THE CASEBOOK OF CHESTER BURNLEY : THE MISSING LADY VICTORIA (Notebook 3)

.
Novemver thla chawhnu lam atang chuan khua a vawt tawh in pawnlam ah phei chuan vur a tla deuh seng seng reng a. Kan Brookdene Avenue pawh chu a vawt tha kher mai.

Kawtthler lehlam phei chu thlasik chhum leivak azin nasat avangin kan pindan tukverh atang phei chuan a hmuh theihloh hial a.
Chuvang chuan kan tukverh puanzar te pawh chu kan zar phui deuh thap reng mai.

Chester- chu thutthleng dupah chuan nizan lama a lehkha hmuh chhiarin a thu kual rum mai a. Chu lehkha chu nizan lamah khan en pawh a en miahlo nangin, tukin zingah lem a chhiar nawn zing tawh kher mai. A hna lam chungchang anih ringin ka tibuai duh lem hlei lo a, a ep chiah a thutthleng sei ah chuan ngawi reng hian chanchinbu ka chhiar ve malh malh reng a. Mahse zinglam chanchinbu chu a ngaihnawm lo na ngiang mai.

Tuilo tak chunga chutia chanchinbu ka chhiar lai chuan ka thianpa chu an thu tha a, lehkhathawn rawn lek chhuak chung hian, " Hetiang thu mai mai chu ka buaipui peih zawng pawh anilo." a rawn ti chhuak a.

Dawhkan chunga chanchinbu thehthlak pah chuan, " Eng lampang nge ni a? I la urhsun viau emaw tia." ka lo ti nghal vat a.
Chester chuan," Lak urhsun tih lamah phei chuan urhsun tak meuh meuh e, thil pawimawh em em chu ani alawm, mahse hetiang kan Lal thisen kai ho chhungkaw thu hla ah hi zawng inrawlh loh hram hi ka duh thin." a rawn ti leh a. Kei chuan," i hming thatna tur pawh ani mai thei asin, a englam pang hawizawng nge ni hrim hrim a." tiin ka lo chhang a.

Ani chuan chu a lehkhathawn ken lai chu ka malchung ah hian arawn theh phei a. " Han chhiar ve phawt la maw le, enge i ngaih ve dan reng reng." a ti zui nghal a. Chu lehka chu ka'n chhiar ve a, hetiang hian alo inziak a.

HURLSTONE, BURNHAM AVENUE. BEACONSFIELD. Nov. 21th.

Ka mamawh khawp mai che, naktuk zing dar sarih leh minute sawmli panga ah i pindanah ka lo kal ang. Hmanni lawk a i chinfel takte han thlir khan thil pawimawh lutuk mai, a aia pawimawh leh chuang awm thei tawhlo turah pawh rinngam ini ang tih alang a ni. A hunah i pindanah lo awm ang che.

Sir. Charles Carlton, COUNT OF HURLSTONE.

Kei chuan, " Hei hi thil mak angreng tak, hriatthiam mai phak loh anih hi maw le. Engnge a awmzia niawma i rin?" ka'n ti a.

Ani chuan," Han chhui zui theihna tur hmanrua ka la nei tlat lo mai. Kan mi hausa chhungkua buaina hi chu sum leh pai hi ani deuh ber tlangpui, thurochhiah eng eng emaw hi an nei kual duah thin a, chuti lam hawizawng pawh chu ani mial mai thei. Caldwell, Kha lehkha atang khan engnge a hriat theih i rin?." a han ti a.

Kei chuan ngun taka lehkha enkual chung hian." a sir tlang kir deuh dan atang hian note bu atanga pawhthlak ngei ani tih a hriat theih, a lekha hrim hrim atang pawh hian note bu hlai ve tak ani ngei ang." kan ti a.

" Ni e, Hmanhmawh taka ziah leh pawhthlak anih kha, Ding kun chungin dawhkan ah a ziak zung zung a, a ziah zawh rual a thlep nawk nawkin envelope ah a thun a, kal pah in a kawrchung ipte chhunglam ah a dah nghal pawh ani ta hial ve ang." tiin a sawi duah a.

Kei chuan rang tak hian, " Hmanhmawh taka ziah a, engtia..." ka tih lai mek chuan minlo chhang a.

" Thianpa Caldwell, a ziaktu Count hian lehkha ah khan a hming ziak kherlo mahsela, A kutziak kha chik taka i en chuan lehkhathiam tak kutziak ani tih a hriat theih a. A chhan chu a kutziak kha pherh deuh angin alang na a, mahse a nalh ru tlat. Bakah lehkha sir tlang lehlam pawhthlakna hnu kha han enchiang leh deuh la, duhai chuan muangchanga pawhthlak a ang lo tlat. A tet deuh ni niai emai. Tin, lehkha inthleh dan kha i hmu anga, a kikawi nuaih bawk. Thleh tawp tawp tih a hriat lutuk. Chuvang chuan chutiang khawp a hmanhmawh chuan a ziah zawh ruala a kalsawn pah in a kawrchung ipte ah a thun ngei ang tih ka ring tlat."

Kei chuan chutia ka thianpa ina asawi taka zarah chuan lehkha chu uluk fahran hian kan en nawn leh vel a, ka thianpa chuan a sawi dik ngei ka ring leh hnuhnawh a.

" A dik chiah, tuna i sawi ang chiah khan ani ngei ang? Chuan a bak ala awm em." tiin kan zawt lehnghal a.

Ka thianpa chuan," A bak zawng chu mah kan zawt chhunzawm tawh mai dawn nia, Caldwell, ka bul ah hian lo insawn phei la, kha laiah khan kan Count chu han thu teh se, chu kailawn a rawn chho chu amah ani ngei ang, a hun tiam pawh a vawng dik khawp mai, mi pawimawh chin nge nge." tiin an sawi duah a.

Chutia asawi lai mek chuan kailawnah chuan muangchang taka penri hi alo chho chhat chhat a, chu tah kawngkhar chu a rawn kik a.

A kawngkhar kik ri chuan beng a verh bik zak mai. Chester chuan," Rawn lut rawh," a lo ti a.

Pa pakhat, feet ruk leh inches li tling ngei tur hmel pu, dar pharh hlai deuh mai, fuke sek tha em em mai hi alo lut a. Lo hmu fo tawh thin mah ila hmaichhan ah tak chuan tun hi ka vawikhat hmuhna ani.

A in cheina chu uluk in felfai viau mahsela a hmel erawh chu a pawrin a rilru a hah hmel hle a.

"Mr.Chester Burnley?" a'n ti a. Ka thianpa chuan lu alo bu nghat a. " Count, khawngaihin thu rawh." tiin thutna a kawhhmuh zui nghal a.

Count chu thutthleng sei ah chuan zawi tak mai hian an thu deuh hnawk a. A kiu pahnih chu a khup ah nghat in a kut pahnih chuan a hmai a hup a, chutichuan rei fe chhung chu a thu ngawi reng a. Ka thianpa pawh chuan nawr lui bik lo in, a sawi tur chu amahin a a duh ang a asawi hun chu hahdam hmel deuh hian a nghak veng veng a.

Rei tawk tak chutianga kan ngawih thap hnu chuan kan In lengpa chu muangchang hian arawn hawi chhuak a, ka thianpa nen chuan min han melh tawn zauh zauh a, bah deuh nuaih hian,

"Minlo ngaidam rawh u, ka rilru a buai em ani, Mr.Burnley, ka buai takzet ani.."

Ka thianpa chuan a thuthmun an siam rem te te a, chutah, " Count, khawngaihin thil awmdan chu min han hrilh ve teh le," tiin alo chhang a. Chester-a hmel chu ka'n en a, nawhchizuar hlun, pangti mawina in a tlansan tawh, dawrtu hmu lova rei tak lo awm, dawrtu hmuh avanga phur tak chunga an phurna thup tuma an han in hmuam-up vel tur hmel te min hriatchhuah tir a.

Kan inleng pa chuan," Mak tak ani, Mr.Burnley, a mak tih mai bak chu sawi ngaihna ka hre lo! Ka sam te pawh a tuak nghal vek lo hi chu mak ka ti zawk ngawt mai, i hre tawh thin ang maw? - William Lewis- hi, American sumdawng hausa lar zet mai kha." a ti a.

Ka thianpa chuan," William Lewis?...hre lutuk e, ei relna lampang bungrua siamchhuaktu kha, Investment lam pawh..." a tih lai mek chuan Kan inlengpa chuan lo pawtchat in.

" Ni e, Mr.Burnley, a fanu hmeltha leh duhawm tak Victoria Lewis nen a kan inneihna pawh ilo hre tawh ang chu." a lo ti a. Ka thianpa chuan hria tih nan alu alo bu nghauh a. " Mr.Burnley, thil awmzia tak chu, chu ka nupui chu tunah hian a awmna chin kan hre lo ani. Chu chu tuna ka rawn kalchhan chu ania." tiin an sawi zawm leh a.

Chu thu chu ka thianpa chuan ngawi rengin hlim hmel pu lek lek hian a ngaithla a. Kan inlengpa bawk chuan a thusawi nemngheh nan a khup a beng thla zen bawk a.

Ka thianpa ina," Chuan." an tih chuan a thusawi lai chu an sawi chhunzawm leh a.

" Ni e, Mr.Burnley, tunkar liamta zirtawpni khan Miss.Victoria Lewis nen chuan kan in kutsuih anih kha. Kan in neih hma emaw, kan inneih hnu ah pawh engmah intihthiamlohnaemaw lungawilohna kan inkarah engmah a la awmlo tih hi ka sawi tel hmasa duh bawk.

Chuan chutianga kan khawsak hnu nimin piah ani ang chu, Pathianni khan kan chhungkua ho leh thenrual tha te sawmkhawmin kan in ah zanriah kan eikhawm a..
Aw, ka hria e, a chipchiar thei ang berin kan sawi ang e.

Pathianni chawhma lam kha chuan thutkhawmna pindan ah hun kan hmang zo a tih theih hial ang, chawhnu lamah erawh chuan kan in kawt zawl ah intihhlim na te neiin hun kan hmang thung a. Mahse kei leh kan mi sawm mipa thenkhat erawh chu kan awm rei lemlo. Sumdawnna lam chungchang thil sawiin pindan ril lamah zanriah ei dawn thlengin kan thukhawm thung. Inchhunga kan luh leh lai chu tlailam dar 2:00 bawr vel ani a, chuta tanga chhiar chuan thutkhawmna pindan ril ahchuan dar 5:00PM thleng kan awm. Dar nga tih ka hriat theihna chhan pawh, kan in enkawltu pakhat Mrs. Wilson-ina zanriah eitur a min rawn koh lai tak chuan banga sana lian inkhai chu dar 5:00PM a ri tih hriat nan a in khawngri tlat ani, chuan, min koh hnu lawk chuan keini pawh chu kan phei ve nghal mai a. Chaw eikhawmna pindan a kan luh chuan ka nupui chu ka hmu ve miahlo a. Mahse mak pawh ka ti lemlo, engemaw thil tiin abuai lawk anih ka ring zawk a. Mahse zanriah kan kil zawh hnu pawh a hmuh tur ala awm loh cheu avang chuan mak ka ti ta deuh hlek a, a nuamsamlo anga kan pindanah a lo han mu hahdam te anih ringin ka han chho a. Mahsela mut pindan ah pawh alo la awmloh cheu avang chuan kan in enkawltu leh khualchhawnte chu ka'n zawt a, mahse anni pawh chuan a awmna chin anlo hre mai bik lo.

Chutah chuan kei pawh chuan mak ka ti tawh hle a, a ruk deuh hlekin a hmeichhe thiante, kan in tual a a awmpui thenkhat te chu kan zawt hlawm leh a. Mahse anni pawh chuan anlo hre bik lo mai nilovin zanriah kil lai a a awmloh avang chuan mak anlo ti hle zawk lehnghal. Chuta tang chuan chhungleh khat te bakah ama pa ngei te pawh hrilhin a kan han zawng a, ama pa ka han tih nachhan kher pawh, Mr.Burnley- i hria anga, an pafa chauh a khawsa an nih vang ania. Chuan, mipui lam hriat ve atana chi kantih loh avangin kan zawnna lamah pawh hian kan fimkhur khawp mai. Chuvang chu ania nang ka rawn pan ngat na chhan che chu. Watford Police lamah thlen ilang chuan chanchinbu lamah hne-awm khawpin an chhuah leh chuaih chuaih ang chu." a ti a. Kan inlengpa ina duhtawk a a chham lai chuan Chester- chuan ngun tak in, ngawi reng hian alo ngaithla a. " Tlailam dar 2:00 leh Dar 5:00 inkarah i nupui hmeltha tak chu a bo tihna ani maw." ka thianpa chuan alo sawi zawt a.

Count chuan bah deuh nuaih hian," Aw, ani mai ang chu, ka thian thenkhat te nena inchhunga kan luh leh dawn lai kha chuan ala awm alawm, hmeichhe thenkhat te nena an in biak buai em avangin ka va be ta lemlo anih kha." tiin alo chhang a.

Ka thianpa chuan, " i kalsan dawn lai emaw in hmel hlimlo emaw eng emaw thil diklo awmin i hria em?" tiin alo zawt leh a.

Kan inlengpa ina zawi raih a," aih, awmlo." ti a a chhan zawh rual chuan, " Anih leh lamlian lamah emaw chulaia awmho zingah emaw chuan hmel thar emaw, hriat ngailo rinhlelhawm ang chi deuhte i hmu mial lo maw." tiin ka thianpa chuan an zawt zui lehnghal a.

Count chuan a chhang lawk lo a, eng emaw ngaihtuah niawm tak hian a thu kun ngul a. Rei vaklo hnuah chuan rawn hawichhuak in,

" Tak a, Mr.Burnley, khatia kan zawn buai hnu lam deuh khan in ngaihtuah buai taka ka lehkhachhiarna pindana ka awmlaiin ka ni fanu tleirawl Emily- a rawn kal a, khatia keini ho inchhunglama kan luh hnu lawk khan kan in hmalam tualzawl hungna Gate pawnlam lamlian ah khan Toyata Car pawl a ding reng ani awm a, a darthlalang chu rawng thim lam anih thu leh a driver thutna lam darthlalang chu tlemte a inhawng na in achhunga thu erawh a hmuhtheihloh thu asawi a, chuan ka nupui pawh chuan chu motor chu a hmu mai nilovin motor lam chu a hawi zauh zauh thu pawh asawi a, zanriah kil tur a inchhunglama an rawn luh pawh chuan ka nupui chu a hmuhloh thu bakah rinhlelhna emaw thil diklo emaw a awm arinloh thu te asawi." a ti a.

Chutia a sawi lai chuan ka thianpa chuan ngunthluk tak mai hian alo ngaithla a, a sawi zawh hnu pawh chuan eng emaw ngaihtuah zui niawm tak hian chhuat lam chu a bih ngur ngur a.

" Mr.Burnley, chung zawng chu ka hriat theih chu ani a, kan zawn dan erawh chu a saisa deuh nuaih avang in han sawi tur teh vak a awmlo." tiin an sawi zawm leh a.

A melh ngai melh reng chung hian ka thianpa chuan, " Engtik atanga inhria enge in nih?" zawi fahran hian a ti a.

Count bawk chuan, "Thla riat vel chu kan inzui ve hman anih chu, a pa hian an Company hi England lama an huang rawn zauh atum a, chumi chungchang velah chuan kan Company nen thawhho kan tum a, kan Company aiawh a New York lama ka va zin tumin kan in hmelhriat a, a hnu ah apa in London lamah a rawn hruai a, Mr.Burnley- i hriat angin tunah chuan an sumdawnna pawh helaiah chuan a lar pawl anih tawh hi, chuan vawi tam tak kan inhmu a, kan in hual, kan innei ta anih hi." tiin a chhang a.

Chutia asawi zawh rual deuh thaw chuam ka thianpa chuan zangkhai angreng tak hian, " A lawmawm e Count, theihtawp kan chhuah anga i nupui chu kan hmuh leh in beisei phawt mai teh ang." alo ti var a.

Chutia asawi zawh hnu chuan Count pawh chu a thuthmun atang chuan a tho chhuak a, ka thianpa chibai pah chuan, " ka lawm viau ang Mr.Burnley, min zawn hmuhsak leh ngei hi ka ring tlat ani, chanchin ka lo ngaichang reng ang." a ti ve ta a.

Muangchanga kawngkhar lamah chuan pheiin min chhuahsan ta a.
Kan inlengpa chhuah hnu chuan kei chuan, " A mak kher mai, ngaihdan eng emaw inei thei em?" tiin ka thianpa chu kan zawt zui nghal a.

Chester- chuan min chhang lawk lo hian athutna sir dawhkan te a Cigar chu la in an tan leh te te a, a hmui a fawp a, tui tih hmel tak a an hip vang vang hnu chuan,

" Caldwell, A dik chauh chuan he thil hi thil ho tak, chhui ninawm tak niin ka ngai." a ti daih a.

" My Dear Burnley!"

" Khatiang deuh hlek kha chu ka chhinchhiahna bu-ah a awm teuh mai, mahse ka sawi tawh angin khatiang teh thut a thil awm chu a awmlo. Nichina ka thu zawh te a chhanna khan ka ngaihdan a nemnghet ta vek a ni. Thil lo thleng atanga kan hmuh theih hi thil pawimawh tak ani. I thingpui inlai ah Tho lo tla palh ta sela, a Tho a ngei chu i thingpui no a i hmuh chuan atla ngei a ni tih i hrechiang lehzual ang." te chu ala ti ta deuh deuh a.
Kei chuan," Mahse i hriat zah ka hriat ve tho si kha?" ka lo ti a.
Chester-chuan,"Tunhma a thil lo thleng tawh ka hriat ang kha hre ve hek lo che, chung thil hlui chu kei chuan ka chhawrbawk ta tlat a ni. Hetiang deuh chiah hian Greenford-ah kum engemawti kaltaah khan a thleng tawh a, chutiang deuh bawk chu Liverpool-ah a hnuah a thleng leh a. Chungte nen chuan a in kaihhnawih tlat ani." tiin an sawizawm leh a.

Chutia asawi zawh chuan ama mutna pindan lamah a lut zui ta daih a, mahse reilo te ah a rawn chhuak leh vat a, kawrchung lum lian tak hi a rawn ha chhuak a,

" Caldwell, pawi itih loh chuan kan teichhuak lawk ange, chawhnu lam chuan ka rawn haw hman ngei ang, chawchhun chu minlo eisan mai dawn nia." ti a, a chhuak ta nal nal mai a. Chutia a chhuah hun chu zinglam dar riat (8) pelh hnu tawh ani a.

Keimah in Tukthuan ka ei a, tihtur ka neih loh em avangin ka lehkhabu lei thar Web Of Deceit, Glenn Meade- ziah chu thutthleng a thu mu chung hian ka chhiar mai mai a, khua avawh em avangin Electric Heater tinung in ka ai pah bawk a, chutiang chuan nileng deuhthaw in ka lo awm mai mai a.

Chutianga ka awm chu ka lo muhil sek ani ngei ang, kawngkhar ri rak ka hriat chuan ka harh zawk a, ka thawh kan lai mek chuan ka thianpa chu a rawn lut a, a hmel chu ka'n en a, a cher pangngai rengin a la cher thuak a, mahse a mitmeng a hlim em mai a, a ngaihdan kha a dik ani ang tih ka lo ring ringawt a. Chutih lai chuan banga kan sana lian inkhai chu kan en a, tlailam dar li leh minute sawmthum panga alo ri mek a.

Kawngkhar bul ah chuan a kawrlum chu ka thianpa chuan a khai a, zangkhai vah hian ka lamah chuan arawn phei a. Ka sir a thutthleng chu rawn pawt hnaiin hnai fe ah hian Electric Heater chu a rawn aia.

Kut nuai nawk nawk chung hian ka hnenah chuan," Kan Count chu arawn la thleng lo ani maw, Traffic jam avangin ke in ka rawn kal nek alawm le, khua lah chu a vawt nek lehnghal a." a ti zui nghal zat a.

Kei chuan," Rawn la kal lo aniang, enge i va chhuahvah na chu?" tiin ka lo chhang a. Ani chuan, " engkim a tha vek ani ber mai, Engatinge Kan Count pawh chu a rawn la lan loh cheu chu le, Traffic Jam vang pawh ani mai thei...Uai, Chu le! A ke pen ri ani ngeiin ka ring.." an tih zawm nghal zat a.

Pindan panna rahkha chu a rawn ri chho rak rak a. Chutah kan Count pa chu kawngkhar ah chuan a rawn lut zui nghal a.

Kan bul lama arawn phei lai mek chuan ka thianpa chuan, " Count, Ka mi tirh khan arawn hmu che a maw." tiin alo zawt a.

Count chuan, " Hmu e, I thil rawn sawi kha ka ngaihtuah phak bakin a mak ani," tiin alo chhang a, ka bulah chuan arawn thu zui ve nghal a. A kut in a chal a dawm a, zawi angreng tak hian,
.
" Mualphona ani, hetiang a mualphona hi ka la tawng ngailo, ama pa ngei pawh a ti mualpho hle ani." a han ti a.

Ka thianpa chuan," Thil awm palh ve liau liau ani Count, i rilru tur ang chu ka hrethiam khawp mai, kan nauvi chet dan kha a pawi viau na in tihdan danga tih theih dan aneih ka hre chuang tlat lova, chubakah amah hringtu, a nu a awm tawh lova, khatiang thilah khan thurawn han pe tu tur anei lo a ni." a ti a.

Kan inlengpa chu a ngui bur ni berin a hriat, tukin zing ai khan a hmel pawh a pawr zawk lehnghal.

" Mahni tana mualphona dah duhloh vang chauh ani, Vantlang hmuh a mawi tumna thil ani," a han ti leh a. Ka thianpa chuan, " Hetiang thil alo thlen takah hi chuan kan nauvi tan chuan ngaihdamna rilru i put theih a tul ang, thil thlak danglam dan a awm tawh silo a," a han ti leh a. Count bawk chuan ringlo te hian, " Ngaihdamna rilru zawng ka pu ngawt lovang, a dik chauh chuan ka thin a rim asin, minti mualpho nasa em alawm." ala ti tlat a.

Chutiang thu an han sawi vel chu kei chuan mak ka lo ti khawp a, engmah hriat ka nei ve der silo a. Chuvang chuan hrilhhai tak in an pahnih chuan ka entawn sek a.

Chutah ka thianpa chuan, " Kawngkhar hmehrik dar an rawn hmet tlat in ka hria, chu ke pen ri pawh alo rik tak chu." a ti a. Chutia a sawi rual chuan kan pathum chuan kawngkhar lam chu kan hawi nghal thap a.

Kawngkhar ah chuan nula pakhat leh tlangval pakhat hi anlo lut ve chiah bawk a. Chester-chuan, " Count, Mr. Mark Walker leh Mrs. Victoria Walker- hi han hmelhriat ve teh. Kan pi zawk hi chu i hmu tawh in ka ring." a ti ta mai a.

Chumi te hmel a'n hmuh chuan kan inlengpa chu a thu ngil zawt a, a hmel chu mak tihna ai mah in thinrimna hmel a ang zawk mah.

A kut chu a malchung ah chuan a hum ruh tih pawh ka hmu.
Nula chuan Count chu a pan vat a, a hma ah chuan a ding a, mahse kan inlengpa chuan melh pawh alo melh duhlo, hnuailam a melh lui tlat a, a dik chauh chuan a thinrimna pawh chu a awm thawkhat ve viau tho mai.
Rei vaklo chu nu chu kan Count hma a a din hnu chuan a rawn luhpui pa chuan Chester-a thutna bul thutthleng seiah chuan a kuah thu ta a.

Eng emaw chen chu sawi tur hre lovin kan ngawi thap a. Mahse kan nula-i chu rawn tawngchhuak in, " Charles, i thinrimna chu ka hrethiam khawp mai," a han ti lehnghal a. Count chu hawi pawh ala rawn hawi chhuak lo, la kun tlat chung chuan chang deuh hian,

" Khawngaih takin ka hnenah chuan ngaihdam min dil lul suh." a lo ti khauh va.

Mrs. Victoria chuan, " Ka kalsan hma che in engemaw chu ka hrilhfiah ngei tur che niin ka hria a, engmah hrilh silova ka chhuahsan tak mai che avangin ka thiamlo tawp tih chu ka hria, mahse Mark-a hmel ka'n hmuh leh hian ka awmdan ka theihnghilh zo va, enge ka sawi a, enge ka tih pawh ka hre ta lo mai a ni. Ka thidang buailo kha mak ka inti zawk hial mai." a han ti a.

Chutah reilo te an chawl zawk a, a rawn luhpui pa lam chu an hawi a, chu pa chuan alu alo bu zauh a.

Tichuan a sawi chhunzawm leh ta nghal a. " Ni e, Thil awmdan chu a bul atangin kan sawi ange, Mark- nen hian New York-a University a kan luh laiin kan intawng a, chutah chuan kanlo induh in kanlo inhual ta hial a. Mahse chumi hnu lawk chuan Mark-a chuan US Army a zawm a, chutianga Sipai a zawm hnu reilo te ah chuan World Trade Center chu bomb chhiat ani a,

Heta a bul tumtu ber Osama Bin Laden- leh a thuihruai te chu Afghanistan ah an tawm a, chumi luhchhuak tur leh nuai chimit tur chuan President George.W.Bush- chuan Sipai te chu Afghanistan lamah chuan a tir liam ta a.

Hetia Afghan-a kal tur zingah hian Mark-pawh hi a tel ve a, chutih lai chuan kan lungngai dun kher mai. Chuan Mark- hian ka rawn haw veleh ka rawn nei ang che a ti a, a thu chu ka zawm thlap mai. Mahse a kal hma lawk chuan, ' Engahnge ka inneih mai lohvang? Ka nupui inih chuan ka thla amuang takzet dawn a, ka lo kir leh hunah chuan ka nupui inihna hi ka rawn sawi mai dawn a, tunah chuan innei lo ang thovin kan awm anga, Pathian hmaah chhia erawh chu kan chham dawn nia' ati a. Kan belh leh lawk anga, Mark- hi chhungkaw mumal neilo leh fahrah ve tak ani a, chubak ah khawsak harsa tak an nih avangin ka pa hian kan inkawp tirh atang reng pawh in a duhlo sa tawh a.

Tichuan kan innei a, kan inneih hnu lawk chuan Mark- chu Afghanistan lamah chuan an kal zui ta nghal a.

Mahse a kal hnu reilo te ah chuan Mark-a te chuanna Helicopter chu Taliban ho chuan an kap thla tih leh a chuang ho zawng zawng pawh an boral thu ka hre ta a.

Chumi thu ka'n hriat chuan awmngaihna ka hre ta lova, engmah ti thei lovin ka let ta reng a, chuta tang chuan ka taksa hi a chak lovin ka dawldang em em a, ka pa phei chu a mangang in a buai kher mai, chutianga kum khat vel zet, Mark-a chanchin hre hlek lova ka awm tak avang chuan a thi anih ka ring nghet ta a, tichuan hun alo rei a, ka pa sumdawnna lamah chuan a kul ataiin ka in hmang chho ve ta zel a, chutianga ka khawsak chhoh lai chuan Charles Carlton- nen hian kan inhmelhriat ta a.

London-a kanlo kal hnu chuan Inneih kan tum ta a, chutia inneih kan tum takah chuan ka pa pawh a hlim khawp mai a, kei erawh chu ka hlim vak chuanglo. Ka thinlunga Mar-an hmangaihna chi a tuh tawh chu tu hmelah mah hian a par chhuak nalh tak tak thei tawh tlat lo. Chutiang chu thil awmdan chu nimahsela, ka thiamlo hulhual bik love. Mark-a hi thi tawh a ka ngaih avangin Count Charles Carlton chu ka nei ta a, tichuan inti pachangin nupui tha tak nih tumna rilru nen chuan kut kan suih ta a ni.

.
Nimahsela Pathianni tlaia tualzawl a kan thutkhawm lai khan In hungna Gate pawn lam lamlian a Motor pawl ding reng chuan eng ati tehreng emaw ni ka mit a la tlat mai a, chutah kan hawi phei chuan motor sir a ka lam hawi a Mark-a ding chu ka hmu ta anih chu.

Chutih lai chuan mak ka ti kher mai, Thlarau anih leh tisa anih pawh hrechiang ngamlo chuan ka'n melh nawn leh nghat a, ka rin angin a ral ta riai riai hauh lo mai a; zawhna a khat mitmeng hian mi rawn melh leh ta nghal vei nen. Chutah zawng ka bul vel chu a vir muai muaiin ka hria a, ka tlu mualpho mai dawnin ka hria a, chuvangin thutthlengah chuan ka thu vat a, ka lukhum la thla in ka sam tawn chu ka phelh a, ka khuih vel ta ringawt a. Tlem a ka rilru buai reh deuh hnu chuan ka va en leh a, mahse Motor chhungah chuan alo thu lut tawh a, motor chhung atang pawh chuan che changlo hian rilru nat hmel tak hian min rawn la thlir zui reng a.
Chutah ka han in ngaihtuag thin a, a tihngaihna tak ka hre lo kher mai, a bulah ka va tlan phei tawp dawn emaw ni ka ti a, mahse ka awmpui te ho in min sawi dan tur leh mak an tih tur zia te kan ngaihtuah a, tih chi niin ka hre bawk silo, kan hawikual vel a, mahse tumah chuan Mark-a chu hmu awm pawh in an langlo.

Chutah rilru buai tak chung chuan ka va en leh a, ani pawh chuan ka ngaihtuahna chu alo hrethiam a, engmah sawilo turin min duh tih entirnan a kutin a hmui a'n khawih a.

Chutih lai chuan kan eisiam ten zanriah peih anih tawh thu an rawn sawi a, midang ho an luh mek lai chuan eng eng emaw chhuanlam siamin ka awm khawtlai a, inchhung lama midang zawng an luh vek hnu chuan min hmu an awm nge awmlo tih kan enkual leh te te a, min hmu tur awm ka hmuhloh avang chuan rang takin Mark-a bul lamah chuan ka tlan phei vat a.

Kum tam tak hnu a kan han inhmu leh chu kan hlim kher mai, motor a ka luh rual chuan motor chu ti nungin chak takin kan tlanchhuak ta nghal a. A thlenna hotel ah in nghat in kei phei chuan chumi ni la la a ramdanga tlanbo nghal mai ka duh hial a. Mahse ani hian hun thawl remchang nghah atih tlat vang leh, ka pasal te hian min zawn nasat arin bawk si avangin inchei danglamna tur te angaihtuah phawt a.

Chulovah America lamah chuan ka pa ten min zawn nasat kan rin bawk avang in India lama tlanbo kan tum ta zawk a.

Tichuan Zanin tlaia chhuah kan tum mek laiin hei Mr,Burnley hian min rawn zawngchhuak in a chenna lama leng turin min rawn sawm chhuak ta ani." tiin a sawi a.

A thusawi nemngheh tum niawm fahran hian a rawn kalpui pa pawh chu alo bu nghauh nghauh a.

Chutah kan Count- pa chu rawn hawichhuakin, " Hetiang a mualphona leh kan chhungkaw zahawmna ka ti hmingchhia hi ka thiamloh ani, induh tawk khan tal teh u." thinrim tak mai hian arawn ti a. A thutna atang chuan tho vut in a kalchhuak ta daih a.

Inthlahrun hmel deuh hian kan nula-i chuan ka thianpa hnenah chuan, " a pawi ka ti khawp mai, mahse engmah thlak danglam ka thei tawh lo ani, a thinrimna pawh a awm ka ti hliah hliah." a ti a.

Ka thianpa chuan tha tho tak hian, " kei phei chu ni ila kha ai khan ka thinrim daih ang." tiin alo chhang a.

Chutah nula-i thianpa lam chu hawiin, " kei chuan ka lawmpui daih zawk che u, tikhan tluang takin va kal tawh rawh u." ati leh a.

Chutianga ka thianpa an tawngchhuah chuan anni pahnih pawh chu an hlim hmel kher mai.
Inthlahna chibai min buk a, " kan lawm takzet ani Mr.Burnley, kan hre reng tawh ang che." kan nula-i chuan ati a. In kai rial hian min chhuahsan ve ta nghal a.

" Engtia va hmuchhuak nge maw inih reng reng le, kan Count pa lah kha engtikah mah a lungawi tawh ngut lovang." tiin ka thianpa chu ka zawt ta nghal a.

Min chhang lawk lo chuan athutna an siamrem hmasa te te a, a Cigar tui chi phawrh a, a tan kai hnu chuan, " Thil ho te maw le Caldwell, khatiang ang buaina chi kha chu ka chhinchhiahna bu ah pawh a awm nual tawh ka tih kha." tiin min chhang a.

A bul a thutna pawhhnaih pah hian, " chu pawh lo ni ta se? Motor atang khan emni? Ama ta anih loh vek pawh in man chawia a hawh ani ngei ang a.." kan tih chhunzawm leh a.

" Uai, Caldwell, nangpui hi ka hna ang chi thawk ve ah ithat hi maw le."

" Teh daih chuan a, a engvang ngawt chuan maw?"

" i rin ang deuh kha ani, khatianga America lam atanga rawn kal hmeichhia kha chu an heti duh deuh chawk asin, ka rin ang deuh chiah chiah in thil athleng a. Motor kha ani a hmasa ber chu." zawi fahran hian an ti a.

Keichuan," Motor a? Engti zawng chuan maw?" ka lo ti deuh hu a.
Ani chuan," Ni e, Motor kha ka ringhlel hmasa ber a, kha nu bo ta daih leh an nau ina Gate pawn lama Motor a hmuh atang khan ka chhui tan a.

Watford bial chhung atanga kan Count te in hnaih ber man chawia Motor hawhna atangin ka zawng a, ka rin ang ngeiin Beaconsfield veng tawp ah ka hmuchhuak ta ani. Motor chu kha pa hming ngei khan a in hawh a, a hmun nghak tu pa ka zawh pawhin, a hawh tu chu American lam mi ani, a hmelhmang leh a aw phawi ah te pawh ati ta zel a. Tichuan a address chu lachhawngin a thlenna hotel lamah ka va kal zui ta nghal a. Hotel a Mikhual hming ziahna bu kan en pawh chuan alo dik thlap mai a, tichuan an pindanah kal chilh in, ka han hmu a, chumi hnu ah rawn haw pah in kan Count hnenah mi ka va tir zui ta nghal ani." a ti a.

" Chu pawh chu lo nisela amak ka la ti tho tho mai, mahse...a bul tawp atangin i chhui dik hmasa tlat ani, Mr.Burnley, ilo ropui nasa ngei mai." kan ti deuh chiam a.

Chu ka tawngka chuan ati lawm ve hle ani ang, nasa lo te a nui suk in a Cigar chu an hip zui leh vang vang a.

Chutah zawi fahran hian,
" Mr.Caldwell. Thil ho te alawm le." tiin min rawn chhang a.

..END..