THE CASEBOOK OF CHESTER BURNLEY : THE ADVENTURE OF THE DEVILS RING (Notebook 13)

..Kum khat ah thla sawm leh pahnih awm mahse, thla sarih lai kan hman tawh avangin chhun arei lo in zan hun a sei ve thung tawh a.

Tlai lam Dar nga a rik meuh chuan khua athim deuh ti tih tawh mai, ka nupui neih hnu ah hian ka thianpa Chester Burnley nen hian tul bik thil ah lo phei chuan kan in hmu thei ta meuh lo a, a chanchin pawh ka hre tam lo kher mai. Chanchinbu vela a thil tih that leh thil chhuichhuah chungchang inziak ka hmu zauh zauh tih loh chu.

Hemi ni tlai pawh hian 'thil hmanhmawh thlak leh pawimawh tak' tiin ka nupui chu biakhlatna hmangin a lo bia ani awm a, chuvangin hah pawh sawi lovin ka thianpa inluahna lam pan chuan ka hnathawk zo hlim chu ka tlan phei thuai a.

Brookdene Avenue a in pakhat luah hawh theih, chhawng hnihna pindan pakhat tawp angreng tak a ka luh lai chuan khua a thim chiang tawh.

A hma ang bawk in chu pindan bangah ah chuan 'Science' lam thil chhutna eng eng emaw hi a in tar thluah a, thil chhutna kan ti tak na 'ng a, milem tangkai tak tak ti ila afiah zawk mah awm e.

" Richard, ilo van lian tawh ve, khawnge amah hi? " tiin ka thianpa tirhchhiah naupang fel tak mai chu kan bia a.
Min chhan hma chuan mutna pindan kawngkhar hi a rawn in hawng a, chutah ka thianpa chu chhuah mai in peih at hian arawn pen chhuak a." Thianpa Caldwell, i va rawn thleng hma ve, zanriah pawh ila ei lo ani maw? Ka ring dik chiah anih chu? Mrs. Hannah-i hnenah rawng lo bawl kep tur che in lo sawi tawh a.." an ti deuh duah a.

Chumi pah chuan min rawn kalpel in thutkhawmna pindan lamah a phei tlang nghal a. Kei chuan zui ve nghal in, " Ni e, vawiin chu Pathian in mal min sawm deuh hlek a, dawr tu ka nei ngah deuh avangin ka haw har deuh ani." tiin ka chhang a.

Thutthleng sei dup a thut pah chuan, " Hmanhmawh pheleng a rawn kal kher chu ti lawmawm viau mah la, i buai phah lutuk deuh ani, a in thlahrunawm khawp mai." an ti zui lehnghal a.
Chutia sawi pah chuan a meizial bawng nalh tak atang chuan meizial phawrh in an dep kai zui nghal a. Kei chu a hmazawn a thutthleng ah chuan ka thu a. " i hnathawhna thawmhnaw thlak lovin i kawrlum fual tha ber irawn ha chhuak a, chu chuan i hmanhmawh thawkhat hle tih min hrilh tlat ani, hnathawh thawmhnaw thlak lova kawr lum rawn hak belh ringawt te chu, Caldwell. Bakah i damdawi sawngbawl rim te pawh ila nam vung vung alawm." tiin an sawi belh leh hlak a.

" Ni e, a dik chauh chuan 'nangin a thil pawimawh' itih hi chu pawimawh tawpkhawk chauh ani tih hi ka hre chiang ve tawk tawh tlat ani." tiin ka lo chhang ve thuai a.

Ani chuan ring fahran lo hian," Pawimawh a ni? Pawimawh 'Tawpkhawk' tak meuh meuh e." tiin min han chhang a.
" Chu 'Case' buaipui lai inei ani maw?" ka han ti a.

Ka thianpa chuan, " Nei e, chanchinbu ah te ilo hmu tawh lo em ni?" tiin mi han zawt a.
Kei chuan," Chanchinbu ah maw? Tak a.. Kan nuthlawi hausa Mrs.Blackwell-i zungbun bo kha em ni?" tiin bangbo zet hian kan ti deuh hluai a.

Ani chuan," Ni ang chu maw le, Chanchinbumi lo lah hi, thil reng reng hi hriat kilh kelh an tum reng a, ka hna ati buaithlak zo vek anih tak ber hi, Richard..." ti a sawiin, chhiahhlawh naupang chu a ko zui nghal a. Chu naupang fel tak chu rang taka lo pheiin ka thianpa bulah chuan alo ding nghal chat a.
A kawrhma ipte atang chuan pen leh thil chhinchhiahna lehkabu te reuhte hi a rawn phawrh chhuak a chutah a hma a dawhkan chungah chuan kun in chu lekha phek khat ah chuan eng eng emaw ni hi a ziak a. Chutah a thilziahna lai lekha chu pawtthla an thlep te te a, naupang kuta hmehbel pah chuan a bengbulah hian an hrilh ru se se a. Naupang pawh chuan a hrethiam ni ngei tur ani, a bu nghauh nghauh a, tichuan pindan atang chuan rang tak in a chhuak zui ta a.

" Khawilam ah nge?" ti a kan zawh chuan ani chuan ngaihsam tak hian, Watford Police Department lamah maw le" tiin min chhang a.

Mak ti deuh a," Richard-a maw? Engtia..? Chester..? " ka tih lai mek chuan. " Engmah thil harsa a awm hleinem, Thianpa Caldwell, Richard-a te chu ka tir fo alawm, Watford Police ho hi chuan an lawm teh asin, Ray Turner- va hmu lawk turin ka tir anih kha.." tiin a sawi fiah a.

" Enge chanchin ni ta zel a" ti a ka zawh chuan, ani chuan," a ruk chhuahdan bak ah a ru tu pawh ka hrechhuak tawh." tiin min chhang a.

" i va han che rang thin tak em, Mrs.Blackwell chu a lawm ngawt ang chu." kan tih chuan, thawk anla det a. Chutah zawi fahran hian.

" A Company nen pawh sawn inthleng a duh ta hial ve ang? "
" Eng a ni..? Chutiang?" ti a ka thianpa thusawi mak ka tih em em lai chuan,

"Ni e, amak mai nilo vin a Ropui asin." tiin ka thusawi lai chuan arawn sawi a. " Thianpa Caldwell, Mrs.Blackwell- i hian min rawih nan pawn Pound maktaduai chanve lai a seng asin. Ka zawnchhuah sak anih phei chuan tlem fahran lo chu min la thehchhuak sak leh pawh ala in huam hial lehnghal." tiin a sawi chhunzawm leh a.

" Eng anga hlu nge ni a chuti fakau a kan nuthlawi hausa i chuan a hlut em em chu?" tiin hriat chak hmel tak hian ka ti a, ka beng chu kan dawh deuh ha mai bawk a.

" A...Caldwell, a bulthum atanga han sawi tak tak dawn chuan kum zabi sawm leh pasarihna tih angreng hi va sawi thlen angai ta daih daih thin a, Lal Bahadur Shah I- hi i hre ngai tawh reng em? tiin min han zawt a.

Kei chuan, " Ka hriatloh lam tak ani ang, India ram lam daih ani ang chu.." tiin ka lo chhang a.
Ka thianpa chuan," Ni e maw le Caldwell, Bahadur Shah I- chu Hmanlai India ram luah hmasa tu ropui tak tak MUGHAL- hnam an tih ho Lal te zinga pakhat ani a, i lo hre lo chu amak hle mai, chungho ina ro an rel hun chhung chu 'Mughal Dynasty' an ti a, India ram ropui leh hausak vanglai ber pawh ani ta hial ve ang.
Khawvela mihring siam thil mak leh ropui ber ber pasarih antih te zing ami, Taj Mahal te pawh hi heng Mughal Lal te zinga pakhat Shah Jahan-an a nupui thi ta Mumtaj Mahal- hriatreng nan leh a ruang a phumna thlan atana asak hi alawm," tiin a han sawi kual duah a.

Chutah sawi zawm leh in," Lal Bahadur Shah I- chuan India ramah kum 1707 atanga 1712 thleng hian ro arel a, a thih hian aruang chu Moti Masjid- ah an phum a, he a thlan in ropui tak ah hian alawm a chakna leh hneh theih anih lohna thuruk a zungbun roh em em mai zungbun thiltithei an tih huai huai leh anchhe keng zungbun an tih bawk chu an phum tel ni. Chu zungbun chu rangkachak hlang a siam ani a, a mit ah lunghlu tha chi nalh leh ropui tak mai an phum bawk a.

Mahse a hnu kum tam tak liamta ah khan ruk ru ho leh thil hlui zawng mi ten chu thlan in chu rawk in zungbun pawh chu anla bo tel a, kum za tam tak mi chi hrang hrang kut a a awm hnu ah eng emaw ti ti in kan nuthlawi hausa i kut ah hian alo tlu lut ve leh a, chumi hnu ah ruk ru hovin rubo leh in tunah hian hmuhchhuah tum in kan zawng leh mek chu anih hi." a ti ta a.

Kei chuan chu a thusawi chu ngaihnawm ka lo ti kher mai, " A ngaihnawm in ava han ropui danglam kher em...chuan thiltihtheihna anei kha iti bawk a..." ti a ka sawi lai mek chuan, " Ni e, Thianpa Caldwell, he zungbun hian malsawmna leh anchhia a keng an ti thin a, a kawltu apiang chuan malsawmna kan ti dawn nge, Tluan na kan tih zawk ang..
An nei thin a, anih loh vek leh chhiatna rapthlak tak tak in anuai ve thung thin a, thihna hial a thlen bawk thin. Mahse kan Pi Blackwell-i hi chuan anchhia zawk hi chu a dawng tello ani ngei ang, a ui dan em em ah hian." tiin an sawi zawm leh a.

.
Kei chuan, " i sawi tak azar ah chuan nih pawh ani hial mai thei ani, ngaihbel theih tur ting chuang tunhnai kum hnih chho atang hian a Company hi a thang em asin, tuipui ral lam thleng thleng in rinrawl leh innghah nan an hmang ber tawh anih hi." tiin ka lo tuihnih a.

Ka thianpa chuan," Ni ngawt mai Caldwell, a eng a pawh chu nisela zanin tlai hi chuan kan hmuh leh ngei ka beisei tlat ani," a rawn ti chhuak a.

Kei chuan mak tih hmel deuh a," Engmaw i beisei chu? Zungbun bo...." ka tih lai mek chuan ka thusawi chu rawn pawt chat in,

" Aw ni e, Caldwell, Zungbun chu zanin hian ka kut ah a awm ngei ka ring tlat ani, rilru in a ar bo a zawn chhung hi chuan zanriah pawh kan eipuar thei tak tak lo ang, chuvangin kekawr ipte a Zungbun ropui ak chung in puar el deuh zawk in maw le." tiin an sawi kual deuh duah a.

Kei chuan ka thianpa thusawi chu awih deuh si, mahse ring tak tak thei chuang silo deuh reuh hian, " Chester, ani thei lo ang, i fiamthu mai mai ani ang, nge ni a aru botu te chu kan va luhchhuak zawk dawn." kan ti deuh chiam a.
Ka thianpa lah chuan tui tih hmel tak a a Cigar hip vang vang pah hian, " Fiamthu lo e, dik tak chuan sazuk kap tur chuan a riahna hmun ah nilo in kah arem theihna lai atangin ani lawm ni anlo chan thin kha, min rawn pan mai ang chu." ring fahran lo hian a ti a.

" Zanin ah maw? Helai ah hian an rawn kal dawn tihna..."
" Thianpa Caldwell, chu chu ka lo beisei dan chu ani alawm, chu enge in hnuai lama thawm ri chu.." an tih chhunzawm nghal zat a. A thuthmun atang chuan a tho vut a, tukverh puanzar kar atang chuan pawnlam kawtthler chu fimkhur tak mai hian a thlek dak dak a. " ka ring dik chiah e, kan zawng hmelchhia a chu anih ngei khu," an tih zawm leh a.

Kei chuan," A tu achu maw?" ka lo ti hluai a. " Webster-a maw le.." tih leh rawn phei arual nghal a.
" Kan misual chimawm a maw... Ava han.." ka tih lai mek chuan ka thianpa chuan, " Ni ang chu, alo kal ka ring tho nachungin duhai in alo thleng hma mah mah ani, tirawh Caldwell.." a ti a. Chutah thutkhawmna pindan chu kalpel in bangkil khat chu a sawi nawk nawk a.

" Engti zia nge...? Ka lo..." " Thuai vat, khawngaih in, Caldwell, Hun a awm tawhlo." ka thianpa chuan a ti a, a bang sawi dawt dawt lai chu kawngkhar lo ni rengin, a hawng zui nghal a. Kei pawh chu hmanhmawh tak in ka thianpa lamah chuan ka kalphei thuai a.
" Duhthlan tur dang a awmlo, Caldwell, pindan ruak, min chhuahsan hnu a ka siam belh tir anih hi. kan Webster- hmelchhia a hian tumah midang an awmlo tur ah ngai se ka duh a, chu chu ama duhdan pawh ani. Chuvangin bengchhenglo la, engpawh lo thleng se che hauh suh ang che. I hria em, che eih suh. Lo ngaithla ringawt ang che." a ti ta a.

Ka luhrual chuan ani chu hmanhmawh takin thutkhawmna pindan lamah chuan atlan phei lehnghal a.

Kailawn a mi lo chho ri chu ka hre thei a. Chutah kawngkhar chu arawn inhawng a.

Ka thianpa tawng ri chu ka hria a, " I lukhum leh i tiang kha chu dawhkan te zawk ah khan dah mai rawh, ka lawm e. Khawngaihtakin thu teh aw. I puakruk pawh kha i rawn dah lang ve nghal mai dawn lo'm ni? A pawilo ve, i thuthnan duh zawk a hnu. Han biak che hi ka duh em avangin ilo leng hlauh chu a tihzia kher mai."

Webster-a chu a thu ni ngei tur ani." Khanglang chuan, ka puakruk chu ka duhleh ka hmuam anga, ka duh leh ka thut hnan ang," tiin thinrim awka deuh hian ka thianpa chu a chhang a.

Ka thianpa chuan," i duh a hnu, iduh leh thut puak la ti nia." alo ti zawm a.
" Keipawh hian biak che ka duh viau asin Burnley, chuvang chu ania ka lo len ni. Man tum in min chhui tih chu ka hria a, ilo hriat loh tak in keipawh hian thah che tumin ka zawng ngar ngar che tih chu ka pha dawn hlek lo mai," a han ti ve nghat a.

" i tum ani ang tih chu ka han ring ve thla rawk a. Mahse fimkhur deuh tawh teh, min thah itum anih pawh in lamlian mipui phut sup sup na nilovin kawtthler fianrial lai deuh te thlang tawh ang che." tiin ka thianpa chuan ngaihsam hmel tak hian alo chhang let a.

Ka thianpa thusawi chu Webster-chuan mak tiin an E deuh thawt a. " Chhaw tulul leh..!! Min lo hmu khanglang elaw, chuvang chu ani maw hmanhmawh tak a Taxi i phar ruai ni, a pawi pawh ka ti phihrit lo e, Bomb chu keng ila chuan i chuanna Motor kha ka rawn phin darh vek tur ania." an tihzawm lehnghal a.

Ka thianpa chuan rang fahran hian, " i sakruang chhuanawmloh tak kha engang pawn thup tum mah la i lu lian tak a i sakhmel chhe zet kha thupbo theih ani hleinem, bakah nimin tlaia ka pindan kailawn thimlai a minlo changtu i mi rawih buikelek ang tak tak hlir ho kha chu chhawr tawh teh suh. A sakhmel lah kha hnek hmelchhiat tur pawh awm tawhlo khawp a hmel chhia ani bawk si. A lu len ang hu aiin a mawl zek lehnghal, alu phut nen phei chuan phut thum ani hial ang." tiin alo chhang let a.

Webster-a chuan," ka mi rawih a ni? A ni lo tawp tih ka hrilh ngam ngat che," a han ti chiam a.
Ka thianpa chuan," Chhaw lutuk duh mahta che, kha midum thluak thawl tak khan i sual rawngbawl dan kimchang min hrilh vek lehnghal, chuvang ani Chhaw lutuk suh ka tih, mahse nang aia mawl lehchhawng rawih tur i hriat ka ring bawk silo." a ti a. Webster-a chuan thutkhawmna pindan a dawhkan ni ngei tur hi a chum ri bur a. " Phiangsen chuan, Anton-a mai mai chu..Burnley..."
a tih lai mek chuan ka thianpa chuan, " Ni e, kha Anton hmelchhia a kha chu a laktlak lemloh khawp mai, Watford Police ten a an han vuak zal deuh hunah chuan i thuruk zawng zawng ala puangchhuak ngei ang. A hrim hrim in, thil ho te chu ani na'nga, Webster, ka hming i sawi reng rengin 'Burnley' te hi mi ti ve mai mai suh, a nih dan tur ang takin min ko zel ang che. Ka hna ah chuan hei hi a tul tlat tih chi i hre ve thovin ka ring. Nangni ang duangin a, 'Mr' tih tel lova koh mai mai tur ka ni lo," a ti ta khauh mai a.

Ring fahran hian Webster-a chu tenawm zet hian anui hak a, chutah," Anih leh chu ti Mr. Burnley," an ti ve nghat a.
Ka thianpa chuan," Tha lutuk! Engpawh nise ilo kal chhan ber pawh ka lo theihnghilh hman der tawh alawm le." a ti a.

Webster chuan ngeiawm fahran hian," Mr,Burnley, ka lo kalchhan ber chu i lu um nalh lo tak mai hi ka puakruk mu a phin darh sak vek che hi ani." a lo ti hluai a.

Ka thianpa chuan," A khai! Webster, pehhel lo mai teh, ka thil duhber i kawl alawm, zungbun ropui kha ka duh tlat ani." a han ti leh a.

Webster a chu ring fahran hian an khek leh vak a, chutah zawi fahran hian, " Van Ekkhum tum ang hlauh." alo ti bul deuh hmuk a.

Chu thu a sawi zawh chuan Webster chu athutna atang chuan tho chhuk in a vei vel ni ngei tur ani, thaw veng awm deuh in zawite te hian a zai rut rut a. A pen ri khauh khauh mai bawk a.

Ka thianpa chuan," Zungbun avanga chhui che ka ni tih chu nang pawhin i hre ve reng alawm, zaninah hian engchen chiah nge ka lo hriat tawh tih hi hre turin hetah hian ilo kal a, tihhlum hi ka tul tak meuh em tihte pawh i rawn hre duh bawk ani. Ka han hrilh tlang nghal mai ang che'ng a, i tan chuan kei mi tihhlum hi a tul takmeuh tawh ani, engkim hi ka hriatpui vek tawh tlat che avangin," a ti ta a.

Webster-a chuan a zai lai chu a tawp chut a, la vei kual reng pah chuan, " A ni dawn maw! Engpawh chu nisela tunah rih chuan..." a tihlai mek chuan, " Tun tum a mi tello pawh hian kum sawmhnih chhung thir bang kara chaw i dawn theihna tur chu i chanchin tuihnai lo tak tak ka hre teuh a, bakah Watford Police Department lam pawh in chung ka thil hriat ka ziahna copy pawh an kawl nual lehnghal." ka thianpa chuan alo ti a.

Webster-a chu a ding chawt a," Zawng-khaw-ro, ka thin iti rim tak tak dawn," a ti ta hlawl mai a.

Ka thianpa erawh chuan ngaihsam hmel tak hian," Mai mai thin a, Webster, i ke phah hlai tak pahnih kha a kham tawh lawm ni, han thu ve phawt teh. I vei chau mai mai." a ti liam puat a.

Chutih lai chuan an in melh dun ngawr ngawr ani ta hial ve ang, eng emaw chen chu an ngawi dun vang vang a. Mahse Webster chu arawn tawngchhuak ah a tang hmasa leh ta nge nge a.

Thutthlengah chuan a thu ni ngei tur ani, " I thusawi chu kan zawm ve ange, nau khawngaihthlak." ala ti zui hram a.

" Dawt ka sawi hi i ring reng reng emawn le Webster, kha nikum lawk a London lam a i chet dan tenawm tak te pawh kha ka hre vek tawh, Zu dawr neitu putar leh a fanu i thuihruai ten an ruk bova, rawng taka an tihhlum te kha. A tir ah khan tello mah la i ruahmanna vek ani." ka thianpa chuan a ti leh a.

Webster chuan,"I tho a anih lek hi!" a han ti ve leh hram a. Ka thianpa chuan," kha putar that tu kha nangmah ngei ini a, a fanu pawngsual a tihlum zui tu pawh nangmah bawk ini. In rukbo na hmun pawh i thurualpui Count Frederic-a Farm, North Watford ah anih kha. Chung chu tuna Watford Police ten an hren mek i mi rawih Kelso-an min hrilh vek kha maw," te chu ala ti ta deuh deuh a.

Webster-a chuan," I at mu anih chu, i chhawrbawk hlek hlei lo'ng e." alo ti a. Ka thianpa bawk chuan, " A dang pawh ala tam asin Webster, Tun kum March ni sawmpahnih a Barclay Bank atanga 'cheque' siamchawp hmanga pawisa in lakchhuah thu te pawh, tun kum tir vek a London pan tur rel in rawk te pawh, tin, Harefield veng ami Miss Eve motor in ruk bo te bakah Pinner venga tlereuh Dawr in rawk te pawh ka hre vek," te chu ala ti ta deuh deuh a.


Webster chuan,"Tak zet." a lo ti a.
Ka thianpa chuan ringlo te hian," Ni ang chu," Mrs.Blackwell pindan in chhuahsan hnu aHarrow pana in tlan tum a in chuanna Motor khalhtu kha ka hre tawh a, ala reiloh bakah i hmel chhuanawmloh tak hi vawikhat hmuh tawh chuan theihnghilh mai mai theih anih loh avangin ala hrechiang khawp ang che. Bakah in zungbun ruk lai vela, in rukna hmun vela nangmahni hmutu ngei pawh ka be vek tawh a, thil awmdan min hrilh vek, tihtheih engmah inei ta lo Webster, chuvangin i zungbun chu ka kut ah hian rawn hlan mai rawh."ati ta a.

Chutiang thu, Chester-an duhtawka ahan sawi meuh chuan Webster- chu reife in ngaihtuah niawm tak hian angawi ta reng a.

" Ka chet ve chuan chutiang vel deuh ngat chuan ania ka chet thin ni. Ka chet dan kimchang takin ka hrilh tawh che kha. Mahse ka chet chhan ber chu ala dik kim thei tlat lo. Zungbun awmna chu ka hre tlat lo anih hi." ka thianpa chuan an tihzawm leh a.

Webster chu zawite hian arawn tawngchhuak ve a," Engtikah mah i hre lo reng reng ang." alo ti a.
Ka thianpa chu a kalsawn ani ngei ang, a pen ri khauh khauh a, chutah engemaw ni, thing pawhdawh in nawt ri ang hi a ri hrawk a.

" Webster, he thingrem te chhung ah hian enge awm tih ihria em?" ka thianpa chuan ati a.

Ring fahran hian Webster chuan," Aih, Hre lo ka Pu.." alo ti deuh hluai a.

Ka thianpa chuan," Lehkha maw le," tiin alo chhang a.
" Eng lehkha maw Mr.Chester Burnley."

"I chanchin maw le, i chetdan zawng zawng, sual rawng ibawl dan kimchang, nichin a ka sawi leh ka sawi bak zawng hi he thingrem chhungah hian a awm vek ani, zungbun min pek dawnloh chuan a thingrem chawp hian Watford Police hnenah ka pe dawn. Ka pek vaih chuan kum sawmhnih vel tal Lungin ah i tang dawn, tlanbo in Watford hi chhuansan mah la He Europe khawmualpui a i sual rawngbawl tawhna zawng zawng kha hetah hian a awm vek avangin khawi ramah pawh man tumin an zawng reng dawn che." ka thianpa chuan a ti a.

" Thi puar rawh, ka hrilh chuanglo ang che, engtikah mah zungbun awmna hi i hre ngailo ang." Webster chuan a ti a. Ka thianpa chuan, " Ka hre lovang maw, Webster, han in ngaihtuah tha leh la, i ngaihtuahna thiang tak kha hmang ta che, zungbun chu ka kuta i rawn hlan loh chuan kum sawmhnih chhung chu thir bang karah chaw i dawng dawn ka tih kha, chuti anih si chuan Zungbun chu engatan nge i hman dawn? I hlawkpui lo hle ang tih ka hlauhpui zakzet che ani,Zungbun chu ka kut a i rawn hlan that duh phawt chuan insiamrem dan ka ngaihtuah ang. Nang hi chu i hmeltha lemlo bawk a ka ngai pawimawh lemlo che, zungbun kha ani ka duh. Ka hnena zungbun chu i rawn hlan phawt chuan tun tum na na na hi chu ka se zawl chhuah mai ang che. Mahsela nakin huna thil ichawh hnawk leh chuan ka chhuah chuang hlek lovang che. Tun tum zawng, zungbun chauh ani ka duh, nangmah taka erawh hi chu eng atan mah ka ti lo che," a ti a.
Zawi angreng tak hian Webster chuan, " Zungbun chu i kutah lo hlan duh ta lo che ila engtinnge itih dawn." tiin a han zawt a. Chester chuan," Min hlan duh lohvin maw? Zungbun chu min pek duhloh chuan nangmah ka man hlauh ang che a ani mai lawm." alo ti sam et a.
Chutia ka thianpa a tawng zawh chuan rei fe chu an han ngawi dun vang vang a. Ring fahran lo hian Webster chu a rawn tawngchhuak a.
" Mr.Burnley, I la sarthi ngeiin ka ring."
Chutia Webster-an atih takah chuan ka thianpa chu Silai in a kah duh mai ka ring a, chuvang chuan thawmdim tak in ka puakruk zakzeh chu la chhuakin ka tawmna pindan kawngkhar chu ka hawng de de a, mahse chutih lai tak chuan ka thianpa chu arawn tawng chhuah leh tak avangin kan nghak deuh a.
" Kei pawh chu chu ka lo rindan ve chiah ani Webster. I puakruk kha dap ru rawk rawk duh lem suh, phawi chhuahna hun pawh pe che mah ila i hmang ngam dawn chuanglo. A bengchheng lutuk. I thluak kha hmang ve ta deuh che, ka mantir kher loh che hian nangmah leh nangmah hi ila in mantir ang ti nia." tin a rawn tawngchhuak a.

Chutia a sawi zawh rual chuan eng emawni hi a ri dup a.
Ka thianpa bawk chuan,
" Nang anga mi dawheh ka nihloh zia i hriat duh chuan thingrem kha hawng la, en rawh." a ti zui lehnghal a.
Eng emaw ni hi a ri khep khep a, chutah Webster chu eng emaw hlau niawm tak hian a sarak chiam a." Zawng phiangsen, Thi nghal rawh, Thi puar rawh.. Tenawm lutuk.."
Chutihlai chuan an ri deuh leng lung a, kut an inthlak ta mai emaw ka ti hial mai.
A hnu deuh ah chuan ka thianpa chuan chang fak hian, "Webster, khatia hmeichhe nau vei anga rak chul lo khan i ka reh zau tak kha chip hmak la la i thutna ngaiah khan thu leh phawt teh. Kawlhrawn chhuah hlek suh ang che, tuna i dinhmun hi han chhut chiang la chet chhuah na chi ani lo tih i hre thei ang. " a rawn tichhuak a.
Webster chuan beidawn hmel deuh hian, " Burnley, A tihngaihna tak a awmlo anih hi. Setana antih hi ilo ni mial lo maw?" a ti ta ngawt mai a.
Ka thianpa chuan," Ka nih loh vek pawhin ka pa te nen chuan inchhungkhat hnai an ni hial ang." tiin hawihhawm deuhin alo chhang a.
" Caldwell, Lo chhuak rawh le, ka lo theihnghilh hmin der tawh che alawm le..." an tih chhunzawm lehnghal a.
Chutianga ka thianpa'n min rawn koh takah chuan kei pawh chu ka tawmkuk atang chuan ka chhuak zui ve nghal a.
Thutkhawmna pindan a ka luh chuan ka thianpa chuan Webster chu a puakruk hian alo tin reng tawh a. A kut lehlam ah chuan eng emaw ni hi a hum a, a ke bulah chuan kawrfual, Webster-a kawrfual ni ngei tur hi a awm bawk a, chuan thing atanga siam thing thingrem bawm tereuhte hi alo let ngat bawk a. A chhung velah leh chhuatah te, Kawrfual ahte chuan maimawm tereuhte te hi anlo awm teuh bawk a.
Webster-a lah chu piah deuh thutthleng ah chuan lungawiloh hmel tak hian alo thu tum bur a.
" Caldwell, hei, kan thianpa hi i puakruk khan lo veng lawk teh aw, ka maimawm khawi ho hi an bawmah kan thun lehlawk ange." ka thianpa chuan alo ti a. Keia pawh chuan ka puakruk chuan Webster chu kan tin ve mai bawk a. Ka thianpa erawh chuan chhuat a maimawm te reuh te te vak chak deuh deuh ho chu a mankhawm theih ang ang chu aman khawm zung zung a, thing thingrem bawmah chuan khungin a chhin leh hmak a. Mahse maimawm te chu an vah chak em avangin a man hnem lo kher mai.
Chutih lai vel chuan kawngkhar pui chu lo inhawngin chhiahhlawh naupang Richard-a chu arawn dak a, ka thianpa chuan lo bia in,
" Richard, rawn luhtir nghal rawh."
Richard-a chu chhuak lehnghal in reilo te ah Police Uniform inbel pahnih hi anlo lut zui nghal a. Chutah Webster-a chu kutkawl an rawn buntir a, Webster-a lu lianpui chu thluak a awm tam tawklo ani tih hriat tak mai hian a thle luk luk a, tan khawh pawh alo tum lem chuanglo.
Tichuan Police te chuan pindan atang chuan an hruaichhuak ta a.
Thutthleng ah chuan thu in thil thlen dan chu hriat chak tak mai hian ka thianpa chu ka thlek vawng vawng a. Ka thianpa erawh chuan a thingrem bawm te chu keng sawnin, thutkhawmna pindan sir kil a Almirah hlui tawh tak pawhdawh chhungah chuan a thun daih a. Chutah thawveng tak mai hian ka lamah lo pheiin ka hmazawn chiah a thing thutthleng ah chuan a thu awn duai a, muangchang hian a kawrchung ipte chu a zen a, chutah a Cigar chu phawrhin an tan zuinghal a.
" Thianpa Burnley, Eng thil nge lo thleng ta hi? Zungbun chu..." ka tih lai mek chuan ka thusawi chu a lo pawtchat a.

" Thil ho te maw le, Caldwell, kha thingrem bawm chhungah khan...ka.." a tih lai chuan a thusawi chu ka lo pawtchat ve thung a. Rang tak hian, " A tir atang rengin maw le.." ka lo ti vat a.

Muangchang hian a Cigar chu an hip vang vang a, chutah an maimitchhing leh diar diar phawt a.

" Ni ang chu, ka vanneihna vang nge ka hre chuang lo na in, kan Webster thluak thawl a kha kan zungbun bo hma daih atang tawh khan ka lo chhui sa hrim hrim tawh a. A sual rawngbawl dan hi pui tak mai ania, a thluak athawl ang bawk hian rilru thatna reng reng hi a pai ngailo bawk. Nang pawn i hria anga, a fin kher rek avangin pitar hausa tak nupui ah anei a, an in nei fel awrh tih in a nupui chu a boral leh mai si a, a nupui boral dan pawh hi sawi neuh neuh atam em kha. A nupui rosum zawng zawng khawm vek mahse pawisa khelh hrat ve tak anih avangin a tunah phei chuan neih engmah anei tawhlo tih thei ani.

A chanchin kan hmuhtheih na hmasa ah pawh America khawmualpui atanga an umchhuah thu te kha ania.
Chutiang khawp a misual chuan a nun siamthat ai mah in anun dan ngai chhunzawm zel chu awlsam ati zawk ani ta hial ve ang. Tun kum hnih chhunga Watford leh a chhehvel a ruk ruk leh tualthah thu tam tak thleng pawh hi a bultum tu chu he kan misual Webster- vek hi ania, mahse a fin phakar em avangin a hming hi alang ngai lo ang. Mahse kei chuan chik tak a ka chhui avang chauhin amah hi ka hre chiang a, chuvangin arukin ka chhui zel a, vanneih thlak takin Mrs.Blackwell in min han chhawr hlauh mai hi chu a lawmawm ka ti khawp asin.
Mrs.Blackwell-i pindan an rawk tum hian amah pawh a tel ve nghe nghe a, paruk lai an ni a, a thurualpui te tawmkuk pawh Watford Police ten tunah hian an luhchilh mek ta ve ang.
Mrs.Blackwell-i khualchhawn ah a thurualpui te zinga pakhat a tang hlauh mai a, mahse an thil duh ber chu a duh anga hma a a rawn ruk chhuah theih siloh avangin Webster-a thluak thawl a hi a che ta ruak ruak mai ani.
A chhan pakhat chu he Zungbun hi kan Indian sumdawng hausa Suraj Ahmed- hnena hralh leh atum vang ania. Tun thlenga anla hralhlo tih leh anla kawl ka rin tlat nachhan chu he kan Indian pa hi tunah hian an ram lama ala haw tlat loh vang ani. I hrethiam thei em aw?
Mrs.Blackwell-i khualchhawn chuan zanreiah Webster te hi kawngka hawn ru in Mrs.Blackwell-i hi hnimhlum hmangin anti mu phawt a, chutah a pindan chu an duhtawk in an singsa vak mai a, an thil duh hi an hmu lawk lo anih hmel khawp mai engkim mai, pindan chhung chu an lipse vek ani mai. Kei pawh a tuk zingah kan sawrkar mi rawih Ray Turner-a khan min rawn ko va, ka va kal ve ngei alawm.
Mahse vanduaithlak tak maiin an khualchhawn ber a chu Webster-ate rual chuan alo kalbo ve daih a, eng ka ang thei biklo anih kha.
Mahse Mrs.Blackwell-i te thenawm a an chhiahhlawh tlangval pakhat in chung misual te chu a hmuh thu min hrilh a. Bakah an Motor chuanna number alo chhinchhiah tel kher bawk nen. Tichuan tun hi kan thleng ta anih hi.
A pawi lo khawih tawhna avang ngawt in han man mah ila, Zungbun a ber an dahna ka hriatloh avangin tihngaihna tak a awm lo a, zungbun avangin ka chhui tih a hriat phei chuan rang takin ati riral ngei ang. Mrs.Blackwell-i pawh hian Zungbun chungchang tak hi chu mipui hriat aduh vaklo na in kan Chanchinbu ah hriatloh theihloh in an puangzar ta si a, chuvang chuan ka hmanhmawh ang bawk in Webster-a chu a hmanhmawh ve dawn tih ka hriat tlang avangin Zanin khan lo kal turin ka ti ta anih kha.
A lo kal duh nan a chanchin tuihnailo tak tak ka sawikhum hrep a, fing phakar viau mahse a thluak hian ka thluak a man phak thlawt loh avangin alo kal ta reng anih kha.
Alo kal ka rin avangin Richard-a kha Watford Police hnen lamah ka tlan tir ta vat a, anlo thlen hun lah kha ruahman lawk ang chiah chiah.
Webster-a khan a thurualpui tumah a rin zawhloh avangin aman akawl ka ring tlat a, a pindan ah pawh a hnutchhiah ngam ka ringlo bawk a, ka rin dan pawh alo dik chiah anih kha.
A tana ka hnawksak em avangin min kahhlum mai pawh a pawitilo tih ka hre reng a, chuvangin ka puakruk pawh ka peipawn reng a, a rilru lak pen nan a chanchin ka sawi kual duah a, kha thingrem te ah khan chung a pawikhawihna te chu dah vekin ka insawi a. Mahse Maimawm hlir in ka thun khat vek a. Webster-a hian maimawm ahlauh zia ka hriat tawh avangin kan thenawm rannung lam zir mi Dr.Terry Erwin-a zar ah Costa Rica atanga alo hawn maimawm chikhat ' Plesiometa Argyra' ka neih phah a.
Kha thingrem kha abula ka thehthlak lai khan a hawng ngei dawn tih ka hria a, ka lo in ring sa ren a. Chutah amal chunga dah in a hawng ta ngei a, a hawn rual rualin maimawm ho chu anlo chhuak nghal a, a hlauh em avangin a buai vek a, a malchunga atihbuak avangin a kawrah te, a kekawrah te an vak darh nghal a, thin thlak atumna lamah vannei thlak takin a kawrchung chu a phelh hlauh a, chu chu remchangah la in rang takin a kawr chung chu ka lo phih thlak sak vat a, chumi rual chuan ka puakruk ka phawi nghal a."

Chu veleh ani pawh chuan ka thil tih dan chu arawn hre chhuak ve chiah a, mahse a tlai ta lutuk ani. Tan lak tuma a puakruk chuh atum ve meuh chuan ka puakruk in ka lo tin reng tawh a. Chutah a thinrim bawk si, a hrilhhai bawk si chu a nuihzatthlak kher asin. Phur fahran lo hian thutthleng ah chuan ka thuttir a, Ka lo rin ang ngeiin a kawrchung ipte ruk chhunglam thuahna ah chuan zungbun chu alo awm ta ngei ani." a ti ta a.

Kei chuan ring fahran hian," Nalh lutuk.." ka lo ti deuh hluai a.

" Mrs.Blackwell-i chu a van lawm dawn em.." ka tih lai mek chuan rawn thu hnaiin a kekawr ipte chu a zen rak rak a. Chutah zungbun ropui chu rawn phawrh chhuakin ka hma zawnah chuan an lek kang a.

" Caldwell, kei hi ania lawm chu, hetiang zungbun hi chu hmuh tur a awm zen zen lo ania, uluk tak khan han thlek kual teh. Hei ngei hi anih hi malsawmna leh anchhia keng zungbun, ' Devils Ring' ngei chu." a ti ta a.

...THE END....