THE BRIDE OF DRACULA : (Season 1) The Land Beyond The Forest : Eclipse (Chapter 20)...

Ramngaw chhahpui hnuaia tlân zel in Nî ina vânzâwl a pelh chuan phaizâwl râi nuam deuh hi a va thleng a.

Khawthlang lam ah chuan cham ruihin a inpharh thla zêl a. Khawchhak lamah erawh chuan tlângdung sâng vaklo hi a in khawh zui a.

Phaizâwl sîrah chuan thingkung a ding thliah thliah a. Tin, Phaizawl piah deuhvah chuan lo neitute chênna niawm tak khaw te reuh te hi a awm bawk a.
Mahse chûng khua te chu kum tam tak liamta a rauhsan tawh ni awm tak hian a hluiin, hrui zám chi te chu in bang leh chungah te chuan a zâm niaih a.

Khaw hawi vel anuamin chulai ram hmelhmang chuan lung ati lêng kher mai.

Vân thiang kûk ah chuan chhûm vâr hi thlûr sungin a kal riak riak a, kâwlhâwk thlawhna hnute pawh a ang lek lek.


Kawlkil tâwp ațanga kawlkil tâwp lehlam thlengin chhûm chu Zebra ințial ang hian a inzawm phei vek a.

Chhim lam ațanga thlifîm rawn thâw chuan Sidar hnah leh phairuang kûngte chu a chhêm ri hiau hiau va, țingțang tum thiam tak țingțang tum ang mai a rimawi ni mai hian a hriat.

Buhpâwl leh pangpâr rimte chu a rawn nam chek chek reng bawk a.

Chûng thil te chu khawhar hmel tak a thlîr zui vawng vawng hian a tlân pêl phei zel a.

Nakin ah chuan kawngpui ve deuh reuh, lian vak lo leh fai deuh hun mai hi a va pawh a, chulai kawng ah chuan tlân lût in, eng emaw chen a zawh hnu chuan mual pâwng deuh lai hi a va pawh a.

Chulai mual pâwng a atlân lai chuan ahnuai zawn piah deuh ruam ah chuan sipai inbei thâwm hi a lo ri a.

A sakawr chu a tur hmanhmawh sauh va, Mual a tlân chhuah dawn lai chuan alam pan a mi sawm rual vêl, leilehna thirkut leh tiang te, ngunhnam te keng chunga rawn tlanchhia niawm tak a hnunglam hawi zeuh zeuh a rawn tlân hi a tâwk a.

Chûng mi a hmuh chuan a sakawr chu tiding  in alo nghak a.

A bulhnai an rawn thlen chuan engvanga chutia baklênga tlân nge an nih alo zawt a.

An zînga pakhat chuan thaw hlawp hlawp chung hian.
" Ka pu, saw lai piah deuh a awm saw kan ni a, Neondreia- khua amite kan ni e, dawithiam pakhat leh a ho sipai rualin min rawn bei a, kan khua an hâl mêk ani." a ti a.
Chutia a sawilai chuan an zînga pakhat chuan hlauthawn hmel fahran hian,
" ka pu, khawngaih in min pui hrâm rawh. Ka in leh lo, ka nupui fanau te kha ka va ngaihtuah êm." alo ti ve bawk a.  ala țap zui lehnghal a.

" engtia hla nge helai ațang hian?" tiin Marcus-a chuan an zâwt leh a.

" Ka pu, ke a kal chuan chawhma vel lai kal ani ang. Tunah pawh hian sipai rual khat chuan min rawn umzui mêk a, khulai deuh ah khuan kan țhiante pawh an tihlum nual asin." Pakhat chuan alo ti leh a.

Marcus-a chuan,
" aw le, helaiah hian lo châwl hahdam rawh u," a ti a.
Chutia a sawi zawh rual chuan a sakawr chu tlán chhuah tîr nghalin chúng ho sawina lam pan chuan a tlân liam ta a.

Mual páwng chu tlân pêl  thla in, a thlang deuh lawk a ruam ah chuan a zu tlân thla a.

Chulai ruamah chuan sakawr chungchuang sipai rual sawmthum bawr vel hian hrui sei tak a mi sawmhnih vel lo thlun zawmin an lo chhawm mek a.

Kawng kawi lai tak anih bâkah hnunglam ațanga rawn tlân a ni bawk a, sipai ho te hian Marcus-a hi anlo hmu lawk lova.

Sakawr tlân ri hria a hnunglam a rawn hawi lêt chuan, a hnung ber ami chu a țê țhawt a, a hawilet rual chuan a thin ah tak Marcus-a chuan a ngûnhnâm chuan alo vit hrâwk a. Sakawr ațang chuan a tla zui nghal a.

Chutia an țhianpa țê rî an hriat rual chuan midang ho chu rang tak hian an lo hawi let a, Marcus-a an hmuh chuan an ngûnhnâm te chu phawiin an rawn in her a, Marcus-a lamah chuan an rawn tlân phei hlawm a.

An mi man ho te chuan an hlauh hmel hlawm khawp mai, a him lai deuh tur ah hian tlânchhia in an insual chu anlo thlîr a.

Sipai pakhat chuan thinrim tak a Marcus-a lam a rawn tlân phei pah hian,
" tunge inih, i lû i rawn zuar emni?" tih pah hian a ngûnhnâm chu Marcus-a lu zawn ah tak chuan a rawn vei fua a.

Mahse Marcus-a chuan nalh tak a lo bum in alo kûn hniam a, chu pa lung hnuai zawn ah tak chuan tlum thawih khawp hian a lo vit a.

Chutih lai mêk chuan alam pan a sakawr chak tak a lo khalh phei tu chu a áwmphâw chuan alo tauh tla lehnghal tawp bawk a.

" nang mikhual kha, i thi dawn." tih pah a alama sakawr chak tak a rawn khalh phei tu Palian pui chuan, sakawr chakna leh ama thahrui hmangin a fei sei tak chuan Marcus-a chu a rawn chhun vak a.

Heti anga sakawr chakna hmang tel tur hi chuan fei khauh leh rinawm tak angai a. Mi naran tan chuan a chhun hi anat êm avangin tawrh zawh rual anilo.

Nimahsela, Marcus-a chuan fimkhur leh inring takin alo en reng a, an inkâr in hnaih lam chu alo teh zêl a.

Chu pa ina feia arawn chhun chuan a pháw a lo indang lovin, a fei hmáwr ah chuan a kut pahnih in alo man a, alo phih vak a. Chu pa chuan a fei chu a vawn ngheh êm avangin an pahnih chuan an sakawr ata chu leichâr ah chuan an tla dun ta a.

Rang tak hian Marcus-a chu tho lehnghal in, chu pa rawn tho chhuak leh tur chiah chu rang tak hian a zuan a.

A in rin hma si chuan a ngûnhnâm chuan zuang chunga vit in, a nghâwng ah chuan a vit tlang zawk a, chumi rual deuh thaw chuan alam pana sakawr chungchuang pakhat lo tlán lamah chuan a ngûnhnâm chu khawh pheiin, chu pa áwm ah tak chuan a bûr vû a, a sakawr ațang chuan a vir thla chawpchilh nghal zawk mai.

Chutah rang fe hian a mi thah pa fei sei tak chu a chhar a.

Mahse midang, chûng sakawr chung chuang dangte chuan beih pawh an tum tawh lo, ramhnuai lam pan in an tlânchhe dial a.

Marcus-a erawh ala lungawi lo, sakawr chungchuang pakhat ramhnuai ngaw chhûng lampang a tlán liam tur chiah chu a fei ken lai chuan zak kau hawk khawp hian a khawh a, a hnungzáng ah tak mai hian khawh fuh in a tlang zawk mai lehnghal.

Han che leh tur chuang a awm tawh lo, a sakawr ațang chuan a tla thûm țawk a, sakawr chuan ala tlansan daih zui.

Marcus-a chu an hawikual vel a, mahse han khawih leh tur chuang an awm tawh lo, chûng a kut tuar ho chu an lo thi vek tawh.

A mi thah te ruang a thlîr kual vêl lai chuan a piah deuh lawk a hnim chu alo ri set set a.

A ke bul a ngûnhnâm let reng chu rang taka chhar in thâwm lo chhuahna lam chu a hawi zui nghal a.

Mahse, hmelma an nilo.
Chu hnim pik  zîng ațang chuan mi eng emaw zat hi Marcus-a leh a bul vel a ruang let phung ho țit hmel deuh a entawn zak zak chung hian muangchang hian anlo chhuak a.

Marcus-a lam pan chuan lo pheiin a hma a chuan anlo țhingțhi tliar tliar hlawm a. Chûng ho te chu an enchiang a, hrui fei hmel deuh hian anlo in thlunzawm vek mai tih a hmuh chuan an phuarna hrui chu a zei chhum sak nghal sawk sawk a.

" ka pu, i chungah kan lawm lutuk, kan nunna min chhanhim sak avangin." pakhat, putar deuh chuan lungchhe angreng tak mai hian a ti a.

Tlangvak chêr lam deuh, an sawisakna ni ngei tur ani, a hnâr leh kamsîr vel a thi khâr bet nuaih chuan zawi te hian,
" Ka pu, Neondreia- khua ami te kan ni a, dawithiam sual tak leh a sipai ten kan khua min hâl sak a, khawngaih in min pui hram rawh." alo ti ve bawk a.

Chûng mi khawngaihthlak tak tak, lo neitu rethei tê tê niawm tak te chu lainat hmel deuh hian Marcus-a chuan a en a.
" engzah nge an nih, an tam em?" ti a a zawh chuan an zîng a pakhat chuan,
" sipai sawmnga vel ani ang. Sual tak tak hlîr an ni a, an hotu pa dawithiam chu a kalbo leh tawh." tiin alo chhang a.

" Zeddicus." ama hriat tawk leh hian an ti sep a. Chutah an hnenah chuan,
" engpawh nise tihian heng misual ho ralthuam te hi lo laksak ula, in țhiante pawh khi lai mual chhak lawk ah khian an awm ang, kei chu in khaw lamah chuan ka lo va kal anga, muangchangin inlo kal dawn nia." a ti a.
Chutia a sawi zawh chuan a ngûnhnâm chu pâi țha in a sakawr chungah chuan inthazo tak mai hian a zuang lawn leh thauh va, tichuan Neondreia- khaw lam panna, kawng țha vak lo sial sa ah chuan tlânin, reilo te an a tlân liam a.

Chûng mi khawngaih thlak tak tak te chuan ngaihsân hmel fahran a thlîr zuiin, a tlân liam thleng chuan an thlîr zui vawng vawng a.

Chutianga ka en reng lai chuan ngaiteh, chu Marcus-a tlân liamna lam ngaw chhûng chu alo lang hnai telh telh a,

 Motor a chuan a, thing hmun kan tlân pelh zut zut ang mai hian ngaw chhûng chu alo lang kal zut zut a.

Chutia ka thlîr reng lai chuan thawklehkhat ah chûng thing leh hnim kal zut zut niawm tak a lang chu a ding thut a, mahse Marcus-a tlân pelh ngaw chhûng chu ani ta hauh lo mai le.

Chu ngaw lo lang chu a pik êm êm hran lo, a țhenlai ah chuan thing ding hmuh tur pawh a awm mang lo.
Chutah alo lang hnai zêl a, chutianga thing hmun, ngaw piah lawk ah chuan phûl hmun zau fahranlo hi alo awm a, chulai chu ruam deuh hi a ang mah zawk awm e.
Khawchhak lam ah chuan tlâng dung sei sâng vaklo hi a in kham ruah a, chulai tlâng hnuai lawk, tlâng bulțhut ani ber ang chu.
Lal in ang deuh mai, Lalin anih pawh in kum tam tak chên ngailohna leh rauhsan tawh ni hial âwm a hlui deuh rup mai, lian fahran lo, mahse a sak dan chu tunlai mithiam ten a uluk fahran a an duan ni mai áwm hi a ding luah a.

Hlui hmel viau ang chuan lang mahse vawikhat en tawh chuan ennawn chhên ngai tawh chi, mit la tak mai hi ani reuh a.

Chu Lalin kiang lawk a lung hmun deuh ti tih, hnim vel țo vaklohna lai ah chuan mi sawmnga rual vel, patling bâk ah nunau te leh an thawmhnaw emaw ni, puan lian tak tak a têl deuh țûn chung hian anlo bâwrkhawm laih laih a.

Meipui lian tak mai hi hmun thum lai ah chhep in, hmeichhia leh naupang te te ho chuan anlo kîl laih hlawm a. Mipa țhenkhat chuan puanin hlui tawh tak tak hi anlo zâr mêk bawk a.

Chutianga ka en reng lai chuan chûng hmeichhe ho zîngah chuan a hma a ka hmuh tawh tho angin kawr vâr fual ha hian Vivienne-i hi alo vei thâuh thâuh reng a, eng emaw hi sawiin a kâwk kual zung zung a.

Ring fahranlo hian,
" Emilia." a ti a.

Chu veleh rang fahran mai hian puanin pakhat chhûng ațang chuan nula tleirawl hmelțha deuh mai hi alo chhuak a.

Chu tleirawl chuan thing chang chi ațanga siam thingrem te fel rên râwn hi a rawn pawm chhuak a.

" aw ka pi." tiin Vivienne-i chu zah hmel deuh hian a melh zauh a.

Vivienne-i chu meipui chhehna pakhat a an bâwrkhâwm tuau tuau na lamah chuan kal in, chu tleirawl pawh chuan a zui ve nghal vat a.

Chulaia an bâwrkháwmna ah chuan nu upa lam deuh tawh hi puan phah chungah hian anlo mut a, an lo kil bial laih hlawm a.

Chûng ho chuan Vivienne-i chu hmun an lo kian sap sap hlawma, chutah chu nu ke lam ah chuan țhu in, chu nu kawr fual hâk chu a mal te thleng hian dîm fahran hian a hlîm sak a.

Abul ah chuan tleirawlté pawh chu lo țhu ve in a thingrem chu hmanhmawh tak hian a hawng zuinghal rawk rawk a.

Chu nu khûp chung deuh, a malpui tawntirh ah chuan chem a zaina hnu hma ang tak hi sei vak lo hian a lo kak duai a.
Vivienne-in a dîm deuh a an hmeh veleh chuan thi duk, thisen chhia hi tam fahran lo hian alo hnâm chhuak țiam țiam a.

Chu veleh rang tak hian Viviene-i chu hawi sawn nghal in, a vawnna pawh chu a thlah zui nghal a.

A bula tleirawl hnenah chuan,
" Emilia, a thûk vak chuan ka ring lo a, heng thisen chhia hi hmet chhuak la, puan thianghlim in i hru fai leh anga, chuan hnim damdawi ka hrilh che kha hnawih ang che, chuan thingrem a darthlalang bûr tung chhûnga tui awm khân reilo te i chiah anga, i țhui zui nghal mai dawn nia," a ti a.

Chutia a sawi lai chuan pa pakhat hian Vivienne-i chu rawn ko in, a bul ah chuan alo phei a.

" ka pi, kan sa zo thawkhat chu ani mai e, i chungah kan lawm tak meuh meuh ani." zah hmel tak a en chung hian Vivienne-i hnenah chuan chu pa chuan a ti a.

Vivienne-i chuan ring fahran lo hian,
" a lawmawm anih chu, helai ah hian Narbeth- khua a awm țhin a, mahse.." a ti a. Chutah an awmna hmun piah deuh, ngaw chhahpui lam chu ngawi reng hian an thlîr deuh vang vang a. Reilo te hnu ah chuan,

" Nia, helai khaw ram ah hian in chhia eng emaw zat chu a awm ang a, la chhe lo, hnim ina a chîm ral pawh ala awm nual chuan ka ring a, heti hian han awm rih phawt ula, chûng chu chên nan in la tifai dawn nia." a ti leh a.

Chu pa bawk chuan,
" helai hmunah hian anlo kal leh ang em? Hmuh chhuah a har viau ang em?" a ti leh a.

" him turah chuan ka ngai a, engpawh nise, hun rei tak chu zalen tak a in awm theih ngei ka beisei." tiin Vivienne-i chuan a chhâng leh a.

Chutih lai chuan tleirawl tê kha lo ding chhuak in.
" ka pi ka zo ve." tiin Vivienne-i chu arawn bia a.

Vivienne-i chuan,
" anih chuan, puanin pawh an kaih zo tawh a, inlo zu zawn lut mai dawn nia." tiin chûng awmkhâwm ho te chu a hrilh a.

Chutah tleirawl lam chu hawiin,
" kal mai ila, midang i en vek tawh em ni?" a ti leh a.
Âw tih nan chu tleirawltê chuan alû a bu zauh a.
Tichuan chûng ho chu kalsan in Lalin ang deuh, in lianpui lamah chuan an inzui phei ta daih a.

A hnunga zui det det pah hian chu tleirawl chuan,
" ka pi, heng ho hi khawi ațanga lo kal nge an nih hlawm a?" tiin a zawt a. Hawi let chuanglo chuan,
" Kan piah lawk a ngaw hmun thlanglam deuh ah sâwn Westland- khua a awm a, chulai ațanga lo kal te chu an nih kha. An khua kha râlin an bei a, tunah phei chuan an awp bet tawh niawm tak ani." a ti a. Chutah chu tleirawl vêk chuan,

" anih chuan atam zâwk chu chûng hmelma ho thuhnuai ah chuan an awm dawn ani maw? An van khawngaih thlak êm." a tih zawm leh a.

" ni e tiraw, nichin a nû i enkawl pawh kha chûng hmelma ho in a an sawisakna anih kha." tiin a chhâng leh a.

" an tam em le? Eng ram nge ni a?"

" an sawi dân chuan dawithiam sual deuh mai leh a țhuihruai sipai nunrawng tak tak te an ti ringawt a. Naupang pawh an sawisa hrep tho an ti."

chutia an ti ti lai chuan chu Lalin Gate lianpui chu an thleng dêr a. Vivienne-i chuan chu Gate lianpui chu a kut hian an khawih zauh a. Chu veleh muang fahran a in hawng ruai ruaiin, Gate chhûngah chuan anin zui lut nghal a.

Chu in compound chu a zau hle mai, a kawt velah chuan pangpâr chi hrang hrang hi a pâr vul chêk chûk a. Chutah thingkung lian pui pui leh pian mak deuh deuh, âwn dêi duai a la ding fur zui lehnghal a.

Chhûn lai vel nimahsela vân chung sângah chuan chhûm a tam hle a, Nî pawh a lang thei lo. Chulai ram vêl a chhûm leivâk paw chûk reng avang te chuan chu Lalin leh a kawt vêl a thingkung lian pui pui te chu alang danglamin a mawi fû mai lehnghal.

Kailâwn paruk vel lai hî chu in kawngkharpui panna ah chuan a in rem chho deuh țhat a.

A kawngkharpui chu thing chang chi a uluk tak a siam leh duan ani a, tin, kawngkhar biang tawn ve ve ah chuan rose kûng ing euh fahran lem hi a in ker bawk a.

Chu kawngkhar pui chu hawngin a chhûngah chuan Vivienne-i leh a awmpui Emilia-i te chu an in zui lût a. Mahse an khâr leh lem lo. Muangchang hian amahin a in khâr riai riai a.

Chutianga Vivienne-i leh Emilia-i te inchhûnga an luh hnu chuan, pawn lam ah chuan chhûm leivâk chu nasa fahran mai hian a paw chûk a, reilo te chin ah phei chuan engmah reng a hmuh theih ta lo hial a.

Dár chanve emaw lai chutianga chhûm leivâk a pâwt chûk hnu chuan zawi zawi hian alo reh leh telh telh a. Mahse chûng chhûm leivâk a reh leh meuh chuan hmun dang daih alo ni leh tawh anih chu.

Vivienne-i te awmna rêng alo ni tawh lo.

Thâwm alo awm a, thîr in khak ri leh mihring na tuar aû rî te, sakawr tlân ri dawt dawt thâwm te alo ri chhuak nuaih a.

Chutianga chhûm leivâk zîng chuai a reh fel meuh chuan, Marcus-a alo lang teh hlawl a.

A kut lehlam in ngûnhnâm a hûm a, lehlamah âwmphâw a keng bawk a. Sakawr chungah pawh alo chuang tawh lo.
Hmelma te nen an lo in bei mêk ni mai hian a lang.

Chak tak in a tlân a, a âwmphâw a in vêng chung zêl in a hma zawn a sipai ho ralthuam famkim a in thuam eng emaw zat lo in hrosa te chu a su tlang pawp a.

Chutah a âwmphâw chu rang tak a ti her in a hnunglam, a thirkawr hnung ah chuan a pai zui nghal a.
Sipai pakhat ina a tiang sei tak, a hmáwr a lu tiat vel a lian thir zum fir fer awm fur mai a hlap a tum chu lo bum in lei chár ah chuan an in bin pah in alum zauh a, chutah a thawh leh rual chiah chuan sâng tak a zuang in sipai pakhat dâr ah chuan tlum thawih khawp in a ngûnhnâm chuan a vit a, chutah a phawi leh rual chiah in a bul lawk a, hreitê a lo cheh tum tu pa khabe ah tak chuan chiang fahran mai hian an vit tlang lehnghal pâwk a.

Marcus-a hmel ah chuan lainatna reng reng hmuh tur hi a awm lo, tualthah châkna mit meng lo chu hmuh tur a awm lo anih chu.

Chutianga hmelma sipai ho a beih lai chuan thawi fiak hian fei pakhat hi a rawn thlâwk phei zawk a. Marcus-a chuan a bumlo na in chu fei chuan a țhelh ve hrim hrim in a hriat.

Chu veleh rang tak mai hian fei lo inkhawh chhuahna lampang chu a hawi nghal a.

Palian pui mai, thirkawr dum rûn mai leh thir lukhum mak deuh mai khum hian chu fei chu a rawn khawh phei alo ni a.

Marcus-a lam ah chuan muang deuh hian a rawn phei chhut chhut a, âwmphâw hi a kut lehlam a kengin, a kut lehlam in ngûnhnâm sei leh lianpui mai hi a hûm rûn bawk a.

" Nang mikhual pa kha, ka that dawn che tih hi lo in hria ang che." tiin a aw rapthlak tak mai chuan Marcus-a chu a vau vel a.

Marcus-a erawh chuan a chháng hran lo, thinrim hmel deuh hian a en vung vung a.
Chutah thawklehkhat ah chu pa lamah chuan chak deuh mai hian a tlán thut a. Chu pa hma zawn a thlen chuan sáng taka zuang vak in a kut pahnih chuan a ngunhnam chu a hûm a, a theih pa tâwpa na hian a ngunhnam chuan an chhipthlak ngheng mai a, mahse chu pa pawh chu alo rang ve hle mai, a âwmphâw chuan alo in dang vat a.

A theih pa tâwp a na ani bawk a, a âwmphâw chuan lo in dang mahse chu pa chu a țhingțhi hnawk a, a âwmpháw pawh chu a thlauh zui nghal a. Chutah Marcus-a chu rang tak a in her in chu pa in siamrem hma chiah chuan a rawn tlân phei lehnghal a.

A ngûnhnâm chuan lo in dang ve bawk mahsela a chêt dân ah chuan a zâm hle tih a hriat mai.

Marcus-a chuan a han khuai nuai tak tak a. Chu pa chu a hnungtawlh rawk rawk a. A tlânchhia hi ani ringawt mai. Chêt ngaihna pawh a hre lo.

Marcus-a chê chu thli ang mai a rang hi ani a, chutah, a malpui ah chuan a han hláwi a, chumi rual chuan a nghâwng ah tlang zawk khawp hian an vit leh nghal a.

A âwn ruai ruai a, bawngchal cheh thlûk ang dupin leichâr ah chuan a tlu ta dup a.

A țhian sipai dangte chuan an rawn pui ngam tawh lo, rang tak a sakawra lawn in hmanhmawh tak in chulai hmun chu an tlanchhuah san ta dâwr dâwr hlawm a.

A bul vêl ah chuan a mi thah ruang te chu an tlu sai kalh nuaih a. A hawi kual vel a, a bul vela puanin ang deuh a thlâm ang deuh a in chhe ve tak tak ding chu a kâng khu deuh rum rum hlawm a, mahse tumah midang sipai anlo awm tawh lo.

Reife a awmna ngaia a din reng hnu chuan a bul vela in kâng bâng ațang chuan ți dâk hian mi eng emaw zah hi  anlo dák chhuak a,

hlauhthawn hmel deuh hian anlo chhuak sap sap hlawm a.

Nu pakhat upa lam tawh hi savun ațanga siam tuithâwl keng chung hian Marcus-a bulah chuan alo phei a, ngawi reng hian a tuithâwl chu Marcus-a lamah chuan an lek kâng a.

Khawngaih hmel deuh a chu nu a en vang vang hnu chuan Marcus-a chuan a tuithâwl ken lai chu lak sak in a dâwt nghal bawrh bawrh a.

" ka lawm e, ka pi." tiin tui a in zawh chuan tuithawl chu chu nu chu a pe zui lehnghal a.

" tlangval, tunge inih a, khawi ațanga lo kal nge inih?" tiin hlauh hmel deuh chung hian a ti a.

Marcus-a chuan zawi sap hian,
" Marcus Valerious, ka ni e ka pi, Delain khua ațang in." a ti a.

Chutia a sawi rual chuan chu nu chu mak tih hmel deuh hian a meng bial kâwk a.
" Marcus maw?" a tih zawm lehnghal a.

" aw ni e, ka pi, hei hi Neondreia- khua ani em?" tiin Marcus-a chuan an zawt zui a.

Chu nu chuan aw tih nan a lû a bu nghut nghut a, Marcus-a chu mak tih hmel deuh hian a en ho a. " Marcus Valerious, dawithiam rapthlak tak mai man tu leh sakawlh Chimera that tu kha ini ti raw?" a tih zawm leh a. " aw ni e, ka pi." chutihlai chuan chulaia in chhe pui pui leh hnim zîng ațang chuan mi țhahnem tak hi anlo chhuak a, Marcus-a leh abul vel a ruang let phung chu mak tih hmel zet hian an en hu hu a. Chutih lai vêk chuan thâwm dang alo awm leh ta.

An lo kalna lam ațang chuan ahma lawk a ami chhante kha an lo phei mek a, an nupui fanau te chuan lo pan in hlim takin an in kuah a, an in pawm a, an țap ruah ruah bawk a. Chûng ho zînga pakhat, pa upa lam deuh tawh hian Marcus-a chu rawn panin, a hma ah chuan a rawn țhingțhi hnawk a. Tah aw deuh ruai hian, " ka pu, min tanpui avangin kan lawm tak zet zet ani, lawmthu sawi ngaihna pawh kan hre lo." a ti a. Rang deuh hian chu pa chu Marcus-a chuan a kaitho a, chutah zaddam tak hian, " ka hma ah zawng thingthi lul suh, nangmah ang bawk a thi thei mihring ve tho ka ni e." a ti a. Chu pa vêk chuan zah taka Marcus-a en chung hian, " ka pu tunge inih? thi theilo Pathiante tu emaw ber min tanpui tur a lo kal chu ini em lo maw?" a ti leh a. Ani lah tak a, Marcus-a thirkawr leh inthuamna, a ralthuam te bakah a hmel hrim hrim hi a zahawm in Lal thisen kai ani tih hi a hriat ngawih ngawih a. Hetia loneitu mi rethei takin a Pathian tu emaw ber mihringa lo chang emaw atih pawh hi a awm hliah hliah tho mai. Zaidam fahran hian Marcus-a chuan, " Ka pu, thitheilo Pathiante zawng min tehkhin lul suh, nangmah ang bawk a thi thei mihring, Marcus Valerious, ka ni e." a ti leh a.

Chutia a sawi lai chuan a kiang vel a mi ho chu an thûm deuh mur mur a, ngaihsan hmel deuh hian Marcus-a chu an en țhap a. A be tu pa pawh chuan mak tih hmel fahran a Marcus-a en chung hian a phu deuh zuk nghe nghe a. " Marcus, Marcus Valerious maw? Dawithiam thiltithei leh sual tak man tu leh Sakawlh Chimera that tu kha?" mak tih hmel deuh hian a âng deuh phuang a.

" aw ni e, tunge he khua a roreltu ber hi." hawikual pah hian Marcus-a chuan a ti a. A be tu pa bawk chuan aw khûr deuh dat dat hian, " ka pu, keimah hi ka ni e." a ti a. Chutia a sawi zawh chuan an piah deuh lam chu hawiin. " lo kal la, ka inah chawl hahdam ta che," a ti leh a. Amah chu a kal zui ta nghal a. Marcus-a pawh chuan zui in an piah deuh lawk a in, a bang lungrem hlui fahran tawh mai lam chu an pan ta a. Inchhûng chu a lian vak lem lo, bungrua pawh chuti teh chiam an neilo na in pindan chu an ping dang hrang ve thliah hlawm a. " ka pu, khawngaih in țhu ta che," tiin chu pa chuan țhutna kawh hmuh in, amah pawh chu a țhu zui ve nghal a. Chutihlai chuan inchhûngah chuan nu upa lam deuh tawh leh nula tleirawl tê leh mipa naupang pakhat hi anlo lût ve mêk a. " Ersa, kan pu hi eitur lo hlui ta che, a chau tawh khawp ang." tiin chu pa chuan alo âu a. Chu nu chuan anlam lo hawi a alu bu zauh in, " aw le." a ti a, a fate ho nen chuan an kalsawn ta a. " ka nupui Ersa-i ania, khâ nula leh mipa naupang kha ka fate an nih kha, Thalia-i leh Aeneas-a. Kei hi Cador-a ka ni a." an tih zawm lehnghal a. " fa inei hmelțha hle mai." " ka lawm lutuk e." chutah chu pa bawk chuan, " ka pu, engti tur a lo kal hrim hrim nge inih. Khawi lam nge pan zel i tum deuh." tiin a zawt leh a. Zâwi fahran hian Marcus-a chuan, " In khaw piah deuh ah sawn thil tih tur pawimawh deuh ka nei a." ti in a chhang a. Chutihlai chuan chu pa fanu tleirawl Thalia-i chuan uain leh bawngsa kan ro bâkah grep rah bâwr lian tak tak hi thing thlêng kum hlai tak a lo châwiin alo chhawp sak a. " anih tak chu, khawilai ah tak nge, kan khaw piah deuh hmar lam ho saw chu tuna sipai sual tak tak te khan an awpbet an ti in ka hria." chu pa chuan a ti a. Marcus-a chuan uain thlit pah hian, " anih tak chu maw le, ka kal tumna lam ani asin, engtik lai ațang khan nge chûng sipai ho chu anlo thawh chhuah țan." a ti a. " tûn thla dêt hnuhnun ber lai bawr vêl khân ani in ka hria, kan khua tak hi chu lo neia ei zawng vek kan nih avangin kan thil neih leh thlai bâk lo chu min chhuhsak vak ngailo a, mahse an duhkhawp an hmu tawh aniang, tikhan kan in leh lo te min hal chhiat sak ta anih kha." lungchhe ang reng tak hian chu pa chuan a ti leh a. Eng emaw chen Marcus-a chu a ngawih vang vang hnu in muang ban chat hian, " engpawh nise, khâng sipai ho kha an la rawn thawk chhuak leh ngei ngei dawn a, chuvangin thil tih dan kan ngaihtuah angai ani." a rawn ti chhuak a. " sipai ho kha maw? Engtin nge ni ang?" beidawn hmel zet hian chu pa chuan alo ti vat a. Marcus-a vêk chuan, " tu emaw han tirh chhuah mai tur an awm angem?" a ti leh a. " aw awm ang." alo ti vat a. Chutah, " Aeneas." an ti zui nghal a. Chutia a koh zawh rual chiah chuan a fapa mipa naupang chu alo kal nghal a. "aw ka pa." " tunah Aelos-a leh Erato-a te va ko nghal rawh aw. Lo kal nghal rawh se, thil hmanhmawh thlâk ania." a fapa chu rang tak mai hian a tlân chhuak nghal a. " sipai te an rawn kîr leh hma in nangmahni lo awmpui tur che u an awm angai ani. Chutilo chuan in khua hi an hâl vek ngei ang." Marcus-a chuan a ti a. " ka pu, i thu ang zel ni rawh se." tiin zah hmel deuh hian a ti a. Chutihlai chuan kawngkhar alo ri rak a, a mi tirh a fapa leh tlangval pahnih hi anlo lut a. " Helam ah, lo țhu ve phawt rawh u." tiin chu pa chuan țhutna alo kawhhmuh a. Chumi te pawh chu engmah sawi chuanglo chuan an rawn țhu ve nghal a. A khât tawk hian Marcus-a chu an melh leh zauh țhin a. " englo ania, in khaw piah lawk ah sawn in kal angai dawn a, a remlohna a awm em?" tiin zawi fahran hian Marcus-a chuan a ti a. Chu mite pahnih chuan zah hmel deuh a Marcus-a en zak zak chung hian pakhat zawk chuan, " Awmlo e ka pu, engti tur in nge min duh." a ti bah deuh niaih a. Marcus-a chuan in neitu Cador-a chu melh zuk pah hian, " anih chuan lehkha ka ken tir duh che u a." a ti a. A thusawi hrethiam niawm fahran hian in neitu Cador-a chuan a fanu chu an au a. " Thalia." " aw ka pa." " lehkhaziahna tui leh lehkha min rawn laksak lawk ta che." pindan pakhat ah hian Thalia-i chu a lût nghal a. Reilo te an thing ațanga siam bawm tereuhte, tung deuh ît ét hi rawn keng chhak in apa chu arawn pe a. " hei le ka pu." tiin Cador-a chuan Marcus-a chu pe leh in thing dawhkan te reuhte hi a rawn laksak nghal bawk a. Bâwm chu Marcus-a chuan hawngin âr hmul nge mupui hmul zâwk ni, sei fahran mai leh lehkha phêk hlai ang reng tak hi a la chhuak a. Chutah Ar hmul chu bâwm tereuh te a lehkha tui ah chuan chiah zeuh in lehkha ah chuan a ziak țan ta a. A thil ziah chhûng zawng chuan anlo ngawi țhap a, a ziah zawh chuan uluk hmel fahran hian a chhiar leh te te a, a lehkha tlâng ah chuan a zungbun thlá chu nem kaiin a zial sawk sawk a. Tlangval pahnihte lam hawi hian. " Tlangvalte u, khâng nangmahni suasam tu che u sipai te kha engtik ah emaw chuan anlo kîr leh ngei ngei dawn a, chuvangin anlo kir leh hma ngeia nangmahni țanpui tur che u in koh vat hi angai ani. He ka lehkha ah hian engkim ka ziak vek a, he mi keng chung hian Delain khua ah inva kal dawn nia, chutah chuan General Hestia-in va hmu anga, lehkha hi in pe dawn nia." a ti a. Lehkha chu a pe a. Chûng tlangval pahnih te chuan zah tak mai hian chibai an bûk a, tichuan Delain khaq lam pan tûr chuan an chhuak ta nghal a. " ka pu kan lawm tak meuh meuh ani." Cador-a chuan a ti a. " mi te tan a Malsawmna nih hi Pathiante pawh ina mihringte hnena an thuchah pawimawh te zîng ami ani alawm." Marcus-a chuan ati a. Chutihlai chuan in neitu Cador-a nupui Ersa-i chu an awmna lama lo phei in, " zanriah kan buatsaih tawh e." arawn ti a. Cador-a chuan, " zanriah ei hma in i intifai duh em." tiin Marcus-a chu a zawt a. " duh tho mai." A fanu chu ko leh in Marcus-a inbualna lo buatsaih sak turin a ti a. Marcus-a lam hawi hian, " ka pu, zânin chu hetah hian i riak ve aniang chu ti raw?" an tih chhunzawm a. " ka kalna tur hi ala hla si a, zanriah eikham chuan chhuak leh nghal mai mahila pawi ka tilo." " Zânin tal chu ilo riak hrim hrim ang chu, chawlh hahdamna ani mai alawm, i chhuah leh nghal chuan ram palaileng ah lo chuan zân riahna tur a awm mai rih lo vang, khua ban hman tur chuan a tlai tawh deuh asin." tiin Cador-a chuan Marcus-a chu riak tur in a ngen a. Tichuan Marcus-a chuan a thirkawr leh ralthuam te chu dah țha in inbualna kuangah chuan hahdam tak mai hian a in chiah ta veng veng a. A thirkawr erawh a ha leh tawh chuanglo. A awmhmun kawr fual pan deuh chu a in bel leh a. Hlim takin chu loneitu te in ah chuan zanriah chu eiin chumi zân chuan a riak ta nge nge a. Zîng a Cador-a nupui a rawn thawh chhuah meuh chuan Marcus-a chu a thirkawr nen alo in thuam ap tawh a. " ka pu, i mu thei meuh maw? i van tho hma awm ve, leilung pawh ala lang chianglo ani si a." " Ni e, ka mutui khawp mai, ka kalna tur hi ahla ang reng si a, ka chhuah vat hi angai ani." Chutia an in biak zawk chuan uain leh vawk thithun rêp te, khawizu leh sa thau er fu bâk ah eng eng emaw hi Cador-a nupui Ersa-i chuan Marcus-a ken tur chuan savun ip lian vaklo ah hian a thun mawlh mawlh a. Marcus-a chu pawnah chhuak in chu zîng boruak dâi tak chu eng emaw chen an hîp vang vang a. A sakawr pawh chu chhuah alo in peih tawh khawp mai. Duat tak a alû a chûl in a be ser ser a. Ersa-i chuan a thil pai tir tur te chu lo keng chhuak in sakawr chungah chuan an hlâng dûn a. " i kal mai dawn maw?" tho phang tih hriat tak mai hian Cador-a chu alo chhuak a. A sakawr a lawnkai pah hian, " aw, ka hmanhmawh deuh sia, ka kal phawt mai ange." a ti a.

Chutih lai chuan Cador-a fate pahnih pawh chu an rawn tho chhuak ve a. An ni chhûng tihloh chu kawtthlêr ah chuan hmuh tur pawh anla awm lo. Vân chung sângah chuan arsi tlem azawng chu an la êng sep sep a, Thlâ erawh a tla tawh thung. Leilung chu ala lang chiang thei êm êm lo na in khawvâr dawn lam ani a, a thim lutuk hran tawh lo. " ni reilo te ah nangmahni țanpui tur che u in sipai anlo kal ang a, hlim tak in inlo awm dawn nia." Marcus-a chuan a ti a. Chûng loneitu chhungkua rethei tak, an kawngkhar bul a an ding țhap an hmuh chuan lainat hmel tak hian a thlîr vawng vawng a. " ka pu, i chungah hian kan lawm tak tak ani, i kal zelna tur ah thitheilo Pathian te chuan vêng zel che in, Pathian chungnung ber Zeus-a hualhimna hnuai ah awm zel ang che." a ti a. A lu a bu nghauh a, a hma lama ngaw chhahpui lam chu hawiin thâwk a la leh te te a. " Ka lawm e, nangni pawh Pathiante chuan awmpui zel che u rawh se, anih phawt le, engtikni ah emaw chuan kan la in hmu leh dawn nia." a ti a. Chutia a sawi zawh chuan a sakawr chu a khêng a, tichuan ramngaw dur khup lam pan chuan a tlân chhuak ta a. A nupui leh fanau te chu kuah in Marcus-a tlân chhuak ta chu an thlîr zui vawng vawng a. Chutia Marcus-a chhuak ta chu hmár lam pan in ngaw dur khup hnuai ah chuan a tlân ta zel a. Chawlh pawh a châwl khawmuang lo. Nî ina vanlaizâwl a thlen pawh chuan chulai ngaw dur khup hnuaiah chuan ala tlân ta char char a, Ni êng ina chu ngaw chhûng chu a rawn chhun tlang loh avang chuan tlân anuam in thlifim a thaw heuh heuh reng bawk si a, chuvang chuan a tlân sâwt khawp mai. Chutianga thing lian pui pui hnuai a a tlân reng lai chuan khua pawh alo thim dawn ruai tawh a. Reilo te an ngâw pawh chu a pik lo ve telh telh a. Khawthlang lama Nî a her liam hnu pawh chuan kal harsa êm êm chuan a pik tawh lo. Khawthlang lama Nî a her liam ațanga dâr chanve emaw lai hnu ah chuan Marcus-a pawh chu a chau deuh ta ani ang, hmun rem leh fai deuh zawng niawm tak hian a hawi kual vuai vuai reng a, a sakawr pawh chu tlân tawh lovin a kal in a kal tîr tawh a. Tlem a hmun fai lai deuh ah chuan a sakawr chu ti dingin amah pawh chu a chhuk a. Hmanhmawh taka thingțang ro zawng khawm vat vat in meipui lian tak mai a chhep hluah a. Sakawr chunga Cador-a nupui Ersa-ina a paitir savun ip chu hlâng thla in a hawng rawk rawk a. A chhûnga Uain leh Sa thithun rêp te chu phawrh chhuakin a eiin a in sawk sawk a. A thirkawr pawh phelh chuanglo chuan leichâr ah chuan a mu a. A ngûnhnâm chu a lu bul ah dah in a pheikhawk sîr a a pai chemte hriam hmel tak chu la chhuakin eng emaw thut ah ti niawm fahran hian a âwm zâwnah dah in a hûm rân a, tichuan chu zâ chu chulai ramngaw ah chuan hmangin, mumang rama a hmangaih Vivienne hmuh tum ngei chuan a muhil zui ta a. Sava chiar noh noh chuan a mutui lai chu a ti harh chiang hle mai. A țhu chhuak hlawl a. A meipui chheh erawh chu rêm vek tawh na in ala khu vung vung mai. Uain chu thli chhuak chuanglo hian a savun ip ami chu a dâwt a, Sa hrang lian tak mai chu a keih thla hlawk a. Chutah thial nuau nuau pah hian Hestia ken tir, ram lem inziahna chu leiah chuan pharh in a thlêk vung vung a. Rei tâwk fang chutia a thlêk hnu chuan a rum nghut a, ram lem inziahna lehkha chu zial țha sawk sawk in a savun ip chhûngah chuan a thun a, a bul lawk a a sakawr bawk rûn chu panin savun ip chu a chungah chuan a hlang a. a mah pawh chu lawnkai in an tlán chhuak leh ta a. Reilo te an chu ngaw dur khup chu tlân pêl in lung hmun deuh ti tih, tlâng dung zawh in reife chu an tlân zui leh ta char char a. Mahse lung khawk rawk hmun anih avangin an duh ang ngawt chuan an tlân chak theilo. Rei ngial an tlân hnu pawh chuan anla thleng tawi hle mai a, Nî lah chu a vanlaizáwl dêr tawh mai lehnghal. Chulai tlâng hmun khawk rawk chu eng emaw ti ti hian chawhnu lam chuan an pêl ve țâwk a. A thlang lawk ruam lamah chuan tlân thla in hnim buk tak tak, tawi te te awmna chu an zu thleng thla leh a. Châwl khawmuang lovin khaw chhak lam dep, Fâr thing din thluahna lam pan chuan an tlân zui leh ta char char a. Khaw thim rualin chulai fâr hmun zau tak chu an thleng a. Mahse vanneih asiamin alo pik em em lo khawp mai. Rei pawh an tlân leh hma chuan chhûm leivâk alo awm țan a, mahse chutianga nasa em em chu ani lo. Zân pawh riah an tumlo ani ang. A hma lam chu ngil tak a en in a țhu ngil auh a. A sakawr hrui chu nghet tak mai hian a vuan ran bawk a. Zanlai velah chuan thâwm alo awm țan ta. A hma lam hla tak ah chuan chinghnia hi an û ruai ruai reng a. Thâwm dang mak pui pui lah chu atam hrep lehnghal a. Leilung lan hma deuh chuan chulai fâr hmun zau tak chu chhuahsan in khaw hlui ni awm tak hi an va pawh hlawl a. Muangchang hian a sakawr chu tlân tîr bek bek in a hawikual pah reng a.

Chhûm leivãk chu a râpawm tâwk lek hian a zîng deuh chuai reng a.
Chulai khua chu kum tam tak liam ta a an rauhsan tawh hi ang.

An in sak hmang chu lung lian vak lo rem khãwm in, chu chu a bang atan an hmang a. A chung pawh chu țhenkhat ah chuan lung tho an hmang bawk. A tam zawk chu a chhe tawh ani ber. A bang lungrem te chu a khî in a bal nual a, hnim in a țo hnan deuh vek tawh lehnghal.

Chutianga muang changa a hawi kual ruai ruai lai chuan a hma zawn piah deuh, kawngpui ina a pawh siloh a a bang lungrem khi țhut tawh tukverh ațang chuan nasa vak lo hian êng hi a rawn chhuak a.

Reilo te thâwm ngaithla a a sakawr a dintîr hnu chuan hla tak a zân sava khawhar hmel deuh a a hram lauh lauh tih loh chu thawm dang engmah hriat tur a awm meuh lo.

A sakawr ațang chuan chhuk in a ngûnhnâm chu a phawi a, inring tak a hûm rân in chu êng lo chhuahna in lam pan chuan fimkhur tak mai hian a kal phei ta a.

Kawngkhar bulah chuan ding in thâwm an ngaithla vang vang phawt a. Mahse rîvâ engmah a hriatloh avang chuan dîm tak hian chu thing kawngkhar chhah pui chu a hawng riai riai a.

Kawngka ep chiah ah hian thuk alo awm a, mei chu a alh nasa em em lo na in inchhûng chu tlem chuan ati lum ve deuh.

Chu thuk bul lawk ah chuan thing dawhkan lian vak lo, hlui rap tawh hi alo  inhûng bawk a.

Chu thuk lam hawi leh kawngkhar hnungchhawn zâwng chuan mi pakhat sam țuak vâr vek tawh hi thing țhutthleng nghenchhan neiah hian alo țhu a.

Chutia Marcus-a an luh chiah chuan.

" Ka fapa, lo lût rawh."

chu âw chu thuk bul ațanga rawn chhuak ani.

A ngûnhnâm la hûm reng chung chuan Marcus-a chu muangchang hian thuk lam pan chuan a phei chhat chhat a.

Chutah aw chu alo chhuak leh a.
" ka fapa, i hriamhrei kha dah rawh, hlauh tûr a awm hleinem."

hawi pawh rawn hawi chuanglo chuan chu pa chuan a rawn ti leh a.
Marcus-a pawh chuan a ngûnhnâm chu an pai țha ve mai bawk a.

" lo țhu rawh ka fapa, ka lo nghâk rei tawh khawp che asin."
ti a arawn țawng chhuah leh tâk ah chuan Marcus-a pawh chu tlem chuan angaih a ngam ve leh ta deuh a.

Dawhkan bula thing țhutthleng chu la in chu pa bul ah chuan a va țhu ve ta a.

Chu pa chu a sam bâkah a hmuihmul leh a khabe hmul chu a seiin a țuak vâr vek tawh a.
Dawithiam ho ina an hâk ang chi kawrfual rawng thim lam hi a inbel bawk a.

Chu meilum ai pah chuan alo muthlu nge maw ni, mut chhuah hmel fahran hian a mit chu a chhîng leh diâr diâr țhin a.

Chutah zawi sap hian,
" kum tam tak ka lo nghak tawh che asin, i lo kal tur thu hi zawlneite chuan anlo puang tawh a, dama ka lo hmu thei che hi ka lawm hle ani, Marcus Valerious." a ti leh a.

Marcus-a chuan mak a tih hmel kher mai, hrilhhai hmel deuh hian chu a bula putar pui mai thu chu a thlî vawng vawng a.

Chutah chu pa bawk chuan,
" Mördre'd ka ni e." a rawn ti leh a.

Reife chhûng chu tumah pawh anțawng chhuak lo. An hma a meipui chu an thlîr dun vawng vawng a.

 Marcus-a chuan phuailuai deuh hian.
" helai khaw ramah hian min lo nghak a maw?" a rawn ti chhuak hlawl a.

" Tunah chuan.." tiin chu putar chu a ngawi leh ta veng veng a.
Reife hnuah chuan rawn sawi zawm leh in.
" he khua hi Aoregin, khaw ropui tak ani țhin asin, mahse kum tam tak kalta khan Persian hovin an rûn a, a mi chêng te hi an that mang țêp a, an tihhlum bâng zawng tlemtê chu salah an hruai vek a." a rawn ti leh a.

Reilo te an chawl det a, chutah,
" Marcus Valerious, thihna chuan a zui zel che a, chuvangin ilo kalna lamah chuan kîr leh la, i Lalram ah chuan hlim tak in ro va rel ta che." a tih zawm leh a.

Marcus-a chu a in ngaihtuah buai hmel kher mai. Aw khur deuh dat dat hian.
" ka thei tawh lo." a rawn ti chhuak thei hram a.

" ka hria alawm, mahse kir leh hi itan a țha ber ani. Mahse i duhthlanna erawh ka hnial lo."

" ka chungchang thu i hria maw?"

" Marcus Valerious, lo ngaithla teh, Tuipui chunga mupui, thlipui nasa tak kâr a thlâwk ka hmu a, khua a thim khup khup a, chu Mupui chu kâwlkil lama niêng pan in a thlâwk a. Mahse khawmual a thleng hman țêp tih in thawklehkhat ah chhûm dum chhah pui pui lo lang thut in țêk leh khawpui rî nasa tak te anlo awm nghal a."

Marcus-a chu a beidawn hmel kher mai, rilru hah hmel deuh hian an rûm kawk kawk a. Chutah inti pachang leh in.
" Thihna hi ka hlau reng reng hleinem, Pathiante aia kan ropuina chu thihna hi ani. Thihna chu ropuina ani." a rawn ti chhuak leh a.

Zawi fahran hian chu putar chuan.
" Thla Arkaiden zân ni mahse thimna in thlâ chu a hliah ang. êng chu thim in a hneh tak avangin ani chu a lungngai êm êm a, chinghnia te chuan an râwl an chhuah a, zân sava te chuan a lungngaihna chu an en ngam lo. a mittui far avangin lei chu anhhedawngin a awm ta."

chutah a hma aia zawi hian,
" mahse kum tam tak chhûng chu thisen luang chu a khang lovang." a ti leh a.

Marcus-a chu a ding deuh hlut a.
" ka hria e, mahse ka kîr leh tawh lovang, kîr thei ka ni tawh lo." an tih zawm a.

A inher a, chhuah a tum lai tak chuan chu putar bawk chuan.
" ka hrethiam che, Marcus Valerious, Beiseina chuan kum tam tak chhûng a nghak a. Mahse beiseina chuan lunngaihna mittui chauh a thlen tîr si." a tih zawm leh a.

Kawngkhar pawnlam ah chuan eng emaw chen chu a ding deuh vang vang a. A in ngaihtuah nasat hmel kher mai.

Nî chu alo la chhuak lo na in leilung erawh alang uarh tawh a. Nasa vak lo hian thli chu a thaw vûk vûk reng bawk a.

Muangchang hian a sakawr awmna lamah chuan a phei chhat chhat a. Sakawr ah pawh chuan a lawn nghal mai lo.
Rei fe chu sakawr bulah chuan ading reng a.

Chutah phur loh hmel zet hian sakawr chungah chuan lawnin a tlân chhuak ta a.

Chu khua chu tlân chhuahsanin khawi khaw panna nge maw ni, kawng hlui, hnim ang reng tak mai zawh chuan a tlân ta zel a.

Reilo te an luite awmna hi an va thleng a.
Chu luite kam ah chuan châwlin sakawr ațang chuan a chhuk a, tui ah chuan an in sil vêl luam a. A hmanhmawh êm êm hmel loh kher mai. Luikam a lungpui ngheng chuan a țhu ar ar a. A savun ip, uain paina chu kengin a lem leh zauh țhin a.

Chutianga eng emaw chen a țhut hnu chuan a piah mai ațang chuan sakawr tlân thâwm hi alo ri a.
Rang tak a tho chhuakin a ngûnhnâm pai chu a phawi nghal a.

A piah lawk ațang chuan sakawr pakhat hi, sipai thirkawr ha hian a awmna lam pan hian alo khalh phei zel alo ni a.

A lo tlân hnai zel a, alo lang chiang ta. Marcus-a chuan mak a tih hmel kher mai. Zawi sap hian,
" Hestia." a ti a.

Chu sakawr chung chuang pa chuan abul alo thlen chuan a rawn zuangthla zawt a. Hlim tak mai hian an han in kuah a.

" Hestia, engatinge ilo kal ve? Engtin nge min rawn zawn chhuah theih zâwk?" Marcus-a chuan a ti a.

An bul lungpui chunga țhut pah hian Hestia chuan,

" I lehkha kha ka hmuh veleh kan lo kal nghal ani mai. I lehkha ka hmuh hma ni khan Captain Pontus-a leh General Klent-te Delain ah an rawn thleng chiah a. Chuan General Klent chu Delain-ah awm in a zân a zânin Captain Pontus leh sipai țhahnem tak hruaiin kan lo chhuak nghal a. Neondreia- khua ah nikhat châm in Captain Pontus-a ka hnutchhiah a, ka rawn umzui ve nghal che a, sawilai piah deuh a khaw rauhsan tawh ah khan Putar Pakhat ka hmu a, chu chuan i chanchin engkim min hrilh hnu in ka rawn chhuahsan leh ta ani." a ti a.

Marcus-a chuan,
" Chuan..? Min rawn hruai kîr leh itum tih na maw?" zawi sap hian a ti a.

Hestia chuan,
" Kha putar ina i chungchang min hrilh kha a dik anih chuan.." tiin a chhang a.

" A dik asin, chu mi avang chuan...." Marcus-an a atih lai chuan Hestia chuan lo pawt chat in.

" Ka hria alawm i rilru chu, Eng anga lo puan lawk leh hrilhlawk pawh nisela kan dang thei ang." a ti a.

Marcus-a chu a thaw hak a,
" Ni e, mahse engpawh lo thleng se pawi ka ti lo." tiin Hestia thusawi chu a lo nemnghet a.

Marcus-a chu a tho hluai a, thinrim hmel deuh hian,
" mahse ka thih hma ngeiin misual Zeddicus-a hi ka that phawt ang." ha chang țhial rawp rawp pah hian ati a.

Hestia chuan,
" Neondreia- khua pawh kha ama tih ani leh pek ang chu." alo tih zawm a.

" Ni e, sipai tlem azawng chu ala nei niawm tak ani, tunah pawh Hmar lam khua ah sawn a lal a hrawt vel mek ta ang chu." Marcus-a chuan tiin a sakawrah chuan alawn zui nghal a.

Hestia pawh chu tho chhuak in a sakawr ah chuan a lawn zui vel leh ta nghal a.

" a tawp nan.. khawinge in that chimit vek teh ang." zawi sap hian Marcus-a chuan a ti a.
Tichuan an sakawr chu vaw tlân in chu lai luite chu an chhuansan leh ta a.

Hmar lam pan in, an hma zawn phaitual hnim leh thing lian pui pui awmna lam pan chuan chak fahran mai hian an tlân ta vang vang a.

Chulai ram palaileng ah chuan chawhma chhûng deuh thaw an tlân a. Nî chu asa țha viau na in chawhnu lamah erawh chuan Vân ah chuan chhûm dum chhah tak tak mai hi anlo lang leh țan ta.
Chhûm leivâk pawh a chhah telh telh a.

Khawthim dawn ruai chuan khaw pakhat lian ve ang reng tak mai hi an lût hlawl a. Mahse mi an tlem khawp mai.
Kâng bâng hi ani ringawt a.
Kawtthler ah chuan ruang hi alo let phung mai a, naupang leh nunau an țap chuah chuah reng bawk a.

Chutah in kâng khu luai luai kawt a putar lo țhu chu Hestia chuan an bia a.
" ka pu, khawi khua nge?"

" Westland."
khawngaih viau mahse thinrimna thlarau chuan a man laklawh tawh tlat.
Chak fe hian an sakawr chu an tlân tîr leh ta a.

Chu khaw chhuah dawn, khaw tâwp lamah chuan sipai eng emaw zat hi khawchhüng mi sawisa hian uain in chung hian anlo au dar dar hlawm a.

An hmuh veleh Hestia chuan,
" nang chu lo va kal rawh, ka lo buaipui ang, Narbeth chu helai ațanga hnaite ah a awm, misual Zeddicus-a ten an pan mek mai thei ani." a ti a.

A ngûnhnâm chu lekchhuak in sakawr ațang chuan a chhuk a, Marcus-a erawh pêng in, a tlân tlang zui ta a.
Chutia Marcus-a tlân ta chu hmanhmawh a tlân ni bawk mahse khaw inkar kawng pangngai pawh zawh lo anih avangin a tlân rei ang reng khawp mai. Zânlai dawn ah Narbeth khaw dâi a thleng thei țawk a.

A sakawr ti dingin a piah lawk a Narbeth khua chu a thlî vang vang a. Castle of Narbeth-an tih țhin chu Vân chung sâng taka thla êng bial kulh chuan a chhun paw ruih a. A kawt piah deuh ah chuan puanin tam fahran lo hi a in zâr dul bawk a.

Mahse chûng puanin te chu a țhen chu a khu rum rum a, kâng hluah hluah tâwk lah bo lo.

Mangang aû ri hi a ri khâwk deuh rum rum a.

"Vivienne"....

Hmanhmawh deuh hian a sakawr chu a tlân tir lehnghal a.
Reilo te an khaw chhûng chu a thleng ta. Khua pawh ani lo, puanin zár chawp deuh vek alo ni a. A țhen chu puanin ang deuh, in pangngai ang tak a sak ani bawk a. Sipai chu an tam kher mai. A țhen mangang in an au ruai ruai a, hmeichhe țhenkhat chu sipai te chuan kawtthler ah te chuan dîm baksak lo hian an hnûk hawn hawn bawk a.

Hmun tin hmun tangah hriamhrei inkhak ri leh thi tur aû ri chu a ri chêl chûl a. Ruang lah an tlu sai kalh nuaih bawk nen.

Chulai a awm te pawh chuan an hriamhrei neih ang ang chuan sipai ho chu anlo bei lêt ve nasa mai.

Chutiang a in suatna râpthlâk tak mai an hmu thut chu a hrilhhai hmel angreng khawp leh nghal.

Chutia a hawi ruai ruai lai chuan  a thaw kâwk a. A melh ngai melh reng chung hian zawi sap hian.
" Vivienne." a ti a.

A piah deuh ah chuan Vivienne-i ngei chu a kawrfual vâr ngei mai ha chung chuan alo tlân kual nasa mai. A kut lehlam lehlam ah chuan chemte zum nalh tak mai hi a keng a, hmelma sipai ho chu a lo bei lêt ve nasa mai.

Chutah ring fahran hian Marcus-a chuan,
" Vivienne." a ti vak a.
Chu aw a hriat rual chiah chuan Vivienne-i pawh chu rang fahran mai hian alo hawi chhuak a.
Marcus-a hmel an hmu chiah chu a phu deuh zawk hian a hriat. Marcus-a lamah chuan a kut rawn lek pheiin zawite hian, " Marcus." a rawn ti ve a.

Mahse hmelma sipai ho chu an tam êm avang leh an rawn beih zel avangin chuti mai chuan an in pan thei bik lo.

Marcus-a pawh chu sakawr ațang chuan chhuk vat in a ngûnhnâm chu a phâwi a, a âwmphâw pawh la ta lo chuan hmelma sipai bitna lam pan chuan a tlân phei ve ta nghal a.

Marcus-a thlen chin chu a hriat ngei mai. A vai kaw duak duak a, hmelma sipai te chu leiah an tlu nghal phawk phawk a.

A kutthlak vawikhat chu tumahin an tuar zo lo. Sipai nghâwngah chuan a vit a, a ngûnhnám a phawi leh rualin a bula mi chu a han sât zui lehnghal zat a.

Marcus-a hmelah chuan khawngaihna rêng rêng hi alang lo. A chêt hmang rêng rêngah chuan a thinlung chu thisenin a tuihal ngawih ngawih ani tih a hriat.
Chutianga an in beih lai chuan Vivienne-i aw ngei mai hian ring tak hian,
" Marcus." a rawn ti țhawt a.

Hnunglam an hawi chuan rang tak hian leiah a bawk nghal zawk mai.
Chutah an tho chhuak leh chiah chu bul lawk a hmelma sipai chu alo kâng hluah hluah a, mangang tak hian alo țê ruai ruai bawk a.

Rang taka thovin Vivienne-i awmna lam an thlîr phei nâk chuan, dawithiam kawrfual ha mi sawm rual vel hian Vivienne-i chu an lo beih rawn anih chu.

Chûng dawithiam ho chuan an kut ațang te chuan țêk ang tak tak phe zuk zuk mai te, meialh rápthlâk tak tak te leh thil khu dum ngun mai, thlî ang maia boruak a lêng kawi nuaih nuaih te hi tichhuak in anlo beih rawn chiam chiam a

" Vivienne." ti chung zelin Marcus-a chu Viviene te lam pan chuan thei leh theilo in hmelma sipai that chung zêl hian alo hnaih phei zêl phei a, tlân pah chuan dimna reng neilo hian hmelma sipai chu a that hmiah hmiah a.

Mahse Vivienne chuan an lam pana Marcus-a rawn tlân chu alo au a.
" Marcus, lo kal suh, kîr rawh." alo ti vak vak a.

Chutia a sawi zawh rual chuan Vivienne pawh chu a thinrim tak tak tawh aniang, ring tak mai hian a țê vak a. Chutia a țê rual chuan a ral lehlam ațang hian chinghnia hi anlo û ruah ruah mai bawk a. A rápthlák ngei mai.

Chutah Vivienne mitmu chu alo danglam ta vek mai, a mitmu chu a sen ta vek a, a ka an ân phei chuan ngho ang deuh mai pahnih hi a ha chunglam ațang chuan a rawn lawr lehnghal.

Chulaia a che chhuak leh chu a rang tawh kher mai, chu Zân thla êng leh chhûm leivâk paw chûk hnuaiah chuan thlî ang mai hian a che rang a, a phe zuk zuk ani mai, a châng leh a inti bo ni maiin a hriat, hmuh hman mangloh khawp a rang hian a tlân a, chutah amah bei tu leh 'lightning' a a hmangaih Marcus-a kâp tu dawithiam ho chu a chemte kenlai chuan an nghawngah zêl a thai phei zur zur a. Dawithiam ho pawh chuan tihngaihna an hre vak bîk lo. A țhente phei chu an tlânchhe hial a.

Dâr chanvê vêl lai chutia an inbeih hnu chuan hmelma sipai ho pawh chu an thi zo teuh tawh kher mai, a țhen chu sakawr ah pawh chuang lovin ramhnuai lamah an tlânchhe zauh zauh reng bawk a.

Chutih lai chuan a piah lawk ațang chuan,
" Marcus." aw hian a rawn ti a.
Rang fe a aw lo chhuahna lam an hawi phei chuan Hestia chuan hmelma sipai rawn tâwn tlangin a ngûnhnâm chu alo vai fua fua a.

Zawi sap a, "Hestia." tiin ani pawh chuan hmelma sipai ho chu an beih chhunzawm lehnghal a.

Chutia Hestia rawn lang leh ta chu Marcus-a pawh a phûr sawt hian a hriat.

Rei ngial an in beih leh hnu chuan hmelma sipai ho pawh chu an tlêm tawh khawp mai.

Mahse chutih lai chuan thâwm dang alo awm leh ta. An piah lawk hnim zîng ațang chuan sakawlh rapthlak leh lian tak tak mai hi râpthlâk tak a hrâm chung hian tam tak mai an rawn chhuak a, an pian zia chu sakei lu pahnih nei an ang ber, mahse sakei ai chuan an lian daih a, an vun pawh meia rawh châr ang maia châr leh chhah tak ani a, ha sei tak mai leh râpthlâk tak mai hi an nei a, an chilthli a far duah duah reng a.

Marcus-a chu an rawn beih rawn ber a. Mahse Marcus-a hmelah chuan zâmna a lang lo. Huaisen tak hian alo bei lêt a, reilo te an paruk lai mai a tihlum der a.

Ngaiteh, chutih mêk lai chuan chinghne rual hi an rawn û ruah ruah a, an piah lawk a 'Castle Of Narbeth ' kawt vêl ațang chuan chinghne lian tak tak mai leh tam tham zet mai hi an rawn chhuak a, chûng chinghne ho chuan Marcus- te chu lo chhan in Sakawlh râpthlâk tak tak te chu an rawn bei a.

Hestia ina a rawn auh țhawt chuan alo in ring hman tawh bîk lo. A lêng lawp a, a ngûnhnâm chu a thlauh zui nghal bawk a.

Chutah Sakawlh lian ber mai chuan hram chung hian a rawn zuan zui lehnghal chat a. Marcus-a pawh chu a chau tawh kher mai, mahse rang tak a lum sawn in a bul lawk a âwmphâw chu a chhar vat a. Hmanraw dang lâk hman ni tawh hek lo. Sakawlh chuan rawn panin a ham zuai zuai reng a, mahse Marcus-a chu a âwmphâw chhar chuan harsa tih hmel tak hian alo in dang ve zêl a.

Tunah zet chuan a mangan hmel ta khawp mai. Hestia chu hmelma sipai leh sakawlh dang beih angaih avangin țanpui tûr in a rawn kal mai thei si lo.

Boruak ah chuan phun ri deuh bul bul hi a rawn ri chhuak a. Marcus-a te piah lawk lung chung ah chuan Dawithiam Zeddicus-a chu dâwi hla chham niawm tak hian vân lam hawi hian alo phun bul bul reng chu niin.

Chutihlai chuan Vân chung sâng tak a thla êng bial kulh chu chhûm dum chhah tak hian alo hliah țan mêk a

Zeddicus-a chuan a dawithiam kawr bán hlai tak chhûng ațang chuan chemte nge, thil zum tle var mai tawite hi a phawrh chhuak riai riai a.

Chu a thil zum chu boruak ah vawrh kângin dâwi hla a chham zui nghal a. chu thil zum chu che lo hian boruak ah chuan a kâng reng a.
Chutah a kut pahnih chu phar chhuakin a kut ațang chuan thil paw riai mai, a khû nge a alh zâwk ni? Hi rawn ti chhuak in dawi hla chham zêl chung chuan chu boruak a ding mêk a thil zum thlawh chhuah lamah chuan a khu phei ta chum chum a. Mit a hmuh hman mangloh hian chu thilzum chu alh zuai in, rang fahran mai hian Marcus-a lamah chuan a thláwk phei zui ta nghal a.

Marcus-a chu a dâk âwrh a, alam pan a a hming lam chunga Vivienne rawn tlân phei chu thlîr chung hian a âwn riai riai a.

Zawi sap a, " Vivienne." ti chung zê chuan lei châr ah chuan a tlu zawi ta hnawk a.

Dawithiam Zeddicus-a chuan chu a thil zum chu Marcus-a thirkawr hma veilam a hnute chung zawn ah chuan a rawn thlawh chhuah tîr in, a bûr vû a. A dawi thiltihtheihna ina a chhampual chu thir zum chuan Marcus-a thîr kawr pawh chu savun pangngai ang mai hian a chhun tlang anih chu.

Chutia leia a tluk hnu lawk chuan chu thîr zum la alh paw phût mai chu muangchang hian boruak ah chuan a thamral zui ta riai riai a.

Vivienne chuan rawn tlân phei pah chuan Marcus-a ngûnhnâm chu hmuh hman mangloh khawp a rang hian a rawn chhar phei a.

Chutah sâng taka zuang kângin Marcus-a beitu sakawlh lu pahnih nei chu an lû a rawn fik zui nghal hmawk a.

Chutia Marcus-a a rawn kah lai tak chuan Hestia chu Marcus-a aû vak chung hian a áwmpháw a in vêng chung hian Dawithiam Zeddicus-a lamah chuan a tlán phei zui nghal a. Chu misual Dawithiam Zeddicus-a lah chuan dawi hla chham mual mual chung hian Hestia chu 'Lightning ( țêk ang deuh hi ani ber. CR) chuan a lo kâp lêt ve chiam chiam bawk a.

Mahse Hestia chuan a rawn thlen tirh khan a sakawr a Marcus-a âwmphâw chu hmu in a rawn lek chhuak hi alo ni a.

Chu âwmphâw chuan Dawithiam Zeddicus-a Lightning a a kahna pawh chu tlân chung hian in dan nan alo hmang zel a.

Sipai pangngai âwmphâw, thîr emaw savun emaw pawh nise chuan Hestia leh a âwmphâw chu an kâng ral tawh ngei ang.

Chutiang Sipai pangngai mai mai âwmphâw ringawt chuan dawithiam ropui te dâwi chu an dang thei teuh mai silo.

Mahse Marcus-a âwmphâw erawh chuti maia chhe thei tûr chi a siam ani lo.
Mei leh Kutthemthiamna Pathian Hephaestus-an a Greek Pasalțha Hmingthang ber Achilles-a tana a țha thei ang ber tûr leh uluk famkima asiam kha ani a.

A phâw chu rangkachak, dâr, thîr leh tangkarua țha ber ber chi a thuah li lai asiam ani a, a phaw hmaiah chuan lei leh Vân leh Tuipui te, Nî leh Thla leh Arsi lemte a chuang bawk a. Tin, A phaw tlângah chuan tuifinriat lem lui angin a luang kual râih bawk a,
Nî ina a chhun phei chuan a êng tle sût a. Zeus-a mupui rawng nen pawh a in ang hle.

Chu âwmphâw chu Achilles-a thih hnu in, a fapa Neoptolemus-an a kawl leh a, Neoptolemus-a chuan Marcus-a pu Baculla lal chu ngaihhruih nan pe leh in, tunah hian Marcus-an a hmang chhunzawm leh ta ani a.

Chutianga Hestia chu in dang chung zel chuan Dawithiam Zeddicus-a lamah chuan a tawlh phei hret hret zel a.

Mahse a bul hnai ava thlen chuan zawi muang hian boruak ah chuan Zeddicus-a chu nui huah huah chung hian a thâmral ta daih a.

A hrilhhai ngei mai, a țhingțhi hnawk a, ring tak hian a țê vak a.

Marcus-a chu ala thi mai lo, Vivienne-i chuan țah aw țuai hian a ko vak vak a.
A lû chu dawm kângin Marcus-a hmaiah chuan a chûl hliau hliau a.

A khawngaih thlak ngei mai, a mittui chu a biangah chuan a luang zawih zawih a. Thawchham ang maia aw pawh chhuak țha theilo hian,
" Marcus, Marcus." a ti sep sep reng a.

Marcus-a chuan thei leh theilo hian Vivienne chu a melh țâwk țâwk a. Chutah muangchanga a kut chu lek kângin Vivienne hmai chu dîm tak hian a chûl sak a, Vivienne-i hmai a mittui luang kawi niaih chu a kut chuan an hrûk sak a.

" Marcus, min kalsan suh, ka hmangaih che asin. Marcus, kum tam tak chhûng ka lo nghak tawh che asin, ka hmangaih che, ka hmangaih che." țah aw țuai leh aw khûr hlak hlak chung hian a ti a.

Thei leh theilo hian Marcus-a chu anui sak a, chutah a hmui chu ti che hlek in zawi te hian,
" Vivienne, keipawn ka hmangaih che asin, ka thutiam ang in ka lo zawng chhuak leh ta che...mahse ka kalsan leh dawn ta che anih hi, kan in hmuh dan hi ka van hrethiamlo tak êm." a ti a.

Vivienne chuan a âwm ah bei tîrin a kuah vawng vawng a. A lungngaihna avang chuan a rûm vawng vawng reng a.
" Marcus, i ta ka ni tawh alawm, ka ni kumkhua ang, i thutiam chu i hlen ta, mahse hriatthiam ava har tak ëm, Marcus, kan in hmuh dan hi ava duhawm loh em, Marcus, min kalsan lul suh, i tello chuan engtin nge ka awm ang." tiin sawi pawh a sawi chhuak țha theilo.

Chutah Marcus-a chuan hriattham mangloh khawp a zawi hian,
" thihna chuan min rawn zûk a, ka hun a thleng ve dawn ta, Vivienne, ka van ngai tak che êm, vawikhat tal han kuah leh che ka van châk tak êm." a ti leh a.

Chau tak a rûm in Vivienne bânah chuan a thei leh theilo hian a vuan leh a. Thâwk harsa ti takin a âng hlawi hlawi a,
" Vivienne, ka mit a thim thlengin ka kut ah chelh tlat rawh aw, Vivienne, ka hmangaih che, ka hmangaih che, Vivienne, Vivienne." a rawn ti leh a, chutia a sawi zawh chuan a zawi ta hnawk a.

Vivienne chuan a hmangaih Marcus-a mit chhîng rîai rîai chu lungchhe takin a en reng a.

Van lam hawiin ring tak hian,
" Marcus." tiin a țê vak a,  Chutah nghet tak a Marcus-a pawm chung chuan lungchhe tak hian a țap zui leh ta zawih zawih a.

Chutihlai chuan an chhak lawk tláng ațang chuan chinghne rual hi rapthlak tak mai hian an rawn ûchuah chuah a.

Hla tak ah hian Zân Sava pawh a kawppui ngâi niawm fahran hian khawhar tak hian a hram lauh lauh reng a.

Chu Zân khawhar tak ah chuan a hma lawk a Vân chung sâng tak a thla êng bial kulh pawh kha hmuh tur rêng alo awm tawh lo. Thil dum nge, chhûm dum niawm tak hian alo hliah thim vek mai anih chu.

.......................................... ..........................  .........................................   .......................

Chu thla êng a thim rual chuan lemchanna dawhsân pawh chu a thim zui nghâl rup a. Chutah khawilam ațang nge maw ni hian thlifîm hi a rawn la thaw zui lehnghal.

Muangchang hian lemchanna dawhsân sîr tawn tawn a puanzâr chu pawt tu awm ang mai hian a rawn che ruai ruai a, reilo te an ka hmazawn a lemchan dawhsân chu a zâr hliah ta vek a.

Chutih lai chuan kei chu mumang ang ruai hian ka awm a, a hma lawk a ka thil hmuh lungchhiat thlak tak mai khan ka thinlung a fan in ka tiril ah min man a, ngaihtuahna fîm pawh ka nei thei lo.

Chutianga ka buai nuaih lai chuan ka phu zuk a. Engkim mai chu alo in thlâk leh ta vek mai anih chu.

Lemchanna in nilovin ka room kawngka bulah chuan ka lo mu reng a,
Muangchangin ka tho va, ka khum lamah chuan pheiin tukverh chu ka khâr țha a, mahse chutih lai chuan ka chiang meuh lo, mumang ang ruai a awm in ka vai muai muai reng a.
Chutah khumah chuan muangchanga țhu in, khâ ka thil hmuh, mumang nge inlârna zâwk emaw ni kha ka ngaihtuah lêt leh neuh neuh a.

Kha thil lungchhiat thlak tak khan ka thinlung a khawih in dan rualloh hian ka mittui a rawn luang zawih zawih a. Chutia rei fê chhûng lungchhe tak a ka țhut reng lai chuan he thu hi ka rilru ah alo lang thut a.

" hla taka ding in hun liam tâ te chu a thlîr a, vut duk kár a lumna nei tawhlo meiling ral riai riai ang hian a rawn kîr leh tawh ngai dawnlo tih hre mahse a beiseina chuan la nghak ta fan a.

'Engtikni ah emaw chuan' tiin beiseina thlarau khawhar chuan tuipui kam te chu a hrût vel a."