh avang chuan a lawmawm kher mai..

Tlai lamah Group Creator J.Zahngaia biak lâwk angin Catering- lam te an rawn che a, chulai a Picnic hlimawm tak hmangtu te chuan puar takin Dinner- an ei leh bawk a.

Chawhlui an kîl ho lai chuan Ṭhuampui véng a chêng Siamtei Khawlhring chuan thuziak ṭhin ho te chu an in a lêng kâwi tûrin a rawn sâwm hlawm a.

Tichuan a hu hova kal a remchâng zâwk tiin Nutêi Tuahzo- leh Julie Chhangte- te motor chuan kal ho an titlu ta a.

Nutei- hian i10 kengin, Elty, Nubawihi Hnamte leh Muantea-a te an chuang a,

Julie Chhangte- motor Eon- ah, Sangpuia khawlhring, Chester Ralte leh Arel Khawlhring te chuang tûr in an insiamrem bawk a.

Chhuah mai theih anih tawh lai chuan Ngaia leh Nubawihi- chu Park- hire chungchâng leh pawisa lam eng emaw tihfel leh lawk angaih avangin Park Chowkider- te nen an in hmu lehlawk a.

Chumi chhûng chuan Julie Motor ah chuan Arel-a, Sangpuia- leh amah Julie- te chu ring fahran a Car Tape ngaithla chung hian an țhu țhâm hlawm a.

Sangpuia leh Ar ela-te pahnih an titi bawrh bawrh lai chuan Chester Ralte pawh chu rawn ṭhu lût ve in, tukverh a dah chhuah pah hian a muthlu deuh nghal ringawt a.

Ar ela leh Sangpuia chu an thawnthu ziah vêl chungchang ah anla ti ti tui kher mai, Julie erawh chuan an thusawi ngaihsak lo lêk hian hmalam ah Car tape a play a, ACDC ho hlâ, Highway To Hell- tih chu play in,

"In tlangval lai a hla lâr.." tih pah in Ar ela chu a lo kâp ve deuh sek a.

Chester erawh chu a rawn luh rual deuhthaw khan a mutthlu nghal daih a.

Chutiang an titi tui lai chuan, minute nga pawh a ni kher lo ang, Chester-a mutthlu chu phâwk tak mai hian arawn harh kâwk a, a phu deuh zawk lehnghal.

Chutia a phu deuh zuk chu abul ațhû Arel-a leh Sangpuia titi lai chuan mak tih hmel zet hian an rawn en deuh hû a,

"Enga ti nge"

Arela- chuan ati deuh hû a.

Chester chuan bah deuh nuaih hian,
"Ka lo chhîng sek a ni maw, a tak emaw ka ti a," a tih lai mêk chuan Sangpuia chuan inthlahrun hmel deuh hian,

"Kan bengchheng deuh emni"? a rawn ti ve bawk a.

"Chutiang lam pawh a ni lo, ka mumang kha, ka mumang kha a mak lutuk.."
tiin rawmawl a inhrûk pah chuan a chhâng buai deuh niai a.


Chutih lai chuan Julie Motor dahna bul chiah a Nutei- motor ding ațanga rawn chhuah pah hian Muantea chuan,

"Rin aiin Ngaia te chu an rei daih mai, lo nghah pah in tlêm kan lem belh leh lawk ange(?)"

tiin a piah deuh lawk a Pathian thusawi avânga țhukhâwm niâwmlo fahran mai, mi panga vêl țhukhâwm lam chu a pan ding nghal a.

Chester chuan mak atih hmêl kher mai,
Muantea chhuak chu motor tukverh ațang chuan ka hau chung hian a thlîr zui reng a.

"A ni chiah, a ni chiah mai, ava han mak ngai ve." ti a ama hriattawk lek a a phun melh melh lai chuan Arela bawk chuan,

"I mumang ațha vak nange, I chau deuh emni," tih leh hmalama Julie țhû chu tui a dîl zawm nghal a.

" Julie, Tui kha ala awm em, lo la lawk mai teh, Chester- hi han in phih fai teh se" fiamthu angreng deuh hian a tih zawm nghal zat a.

Julie pawh chuan tui bottle chu a rawn la ve mai bawk a, engmah sawi chuanglo chuan arawn nui suk a, phone ah mî a be zawm nghal daih a,

Chester erawh chu a in phih chuanglo, tlêm tê a in a, eng emaw ngaihtuah niawm tak hian Muantea te țhukhâwm lam chu a thlîr zui ta reng a.

Rei pawh a nilo, chumi hnû lawk chuan Maêngi Ralte chuan Nute-i chu biain,

"Kan Pû te lamin min rawn phone a, hna lama ka kal angai leh thut sia, ka lo kalkawi ve tawhlo mai ang e," a ti a.

a scooty chu a tinung zui nghal a,
" Vawiin nî ber kher a, inpû te chu hauh an ngai anih chu." tiin nuih vur vur pah hian Nutei chuan a chhang a.

"Niang chu mawle, Tanker ho nawrh chungchâng vêl ania, Tanker Driver- ho hi chhîpthlâk deuh ang ngai a ni." nui uarh uarh chung hian Maengi- chuan a ti a. A Scooty chu tinung in a tlân zui ta daih a.

Chester chuan zawi sap hian,
"A ni chiah mai, engkim a dik anih hi, a van mak ngai ve le" a ti a.

Chû a thusawi chu Arela chuan lo hre phâ in,
"Enge maw nile, nangmah leh nangmah i inbiak tâk chiam chiam a," ngaihțhat loh hmêl deuh hian arawn ti a.

Chester chuan," Nia, Aw, Englo....'' ati bah nuaih a,

"Chester..." Arel an tih lai lai chuan, Chester bawk chuan,

"Nia, Nichin a ka mutthilh zawk khan mumang kalo nei hman a...Mumang niin la hria,...Englo..''
tiin sawi pawh a sawi zawh hma chuan Ngaia leh Nubawihi-te chu lo lêtin an rawn thleng chiah a.

Tlanchhuah mai an tum tawh hnûah Muantea chu an han aû leh tê tê a, a ni Muantea lah chu ava kalna ah chuan alo țawng tui leh tawh nasa chu niin.

"minute khat chauh" tiin țawng duhna Châwltui chu no khat an khiât leh tê tê a.

Chutah Chester chuan buai nuaih hian Motor kawngkhar chu hawn pah in, " Ka lo kal lo mai ang, Ka nuamsam lo deuh emai, bâkah...." tih leh chhuah arual zui nghal a, Arela chuan rawn zui chhuakin,

"Enga ti maw, Chester, Enge ni a." a ngaihna hriat loh hmel deuh hian a rawn ti a.
Ngaia pawh chuan, "Nang ber ikal loh ten, enga ti nge" arawn ti ve bawk a.

"Nichin khan a muhil a, arawn harh leh hnu khan a buai deuh nuaih mai, a chau deuh emawni." Arela chuan a lo tih zawm a.

"Nia, Ka lo tel lo mai ange, eng lo... haw mai ka duh..ka duh deuh thut..." Chester chuan a ti a.

Ngaia chuan," anih chuan nidangah dawrah lo leng ang che," a ti a, chu a thusawi chu Chester chuan hria âwm pawhin alang lo. A kalsawn nghal daih a.

A Kalpui pâ te awmna lam chu pan ding nghal in, a ko fâla, eng emaw a hrilh chiam hnu chuan an scooty chu ti nungin an in phur chhuak zui ta nghal a.

An kal dawn chuan Chester chuan,
" a pawi khawp mai, nakinah kanla sawi dawn nia," tiin ngaihțhat loh hmêl taka lo en tu Ngaia leh Arel-a te chu a thlah a.

Ngaia chuan,'' A nih phawt ule, nia, kan la sawi dawn nia " a ti a.

Nubawihi motor a a luh hnu chuan Ngaia chuan, " In hnungah Duati- nen kan lo kal ang, kan lo inphur chho mai ange." a ti a.

 Tichuan Julie te chuan hmâ hruaiin, Nûtei te nen chuan an in zui chhuak ta a.


Chutianga an tlânchhuah lai chuan Sangpuia chuan, " Tinge mawn le Chester-a chu, a in ve deuh em ni, a rui mah mah a ni lo maw..." a ti a.

" a in âwm pawh ka hre lo, a mah kha a nuamsam vak lo sa hrim hrim a, vawiin pawh rawn kal loh a tum zâwk a.." tiin Ar ela chuan a lo chhâng a.

Thui pawh anla tlân hman lo, Falkland Main Road- ațanga Park Eden pênna, Park Eden ațanga tlân chhoh char char a Falkland Main Road han pawhna chiah pêngțhuam anih chu.

Julie te chu tlân hmasa zâwk an ni a, hemi pêng țhuam lai ah hian kawngpui a zau chuan bïk loh avangin Julie hian a khalh chak lo hle a, muangchângin kawngpui a chhuak a, a chhuak fel chiah tih in Nutei te chu an rawn lang ve nghal bawk a.

Chutih lai tak chuan Pushpak School lam, kawng chhak lam ațang chuan Falkland lam pan hian chak fahran mai hian Truck ke sâwmpahnih nei chî, World Bank- ho motor hi arawn tlan a.


Second hnih vêl lek a ni.

(!!) "LALPA!!!"

"AWI KA NU!!"

"KA DUHLO!!!"

Motor leh motor in su rî rum rum leh mangang aû ri chu a ri chêl chûl a.

Khatia Julie- ina kawngpui a han pawh chho chiah kha Truck breakfail chak lutuk maia rawn tlân thlâ chuan a rawn su lêng lawp a. Truck Driver- ina a rilru chiai tak a motor thunun tuma a theihtâwp a a stearing a herh a vâng in chutia Julie- te motor a sut hnu chiah chuan a motor chu kâwiin kawng péng ațanga rawn chhuak chho tûr chiah Nutei- te motor chu leh pah hian a hnâwl zui leh nghal a.

Nutei- te motor chu kawngthlanga building in chu hnâwl chilh in a chhûnga chuangte chu kâ pawh chhâwn lohvin an boral nghal vek a.

Julie- te pawh an bâng chuang lo, khatia Truck ina a rawn sut lên lawp khân vawihnih lai a in bin thawk a, kawng thlanglam a Building- in lo ding chu a dêng phei nawk a.

Sângpuia chu motor in bin avâng khân a nghawng ruh a tliak chiang kher mai.

Ar ela pawh chu motor aṭangin a in vawrh chhuak lawp a, mî in building bang chu a dêng dawt a, motor kawngkhâr thlawn in vawrh chhuak thlâwk chuan a kâwng ah tak fuh in, a bung hmawk mai lehnghal a, a bân ruh te chu a tliak hneh in pum aṭang chuan a rîl te chu rawn baw chhuak nuaih a, mî inkawt leh bang te chu a thisen per vel chuan a berh nuaih a.

Julie Chhangte erawh motor chhûngah chuan kawisawi tak hian a tâng a, A insawhna avângin a luruh chu a keh phawk a, a thluak bua te chu a taksa leh motor ah te chuan a per nuaih a.

A nâkruh te chuan a taksa rawn thil tlangin a taksa pâwn lamah an rawn lawr chhuak vûng hlawm a.

A khûp achin hnuailam phei chu hmuh tlâk awmlo khawp hian a sâwp vek mai lehnghal a nih chu...


(THE END)