MIZO MYTHOLOGY : AFTERLIFE, THE GODS & GODDESSESS

(Ka rawn chhawpchhuah dan hi tam tak chuan an helh maithei bawk a, a kimlo in dik tawk lo pawh inti maithei, mahse hnamdang ho ina an ziah angin a tunlai leh changkang zawk a alam theih nan a ti ka ni e, ka sawi kim loh hriat in neih chuan lo sawi zel ula ka ti lehzual ania..)

Mizo pî leh pû te chuan Thlâ hi mihring ațanga a chhuah ațang hian 'Thlarau' an vuah a, 'Râu' tih hi 'Tak nei manglo' tihna a ang hle.

Mihring an thihin an thlâ chuan a luruh a a lu dîp lai arawn tâwn pawpa, tungchaw a zui chho a, khanchhuk a zawh a, tichuan liangah châr lamah a chhuak ah an ngai țhin.

Tichuan Rihdil a han tlawh a, alo kîr leh a, an in bul velah thla thum vel a châm bâng țhin.

Chumi hun chhûng chuan a chhûngte chuan mitthi tan chuan 'Thlaichhiah' an nei a, a țhutna tur te pawh an kian țhin.

(thlaichhiah chungchang leh alo chhuah dan chu Tlingi leh Ngama thawnthu ațangin kan hriat vek tawh kha.)

Chutianga thla thum vel a tei hawi hnu chuan mitthi chu an țîn a, chaw pawh an hlui tawh lova.

Mitthi pawh chuan ' Kan chhûngte pawhin min ning tawh ani' anti a, mitthi khaw lam panin hreh tak in an kal ta țhin ani.

Mitthi khaw kalna tûr hi kawng pêngțhuam sarih a awm a, Rihdil ațangin an chhuak a, a enga pawh zawh se Pâwla kawtchhuah ah an chhuak ngei ngei a. Hei hi 'zîngvawnzâwl' an vuah.

Tichuan he kawtchhuah ah hian lung rah bûk a awm a, he rahbûk hi rap lo chuan an kaltlang theilo a, an rap bûk ngei ngei țhin ani.

Pâwla chu lo muhil mahse rah bûk rî chuan a tiharh a, thlarau sai tur chuan alo harh zel a, pumpelh theih anilo.

Pâwla hian sairawkherh, phulraw phel, suihpawrh khauh tak anei a, a saihlum chu artui tiat tiat ani a. Mi a perh chuan ana em em a, a ngâwt bawk a, chutia na tak tuar chung chuan mitthi khaw lam an pan ta zel țhin.

Tichuan Pâwla kawtchhuah ațang chuan Hruaitu in alo hruai ta zel thin a.


Sawi dan dang ah chuan mitthi thlarau in Rihdil a kai dawn ațang hian Hruaitu an awm anti bawk.



Pâwla kawt ațang chuan tuna 'Hruaikâwn' an tih khaw awmna ah khian 'Hruaitu' te chuan an hruai ta zel a, kâwn chhak lam tlâng sâng hi 'Hringlang tlâng' an ti a. Hetah hian an hruai thleng a, chu hringlang tlâng ațang chuan mihring/minung awmna ram, an khaw hluite an thlîr a, an lung alêng êm êm țhin.

An khaw hlui/minung ram lam an hawi fo avang chuan an kal pawh a sâwt hleithei lo a, chûng lai velah chuan pangpar chi khat ' Hawilo Pâr' a awm a, an hruaitu te chuan chûng hawilo pâr te chu an tawntir(khim) a, tichuan minung ram lam chu an hawi duh ta lova, tlêm chuan an kal chak thei ta deuh deuh a.

Mahse, an lung ala lêng êm êm a, hawilo pâr tawn tawh in minung ram lam hawi tawhlo mahse an la țap anla țap țhin ani.

Chutiang chuan an kal zel a, reilo te an tlângkara tui fîm tak mai lo luang her her, 'Lungloh tui' awmna an va thlen chuan, hruaitu te chuan chu tui chu an intir a, tichuan mihring inngaihna țhin kha anlo hloh ta vek a, lungdam tak in mitthi khaw lam pan chuan an kal ta a, mitthi khuaah chuan an zu chêng ve ta a.

Pâwla perhna ngâwt kha kum thum chhûng chu reh lo in a ngâwt reng a, na an tuar reng ani.

Tichuan mitthi khua a hun engemaw chen an awm hnuah chuan 'Dairial' ah an chang a, ni alo tlángsâng a, an ral ta țhin ani.

Sawidan dang pakhat, Tlingi leh Ngama thawnthu ah chuan, mitthi khua ah chuan minung ram ang bawkin lo an nei a,fúr khaw chhe hnuaiah berh hrep in lo te anla neita zel tih kan hmuh bawk kha.

Tin, Pasalțha leh Thangchhuahte pawn Pâwla kawtchhuah hi an thleng ve tho va, mahse Pâwla hian a lo sai ngam ngai lo țhin a ni.

Mi satliah te chu 'Mitthi Khua' ah an kal a, heng pasalțha leh thangchhuah te erawh chu 'Pialral' ah an kal ve thung țhin.

Pialral leh mitthi khua hi a in ang lo a, Pialral chu hmun nuam tak, faisa ringa hahdam taka awmna/chenna tur ani a, Pasalțha te leh thangchhuah te chauh an kal țhin.


Kan mizo mythology ah rau rau pawh hian thih hnu khawvel hi a changkang em em a, hnam dang te aia a hniamna hi a lo awmlo.
Japan, Canada leh Africa te ai phei chuan a changkang daih zawk lehnghal.

Hêng hnam fing hmasa kan tih, Egypt, Greece, Scandinavian leh Mayan Mythology te nen huang khat ah dah mah ila, a ropui leh changkang pâwl chu ala ni tho tho mai. 

Mizo te tuan thu hi sawi dan hrang hrang atam hle a, tuna kan sawi tum ah pawh hian a kimlo nasa ang tih chu ka ring a, Pathian anga an biak leh malsâwmsak tu thlarau țha te chungchang a ni mai a, mahse hetiang deuh hian a mawihnai ve deuh nan kan țhen hrang ve phawk mai chu ania.

KHUAVANG : Khuavâng hi a hming pû chuan an be ngailo a, Pathiante zîngah chuan a ropui ber te zîng ami an ni a, siamtu ni chiahlo mahse, Khua ina a siamsa ti zo tu 'finishing' tu chu khuavang ani. Lasî te ang bawk a nungcha tinreng enkawl tu an ni bawk a. mihring zînga Lal ropui Thlanrawkpa pawh khan khuavâng nula te zînga mi nupui ah anei anih kha.

KHUA : khua hi siamtu Pathian ber chu ani a, Pu Vâna tih nen hian thuhmun niin alang.

Tin, Lusei ho ina Khawzîng Pathian an tih nen hian thuhmun tho anih hmel, a chhan chu, Siamtu chu Ziak tu hrang hrang te leh thawnthu hrang hrang ah hian, Khuazîngnu, Pu Vâna, Khua, Khuanû, Khawzîng Pathian tih te in a awm a, mahse an chanchin leh awmdan sawi zawmna ah an in ang leh hlawm vek zel tlangpui țhin a, chuvangin 'Khua' ka han ti tawp mai ani.

Mahse, Khua tih hi a țawngkam syllable pakhat chauh anih avang hian alam anuam zânlo a, chuvangin 'Khuanû' kan ti tlangpui țhin.

Heta 'NU' tih atel avang hian Hmeichhe sawina lam anilo va, Khua Pathian chu siamtu leh mihringte vêngtu anih avangin a hnathawh hi 'NU' hnathawh nen a in ang em a, chuvang chuan Khuanû tih ani zawk.

SA : kan silhfen siamna 'la' tiha 'a' ri hniam leh thlûk anga lam tur ani. Sa hi chhungkhat mai nilo, thlah khat, chi khat enkawltu ani a, inthâwina ah pawh Ralte ho Sa leh Lusei ho Sa biak dan a inang
lo.

MAL : malsâwmna pe tu ani a, 'Mal sâwm' han tih a, 'aw' ri sâng thlûk hi Mal, Pathian ka ko tihna angah an ngai țhin.

KHALTU : mi mal enkawltu ani ber a, nu leh pa ten an fate tan inthâwina an hlân țhin. Țhenkhat ah chuan Khal an ti mai bawk. Sap ho in a Guardian Angel antih anga mi mal țheuh vêngtu Angel ang hi anih ber chu.

HNUAITE : hnuaite an tih chu thlarau(angel) chi khat, vêngtu tho, tual ah te, sumhmun ah te, bangrelah te, chhuat relah te chêng țhin ani a, invêl enkawltu ani.

HNUAIPUI : hei hi chu in hnuai lei thuah tam taka chêng țhin ani thung a, leimin leh chhiatna dang lak a vêngtu ani.

CHUNG(vânsen) : Vân sânga romei zîng a chêng, Nî leh Thla kâr a mi ani a, vêngtu tho ani.

LASI : lasi ho hi chu kan hmelhriat viau in a rinawm a, nula hmelțha tak tak an ni a, mahse Khuavâng nula te erawh chu hmelțhat lamah chuan an tluk lo.

Khuavâng ho ang bawkin Lurh leh Țan hi an chênna hmunpui ber ani.

Pasalțha in sa kah a dîl dawn in inthâwina anei ve țhin a, chu chu 'Lasi Khal' an ti, arpa hluisen in an inthâwi țhin.

Chutianglo pawh in Lasî te hian Pasalțha ramchhuak te hi anlo chângin, anlo thlîr ve țhin a, an hmel duhzawng te chu mal an sâwmsak in an zâwl țhin bawk.

Tlâng Lal ve tho an ni a, an Lalpa Lalchungnunga chuan Seipui khuaa awm nula Chawngtinleri angaizawng a, nupui ah anei ta hial anih kha.
(Lasî leh khuavâng nula te hi hnam dang thawnthu a Nymph/Fairy- an tih te ang tho kha ani a, Forest Nymph an tih ramhnuai a khawsa, ramsa ho te enkawltu ang hi an nih ber chu).

PHEICHHAM : Thlarau țha zînga chhiar tel tur ani awm e, ke pakhat chauh anei a, a invuah letling lehnghal. Miin an man chuan,' enge i duh, sawi thuai rawh' a ti a. Thaw la lêk lova duh ang sawi chu a pe thei zel a, thaw lâk hlauh erawh chuan ' Phengphehlepa khua a tlai ta' a ti a, engmah a pe tawh ngailo.

TLANG LAL TE : Zorama tlâng lian deuh deuh te hi Lal in a awp ve vek a. Tlâng Lal leh Huai hi hriat pawlh loh tur ani.

Tlâng lal hi Huai te angin an sual ve lo a. An lalna tlânga awmte chu lalin a khua a enkawl angin an enkawl ve a, an khua leh tuite hamțhatna tur an ngaihtuah ve bawk țhin.

Kan hriat lâr berah chuan Mawmrang Tlâng Lal Sahmula hi ani awm e, ani hi Khuavang Lal Pakhat Sabereka fapa ani.
Reiek Tlâng Lal chu Khawluahlali ani a, a fanu chu Dârthaikawii ani.

SABEREKA : Sabereka hi Khuavâng Lal te zînga pakhat ani a, a fanu chu Thlanrawkpa khan nupui ah aneih nghe nghe kha.

Thli leh ruah Pathian a ni a, a pa chu Belebuta ani a, Belebuta pa chu Țuanlehmanga a ni a, Ṭuanlehmanga pa chu Khuareia a ni, Khuareia pa chu Hmakhawsanga a ni.