THE BRIDE OF DRACULA (Season 1) : The Land Beyond The Forest : Moonlight Waltz (Chapter 19)...

He Argonauts Rammutna a an  hotupa ber chu Jason-a ani a, Tin, Zeus-a fapa mi chak hmingthang Hercules-a te, Rimawi lam Pathian Apollo-a fapa Idmon-a te, hla phuah thiam leh țingțang perh thiam Orpheus-a te, nula sapêl thiam hmingthang Atalanta-i te bâk ah Greek Pasalțha lâr leh hmingthang ber, Achilles-a pa Myrmidon Lal Peleus-a te leh Greek mi pasalțha huaisen tak tak te an kal hlawm anih kha. Heng Pasalțha huaisen tak tak te hi Pathian ropui ber Zeus-a nupui Inneihna Pathiannu Hera-in mal a sawm a. Mihringte hriat ve thianglo, Zeus-a fanu Pakua Muse- ho zaipâwl chu Helai Helle-i tlâkhlumna lai, Hellespont an pelh lai hian a ngaihthlak tîr anih kha. Tichuan Hellespont chu thlawh kân zel in zanlai velah chuan khaw in hnaih tak tak pathum Parium, Lampsaus leh Abydus khawpui te chu an thlawh pel leh hman tawh. Khawchhak lama Nî a chhuah țan vel lai chuan Illium- khawpui dâi boruak ah chuan an lêng vêl mêk a. Illium khawpui hi Troia an ti bawk a, mahse Troy tiin khawvel chuan a hre ta thung ani. Chanchin a ngah hle a, tlem a zawng hriat zau nan han sawi ila. Troy khawpui ah hian finna Pathiannu Athena-i Temple a awm a, he Athena-i Temple chhûngah hian milim Palladium a awm bawk a. Hei hi Troy khawpui tan a pawimawh ber ani. Heti khawpa a pawimawh nachhan chu: Athena-i hi Zeus-a fanu ni mah se, Zeus-a unaupa Tuipui zawng zawng leh Lirnghing Pathian ropui Poseidon-a fapa Triton-a'n a enkawl a, Triton-a chuan fanu Pallas-i anei bawk a. Athena-i leh Pallas-i chu hmeichhe naupang inkawm ngeih tak an ni a. An infiam a, thiamna chi hrang hrang an zir dûn țhin. Vawikhat chu ngunhnam vaiin an infiam a, Pallas-i chuan Athena-i chu sah a tum a, zak kau hawk khawp in ngûnhnâm chuan a tin ûr mai a. Chu chu Zeus-a chuan alo hmuh in Pallas-i chuan a fanu chu a sât fuh ang tih a hlau va, chutia an pahniha nunchan an zir lai chuan Olympus- tlâng ațangin âwmphaw a thlâk a, Athena-i âwmah chuan a zu vuah sak a. Thawklehkhata lo thleng thut anih avangin Pallas-i chu a phu zawk a. Chutih lai tak chuan tihpalh tak meuh meuh vin Athena-i chuan Pallas-i chu a ngûnhnâm a vit in, a vit hlum ta dêr mai a. Pallas-i a thah avang hian Athena-i hi Pallas Athena tiin an koh zui phah ta ani. Athena-i chuan Pallas-i thî chu a tuar thiamlo hle mai a. Tawng thum(3) a sângin thing milim, Pallas-i lim chu a siam a. A ke a in zawm a, a kut dinglamin fei a hûm a, a kut veilamin tiang a keng bawk a. Pallas-i ti phu zawk tu âwmphaw kha a âwmah a vuah sak bawk a. Chu milim chu Palladium ti a vuah in Olympus tlânga a pa Zeus-a Lalțhutthleng bulah zah takin a hûng ve a. Vawikhat chu Pathiante zînga chungnung ber Zeus-a chuan siruk rual, Pleiades- unau zînga pakhat Electra-i a pawngsual a, Electra-i chu tlânchhia in Zeus-a Lal țhutthleng sîr a milim Palladium- chu in phên nan a hmang a, Zeus-a thinrim chuan Palladium chu leiah a paihthla daih a. Hetih lai vel hian a hnu a Troy Lal Priam-a pu, Ilus-a chu Phrygia khawpuiah a kal a. Chutah chuan inchaia intihsiakna anlo buatsaih a, Ilus-a pawh chu a tel ve a. Vanneih asiamin chu inchaina ah chuan a chak ber ta hlauh mai a. Tichuan Phrygia Lal chuan lawmman ah mipa sawmnga(50) leh hmeichhe tleirawl rual sawmnga(50) ve ve a pe a. Zâwlneite thurawn angin Lal chuan bawngpa a pe tel bawk a. Zâwlneite chuan Ilus-a chu, " bawng hi zui zel la, a bawhna hmasa berah khua sât ang che," an ti a. Zâwlneite sawi angin Ilus-a chuan bawng chu a zui ta zel a. A tâwpah chuan Ate-tlângah bawng chu a bawk ta a. Chuan Ilus-a chu Zeus-a hnenah chhinchhiahna dîl in a țawngțai zui nghal a. Chutia a țawngțai lai chuan a puanin bulah chuan Palladium chu a hmu thut a. Mahse Palladium chu Mihringte tana hmuh thianglo anih avangin chawplehchilh in Ilus-a mit chu a del ta nghal a. Mahsela inthawina a hlan hnu in a mit del chu alo vâr leh tho. Chuan chumi hmunah chuan bâwkte khawh in, khawpui a din ta a. Chu a khaw hmingah chuan Illium a ti a, mahse a hnu ah Troy- tiin an thlak leh ta a. Chuan Palladium tan chuan Temple sa nghal in Athena-i temple chu a lo din ta ani. Zâwlneite chuan, " Palladium hi vawn țhat anih chhûng chuan Troy hi hmelma ten an hneh ngai lovang,'' an ti ani. Mahse a hnu a Troy Lal, Ilus-a tupa Priam-a leh Hecuba-i te fapa Paris-an a Sparta Lalnu Hmelțha, Pathian Zeus-a leh Sparta Lal Tyndareus-a nupui Leda-i te fanu Helen-i, Sparta ațanga a rûk chhuah avanga Greek ho ina Troy khawpui an rûn khan he Palladium hi Helen-i puihna azâr ah Greek ho sakawr lim lian tak mai siam dan tur ngaihtuah chhuaktu mifing Ithaca Lal Odysseus-a, Helen-i unaunu Penelope-i pasal leh Tydeus-a leh Deipyle-i te fapa Argos Lal Diomedes-a, mihring sa ei țhin sakawr nei tu te chuan an ru chhuak a, chuvangin He Troy khawpui ropui tak hi alo tlûkchhiat phah ta anih kha. Tuna Marcus-a ten an thlawh khum mêk lai hian, Hmangaihna Pathiannu Aphrodite-i fapa Aeneas-a chuan he illium, Troy khawpuiah hian ro arel mek ani. Aeneas-a pawh hi Troy indo lai khan Greek Pasalțha huaisen leh hmingthang Achilles-a khan a that țêp a. Troy khawpui kiang luikam ah Achilles-a nen hian insualin Achilles-a hian a feia khawh tlu in a ngûnhnâm a sahhlum a tum a, mahse a sât hman țêp tihin tuipui zawng zawng chunga thuneitu Pathian Poseidon-a chuan a lo chhanchhuak hman anih kha. Aeneas-a hi a vannei hle a, Pathian ten a Thi lo tur leh Hun lo kal lehzel tur atan a Troy khawpui a ro la rel tur a an lo hual lawk anih avang chauh in Achilles-a hma ah khan a thi lo ani. Tichuan an thlâwk zui zel a, Illium khawpui pawh chu thlawh pel in Aegean Sea chung boruak ah bawk chuan an thlâwk lût leh a. Aegean Sea kâr a thliarkâr lian ve ang reng tak mai, khawpui Pathum awmna ah chuan chawhnu lam ah chuan an thlâwk lût ta a. Mahse an châwl lawk lo, khawpui Pahnih Methymna leh Mytilene te chu thlawh pêl in, Lesbos khaw dâi ah chuan châwl turin an thlâwk lût leh ta zawk a. Nî chu a sâng êm êm tawh lo. Hetia an chawlhna lai tak hi ngaw pik tak chhûng ani a. Pegasus chung ațanga chhuk in a ngûnhnâm a phawi a, zau vak lo hian hnim pik tak tak chu a sãt veng deuh a. Chutah vanneih asiamin an awmna lai ah chuan ram theihmu alo rah țeuh a. Chûng chu Marcus-a chuan lo khâwl in hnah lianpui pui ah hian a dahkhawm ruih a. ram theihmu a lawh khawl ei pah chuan a thing bul ngheng hian a țhu reng a. Khawthlang lamah Nî chu la her liam chiahlo mahse an awmna lai hi ngaw pik tak anih avangin a thim ruai tawh tho mai. Chulai hmunah chuan zán riak in a tûk zîng Ni chhuah rual vel chuan an thláwk chhuak leh ta nghal a. Agean Sea chungah bawk chuan thlâwk lût leh in Aegean Sea chhûng tho a thliarkar lian vak lo, Skyros- ah chuan fehrehsan bawr vel lai hian an thlâwk lût leh ta a. He thliarkar hi Neira-ina Penelope-i dah tîr a tumna hmun kha ani a. Thliarkar lian nilo mahse a hmun a nuam hle a, hmun reh leh fâl, khâm sen veng vung leh fár ngawpuiin a tuam, Lasi ho lalram ang maia nuam leh mawi ani. Hmanlaiin He Skyros- thliarkar ah hian Lycomedes-an ro arel țhin a. Fanu hmelțha tak tak leh ramvachal tak tak pasarih(7) anei bawk. Troy indona a a akal ve ahlauh avangin Thetis-i chuan a fapa Achilles-a chu a dâwi mu a, zawngduli nu chungah chuangin he Skyros thliarkar ah hian a tlanbopui daih ani. Hun eng emaw chen chu he Skyros Lal Lycomedes-a hnenah hian an chëng a, Achilles-a hian Lycomedes-a fanu te zinga pakhat Dedamia-i nen hian fapa Neoptolemus-a an nei bawk anih kha. Skyros thliarkar thlanglam Aegean Sea kam lawk ah Marcus-a te hi an châwl a, hmun nuam tak anih avangin Marcus-a pawh chuan nuam a tih hmel in a lung alên hmel hle a. An hawi vel a, an chhak lawk ah chuan Fâr thing sâng tam tak a ding khup mai bawk a. Chu Aegean Sea tuipui kam a coconut kûng ding thluah hlim ah chuan Marcus-a chu a țhu veng veng a. Tui chîm chin leh chin loh va Pegasus tlânjual vel chu a thlîr dauh dauh reng a. Chutia a țhu chu reilo te an alo muhil daih a, a mutui ang reng khawp lehnghal. a harh leh meuh chuan khawthlang lamah Nî a lo her liam dawn ruai tawh a. Muangchang a thovin țiaupho ah chuan a chhuk thla hret hret a. Chuth lai chuan khâm tohlâwt hnuaia pûkte chu tuifawn chuan a birh ri bûrh bûrh reng a. A chhak deuh Thliarkar chuan chung lama fâr hingte chu thli in a chhêm kûr suau suau reng bawk a, chûng fâr thing rim te, tlâng pang awihtlán a phaitual hnim rimte leh tuipui kam a lily chikhat, Hyacinth pârrim te chu thlî chuan a rawn chhêm a. Marcus-a chuan an hip vang vang a, chutih lai chuan a khua a har hmel kher mai. Hetih hun laia Nî tla tûr hi tuipui táwpah, kâwlkil ah a sen no phût a, a zung chuan a awmna thliarkar leh a hma zawna Aegean tuipui dum kûk mai chu a chhun tle suar suar a. Skyros thliarkar ațanga hnaite, chhim lam a thliarkar te tak te Sarakinon pawh chu alang dum nel nel a. Chutianga khawhar tak a tuipui kam a hawi veuh veuh chung chuan zawite hian a phun sep sep reng a. Reilo te an Zân thim tur chuan Skyros thliarkar chu a rawn tuam țan ta a. Chutih lai chuan a thliarkar chuan chung lam ațang hian Pgasus chu a rawn thláwk thla a, Marcus-a bulah chuan rawn țum in, hlim hmel deuh hian a hrâm vel ruai a. Pegasus lu ah chuan chûl in Marcus-a chuan eng emaw ni hi a sawi a. Tichuan Pegasus chungah chuan lawn kaiin chulai thliarkar khawhar leh mawi tak chu an thlawh chhuahsan leh ta a. Chu zân boruak chu a vawh hmel kher mai, vân chung boruak sâng tak a an thlawh vang pawh ani mai thei... . Tichuan chutia an thlâwk chhuak ta chu Aegean Tuipui thlawh kân in zanlai velah chuan Greece ram leilung an chuangkai ta a. An hnuai zawn a ramngaw zau pui chu a thim chhah mup mai a, Thlâa ral tawh avangin a reh in a thim kher mai. Chutianga an thlawh mêk lai chuan an awmna hnuai khawthlang lampang ah chuan khaw ropui hmel deuh mai hi ramngaw kâr ah chuan alo êng deuh țhap a. " Eubola," tiin Marcus-a chu a phun sep a, tlem chuan a hlim hmel ve ta deuh. Ni e, Aegean tuipui ațanga hla lo te ah, Greek ram chhung si a khaw awm hmasa ber chu Eubola- khua anih avangin, an ram chhûg boruak ah an léng vel mek tih Marcus-a chuan a hria ang a, a hlim ve deuh pawh ani maithei. Tichuan Athens khawpui leh Sparta khawpui te chu thlawh kân zel in Delain khua chu a tûk fehrehsan bâwr velah a thleng ta chauh a. Sipai riahbuk lam ah pawh kawi lovin Penelope-i te puanin awmna lam ah a tlang nghal daih a. Boruak a a thlawk lai chu khaw mipui te chuan anlo hmu duh kher mai, a tum tum a a thlawh hniam lai chuan naupang leh kawtlai a mi thenkhat lo awmte chu an tlan darh hak a. Penelope-i te puanin bul lawk ah chuan țum in, Pegasus ațanga a chhuk lai mek chuan a thâwm hria in Penelope-i țhiannu Katie chu puanin pawnah arawn tlân chhuak a. " Pu Marcus, nang elaw?" hlim deuh si, hrilhhai hmel deuh hian alo ti a. Katie pan pah chuan Marcus-a chuan, " aw, ka rawn thleng chiah, enge inlo an a?" ti a chhangin Puanin chhung ah chuan an in zui lut leh ta nghal a. " kan țha ani mai, i tluang maw?" " tluang ani mai e." inchhungah chuan Penelope-i nu leh Hestia- lo awm in, eng emaw sawi hian anlo inkawm mek a. Marcus-a an hmuh chuan an pahnih chuan anlo ding a, Marcus-a chu a mangan hmel ang reng viau tih Katie-ina alo hmuh chuan, " Pu Marcus, hlauhthawn awm êm êm ani lo e, a hma pawh hetiang hian a awm fo țhin alawm," alo ti a. Chutah Marcus-a chuan kel vun ațanga siam, a ip lian vaklo chu dap rak rak in Dragon mittui, lung tum ang maia sakhat leh, Marble ang mai a fim paw deuh riai chu a rawn lek chhuak a. Mak an tih hmel hlawm kher mai, Hestia pawh chu abâng bîklo. " hei hi, anih hi dragon mittui chu." Marcus-a chuan an tihzawm a. Dawhkan ah chuan a dahchhuak a, mak tih hmel deuh hian an thlir thap a. " i hlawhtlinna hi ka lawmpui hle mai che," Hestia chuan alo ti a. Penelope-i nu pawh chuan, " Pu Marcus, ka fanu tan hian i thawk nasa hle mai, lawmthu sawi ngaihna pawh ka hre lo." alo ti ve bawk a. Marcus-a chuan, " Ka pi, chutiang sawi angai hleinem, țanpui thei che u a ka awm hi ka lawm zawk hle asin." a ti a. Chutah Chu mittui tlang chu a ban a, " zanin ah emaw, naktuk zân emaw hian thlá a de tawh ngei ang, Neira khan thla deêt leh hma in a ti sia, Pathianten min hruai a, ka lo kir leh vat thei hi ka lawm tak tak ani." an ti zui a. Penelope-i nu lam hawi hian, " a awmna lai vel inlo sawi kha alawmawm khawp mai, Pathian Ares-a temple pawh chu alo la awm ngei alawm, puithiam hmeichhia in a awmna puk ah min hruai a." a ti a. Chutia a sawi zawh chuan a țhutna ațang chuan a tho chhuak a. " a tihdan tur chu Puithiannu khan min hrilh a, kan hnawih chhin dawn ang e," tiin Penelope-i mutna lamah chuan a phei zui nghal a. An vai chuan anlo zui lut ve nghal a. A mutna bulah chuan Marcus-a chu an ding ang rên râwn a, Penelope-i muhil chu khawngaih hmel deuh hian an thlïr vawng vawng a. Hestia ina a rawn kheuh zeuh tákah chuan Penelope-i bulah chuan a țhu nghal a. Chutah dîm deuh hian Penelope-i bán zawi hniang, leh chêr tak chu a ban a. A kawr bân an hlim chuan rûl ina a chukna hmuamhma chu alo la hriat ngei mai. A hmuamhma lai tak chu a vûng duk ruih a. Chutih lai chuan Penelope-i chu a rawn sahal leh țan ta. Rang tak hian Mina-i chuan thing thlêng kum lian vaklo hian tui ava la a, chutah Puan them hi tuiah chuan chiah huh in Penelope-i chal chu alo hru sawk sawk a. A thlan chu alo tla leh țan ta, a taksa chu a sa huam huam a, a thisen te pawh chu puak keh tur ang mai hian alo pâwng chhuak nasa hle mai. Rang deuh hian Marcus-a chuan A damdawi ken chu rul chukna hmuamhma laiah chuan an dah a. A mak kher mai, chutia a dah rual chiah chuan chu dragon mittui tlang chu a rawn êng deuh phût a. Penelope-i pawh tlem chuan a zia awm nghal ti tih mai anih chu. Chutah zawi muang hian a tui riai riai a, Penelope-i bân zawng zawng chu reilo te an a ti huh ta vek a. Mahse mak em em chu, chutia a banpuam a a dah, tui ang mai a a rawn tui a a ban vel a huh vek pawh chuan hmun dangah a far lo reng reng, Penelope-i bân ah chuan a luangral vek zu nia, a taksa chuan a hîp bet ani ber ang chu. . Reilo te an dragon mittui chu a hul vek leh ta nghal. " a va han mak ngai ve." Katie chuan alo ti a. " hetia ti tur hian Puithiam nu khan min hrilh chu ania, a sawi diklo chu ani emlo ang ang?" Marcus-a chuan hrilhhai hmel deuh hian a rawn ti chhuak phawng a. Chutih lai chuan Penelope-i taksa lum pawh chu a rawn reh in, a thisen zam te pawh chu a pangngai leh tawh. Mak leh em em chu, rul chukna hmuam hma pawh chu avung a reh mai nilovin, a hmuamhma pawh chu a reh daih anih chu(!) " a va han mak ngai em? Pu Marcus, i ti dik ani?" Penelope-i nu chuan lawm avanga mittui tla deuh pûr chung hian a ti a. Dar chanve emaw lai aral leh meuh chuan Penelope-i chu muhil satliah ang mai ani ta. An ngaih ațhat hlawm tawh hmel hle a. Chutah Marcus-a chuan, " tunah chuan a dam ani tawh mai e, keini pawh riahbuk lamah kan han kal phawt ang e, ngaihțha tak in lo awm rawh u, a muhil mai mai tawh anih hi, alo harhchhuah leh chuan a dam vek tawh ngei ang." a ti a. Tichuan Puanin chu chhuahsan in Pegasus chunga chuang tawh chuanglo in, ke in an riahbuk lam chu an pan ta a. An riahbuk an thleng țêp tih chuan khaw pawn lam ațang hian sakawr chungchuang pahnih hi anlo tlân a, sakawr pakhat hi ruakin anlo kai tel bawk a. An puanin a lut ta chuanglo chuan chung sakawr chung chuang te chu ding meuh va lo thlir in an lo nghak a. " Xanthus." zawi sap hian Marcus-a chuan a ti a. Chung sakawr chungchuangte chuan Marcus-a te chu rawn pan dingin, an rawn thleng chawpchilh ve nghal a. " Marcus Valerious," sakawr chungchuang pakhat zawk chuan a rawn ti a. Marcus-a chuan mak atih hmel kher mai, chutah a sakawr duh tak Xanthus- an rawn la hruai zui lehnghal. Hestia erawh chuan angaihna a hriatloh hmel kher mai. " Hestia, Pegasus awmna min hrilh tu Athens khawpui a, Finna Pathiannu Athena-i Temple, Parthenon a puithiam anih hi," tiin Hestia chu Marcus-a chuan an hrilhfiah a.

Hestia chuan chu sakawr chungchuang pa, puithiam kawrfual ha chu zahna chibai an bûk zauh a.

 Marcus-a chuan chu pa hnenah chuan,
" engti tur in nge?" a ti a.

" i sakawr hi kan rawn pe dawn che a," tiin chu Pa chuan a chhânga, a bula sakawr chungchuang pa lam hawi chuan,
" Therion." an ti a.
Chuveleh chu pa chuan a sakawr nen a suih zawm Marcus-a sakawr hrui chu a phelh nghal sawk sawk a.

" Khaw ên lai chuan in thleng hman tawh awm silova, zânin chu kanlo mikhual ang che u, puanin lamah i phei ang u hmiang," Marcus-a chuan alo ti a.

Mahse chu sakawr chungchuang pa chuan Delain khawpui thlîr kual pah chuan,
" A lawmawm e, mahse kan kîr leh zawk mai ange," tiin a chhang a.

An Pahnih a riak tur a an sawm ngial pawh chuan an sawm tlu thei chuanglo.
An puanin ah pawh chawl chuanglo chuan Marcus-a sakawr chu pe in Athens- khawpui lam pan chuan an tlân kir leh nghal ta daih a.

A sakawr Xanthus chu kaiin Hestia nen chuan an puanin lam pan chuan an inzui phei leh ta hnek hnek a.

Puanin pakhat a sipai pali panga te an riah khawm mai țhin avangin puanin pawh chu a tlêm pharh tawh.

An puanin kawt a sipai pakhat lo awm chu Marcus-a chuan kovin a sakawr chu a hruai tir a.
Puanin ah chuan an in zui lût chawpchilh ve ta nghal a.

Puanin chhûngah chuan hmeichhe tleirawl pahnih hi eisiam in anlo awm a.
Marcus-a te an hmuh chuan zahna chibai an han bûk zauh a.

" Delain khaw nula fel ber Alcibie leh Derimacheia-i te an nih hi, ti hian zîng ațangin rawng minlo bawl sak a, engkim min tihsak vek ani mai." tiin Hestia chuan nuih deuh ralh ralh pah hian an fak vel luam a.

An ralthuamte dah fel in puanin kil sir deuh a Thing țhuthleng ah chuan an pahnih chuan an țhu dun a.

Chûng tlerawl hmelțha deuh deuh pahnih te chuan rang tak hian theirah tam deuh leh uain hi anlo chhawp sak a.

Eng eng emaw sawi a uain in pah a an ti ti lai mek chuan nula pakhat zawk chu an bul ah alo kal hnai a,
" inbualna peih ani tawh e," a rawn ti a. A kal sawn leh ta nghal daih a.

" inbual hmasa ta che nang, i hah awm si a." tiin Hestia chuan Marcus-a chu inbual tur chuan a ti a. ani chuan a thirkawr te chu phelh in puanin pawn lamah a chhuak leh ta daih a.

Marcus-a pawh chuan inbual chu alo châk tawh khawp ani ang, a tho va, a thir kawr leh bân hren te chu phelh in puanzâr piah a inbualna kuangah chuan a in chiah zui ta nghal a

a inbual zawh chuan Delain nula pahnih te chuan Marcus-a chu zanriah an lo buatsaih sak mek a.

A awmhmun kawrfual, a bán leh a tlâng vel rangkachak a cheimawi pan tak chu inbel in chu zanriah tuihnai tak tak mai chu amah chuan muang fahran hian a ei a.

A ei zawh hnu chuan Nula te chuan an lo seng fel leh zung zung a, chutah Marcus-a chuan an puanin chhung tifel vel chu uain in pah chuan alo thlir reng a.

An in tihfel zawh chuan Marcus-a bulah chuan lo kal hnaiin zahna chibai an rawn bûk a, tichuan an chhuahsan zui ta nghal a.

Marcus-a pawh chu a chau deuh aniang, Hestia lo nghah pah in a puan thuah ah chuan alo tlu zâl a. Mahse alo nghak chhuak ta lem lo, chutia a mu chu alo muhil tlang daih a.

" Marcus, Marcus"....

a harh zawk mai, a hawi kual a, a piah lawk ah chuan Hestia chu tui fahran mai hian alo muhil a.

Hmeichhe âw bawk hian fiahlo ruai hian a hming in a rawn ko leh a.

Muangchanga thâwm ngaithla chung hian a tho a, Hestia tihharh hlau tak chung chuan puanin pawn lam ah chuan a chhuak ta a.

Thim hlim a mû kha ani a, alo mu rei hle mai, zanlai vêl ani tawh ta hial ve ang. Delain khaw chhûng pawh chu a reh țhap tawh a, sipai râlvêng pawh an awm lo.

Pâwn chu alo vawt zêk mai lehnghal a. Thlifîm ala rawn thaw heuh heuh leh ta nghal vei nen.

Hmeichhe âw bawk hian a rawn ko leh a. Mahse aw lo chhuahna chu a hre mai thei lo.

Vân lam a lungrual tak mai a arsi phe un mai te chu a thlîr dauh dauh a.

Chutih lai chuan ngaiteh,
Vân chung sâng tak leh thim mup chu alo lang hnai telh telh ni ber in ka hria.
Chutah leilam alo lang leh chu Delain khua reng alo ni tawh lo.

Thing lian pui pui bulah hian hmanlai hmeichhia tena an hâk ang kawrfual ha hmeichhe pakhat hi a hma lama khaw ropui tak thlîr hian alo ding reng mai chu niin.

Tichuan alo lang hnai zêl a, a hmalam alo lan chuan Vivienne-i, Marcus-ana zawn chhuah a tum mêk kha alo ni reng anih chu.
Chutah zawi te te hian,

" Marcus, i lalram bul lawk ah ka lo kal asin, min zawng chhuak leh tur khan i in tiam ani lawm ni? Mahse min theihnghilh chu ka ring silo. Aw, ka van ngai tak che em." a ti a. a âw te chu a zâwiin a khûr lek lek in a hriat.

Ni e ka hre tawh tlat helai hmun hi.
A hma a Vivienne-ina Marcus-a a thlahna hmun leh Marcus-a in tiamna lai kha ani tlat mai.
A piah lawk ah chuan Baculla khaw ropui tak chu a ding luah a.

A mit ațanga mittui lo luang chhuak chu a hmai ah chuan a luang ngiai ngiai a, chu zân reh tak ah chuan thlifîm te chuan a sam dum hlap mai te chu an chhêm lêng siau siau a.

Hun tam tak liam tawh khan helai hmun ah ngei hian Marcus-a kha a thlah liam a, a hnena kir leh tur leh zawng chhuak leh ngei tur khan a intiam ngei anih kha.

Chu a thutiam chu Marcus-a chuan tih hlawhtlin ngei a tum a, tunah ngei pawh hian a mah zawng chhuak turin a Lal ram ropui tak chu chhuahsanin hriat ngailo ram ah a thang mêk ani si a.

Mahse chutiang thil chu Vivienne-i hian a hre lo ani ngei ang.

A in zau pui maiah chuan khawhar tak in Marcus-a chu alo nghak ve char char a, beiseina nen alo lan hun tûr chu alo thlîr mek ani si a.

Mahse a khawharna leh lunglenna te chuan an uai rit ngang ani ang, Marcus-a hmuh tum in tunah hian an khaw bul lawk ah a kalchhuak ta nge nge a.

Chutianga suangtuahna a ka chên vel lai mek chuan ka hma zawn a lemchan dawhsan ațang chuan thâwm alo chhuak leh a.

" Marcus, Marcus." ti a Vivienne-i țawng thâwm chuan ka suangtuahna khawvel ațang chuan min țhâwng tho chiang ngei mai.

A hma lawk a phul hmun zau tak piah deuh a Baculla khaw ropui tak chu Vivienne-i chuan alo la thlîr reng a. A va kal ngam chiah lo ani mai thei bawk ani.
A ni ve tho mai, ani chu mihring pangngai a chhiar tel theih ani tawh tlat silo.

A hmaia mittui luang te pawh chu hrûk a tum lêm chuang lo. A châng châng in lungngaih hmel deuh hian a thaw ri leh hat țhin a.

Chutah zawi fahran mai hian,
" Marcus, ka hmangaih che ang bawk hian nang pawn min hmangaih tih ka hria, i thutiam chu i vawng reng ang a, i hlen bawk ang tih hi ka ring tlat ani, a chhan chu ka hmangaih em mai che a." a ti leh a.

A âw te chu a zâwiin a khawhar thlâk ngawih ngawih in a hriat.

Lungchhe tak hian a in sût ri leh hraih a.
A hmui sen no leh duhawm tak chu chêt tîr leh in,
" Marcus, ka kal phawt mai ang e, i thutiam ah chuan i ding nghet dawn tih ka hriat a vangin beiseina nen ka lo nghak reng ang che, ka hmangaih che a, ka hmangaih reng fovang che, anih leh phawt le." a ti a.

Tichuan chutia a sawi zawh rual chuan a thaw ri hak a, muangchang a in her riai riai in a hnunglam a ngaw pik tak lam pan chuan a kal ta a.
A kal chu ani nâ a, a pên pawn ka hre lo. A tleng anih loh pawh in a thlâwk emaw chu ani ta hial ve ang(!)

Ram ngaw dur khup lam chu pan in reilo te an thim zîngah chuan a ral ta daih a.

Chutia ramngaw chhûbg lama a kal bo hnu chuan a reh hian a reh tlawk tlawk mai a. A khawhar thlak ngawih ngawih ani ber mai.

Vivienne-i chu kan ngaihtuah a, a khawharna leh lunglenna te kha a âwm hliah hliah in ka hria.
Chutiang a ka inngaihtuah lungpuam vel lai chuan engtik laiin nge ka mittui a lo tlâk tih reng ka lo hre lo.
Ka hmai ah chuan ka mittui chu a rawn luang thla anih chu maw le(!)

Ni e, mi pahnih in hmangaihna leh lunglênna chuan ka thinlung mai nilo, ka thlarau thleng hian an khawih danglam in, an fan ni ber in ka hria.

Vivienne-i chuan Marcus-a chu a mah zawng chhuak leh tur in a rawn la kal lo ah angai ngei awm si a. A in khawhar tak ah chuan hun tam tak beiseina nen alo nghak a, mahse a rawn lang thei silo.
A lunglen leh khawhar em avangin a tuar zo lo a. Tunah ngei pawh Marcus-a hmuh in beiseiin a lalram ah alo kal a, mahse a lût leh ngam silo.

Marcus-a pawh hian a hmangaih chu tunah ngei hian zawnchhuah a tum leh mek a. Mahse a zin kawng chu buaina in a khat zo ta vek ani si hi.

Chutianga ka in ngaihtuah vellai chuan Lemchan dawhsan lam chu ka va hawi phei leh a. Mahse Vivienne-i ka hmuhna ram ngâw leh Baculla khaw ropui tak te kha hmuh tur reng alo awm tawh lo.

A hma lam kâwl kil tâwp ni ber in ka hria.
Marcus-a chuan che chang lo hian khawhar hmel deuh hian alo thlir veng veng a.
A khât tâwk a arûm rîk leh deuh hak hak dan ah chuan a lung aleng hle tih hi a hriat ngawih ngawih mai.

Chutah zawite hian,
" Vivienne, ka hmangaih, min kohna rî te hi ka bengah a cham reng asin, nangmah ngei ini tih ka hria, ka thinlung hian min hrilh tlat ani.

Ka hmangaih che asin, ka thutiam chu ka hlen ngei ang, ka la rawn zawng chhuak leh ngei ngei ang che," a ti a.

Chutia a sawi lai te chuan a mittui chu a parawl kuang mai lehnghal.

Chutah vân chung sâng tak lam chu hawiin,

" Viviene, ka rawn zawngchhuak leh ngei ang che, ka hmangaih lutuk che asin." aw khûr dar dar hian a ti a.

Tichuan muangchang a in her in puanin chhûng ah chuan a lût leh ta a.

Dawhkan a uain dahna savun ip chu la in no khat pam hian a thli chhuak a.
Muang fahran hian tlem tlem a in in, a in zawh hnu chuan a mutbu lam chu a pan leh a.

A puanthuah a a mut hnu fê pawh chuan ala muhil thei chuang lo. Viviene-i chu ala ngaihtuah ani ngei ang.

A mutthilh meuh chuan khua avâr dawn ruai tawh.

" Marcus." ti a Hestia ina a rawn koh chuan mutthilh la chhuah hmel fahran hian a rawn meng a.

A hma ah chuan Hestia chu a thirkawr nena in thuam ap hian alo ding a, uain no hi a hûm rân a, Marcus-a chu arawn la nuih vur vur zui lehnghal.

" Ni chhuahna pawh arei tawh ania," ti in a kalsawn lehnghal ta daih a.

Muang fahran hian Marcus-a chu a tho țawih țawih a.
Hestia bula lo pheiin thing țhuthleng ah chuan a țhu deuh hmuk a.

" nizân lamah i mu țha meuh nange," Hestia chuan alo ti a.

" khawvâr dawn ruai khan ka tho leh a, ilo van haw har awm ve nizan chu," Marcus-a chuan a ti a, chutia a sawi zawh rual chuan dawhkan a grep rah chu ban in a hmawm zauh a.

" Ni e, khawchhûng lamah ka kal a, taka i țhiannu pawh kha tûkin zîng chu ka va tlawh a."

" enge alo an tawh a, ka thil hawn chu a ngeih hmel em?"

" Ngeih tih piahlam ani, a rawn tho harh peih alawm." Hestia chuan a ti leh a.

Marcus-a chuan thil țhial nuau nuau pah hian,
" a va lawmawm ve?" a ti liam puat a.

" eng emaw thil hrilh tur che ka nei asin." an tih zawm leh zat a.

" eng lampang maw?" ti a Hestia in a alo chhân chuan, chhâng lêt ta mai lo chuan a melh ngai a melh rûn rûn a.

" Marcus."
ti a Hestia in a an koh tâk ah chuan,
" Ni e, eng lo ania, chutia Penelope-i a dam tawh chuan ka kal chhuah angai ani."

mak tih hmel deuh hian,
" Kal chhuah a? Khawilam ah maw?" Hestia chuan alo ti deuh hû a.

" ka kalna tur hmun ah tak maw le, mi zawn chhuah tur ka neih kha," zawi fahran hian Marcus-a chuan ati a.

Hestia chu a bu nghauh nghauh a,
" ka hria alawm, engtik ah nge chhuah i tum deuh reng reng a? I țhiannu pawh a damfel chauh ani si a?"

reife Marcus-a chu a ngawi vang vang a, chutah zawi te hian,
" a remchan hun hmasa berah ani mai." tiin Hestia chu a chhang a.

Chutih lai chuan an eisiamtu Delain khaw nula pakhat zawk chuan,
" Pu Marcus, inbual iduh chuan kan buatsaih tawh e," alo ti a.

Marcus-a erawh chuan chhân pawh a chhâng lêt hran lo, uain no chu a thli zui daih a.

" eng emaw nawmsam loh deuhna i nei ani lo maw? Tûkin zîng chu i diklo deuh riau in ka hria." Hestia chuan Marcus-a en vung vung chung chuan a ti a.

" chutiang pawh ani chuanglo Hestia, dik tak chuan anilo lamah ka pêng thui ta lutuk hi ka inthiamlo tawh khawp asin." a ti a.

Hestia chuan hriatthiam loh hmel deuh hian,
" Inthiamlo a? Ka van hrethiam chiahlo ve?" alo ti deuh hû a.

Marcus-a vêk chuan,
" Ni e, a.. Inthiamlo ti ila, ka mi hmuh tum zawk chu ania, mahse Pathiante remruat ah dah ila, thil țha chu kan tih tho hi maw.." a ti a, chutia asawi zawh rual chuan a uain chu a tlâk pawp a.

Inbual tûr chuan Hestia chu a thawhsan ta daih a.

Bual thléngah chuan reife a in chiah a, a in bual tih pawh a hre tawhlo ani ngei ang, eng emaw vei rûk nei ang deuh hian thil a ngaihtuah deuh rûn rûn reng a.

Chutah muangchanga thovin a in hru ro thuak thuak a, a thirkawr pawh inbel chuanglo chuan rawngbawlsak tu nula ina alo phawrhchhuah sak maimaw puan ațanga siam kawr fual uk chu a in bel a. A kâwngah chuan a ngûnhnâm apai bawk a.

Hestia erawh chu a inbual lai khan alo chhuak leh hman daih tawh a.

A kawr laksak tu nula hnenah chuan chhuah pah hian,
" Tûkțhuan chu ka eilo mai ang e," a ti a, chhân pawh an chhân lêt hma chuan puanin chu a chhuahsan daih a.

Pawn a sipai lo awm chu zaizir a bia in a sakawr chu a lâk tîr a.
A sakawr lian țha tak, Greek Pasalțha Achilles-a sakawr thlah Xanthus- chu sipai ina alo kaih phei lai chuan uluk fahran hian alo thlêk vung vung a.

A bul an lo thlen chuan a sakawr lû a chûl pah hian,
"Xanthus, i pu hi minla hria em?" an ti a.

A pu chu alo la theihnghilh lo khawp mai, Marcus-a hmai vel ah chuan a hmui chuan a rawn nawr fiam vel a, chutah ala hram zui leh nghal.
Marcus-a chuan,
" Xanthus, Xanthus." tiin, a chungah chuan nalh fahran mai hian a zuang lâwn a.

Penelope-i te riahbuk lam pan chuan chak deuh mai hian an tlân chhuak ta a.

Rei pawh an tlân lo, Penelope-i te puanin kawt ah chuan a sakawr chu din tîrin, hmanhmawh fe hian a chhuk a, Puanin chhûng lamah chuan alût a.

" Marcus, Marcus." ti a aû in hlim hmel fahran hian puanin chhûnga aluh rual chuan Penelope-i chu alam panin a rawn tlân phei a. Nghet fahran mai hian Marcus-a chu a rawn kuah nghal chûk chûk a.

Chutia a rinloh ang deuh a Penelope-i lo dam ta var mai an hmuh thut chuan Marcus-a pawh chuan mak a tih hmel in awmdan pawh a thiamlo deuh niin a hriat.

" Penelope, Nang..i van dam tawh awm ve?" a ti bah deuh nuaih a. Lo kuah lêt nachâng pawh a hre lo.

Penelope-i chuan an chhoh en deuh hâ a,  hlim tak a nui deuh var var chung hian,

" Aw, min han en ta che, ka dam vek tawh anih hi, Marcus, ka ngai tawh lutuk che a." a ti a.

Marcus-a chu a hrilhhai em avang chuan Penelope-i pawh chu chhân pawh a chhâng mai lo.

Chutih lai chuan pawnlam ațang chuan nasa vak lo hian thlî alo thaw lût a.

Inchhûngah chuan Penelope-i țhiante pahnih Katie leh Mina-i bâkah Penelope-i nu te an awm ve bawk a, mahse chu thli thâw chu hria awm pawh in an langlo.

Marcus-a erawh chuan a hrechiang khawp mai.
Chutah chu thli thaw ațang chuan âw alo chhuak ani ber ang chu.
" Marcus, Marcus." tih hi zawi fahran hian Marcus-a beng bulah chuan alo ri a.

Chu aw chu analh kher mai, hmeichhe aw tliang leh khûr deuh dar dar ri ani.
Thli thaw ri ni maiin a hriat.

Chu aw a hriat chuan Marcus-a chu a phu deuh zuk a.

" enge ni ta Marcus?" Penelope-i chuan hrilhhai hmel deuh hian ati deuh hluai a.

" engmah ani lo ve." Marcus-a chuan a ti a. Chutia asawi pah chuan Penelope-ina a kuahna ata chu chhuak in an piah deuh a Penelope-i nu țhutna lamah chuan a phei tlang daih a.

" thil diklo a awm em ni, Marcus?" tih pah in Penelope-i chuan a rawn zui a. Anu bula Marcus-an țhuhmun a rem lai mek chuan a bul tê ah hian thing țhutthleng la in a rawn țhu zui ve thuai a.

Chutihlai chuan Mina-i leh Katie-i te chuan thing thlêng kum hian theirah tuihnai deuh deuh leh thing no tung sei ang reng tak hian theitui rimtui tak mai an lo chhawp a.

" Pu Marcus, nangmah avangin ka fanu a dam leh thei a, kan lawm tak zet zet ani, lawmthu sawi ngaihna pawh ka hre lo." Penelope-i nu chuan alo ti a.

Marcus-a chuan eng emaw ngaihtuah chung niawm tak hian, thu tak lem lo hian,
" chutiang a ngai lo. A dam chhuah leh hi ka duh ber alawm, eng tin nge?" a lo ti thuai a.

" a.. Nimin tlai a in haw hnu ațang khan a zia chho char char ani deuh mai, zanlai vel khan a khua asik leh vak a, kan mangang hman khawp a, mahse a rei lo hlauh a, chuan a khawsik areh a amah pawh reilo te ah a rawn harh zui nghal mai. Tûkin zîng ah pawh a tho hma kher asin." ti a Penelope-i nu chuan chhângin thil awmzia chu a hrilh a.

Penelope-ilam hawi pah in Marcus-a chu an nui deuh sak a, mahse a hul deuh hak in a hriat, an nui ve bawk na in, a rilru zawng zawng chu anih hmel loh.
" i damchhuah lehna turin Colchis ram thleng ka kalchhuak asin." an ti zawm a.

Penelope-i chuan hlim deuh a nuih deuh ver ver pah hian,
" ka hria alawm, ka nu in minlo hrilh nual tawh a." tiin alo chhang a.

" Penelope-i dam lawm nan i eiin i in phawt ang u," tiin Penelope-i nu chuan a lo ti a.
Chutih rual chuan Mina-i leh Katie pawh chu Penelope-i nu kârcheh hian an lo țhu ve nghal a.

Tichuan hlim deuh in an eiin an in a, a bîk in Penelope-i chu a hlim leh zual in a hriat. Marcus-a chu a si deuh chaih chaih reng a.
Mahse Marcus-a erawh chu chutiang êm êm chuan a hlim hmel hran loh.

Han nui ve bawk mahse a pawnlang deuh tlat hian a hriat. Penelope-i chu khawngaih thlâ la deuh hian a melh leh vawng vawng țhin a.

Chutia an ei a an in zawh hnu chuan Marcus-a chuan thu tak hmel deuh hian ring lutuk silo hian.

" engpawh ni se, hei hun rei tak chhung in zîngah ka lo chêng ta reng mai a, Pathiante venhimna azar ah buaina nasa tak tak leh harsatna hrang hrang ten min bawh buai reng mahse, tunah chuan chung chu lâkkian sakin kanlo awm ta a." an ti a.

Chutia a sawi mek lai chuan Penelope-i chu an melh a, Penelope-i lah chuan hrilhhai hmel deuh hian alo en reng lehnghal.
" eng nge sawi i tum chu?" ti hmel hi a pû a.

Marcus-a chuan a rilru chu lo hria niawm takin.
" Ni e, kan ram ațanga ka lo kalchhuahna chhan ber chu, mi pawimawh tak mai zawng chhuak tur in ani a, mahse kha tih lai khan Penelope-i hi hmu in tun hi kan thleng zui ta chu ani a, in zînga la chên rih pawh hi la duh viau mah ila, ka kalsan leh che u hi ala ngai dawn tho tho a." an ti a.
Chutah a hma dawhkan a thing no tung sei khat a theitui chu banin an tlak pawp a.

" engpawh chu nise, tunah chuan buaina a reh tawh a, kan hmelma ber te lah kan ûmkîr leh tawh bawk a, reilo te ah nangni pawh in inkhua Isle- chu in luah leh thei tawh ngei ang. Penelope-i pawh a dam tawh bawk a, chuvangin kei pawh ka kalchhuah hi angai tawh ani." an tih chhunzawm leh a.

A sawi zawh rual chuan Katie- chuan lungngaih hmel deuh hian,
" engtik ah nge chhuah i tum?" tiin alo zawt a.

Marcus-a chuan,
" zânin tlâi ah chuan ka tum chu ania, engpawh ni se, engtik ni ah emaw chuan kan la in hmu leh em ang chu." tiin Katie- chu a chhâng a.

Chutia a sawi lai te chuan Penelope-i chu a lungngaih hmel kher mai, mi dang chu awm ve lo phei selang chuan a țap ngei ang le.

Marcus-a chu a ding hluai a,
" ka kal phawt ange, inlo in enkawl țha dawn nia, kan la in hmu leh ngei ngei ang. Mangțha phawt mai u." tiin thlahna chibai a bûk diat diat a. Dik tak chuan Marcus-a pawh chu a hlim vak biklo tih a hriat tho mai. A țap ve țêp in a hriat.

Tichuan chutia chibai te bûk a in thlahna te an nei zawh chuan hmanhmawh deuh hian puanin chu a chhuahsan ta a.

Chutia a chhuak ta chu Penelope-i nu bâkah Mina-i leh Katie te chuan ngui fahran hian ngawi rengin an en zui țhap hlawm a.

Penelope-i erawh chuan Marcus-a chu a zui chhuak ve nghal daih a.

A sakawr a a lawn tûr chiah chu Penelope-i chuan,
" engtik ah nge ilo kî leh ang, ka lo nghak reng ang che." tiin Marcus-a chu alo aû a.

A ding chawt a. Penelope-i chu a chháng nghal mai lo. Reife chu a dinna ngai ah ngawi reng hian a ding reng a.

Muangchang a in her in hnunglam a rawn hawi a, a mittui parawl kiang a puanin kawt a Penelope-i lo ding reng a hmuh chuan ani pawh chu a hlim mawlh lo.

Ngawi reng in khawngaih hmel deuh hian Penelope-i chu a en reng a.

Penelope-i chu alam ah lo tlân pheiin Marcus-a âwmah chuan a bei thlawp a.

" mawh, sawi rawh, engtik ah nge ilo kîr leh dawn?" țah aw deuh ruai hian Penelope-i chuan a ti a.
Mahse chu pawh chu Marcus-a chuan a chhâng chuanglo.
Dik tak chuan ani pawh chu a lung a léngin a lungchhe ve tho tih chu hai rual ani bik lo.

Penelope-i chu nghet tak mai hian a kuah  vawng vawng a.

" min chhâng rawh. Ka lo nghak reng ang che, lo kîr leh vat rawh aw." ti a Penelope-in a lungchhe tak a atih lai chuan zâwi fahran mai hian.

" ka hre mai bik lo. Hlim deuh in lo awm ang che," a tichhuak ve thei țâwk a.

Chutah sawi zawm leh in,
" engpawh nise, tunah chuan ka kalsan che hi angai ani," a ti leh a.

Penelope-i dâr ah chuan a kut lehlam a vuanin a kut lehlam in a mittui chu a hrûk sak a.

" min tiam rawh, hlim takin i lo awm ang tih hi." a ti a.

Penelope-i chuan chhân pawh a chhânglo, a lû chu a bu nghut nghut ringawt a, țh insûm deuh hian ala in sût zauh zauh lehnghal.

" kei pawn ka ngai dawn hle mai che, mahse Pathian ten min awmpui ang a, engtik ah emaw chuan kan la in hmu leh ngei ang. Chuvangin hlim deuh a awm lo tum ang che, i nu pawh țha deuh in lo enkawl la." a ti leh a.

Penelope-i chuan âw tih nân a lû chu an bu zauh zauh a.
 Marcus-a chu kûn hniam in dîm fahran mai hian Penelope-i chalah chuan an fawh sak a.

Chutia Marcus-ana a fâwp chu a hlim deuh ani ngei ang. Marcus-a chu chhoh en deuh ha chung hian a nuih a.
A mit ah chuan mittui ala parawl tam ngei mai.

" țap tawh lo la, chuti lo chu i damlo leh mai ang. I rilru lo ti hah suh ang che, hlim taka i awm hi ka duh ber ani." tiin Marcus-a chuan zawi sap hian a ti leh a.

" anih leh Mangțha phawt mai le, dam tak in le, hlim deuh in lo awm ang che, minlo ngaihtuah reng reng suh."  a ti a, Penelope-i hmai tawn tawn ah chuan dîm deuh mai hian an fáwp leh zauh a.

Tichuan a sakawr chung ah chuan lâwnin an riahbuk lam ah chuan a tlân chhuak ta a.

Thui fê a thlen tawh hnu chuan a sakawr chu tiding in an lehhawi leh a.

Penelope-i chu alo la che sawn lo reng reng. A hma a a dinna ngai ah chuan che chang lo hian alo la ding reng a, khawhar hmel deuh hian Marcus-a chu alo la thlîr reng a.

A mittui parawl țeuh avang chuan a khawhmuh a fiahlo ta hial ve ang, a mittui chu a hmai ah chuan a luang kawi niai a, a khawngaih thlak kher mai.
A khât tâwk hian a in sût leh zauh țhin bawk a.

Rei vaklo chu ding meuh in Marcus-a chu a lehhawi a. Mahse tih theih dang anei chuang lo.
Ama hriat tawk lek hian,

" keipawn ka ngai lutuk che asin, ka thinlung ah i thi tawh ngai lovang, dam tak in le." a ti zui sep a. Tichuan a sakawr chu a tlán tir a. An riahbuk lam pan chuan an liam ta a.

An riahbuk a thlen lai vel chuan Nî chu a vanlaizáwl țêp tawh.
A sakawr chu thlun pawh a thlung lo. Puanin pawn ah chuan dah tawp in inchhûng lamah chuan a luhsan ta daih a.

" Marcus, ilo lêt leh ta maw? Enge i țhiannu chu alo an a?" Hestia chuan dawhkan a ram lem inziahna emaw ni lehkha hlâi deuh mai kai pharh a, lo bih ngur ngur pah hian alo ti a. Chutia a sawi lai pawh chuan alo hawichhuak hran chuang lo.

Puanin chhûngah chuan amah chauh hian alo awm a.
Mahse a sipai thirkawr leh bân hren vel chu alo in bel tawh bik lo. Awmhmun kawrfual pan fahran mai hi alo ha a.

" i sawi ai khan a dam daih záwk maw le. Thil i sawi uar thiam lo emai General." Marcus-a chuan amah rawn pan pah chuan a ti a.

" enge a?" tiin Marcus-a chuan a lehkha hlai bih lai chu a rawn din chilh a.

" tak a, hei hi tûkin zîng khan khawpui chhûng a lehkha chhiarna in ah ka va hmu chhuak a, i mamawh tâkin ka tia, ka lo keng phei anih hi." tiin Hestia chuan a chhâng leh a.

" ummm.. Ka la mamawh mai thei ani, i ti lawmawm khawp mai General."

Hestia- bulah chuan phei in, a lehkha hlâipui en lai chu a va en pui ve a.

" Hei hi i chhuah dawn chuan ila mamawh ngei ang, mahse a huam zau em em lo, Hmarlam ah hian Verna thleng chauh ani a," Hestia chuan an ti leh a.

" A țhat tho chu, Verna- khaw lamah chuan ka kal lo ang." Marcus-a chuan alo ti vat a.

" ngatinge helai hi kawng a in kawh zawm loh le," ram lem chu kawh pah hian Marcus-a chuan a ti a.

Hestia chuan,
" Ni e, Isle leh Eastland hi chu kawng ala in kal zawm anih hi, mahse heihi chu a hlui tawh lutuk a, khawilai khua maw itih?" a ti a.

Chu ram lem inziak râng nuaih chu uluk fahran a thlîr dauh dauh pah hian,
" He mi hi maw le, Isle hmar lamah hian Aoregin khua a awm ani lawm ni, Hemi Mount Aelira- bul lawk ah hian," a ti leh a.

Hestia bawk chuan,
" Aoregin khua hi chu Persian hovin kum tam tak kal ta khan an ti chhe vek tawh alawm, a bul vel a khua ho nen hian, chuvangin Gallatican khua pawh hi Eastland nen chauh chhak lam ah chuan an in zawm anih hi." a ti leh a.

" anih dawn hi, pawilo mai rawh se, ka la mamawh tho ang." Marcus-a chuan a ti a, a kalsawn ta daih a.

A awmhmun kawrfual chu phelh in rei fahran mai inbualna kûangah chuan a in chiah a.

He a inbualna kûang awmna hi bang sîr kil lam deuh ah niin puan in a inzár hliah deuh a.

Hestia chuan a ram lem lehkha hlai pui chu zial sawk sawk in rangkachak a luan hrui nalh tak mai hian a țawn a, dawhkan ah chuan dah in Marcus-a inbualna lamah chuan a phei a.

" Khaw chhûngah ka va kal lawk ang e, ka rei lo ang," inbualna puanzar pawh hlim chuang lo chuan Marcus-a chu a au a.

Chutia a sawi zawh chuan Marcus-a chhâna pawh nghak chuanglo in puanin chu a chhuahsan nghâl vut a.

Hestia chhuah ațanga Dár chanve emaw lai hnu ah chuan Marcus-a pawh chu phûr fahranlo hian ruak ngal ngat hian inbualna kûang ațang chuan alo chhuak a.

 kawrfual té reuh tê hi inbel in, a chungah chuan a thir kawr chu muangchang hian a ha a.

Vei rûk deuh nei niawm tak hian a thiltih rêng rêng chu a muang ruih deuh ruih a.

A ngal káwr, rangkachak leh dâr țha mi a siam a bun lai te phei chuan a bun zo thei dawn ta lo emaw tih mai tur hian a muang a, an chawl leh deuh țhin vei nen.

A ngûnhnâm chu reifê lek chhuak a a thlîr vauh vauh hnu chuan a kâwngah chuan a pai thei ta hram a.

Chutih lai vel chuan Nî chu khawthlang lamah a her vû tawh a, mahse a hmuh theih meuh loh.
Ván chung sâng ah chuan chhûm dum lian pui pui hi khaw chhak lam pan hian an kal dûl dûl a. A la tlai tehchiam lo na in Vâb chung sâng a chhûm tam tak avang chuan a tlai hmel khawp mai.

Marcus-a chuan a savun ip lian vak lo chu dap rak rak in a hma a alo hman tawh, rangkachak no nalh fahran mai chu a rawn phawrh chhuak leh a.

Puan them hian muangchangin a hru fai hliau hliau a. Chutah dawhkan a savun uain dahna chu la in chu rangkachak no khat țhelh chuan a thli a.

A hma lam a lek kâng in tlem a leih baw zeuh a, eng emaw ni, țawngțai hlâ nge hla chham mi ang hi zawi fahran a sawiin uain chu a in zo ta vek a.

Maimitchhing diar diar in záwite hian,
" Viviene, min lo la nghâk reng tih ka hria asin, ka thinlung hian chu chu a hria ani, ka thutiam chu ka hria e, ka ti hlawhtling ngei bawk ang." a ti sep a.
Chu thu a sawi lai te chuan a lunglén hmel lehzual kher mai.

Záwi fahran hian,
" tunah hian ka lo kal e, Viviene, ka rawn zawng chhuak ngei ang che." a ti leh a.

Chutia a sawi zawh chuan a rangkachak no chu tuia sil leh in uluk fahran mai hian muangchangin puan them hian a hru ro leh hliau hliau a.

A savun ip lian vak lo ah chuan thun leh in a ak a, chutah a âwmphâw leh a thîr lukhum chu la leh in puanin chu a chhuahsan ta nghal a.

Pawn ah chuan sipai ho pawh hmuh tur an awm meuh lo, indona zawh tawh hnu leh an ralmuan lai anih avangin sipai te pawh chu an in thlahdah ve deuh a, khawchhûngah te an kal chhuak ve deuh reng a.

Nî chu chhûm dum ina a hliah avangin a hmuh theih meuh loh. Chhûm leivák hi an riahbuk vêlah chuan a rawn zâm chiai chiai reng bawk a.

Chutih lai chuan thlifîm hi nasa vaklo hian a rawn thaw heuh heuh reng a. Marcus-a chuan pawna a sakawr lo ding chu panin a âwmpháw leh a savun ip ah lai chu a dah a.

Mahse a chuang nghal mai lo. A sakawr bulah chuan dingin khaw chhûng lam chu ngawi reng hian engemaw chen chu a thlir leh ta veng veng a.

Thlifîm rawn thaw heuh heuh te chuan a lung a ti lêng ani ngei ang, maimitchhing in boruak chu a hîp leh vang vang a.

" Marcus, Marcus." ti a hmeichhe aw in a alo koh chuan rang fahran lo hian hnunglam an hawi let a.

Hestia leh Penelope-i chu sakawr ah hian rawn in phur in hmanhmawh hmel deuh hian an rawn tlân hlawk hlawk hi alo ni a.

Penelope-i chu a țap nasa deuh ani ngei ang, a mit chu a bûi deuh lûk a, Marcus-a arawn auh lai te chuan a mittui a la parawl kuang lehnghal.

Marcus-a chuan ngawi reng hian alo thlîr reng a.
A bul hnai an rawn thlen chuan Penelope-i chu rang deuh hian sakawr ațang chuan arawn zuang thla a, Marcus-a lamah chuan rawn tlân pheiin Marcus-a áwm ah chuan a rawn bei nghal chawt a. Chutah a la țap zui lehnghal.

" Marus, i lo kîr tawh dawn lo maw? Engatinge engmah min hrilh loh?" țap chung hian an ti zui a. Mahse Marcus-a erawh chuan a chhâng hran lo. A thinrim hmel loh va, a lungngaih hmel zâwk in a hriat. A meng siar siar a.

Penelope-i bawk chuan,
" Hestia-in engkim min hrilh vek asin, i lo kîr leh tawh dawn lo ani tiraw?" a ti leh a.

 Marcus-a chuan Penelope-i sam ah chuan dîm fahran hian an chûll sak a.
" Hlim tak in lo awm ang che, engtik ni ah emaw chuan kan la in hmu leh ngei ang." zawi fahran Marcus-a chuan a ti a.

Penelope-i dâr ah chuan vuanin,
" engpawh nise, ka kal a hun tawh ani, ka kal phawt ang e, hlim deuh a awm lo tum la, lo in enkawl țha ang che." a ti leh a.

Penelope-i chuan a chhoh en deuh hâ  a. A mit bûi nasa lutuk leh mittui avang chuan engmah a hmu fiah pawn a hriatloh.

Țah aw deuh ruai hian,
" Marcus, ka hmangaih che asin, ka hmangaih lutuk che." a ti a.

Marcus-a erawh chuan a chhâng lo, khawngaih hmel deuh hian Penelope-i chu a en vawng vawng a.
A hmaia mittui luang kawi niai chu a hrûk sak a. Zawi te hian,
" Kei pawn ka ngai viau ang che, hlim deuh a awm lo tum la, engtik ah emaw chuan kan la in hmu leh ngei ang." a ti leh sep a. An piah lawk a Hestia lo ding reng lam chu hawiin,

" General, ka ngai dawn hle mai che, Mahse Pathianten min awmpui ang a, kan la in hmu leh ngei ang chu tiraw, râl te pawh kan la do ho leh ang chu maw le." a ti a. Chutia sawi pah chuan a nui deuh sak a, mahse a hlim hmel hran loh.

 Penelope-i a vawnna chu thlah in a sakawr ah chuan phûr lo fahran mai hian a lâwnkai a.

" Ni e, tluang tak in iva kal dawn nia, kan la inhmu leh ngei dawn nia." tiin ngui raih hian Hestia chuan alo chhâng a.

A sakawr lû ah chuan an chûll hauh hauh a, chutah, "Xanthus." an ti a.
Chutia a sawi rual chuan a sakawr chu a tlân ta nghal a.

" Marcus, Marcus." ti a Penelope-in a țah aw țuau a a rawn auh zui lawm lawm te chu hriat loh theih ani lo. Mahse a hawi kir tawh lo.

Chak fahran hian a sakawr chu a tlân tîr a, Hmar lam pan a tlân zel in reilo te an khaw dâi ramngaw ah chuan tlân lût in, a hmuh theih lo zui ta a.

Penelope-i chuan lungchhe deuh hian Marcus-a tlán chu a thlîr zui vawng vawng a. A mittui chu a dang zo lo.
A khât tawk hian, " Marcus." a ti deuh reng bawk a.

Ramngaw chhûnga a tlán liam thleng chuan Penelope-i chuan a thlîr zui vawng vawng a.

Chutia Marcus-a tlãn chhuak ta chu chak tak hian a tlân char char a.
Khawthlang lamah Nî chu la her liam lo mahse khua a dur êm avangin ngaw chhûng chu zân an deuh thaw in a thim deuh khup tawh tho a, chulai a karah chhûm leivâk ala zîng tuau tuau lehnghal.

Zankhua in Marcus-a chu ramngaw ah chuan a tlân a, a tûk zîng Ni lo chhuah lai vêl thleng pawh chuan chu ngaw zau pui hnuai ah chuan a la tlân char char anih chu..

Zîng ni chhuak chuan ngaw chhûng chu a rawn chhun tlang lo na in a tlân nuam tawk chuan a êng ut tho mai.

Fehreh san bawr vel chuan a chau tawh ngang ani ang, a sakawr chu ti dingin muangchang hian a chhuk a. Thingbul lian tak hnuaiah hian a țhu a, a thirkawr pawh phelh chuanglo chuan chu thing nghêng chuan a muhil zui daih a.

Eng emaw chen chutia a mutthilh lai chuan,
" Marcus, Marcus." tiin hmeichhe aw hian a rawn ko leh a.

A harh chiang ngei mai, thawh phan pawh awmlo hian a ding chhuak zawk a.

Aw lo chhuahna lam zawng chuan a hawi kual vuai vuai a. Mahse a hre mai thei lo.

Chutah aw ngai bawk chuan ring fahran lo hian a rawn ko leh a.

Chu âw chu ngaw chhûng ah chuan a thâm vêl ruai a. Mahse khawi lai ațanga rawn chhuak nge tih pawh a hriat mai theih loh. Ngaw chhûng hmar lam ațanga rawn chhuak ni mai hian a hriat a, mahse ngaihthlak chian chuan chhim lam ațanga rawn chhuak a ang leh lawi si.

Chulai ngaw chhûng boruak ah chuan chu aw nalh fahran mai chu a thâm vel chuai a. A ring êm êm lo na in ngaw chhûng chu a luahkhat hneh viau lawi si.

Marcus-a chuan zâwi sap hian,
" Aw, Vivienne, ka van ngai tak che êm, nangmah ngei ini tih ka hria, i hnenah ka lo kal mêk asin, Vawikhat tal i hmel hmuh leh ka van châk tak êm." a ti a.

Tichuan a sakawr chungah chuan a lâwnkai a.
Chak tak a tlân tîr in Castle of Narbeth, Vivienne-i awmna lampan chuan an chhuak leh ta a ..

(end chapter 19)..