THE CLASSIC..

 Kum liam ta tun ang hun ah te kha chuan tuipui kam ah te lengin ka pu (uncle) nen hlim tak in kan infiam a, a khawharna leh lunglen na te theih tawp in chhawk zangkhai ka tum thin kha ani a.

Ni e, mahni chauh a khawhar taka a awm ka hmuh chang te hian a rilru lak pen na tur ringawt ka lo zawng thin kha ania.

...................................................

..Thlanmual atanga ka haw lai chuan khawthlang lamah Ni pawh a liam dawn ruai tawh a.

Ka Scooty pawh Garage ah dah lovin kawt ah ka dah a, inah lut in tumah pawh ka be lo, ka nu ina minlo biak mawlh mawlh lai chuan in chung lamah ka chho tlang nghal daih a.

A hma chuan ka pu room opposite ah chiah hian room ka nei thin a, mahse ka pu ka ngaih em avangin ka room chu chhuahsan in ka pu room ah chuan ka in sawn lut daih a.

Ka thawmhnaw dahna Almirah pakhat leh Drower tih loh chu lak luh belh pawh ka nei lo.
Room hrim hrim chu ka khawih danglam lo hrim hrim a, ka pu ina a duh dan ang anga a dah chu ka khawih sawn phallo bawk a, chubakah a pindan sir a a lehkha chhiarna pindan pawh chu engmah ka khawih sawn ngailo.

Chutianga inchung lama ka chhoh lai mek pawh chuan ka khua a har veng veng reng a, room ah lut in kan hawi kual vel a, engkim mai chuan ka lung ati lengin ka pu min ngaih zual tir ni berin ka hria.

Rei fe chhung khuma ka thut ngawih reng hnu chuan muangchangin ka tho va, pindan lehlam a ka pu lehkha chhiarna  pindan lamah chuan ka phei a.

He a lehkha ziahna/chhiarna pindan hi a awmloh achin chu kan lut khat thin khawp mai.
Ka nu te phei chu an lut ngailo tluk ani a, a lut ngun ber chu kei hi ka ni mai a, nileng lengin ka tawm thin.

Muangchanga lehkhabu dahna a lehkhabu inrem thut mai te leh dawhkan chunga a lehkhabu dah te ka enkual hnu chuan dawhkan sir a tukverh pakhat chu ka hawng a.

Rei fe chhung chu tukverh bulah chuan dingin tlailam boruak thiang tak mai leh thlasik thlifim te chu ka in chhem tir heuh heuh reng a.

Tlaini tla tur ina kan in piah lam a tlang sang tak tak mai te a chhun eng phut mai te leh sava chiar ri nak nak mai te chuan eng thil dangmah min ngaihtuah tir thei lo.

Chutih laia ka lunglen zia mai chu engtin nge ka sawi ang(!)

Nikum tun ang hunah te kha chuan ka pu nen kan awmna ral lehlam a tlang bulthut ah te kan leng dun thin anih kha.

Nipui khaw lum leh ninawm tak mai te, Fur khawchhia leh ruahtui tlak tam hun te an kal liam hnu a Thlasik khawthiang leh boruak dai tak mai alo her chhuah leh hi chuan ka pu hi a lunglen a zual thin ni ta ber in ka hria. A mah a a awm tam tawh tehreng nen he hunah hi chuan a kan bawhbuai ngailo tluk ani.

A chang chuan ka len harh pui thin a, ka theihtawp a tih hlim leh a rilru lak pen chu ka tum ber thin.

Chutianga kan lenchhuah chang pawh chuan kan awmna piahlam tlang bulthut a Far thing sang tam tak ding thup hnuaiah chuan kan leng thin.

Chutianga ka pu nena kan hun liam tawhte ka ngaihtuah lai mek chuan mumang ang ruai hian ka awm a, ka khua ahar a, ka lung achhe ngawih ngawih ni berin ka hria. Hriatloh kar an mittui alo hnam in ka biangah chuan a luang zawih zawih a. Insum pawh ka tum chuanglo, insum a hnek in ka tap chhuak zui lehnghal a.

Minute sawm(10min) vel lai chutianga ka awm hnu chuan tukverh bula thing thutthleng buk thei ah chuan ka thu a, chutah thutthleng hma zawn a dawhkan te chu bawh in dawhkan chunga Frame mawi tak tak a ka pu thlalak, a tlangval lai a a lak te leh an thianho niawm tak a anlak te chu ka en pah a.

Chutah dawhkan chunga a Diary hlui tawh tak awm chu la in kan chhiar a.

Chutianga ka chhiar mek lai chuan thil pakhat ka rilru ah a rawn lang zawk mai.

Diary chu ka khup thawk a, rang tak a tlanchhuakin ka pindan a keima Diary ve chu ka va la a.

Chutah chuan ani, ka pu chanchin amah Damdawiin a awm laia min hrilh ngei kha ka ziah chu.

Ka hma zawn a ka Pu Thlalak frame mawi taka intar chu kan melh zawk a, chutah ka Diary chu keu in amah, ka pu ina a thinlung khawharna zawng zawng a ziah chhuahna/puan chhuahna thin ngei Kawlawm chu lek kangin ka Diary ah chuan ka ziak ve ta a.....

....A in lianpui ah chuan amah chauh in a cheng a reng thin a, ka nu nen hian in chhang bung chiah an ni a, an in ngai in, an in duat thei lutuk a, kei pawh hian a chang chuan ka thik hial thin.

Ka chanchin tlem kan sawi belh ve lawk ang a, ka hming chu Talinda Malsawmkimi ani a, ka pu ina a phuah ani a, chuan ka nu leh pa te hi an in neih loh avangin ka pu hian kan nufa in min enkawl char char a, kum thum(3years old) mi ka nih hian ka nu nen ka pu chu kan va fin ve rawih a, tichuan nupui pawh nei lovin kei leh ka nu nen, kan pathum chuan kan khawsa char char anih chu. Ama fa ang maiin min en a, min duat thei em em thin.

School ah ni se, ka pu chuan min hruai ber thin a, kan zirtirtu te phei chuan ka pa emaw an ti thin.

mahse kum kua ka tlin kum in ka nu hian pasal anei leh a, chu ka pa thar hna thawhna hmun ah chuan kan awm angaih tak avangin hreh tak chungin ka pu chu amah chauh a awm tur chuan kan chhuahsan ta a...

Ka pa thar chu Private Company pakhat, Khawl thil lampang a sumdawnna ah hotu lian tak pakhat ani a, a zin chhuah deuh reng thin avangin kan in hmu tam lo thin khawp mai, mahse a zin lo haw apiangin ka thil awh deuh deuh hi min rawn hawn ziah a, min duat in afa dik tak ang chiahin min en thin.

He ka Pa thar te nena kan awmna hi ka Pu awmna veng atang chuan a hla deuh na in khaw khat tho chu ania, Motor chuan darkar thum vel lai kal ani.

Tichuan kum engemaw zah chu kan chhungkua chuan hlim tak in kan khawsa ve naw naw a, mahse engtik lai mah in ka pu chu ka theihnghilh ngailo.

Ka lo lian in ka lo upa ve telh telh a, ka pu chu ka ngai telh telh ni ber in ka inhria.

Ni e, ka pu hian min duat theih em avangin ka ngai thei em em a, thian ngaina em em ka nih loh avangin school chawlh leh Christmas te hian a hnenah ka zin ziah thin.

Tichuan hun alo kal zel a, ka pu pawh chu alo upa ve telh telh a, tunah chuan mi thil chik mi leh, fel tak a che thin kha haihawt leh che phelh phung mai alo ni tawh a, tlawmngai leh taima tak thin anih thin vei nen, tunah chuan mahni pawh in a chhuakvak thei meuh tawh lo.

Chutiang chuan ka pa thar te nen a kan awmlohsan na pawh kum sawm leh pahnih lai alo ni ve ta reng anih chu.

Ka nu nen hian in chhang bung chiah ni mah se, ka pu hi chu a kum phu loh in a lang upa a, putar tak mai ni wm tak ani.

Amah hi mi lungleng chi leh khawhar chi anih vang bakah a hrisel loh em avangin a thenawm khawveng te chuan kum sawmli leh panga anih te chuan kum sawmnga a pelh tawh an ring hlawm anih chu(!)

Ni e, an awmdun phei chuan ka nu nen hian inchhang bung an ni tih tuman an ring ngailo ang, kum nga emaw, kum sarih vel lai a inthlau niawm zawk tak an ni.

A sam te chu kan awmho lai atang tawh khan atuak deuh tawh sa hrim hrim a, mahse khatih hunlai pawh khan engahmah angailo niin ka hria.
Uluk takin a Oil a pe a, a khat tawk in a meh tir zauh zauh bawk a, chutiang lo chuan asam hi a khawih danglam ngai lo.

Chutianga amah chauh a a awm avang leh a hrisel loh bawk em avang chuan kum tawp School chawlh lai chuan awmpui turin ka in pu lut leh ta a.

Ka nu te nen a kan awmlohsan atang khan kum sawm leh pahnih lai ani tawh a, chutiang nimahse kan chhungkua hian akhat tawk in kan tlawh reng tho va, kei phei chuan kan school chawlh apiangin ka va awmpui thin.

Tun kum Nipui Chawlh kan neih kha ka kal hnuhnun ber leh ka pu ka hmuh hnuhnun ber ani a, rei pawh ala rei lo in thla nga vel chu aliam tawh anih chu.

Mahse chutiang thla nga chhung lek pawh chuan ka pu chu alo danglam in, a taksa chu a chaklo tih hi a hriat ngawih ngawih ni berin ka hria.
A sam chu alo tuak var vek tawh na in uluk taka enkawl tih chu ala hriat tho mai, a mitkhur pawh a thuk in a mitmeng reng reng pawh chu a dul deuh ruih tawh a, min han hmuh chuan tlem chuan a hlim ve deuh chuan ka hria.

A chanchin hi a sawi ngai lo reng reng tih deuh thaw hi ani, a ma mimal chanchin tak phei chu ka nu pawh hian a hriatpui em em bik lo nia, mak ve tak chu ani.

A chhan ni bawk a lang chu, ka nu nen hian hna hrang hrang thawk lawr in khaw dang dang ah an awm kual a, engemaw changin an in hmu ve zauh zauh chauh a.

A nunah hian hmeichhe pakhat chu alo lut ve tawh ngei mai tih chauh ka nu hian min hrilh thin a, chu pawh abak sawi vak tur ahre lo khawp mai, chu pawh ka nu nen an in hmuh tum in alunglengin a sawichhuak ani awm e.

A hma pawh khan mihlim thei tak ni mah se ka bul ah lo chuan a thinlung tak a hlim ka hre ngai lo, mi te chuan fel tiin, ka thian te pawn ngaina hle mahse, a ruk tak hian a khua a har ngawih ngawih ni ber in ka hria, amah chauh a awm hi a thlahhleh ber niin ka hre thin, a lehkha chhiarna pindan ah hian a awm deuh chawt thin a, anih loh pawh in pawnlam bathlar ah hian thil muk tak ngaihtuah ni awm tak hian alo thu leh veng veng mai thin.

Tichuan kan pahnih chauh chuan kan cheng dun ta a, pahnih chauh ni mahila kan bengchheng thei hle a, tudang vak hi kan ngai lo, ani pawh a hlim ve thin hle in ka hria, ka awmpui tak achin ah hian a hmel pawh a eng in ataksa te pawh a chak ve sawt sawt in ka hria.

Ka kalna apiangah hian ka hruai ve zel thin a, ka thiante in ah leh ka bazarna ah te pawh min zui ve zel mai thin.
Chau thei hle mahse a sawi chhuak ngai lo va, a hlim ka duh ang bawk in ka hlim hi a duh ber niin ka hria.

November thla alo her chhuak a, ka kum sawmlehpakua na pianchampha alo thlen chuan ka pu chuan ka thil awh ber mai Scooty sen min present anih chu.

Ka van lawm tak em. Ka pu ka ngai lutuk che(!)

Ni e, ka pu chu hi adanglam ve khawp a, kum thu ka nih kum, kan chenho tantirh atanga min awmlohsan hma zawng kha chuan kumtin, ka pianchampha ah thilpek min pe ziah thin a.

Kan chen ho loh hnu pawh in min rawn thawn loh vek leh ka va lam ziah thin a, ka nu phei chuan tullo hi a ti thei khawp a, keimah min hau ziah lehnghal.

Tichuan kar tawp apiangin kan chenna piah ral lehlam a tlangsang tak bulthut ah kan leng thin a.
Chuta țang phei chuan ka nun hi a ruak ngawih ngawih a, chaw pawh ka ei ngai meuh lo, lehkha chhiarna pindan ah ka in khung chawt a, ka rilru leh ngaihtuahna te chu puangchhuak in lehkha ka ziak tan ta a, ka in chhir zia leh ka kalsan na chhan te ziak in, ka in puanna thu, ' THE CONFESSION OF LETTERS ' ti a a hming ka vuah chu ka ziak a, he thu ka ziah hi, ka thawhpui thin Pi Mary-in a hmu fuh a, ka phallo chung chu ka rilru leh ka khawhar zia te ahriat in, alo hmuh ve tak hlauh vin ati a, a chanchinbu ah min chhuah sak ta a. Bakah Social Networking te ti turin min ti a, tichuan ka hmangaihi chu zawn chhuah leh tum in hma ka la tan ta ani.
Rin aiin alo nuam a, Facebook te tiin ka hmangaihi hming pui apiang chu thian ah siam in ka be zel a, Group hrang hrang ah te awm in ka hmangaihi ka zawnna thu ' THE CONFESSION OF LETTERS ' tih Articles chu ka theh darh ta a.
Tin, keimah in Group te ka siam a, 'CHESTERLAND' tih niin, ka thuziak hrang hrang te chu ka dahkhawm ve ta ani.

(he ka pu thuziak The Confession Of Letters, tih hi a hnu ah ka hai chhuak leh a, chu chu hemi hi ani, ka chhiar apiangin ka mittui ala tla thin, hetiang khawp a mihring rilru leh thinlung na puangchhuak thei thu hi ka la chhiar ngailo.)

...THE CONFESSION OF LETTERS..

Kum tam tak aliam ta, Nipui khaw lum huam huam te leh Thlasik boruak vawt vur maite pawh vawi engzah nge liam zozai ta le ? lunglenna te khawharna te chu hun her in aliampui an lo ti thin maw?

Khuarei hian engzata tam fakau nge hmangaihna tahpui tute leh hmangaihna avanga thinlung kehchhia te chu hnem tak ang maw? Hunin aher liampui mai theih hmangaihna thliak tute chuan thinlung ser leh hliam khawpin hmangaihna an dai thei ngai dawn em ni?

Aw, Vana arsi te u lo hnai ula, lo ngaithla teh u. Aw, Zan thlifim te u, ka rilru ngaihtuahna leh lunglenna thinlungte hi han chhem kiang teh u.

Chutin he thlarau rethei hian nunhlui hnutiang chhawnin a hringnun a hmang ve tur a.
Chhumpui ang mai ina khawharna in a tuam he thlarau hi, chung Van Angel thianghlim te khian Van tukverhte hawngin rawn thlir ve selang chuan an tahpui ve hian ka ring asin.

Aw, Ka hmangaih, engatinge ka theihnghilh theih ngai loh che? engatinge ka ngaih em em thin che le?

Kum engzah nge ka rilru leh ngaihtuahna ah hian icham tawh le? mitkhap kar lek chhung chauh tal pawh he thinlung hian ala theihnghilh ngailo che asin. Tan tlang Lasi lalnu, Chawngtinleri ianga thatna leh duhawmna a malsawm i hmel mawi tak leh zaidamna leh ngilneihna, hmangaihna akhat i mitmeng mawi tak hma ah khan e, Kumpui lingletin hringnun lo hmang thin mah ila, He ka thinlung thuruk hi sawichhuak tur in huaisenna reng ka nei silo.

I hma a sawichhuah aichuan in e, Siamtu chung Khuanu hnena he thlarau sual thiltih tenawm ber leh nun tawp hi tak puanchhuah ka duh zawk asin.

Aw, Ka duhlai, He hringnun khawvel hi i chhuahsan tawh nge tangdang belin hlimlaini i chen mek tih reng ka hriatna thahrui te hian a ngaihtuah chhuak zo ta lo. A enga pawh chu lo ni ta tehreng pawh nise la, mitkhap kar te lek chhung pawh i rilru leh ngaihtuahna a ka lo lang ve anih ngai chuan, chu tluka lawmna ka nei chuang lo.

He hringnun khawvel ka cham chhunga ka neihtheih ngailoh tur leh ka chan phak ngai reng reng loh tur chu he thinlung rethei hian alo hmangaih si a, mahse ka kalsan loh chuan beidawnna leh lungngaihna avangin mitthi khaw mawi turin he thlarau hian a nunna hi thihna kut vawt chu a hlan hun ala awm dawn si.

I hringnun atang chuan ka kalbo ngei a, ka hriatrengna thinlung erawh i chhuahsan silo, ka thinlung hian angai ngawih ngawih che asin.

Aw, Duhtak, I sakhmel hmulo hian in he thlarau hian a khawvel damlainite chu lo hmangral mahsela, nangmah ngaihtuah reng chungin fam khawpui alawi ani tih tal lo hria ang che o.

Aw, thihna khawiah nge i tur chu? khawiahnge i hnehna te chu an awm zawh tak ni? Vawi engzatnge i kut vawt hian hmangaihna ilo pawh then tawh a, Engzatnge i chakna hmang in ilo lem zo tawh le? i angchhung a luh hlau a himna zawnga tlanchhia te chu i chakna hmangin i hneh thin amaw. Aw, mitthi kulh kawngkharte u lo in hawng teh u.

Aw, Lungloh tui thiangte u engti zai zia nge in lo kang chah tak ni? Chuti ni suh sela chuan zing daifim ang a vawt chu he thlarau rethei hian lo dawt in, a hringnun khawvel chu nghilh zai a rel ve thei mai tur a.

Hawilopar duhawmte u, lo par chhuak ula, lo inlan teh u, chutin he thlarau rethei hian alo thliak in a tawn che u anga, chutin hringnun khawvel hnutiang chhawn in a achawl hahdam thei hram mahna.

Aw, Duhtak, he lehkha a ka kutziak tlawm tak, ka hmangaihna mittui a chhinchhiah leh ka char hnan hi ilo hmu anih ngai chuan, i lungngaihna hnemtu leh, i buaina te, i harsatna zawng zawng i thlenna thin, i thian khan a lo hmangaih reng che a, nangmah ngaihtuah nan leh hmangaih reng theih nan alungphu ala chawlh tir lo tih ilo hre dawn nia.

Nangmah avang in hmangaihna hi enge anih ka hriat phah a, nangmah avang hian ka nui a, ka tah leh avang pawh hian ka lawm ani. Ka lo hmangaih che avang hian ka in chhir lo a, engtik lai mah in ka in chhir ngai hek lovang. Mahse engtiklai maha ka neihtheih ngai loh tur ka lo hmangaih che avang hian, ka hringnun chu tahna in a khat zo si anih hi.

Aw, Duhtak, he khawvel ah lengdun thei ngai dawnlo mahila, kan piannawn leh hun ah tal chuan ka ta ini thei tawh ang tiraw.

A enga pawh chu nisela, kei chuan tawp lo in ka hmangaih reng ang che a, he ka thisen kallai te hi lo khang in, he lei taksa hian thlan khur chhungah a tawihral hun a nghah hunte lo thleng mahsela, ka hmangaihna chuan a nghak reng ang che a, thlarau khawvel a thlen thleng pawh in i hmangaihna beiseiin kumkhua ai pawh a rei zawk, chatuan thlengin alo nghak reng ang che.

Aw, Duhtak, thihna kut vawt te chuan min hual vel a, ka mit pawh a thim dawn ta, ka thahruite chuan min kiansan a, chakna reng ka nei ta lo, damtak in le.. Aw, ka hmangaih, ka van ngai thin tak che em..

..Chumi hnu lawk chuan kan thawhpui thin tho Pi Rita-in ka thu ziah chu, ama sawi dan tak in, Ka chhiar a, ka chhiar nawn tlut tlut a, kan thawh ho lai thin te ka ngaihtuah a, i office ah inleng tleirawl inei thin tih ka hre chhuak a, chuan ka ngaihruat na hrang hrang lawr khawm in eng emaw chu a awm ka ring tlat a, bakah kan inhmuhkhawm tum khan Pi Mary nen a Office ah thu khunkhan tak mai sawiin in inkawm tih ka hria a, Tin, i thuziah dan kha thuruk leh phehhel deuh a ang ka ti bawk sia, Mary ka zawt ta rawih a, chuan anin engkim min hrilh ta alawm, tiin kha thu khan a velh nasat zia leh min khawngaih zia lungchhe tak in a sawi a.

Chuan chu ta tang chuan an pahnih chuan min rawn tlawh ta zauh zauh a,

ka lunglen leh khawharna te chuan zual lam apan zel inti mai teh ang, ka nun hi a ruak ngawih ngawih a, zan ah te hian tukverh hawng in pawnlam ral lehlam hla tak te chu thlir in ka ding zankhua leh thin, chu ka khawharna chu sangha nula in a tuipui ral lam a mihring pangngai, kumkhua a aneih theihloh tur tih a hriat reng beiseina nen a zantin maia a lungpui chung a thu chung a khawhar tak a lo chang ang mai ni hian ka inhria a, chu ka lunglenna thu chu ' A MERMAID WINTERTALE ' ti a vuah in ka ziak a, hei pawh hi an pahnih chuan chanchinbu ah min chhuah sak bawk.

(hei pawh hi ka pu lehkha ziak tho, a hnu a ka haichhuah leh bawk ani a, a hnuai ah hian kan tarlang lehnghal law law mai ange.)

..A MERMAID WINTER TALE..

Nipui khawlum huam huam leh ninawm tak te chu an kal bo zo va, chung Van lam hla tak a arsi sang tam tak in pho uarh maite pawh chu Thlasik boruak thiang karah chuan an lang chiang em em a, Lemziak thiam ina uluk taka a ziah ni awm taka Thlasik kawng paw riai mai te pawh chu an lang chiang in Siamtu hian hetianga awm tur hian Kum maktaduai engzahnge a ngaihtuahna leh remhriatna hi alo sen ang tih hi rilru hian a ngaihtuah vawng vawng mai.

Chutianga lungrual leh inngaih hmel taka Van lama an in D siau siau lai chuan Khawhar takin Chhawrthlapui pawh alo chhuak tan ve mek a, chu Arkaiden zan chuan a ropuina leh thiltihtheihna te chuan a hnuaia Tuipui zau tak chu chhun eng in, a rawng dum leh thim khup te chu en paw phut mahsela, chatuan atana Siamtu ina mal leh khawhar taka awm tura a duan tlat avangin a hlim ve thei mawlh lo.

Chu Zan khawhar takah chuan nunna nei an awm lo nge, an mut bo lai ni zawk?
Hla taka Zan sava, a kawppui ngai ni awm tak a khawhar taka a hram lauh lauh tih loh chu ri dang reng hriat tur a awm mawlh lo..

Thlasik thlifim te chuan a sam rangkachak rawng mawi tak mai leh thianghlim tle siau mai te chu an chhem leng siau siau va, a mitmeng sual kai lo leh thianghlim, mawi tak mai atanga mittui lo luangchhuak ngiai ngiai te chuan a rilru suangtuahna leh ngaihtuahna khawvel te chu engzah taka tam belhchhah ang maw ?

A mit chuan a hmalam Luipui lam chu a thlir dauh dauh a. Nilo...Tuipui ral mai nilo, mihring mit in a ahmuh phak aia sei leh thinlung mit pawh in a ahmuh theih piahlam, thlarau khawvel ai pawh a hla zawk a thlir ni hian alang.

Chu Tuipui zau tak chunga Lungpui tohlawt chungah chuan thu in, khawhar takin a thinlung ngaihtuahna leh a mitthla... a beiseina te chu Kum sang tam tak chhung alo thlir in, alo lan hun alo nghak thin a.

A ngaihtuahna leh duhthu lo sam ve te chu a taka chantir a tum nge, Tuipui piah ral leh lam ram a lawng mi, tuipui hrut a zin vak te zing ah hmangaih alo nei tih chu rin thu mai lo chuan sawithiam ava har em. ...a enga pawh chu lo nita tehreng pawh nisela, a thinlung a hliam a, a khua a har ngawih ngawih anih loh pawhin a hringnun chu lungngaihna leh lunglenna in a hual vel ani tal ang...

..Chumi hnu chuan chu ka lunglenna chu thisen dawt hmang Dracula nula ina mihring tlangval a hmangaih avanga lungleng taka a Lalin (castle), kulh hlui rup tawh a alo lan hun beisei taka a nghak anga in chan in, ' THE BRIDE OF DRACULA ' tih chu ka ziak leh a, mitthi nung thisen dawt hmang leh minung chu engtikah mah an in nei thei ngailo ang bawk in kei pawh, kei rethei leh fahrah mai hian mi hausa fanu chu engtikah mah ka nei thei ngai dawnlo tih ka hre chiang a. He thu tawi, 'The Bride Of Dracula' hi a tirah chuan lemchan thawnthu angin ka ziak na a, a hnu ah mi thenkhat min ngenna angin thawnthu puitling ah ziak in lehkhabu in ka chhuah nghe nghe kha, bu thum lai ani a,

Season thum ah then in, Season khatna hi 'THE BRIDE OF DRACULA: the land beyond the forest. Ka ti a, Season hnihna chu, 'THE VENGEANCE OF THE VAMPIRE BRIDE :reborn in the wood, ka ti leh a, a bu thumna, Season thumna hi 'THE BRIDE OF DRACULA: awakening' ka ti bawk.

Heng ka lehkha ziah te hi a hnu a ka chhiar leh chang pawh hian a awmzia tak ka hre fiah zo lo fo thin a, kan ngaihtuah a, ka ziah lai awm te pawh hriat mangloh chang ka nei nual thin, engtiang taka nasa in nge hmangaihna leh lunglenna te hian min lo sawisak thin ang le. Chumi hnu chuan kum tam tak chhung in hmu tawhlo mah ila, ka la hmangaih zia thu ka puanchhuahna NEVER TOO LATE tih ka ziak leh bawk a.

(hei pawh hi a hnu a ka pu thuziak ka hai chhuah tho ani a, a hnuaiah hian ka rawn ziak chhawng leh mai e.)

..NEVER TOO LATE..

A chang chuan tihian ka ngaihtuah thin, engatinge ka ngaih em em thin che le? Engatinge ka thin lung hian a theihnghilh theih ngai loh che a, engvangin nge ka mitthla ah hian i cham reng thin?

Aw, duhtak, kum tamtak liam tawh hnu pawh hian ka thinlung leh ngaihtuah na zawng zawngte hi nangmah ngaiin an la rum asin. I sakhmel mawi tak te leh i nui hmel duhawm tak te kha hmu leh chak in zawng thin che mahila, hmu leh ngam tur hian in ka thinlung hian huaisenna reng a nei mawlh silo.
I hnen atanga ka kalbo ni khan e, ka thinlung hi chemte a vih ang mai hian ana a, kumkhua ai pawh a rei zawk chatuan thleng pawh a reh tawh ngai lo tur Ser ka in siam dawn tih reng ka tleirawl ngaihtuahna mawl leh rilru nu khan a ngaihtuah phak mawlh silo, mahse a pawi ta ber zawk chu, ka thian ka lo hmangaih che kha ani.

Ka thinlung leh ngaihtuahna te hian nang hmangaih tur che hian min nawr tlat ang khan, i chetzia leh tawngkam chhuak te khan i rilru putzia leh ngaihtuahna te chu an nawr ve tho ani lawm ni.
mahse hmangaih biahthu hlan tur chuanin, kumpui linglet a thian hmangaihna bak ka huaisenna hian a ngam lo ang bawk in, i hmangaihna chuan a ngam bik si lo ani ti raw.

Ni e, he ka hmangaih leh duh zia thu hi hrilh ta che ila, engtin nge i thinlung khan lo dawnsawn anga, engtinnge ilo ngaih ang tih te hi ka ngaihtuah ve thin fo asin. Mahse nang chan che hi ka ngam lo a, i thinlung tih nat hi ka duh ngailoh ani si a.

Aw, duhtak, tahna leh lungngaihna ten i hringnun chu chim buai lo a, hlim taka inun i hman reng theih te chu ka tawngtai hla ni thin mahse, i hmel mawi tak te chu i lungngaihna mittui luanna ah ka siam sak che a, i thinlung thianghlim leh hmangaihna a khat liam te chu, sual lam kawng zawh tur in ka lo thlak sak che a.

I hlimna chu lungngaihna ah ka chantir zo ta si anih hi. i chung ah hian thil tamtak ka tisual a. Aw, Siamthat leh theih ka van chak tak em. Mahse, ka neih rosum leh thil hlu zawngte chu i tan chuan engmah lo mai an ni si, i hnen atanga ka kal bo ni atang khan e, hlimni reng ka nei thei tawh lo asin, nang chuan chutiang reng i dawn pha silo. Ka taksa chu i hnen atanga hla tak ah awm mahse, ka thinlung chu i kiangah a awm reng asin. Nang ka neihtheih nan che hian tlangsang takte chu lawn liam ngai mahse, i tan chuan ka lawn chhuak ang a, thlasik khawvawt leh ruahpui nasa tak pawh kal tlang ngai mahse, nipui khaw lum leh thlaler khawro pawh ka paltlang ang a, mel sang tam tak pawn min dang thei chuang lovang. mahse kan in karah chuan tawp chin neilo tuipui zau tak a awm si a, a kai na tur reng a awm si lo..

Aw, duhtak, i lak atanga kalbo kha ka duh ngailo asin.

Tunah zawng nunhlui chuan mual aliam a, mahse thinlung ah erawh nitin athar zel si anih hi maw. I thinlung te chuan khawvel ah hlimna zawng tur in an nawr reng che a, i taksa te chu a sualna zunzam chuan an ei mek in, chhuahsan theilo khawp in an char bet tlat si a maw.

Duhtak, keimah avanga i tawrhna te hi ava rapthlak tak em. Mi te chuan i parmawina chen in, i pawnlam thatna te um in hmangaihna thu an fah thin che a.

Mahse kei chuan in e, i taksa nilovin ithinlung thianghlim tak kha ka duh asin, eng ang pawn i hringnun chu lo hmang tawh mah la, sualna khur chitin ah pawh lo tla lut tawh mah la, kei chuan tawp lovin ka hmangaih reng che asin. Ka hnena ilo kir hun nghak in ka lo la nghak reng che asin. Ka hmangaih che a, ka hmangaih reng fovang che, a chhan chu nang chauh hi ka hmangaih awmchhun, ka hmangaih hmasa ber leh hnuhnung ber chu ini si a.

Chuvangin kei chuan engtiang pawn awm la, eng ang harsatna leh buaina pawh lo tawk tawh mahla ka la hmangaih reng che asin. Eng tiang pawhin i hringnun chu lo hmang pawh nila, kei chuan tawp lovin ka hmangaih reng fovang che. Ka beiseina chuan alo la nghak reng che a, ka thinlung chuan alo la nghak reng bawk che asin.

Ka hnena i thusawi hnuhnung ber, ' engtikni ah emaw chuan kanla in tawng leh ngei ang' itih te kha ka la theihnghilh lo asin.

Chuvangin chu hun chu ka lo la nghak a, ka lo la thlir tawk tawk ani. I lo kir leh ang tih hi ka ring tlat a, mahse engtiang in nge? Eng hunah nge tih chu ka hriatna thahrui te hian an ngaihtuah chhuak zo lo.

Mahse ka hmangaih em avang che hian ilo kir leh hi ka ring tlat ani. I lo kir leh dawn tih ka hria, ka la hmangaih reng che, ala tlai lo, ka lo la nghak reng che asin.

I sualna zawng zawng nen pawh khan ka la hmangaih reng che, lo kir leh hram rawh.

Ala tlai lo.. Duhtak, i sualna zawng zawng nen khan ka hmangaih che asin, min hmangaih thu min hrilh nan khua ala tlai lo... Khawvel te hi lo tawp in, Van te khi lo tla mahsela, Hun leh ni te lo in her danglam zel in Ka ruh te hi ka vun ah lo bet in, ka nunna te hi lo tawp mahsela ka lo la nghak reng ang che...

Heng ka thuziah tlawm tak te hi min khawngaih leh lainat em em tu Pi Rita-i leh Pi Mary ten an chanchinbu ve ve ah min chhuahsak a, min la zawnpui reng thin. Chubak ah Facebook ah te pawh ka ziak ve zel bawk a.

Tichuan ka lehkha te kha alo hmu angem, hmu se min rawn zawng chhuak leh duh angem, pasal anei tawh angem, tih te chu ngaihtuah in ka hun tam ber chu beiseina chhete nen ka thlir ve dauh dauh thin a, kan in bula Motor- thawm ka hriat te hian ani kha ani tawh angem, tiin hlim leh hmanhmawh tak in ka tlanchhuak vat thin. Mahse kum alo vei zel a, kei phei chu rilru hahna in min chiah nasat em avang in ka lang tar nasa bik hle a, la thalai tak chung in ka sam te a tuak tan a, ei leh in ka hlamchhiah avangin ka lo cher in, ka taksa te pawh alo zur titih ta mai a. Chuvang chuan ka dam rei pawh ka ring ta meuhlo a, ka beiseina pawh chu alo chuai ve ta telh telh a, khatiang ka lehkha zo zai zing ah khan pakhat tal pawh alo hmu lo chu ani ang a, nge a rilru hah leh lungleng hi fam chang in he khawvel hi alo chhuahsan tawh zawk ni ang. Ka beidawng leh rilru na chuan tuma la chhiar loh a ka la dahthat, ' THE DEAD LETTER ' tih chu ka ziak leh a, he lehkha hi ka chetsual hma zan a ka ziah ani a, he lehkha hi ka thu ziah hnuhnun ber anih ka ring ta hial mai.

(hei pawh hi a hnu a ka pu lehkha ziak ka haichhuah leh ani. Hetiang em em a thinlung na leh khawhar hi ka la hre ngailo, ka thinlung a khawih takzet mai, chhiar zawh a har thei khawp mai. He thu ka ziah lai mek pawh hian ka thinlung hi ana in a rum ngawih ngawih hial ani. Ka pu thuziah hi pakhat mah ka belh lo a, paih then lah ka nei hek lo, a ziah dan ang chiah chiah in a hnuaiah hian ka rawn ziak chhawng e.)

..THE DEAD LETTER..

Ka rilru leh suangtuahna te chuan ka hringnun khawvel te chu an luahkhat a, ka tisa leh thlarau te chu chhun zan in an tap a, khawharin an rum thin asin. Ni e, kum tam tak liam ta khan ka thinlung chu hliam in a awm a, kir leh tawh ngailo tur a ka hringnun khawvel i chhuahsan ni khan e, ka thinlung chu chemte vih ang maiin ana a, mahse maw, khang ni te kha hun in her liampui tawh mah sela, ka thinlung hliam chuan dam ni reng a nei mawlh silo. Kha ni rapthlak tak khan ka thinlung chu chemte in a rawn vit a, tun thleng hian a hmuamhma atang hian thisen ala far reng asin. Dik tak chuan in e, he thi thei mihring mit leh ngaihtuahna te chuan i hringnun chu keima duhthlanna ngei a ka chhuahsan ta ang pawn alo ngai ani thei, mahse demna che ka nei lo asin.

Kumpui linglet a he lei hringnun kawng ka lo zawh pui thin chu engtin nge ka hmangaih leh duhzia thu chu ka hrilh ang. He ka thinlung thuruk sawi chhuah ai chuan in e, Engkimtithei chung Khuannu khian a Nunna Bu thianghlim atang khian in he ka hming hi thai bo zawk se la pawi tihna reng ka nei lo zawk ta hial ve ang.

Ni e, engtik lai pawh a ka kiang a awm reng thin ka thian duhtak, he ka thinlung thuruk hi i beng hriat ah lo sawi ta ila, sual kai lo i thinlung leh ngaihtuahna, i mitmeng mawi leh thianghlim tak te kha huatna leh thinrimna ah a chang ta mai ang tih hi ka hlauh ber ani asin.

Kumkhua ai pawh a rei zawk, chatuan thleng a ka hringnun khawvel i chhuahsan tur chu ka ngaihtuah zawng ringawt pawh hian ka thlarau te chu an khur a, ka thisen luang lai te pawh hi an khang zo tak ngial dawn e.

Chuvang chuan in e ka thinlung thuruk chu lehkha zial ang mai a zial bo a, i kianga len a, ka hun leh ni zawng zawng nangnen a hman ral kha ka duh zawk ani. Mahse he hringnun khawvel ka hman chhung a ka neihtheih ngai loh tur leh ka chan phak ngai loh tur ka lo hmangaih che avang hian nitin in ka thinlung chu lungngaiin a rum a, i kianga awm reng chung si khan e, khawhar in a chau thin asin.

He hringnun khawvel ah chuan in ral leh mai tur nawmchenna leh rosum, khawvel thil hlu te chuan hringnun chu a luahkhat a, kan thinlung chuan thil dang reng a ngaihtuah ngai silo.

Kan in kar ah hian in e, tlang sang tak te awm mahsela, i tan chuan thlarau chawlhna van chung sang tak arsi piahlam ram pawh ka lawn chhuak ang a. Mel sang tam tak in min daidang in, nipui khawlum leh ni sa rapthlak tak hnuai ah thlaler ramro pawh kal tlang ngai se, ka hmangaih, i tan chuan ka kal zel ang.

Mahse tawp chin nei lo tuipui zau tak chu kan inkar ah aluang a, a dai kaina tur reng a awm silo. Ka hmangaih em avang che hian in, i hmel mawi tak te khan chuai ni nei lo se, i thinlung thianghlim tak te kha hahdam tak in kumkhua in awm se tih chu ka thinlung duhthusam leh ka nitin tah hla ani asin.

He khawvel ah hian in, ka thinlung leh hmangaihna chauh lo chu he fahrah rethei hian engmah pek tur che ka nei si lo, nangnen hian runhmun lengdun in ka thai chang mah la, i hringnun hlimna tur reng engmah ka nei mawlh silo.

Chuvang chuan in e, kumtluanga i hlimna tur leh hmangaih bula i hringnun i hman theih nan, i hnen ata hla tak ah ka kal bo ta anih kha. Ka kalsan che avang khan ka hringnun chu tahna in a khat a, kum tamtak chhung inchhirna in ka thinlung a luahkhat asin. Ka han ngaihtuah let chang te hian i thinlung leh ngaihtuahna te chu hre lo mah ila, i chet zia leh mitmeng, khawizu thlumtha mi ai pawh a thlum i tawngka atang te khan enge maw tak a awm anih ring in, ka thinlung thuruk chu enge maw ti a i lo hmuh beiseiin, " the confession of letter ".. Mittui nen ka lo ziak kha ani a, kha lehkha thu aia ka thinlung thuruk leh suangtuahna puanchhuahna hi ka khawvel damchhung ni hian ka nei leh tawh ngai hek lovang a, a themte pawh puan chhuah tur ka nei tawh lo asin.

Duhtak, he khawvel ah hian i awm tawh lo nge tangdang belin i hringnun chu i hmang mek tih reng ka hriatna thahrui te hian an ngaihtuah chhuak zo ta lo. A enga pawh chu lo ni ta tehreng pawh nisela, hre ka thinlung thuruk hi nangnen hlim taka kan lendun lai ami kha ani tih tal hi lo hre hram hram la ka duh asin.

 Duhtak, kha lehkhathawn hmangaihna mittui a ka char hnan tlat kha he khawvel ah nangmah zawnga a vahvaih hnu in, beidawng tak in alo kir leh a,

" kawlkil tawp ah te chuan a lo awm mial mahna tiin beiseina nen ka vak thleng hram hram a, mahse hmuh tur reng a awm lo.

Chutin chung van lam hla tak, arsi piahlam ram ah te chuan ka lawn a, mahse a awm chuang si lo. Leihnuai thuk tak, mitthi khua ahte chhuk in Seoul kulh tihbaiawm chhung ah te chuan ka vakvel a, tui hnuai thuk tak ah te pawh, mahse ka hmuzo chuang lo, boruak ah a thamral ta pawh ani mial maithei." tiin min hrilh asin.

Ka hmangaih, khawiah nge i awm tak le? I hringnun chu engtin nge i hman tak zel tih reng ka thinlung hian a hre thei ta silo. Mahse, kir leh tawh ngailo tur chu beiseina in ka lo la nghak a, ka vun te pawh ka ruh an bet zo ta a, ka mittui luang te pawh vur ang maiin an khang zo ta.

..Tun ah chuan ziak leh tur pawh in chakna ka nei tawh lova, he damdawiin hi dam in ka chhuahsan dawn nge dawn lo tih hi doctor te pawn an sawi thei bik lo ani a.

Talinda, he ka tawrhna leh nun kawng hahthlak tak ang hi tawng ve lo tur in ka duh che ani, nang chu hlim tak in i hmangaih ber nen chuan chhungkua din tum la, he kan dam chhung tawite hi hmangaihna avang in sei tak pawh ani thei tih hre reng ang che..." tiin chau tak mai hian a sawi a.

Chutia a sawi lai te chuan a maimitchhing tlat a, a thinlung na avang chuan a meng ngamlo ni ber in ka hria.

A mittui chu abiang ah chuan aluang ngiai ngiai reng a. Kei pawh chu chu zan rei tawh tak ah chuan ka mutthilh a chhuak lo va, mahse ka zawi nguai a, ka thinlung hi a chau ngawih ngawih ni ber in ka hria.

Engtik lai khan nge ka mittui te chu an lo chhuah a, ka biang ah te chuan an lo luan tih reng ka hre lo. A tawpah chuan ka in sum zo lo a, ka pu awm a bei in ka tap ta hawm hawm a, duat tak a ka sam chul a min thlem te chuan ka lung ati chhe zual zel si.

Tichuan chutianga ka tap chu ka lo muhil tlang nghal daih a, ka han harh leh meuh chuan khua alo var uarh tawh mai a, ka pu chu kan melh a, mahse ala muttui em avangin ka kaitho duh lova.

A bianga fawp zauh in bathroom ah intifai turin ka phei ta a, ka in tifai zo ka chhuah leh chuan alo harh ve tawh a, abula va thu hnaiin, damdawi te kan pe sawk sawk a.

Chutia ka pek lai chuan, " Nakin ah ka lehkha chhiarna pindan ah khan ilut ang a, kawngkhar chhunglam sir a Almirah ah khan thing atanga siam bawm lianvak lo a lo awm ang a, chu chu hawng in a chhunga lehkhathawn leh diary kha i chhiar dawn nia, nizan a ka hrilh che leh ka sawi bak zawng a awm vek ania, chuan ka chung ah engpawh lo thleng sela uluk tak in lo vawng la, ilo kawl tha zel dawn nia " tiin min chah a, lo kal hnai teh min ti a, chuan duat takin min pawm vawng vawng a.

" Ka fanu, engpawh lo thleng se huaisen tak in i awm tur ani, mahse heng ka thuruk, ka chanchin hi inu chu hrilh hauh suh ang che, a tuar thiam lovang " tiin min intiam tir a, a mit meng chu a duaiin a khawhar hmel em em a, mahse ngaihthatlohna pawh nei chuang lovin coffee leh eitur vel lam turin ka chhuahsan a.

Minute sawmhnih emaw vel bak ka thang lovang, damdawiin chhung a ka lut leh chu, nurse duty ho chu hmanhmawh hmel tak in ka pu pindan lamah chuan an tlan phei hlawk hlawk hlawm a, ngaihthatlohna lian tak ka nei ta, ka pu chungah enge thleng tia au phei chung in ka um zui ve nghal a.

Pindan ka va luh chuan ka pu khawngaihthlak tak chu thawk pe in a awm ah an lo nem a, oxygen te pe in an lo buaipui laih laih a, chiai taka tlan pheiin ka pu chu ka kuah a, tap hawm hawm pah chuan ka ko vak vak a, mahse nurse te chuan pawnlam ah min kuah chhuak vat in min hnem mawlh mawlh a, reilo te hnu ah chuan beidawng taka Doctor lo chhuak chu thil awmzia zawh buai angai hran lo tih a hmel ah chuan alang chiang em em.

Chumi tuk chuan ka pu chuan min boral san nge nge a, ka nu leh pa te pawh lo kal in vuina hun te pawh ropui tak in kan nei a.

.........................................................................

Keipawh hi ka pu ka chhun emaw ni dawn ni, min boral san atang khan chaw mumal pawh in ka la ei lova, ka khua hi a har veng veng a, a chang chuan thih ve daih mai te ka chak rum rum thin.

Ka pu ina ni awmloh san atanga kar hnihna vel ani ang, khawhar taka in a ka tei ruk ruk lai chuan ka pu lehkha chhiarna pindan ah chuan ka tei lut nawlh a, kan hawikual a, thil reng reng chu fel tak hian a in rem thlap a, chhuah leh mai tum a ka in her lai chuan kawngkhar bula almirah chu ka hmu thut a, ka van theihnghilh teuh em.

Hmanhmawh tak in ka hawng nghal rawk rawk a, a chhung chuan bawm tereuh te mai, thing chang chi a uluk taka siam hi alo awm a, mak ti leh thin phu dep dep a la chhuak in dawhkan ah chuan ka dah a, muangchangin kan hawng de de a, a chung ber ah chuan Diary hlui tawh tak hi alo awm a, chu diary hnuai ah chuan lehkhathawn tam deuh hi fel tak hian alo in rem thap a, khawih ngun tih hriat tak hian ahmel pawh ahlui hlawm tawh khawp mai.

Mahse diary chuan ka mit alak zawk avang chuan kan keu a, muangchanga chhiar chunga kan ken kan veleh chuan akar atang chuan lehkha them emaw ni hi alo tla thla nawlh a, chu lehkha them tla pakhat zawk chu chhar a kan en chuan lehkhathem nilovin thlalak, thlalak hlui tawh tak mai hi anlo ni a.

Kan en chiang a chu hmeichhe thlalak, tleirawl te chu ka hmuh tawh hnu ang ka ti telh telh a, thlalak hnunglam chu kan en leh a, thil hi alo inziak khat dul a, ka pu hawrawp ngei mai chuan,

' ka theihnghilh kumkhua lovang che, engtik ni ah emaw chuan kan la lendun leh ngei ang tih hi ka ring tlat ani, ka hmangaih reng ang che Judy '... tih hi alo in ziak kalh a.

Thlalak pakhat zawk chu kan en leh a, chutah thung chuan thlalak pakhat zawk a hmeichhia chu ka pu nen in ngaih hmel tak a inkuah chial a an lakdun na ve thung a, ka pu pawh ala naupang in ala hmel tha khawp mai, a tlangval lai chuan nula tam tak chu a zun ah an uai ngei ngei ang tih ka ring tlat.

Mahse abula hmeichhia chu ka hre tawh tlat ani, khawi lai ah emaw chuan ka hmu tawh tlat in ka in hria a, thlalak en vung vung chung chuan kan ngaihtuah a, mahse ani thei in ka ring bawk silo, thlalak pakhat zawk te chu kan en leh thin, ka pu hmeichhe thlalak pui hi ka hre tawh tlat ani, Ni e, chu tleirawl mitmeng thianghlim leh fiah tak mai chu ka hria ka hria, khawiah emaw chuan ka hmu tawh ngei ani...

Engmah pawh chu ka dah fel hman lo, hmanhmawh tak in pindan atang chuan ka tlan chhuak a, kawt zawl a ka nu leh pa lo thu te pawh chuan mak min tih hmel kher mai.
Min au zui na in eng nge an sawi pawh ka hre lo, ka scooty chu ti nungin, hmanhmawh bak lengin damdawiin lam pan chuan ka tlan phei dawr dawr a. Ka pa phei chuan min rawn umzui hial a, mahse ding hman ka ni lo, ka hmanhmawh lutuk tlat.

Damdawiin kawt ah chuan scooty chu ka hung tawp a, security ten a min lo auh pawh chu hrelo ang hmiah in achhung ah chuan ka tlan lut nghal a, duty na ah chuan a hma a nurse tleirawl fel deuh kha alo awm hlauh a, hah leh la thaw hlawp hlawp chung chuan a hma a ka pu pindan ep chiah a pitar awm kha enge a chanchin, ala awm em ti a ka zawh chuan, mak ti tak a min en ha chung chuan, ala awm thu leh nizan ah a chauh zual thu min hrilh a, thil awmzia min zawh tum a a au ziau lai chuan, " a pawimawh lutuk a, ka va hmu phawt anga, chuan chanchin kan in hrilh leh dawn nia." tiin hmanhmawh tak chuan pitari pindan lamah chuan ka tlan phei leh ta sawk sawk a.

Chu nurse pawh chuan min rawn umzui ve nghal bawk a.
Pindan a ka va luh chuan chau tak chung chuan min rawn melh tawk tawk a, thei leh thei lo hian min lo nuih suk a.

A hnar ah chuan oxygen pekna a in vuah a, thisen chaw - anlo khai pah bawk a, a chau zual chu ani ngei ang.

A khum bula thutthlengah chuan ka va thu hnai sawk sawk a, eng khaw sawi set set lo chuan thlalak pakhat chu a hmai zawn ah chuan kan lek kang a,

" Ka pi, he thlalak hi i hriat zawng ani em? " thei leh thei lo a melh tawk tawk pah chuan an en chiang a,

A mit chu a makti in a meng zau kawk in ka hria, khur dar dar a akut chu rawn lek chhuak in, a ka kut atang chuan thlalak chu a rawn la sawn a, zawi te hian, " khawi ami nge i neih a..?" a rawn tichhuak a.

Chu a thusawi chu chhan pawh chhang zui chuanglo chuan, thlalak pakhat zawk pawh chu kan phawrh zui lehnghal a.

Chumi phei chu mak ati leh zual. Kei ina mak ka tih let in mak ati zawk ni hial in ka hria.

A hmuh rual chuan a mittui alo far in zawi te te hian a phun sep sep bawk a. Chau aw tak mai hian, " mami, khawi atangin nge heng thlalak hi i neih a, hmeichhia kha ka thlalak anih kha." a rawn tichhuak hram a.

Chu a thusawi ka hriat rual chuan ka ka bing chuk chuk in ka hria, ka lu chu a hai muai muai a, mak ka ti bawk si.

Chutah mak ti leh tah aw deuh tuang chung hian, " Ka pi i hming chu Judy ani maw..? " kan ti leh ang he haw a.

Ani chuan ka mit tak a rawn melh chung hian, " Aw ni e, kha thlalak kha khawi atangin nge i neih," a rawn tichhuak leh a, a aw chu a khur nasa kher mai, a sawi zawh chuan a maimitchhing leh te te a.

Chutah a kut lehlam chu thei leh theilova ka lama rawn phar chuak in a kut cher leh vuai tawh tak mai a a thil hum chu ka kut ah chuan a rawn hmeh bel a.

Chutih lai chuan nurse tleirawl kha pindan chuan lo lut ve in hrilhhai leh mak ti tak a pitari nena min entawn zak zak chung hian ka bulah chuan alo ding ngawi ve reng a.

Chu a kut a a thil hum thlan dap mai kan en chuan mak ka ti kher mai. Chu a thil hum chu thlalak alo ni a.

Ni e, ka thlalak ken pakhat zawk, ka pu leh hmeichhe awmdun lai thlalak ang chiah chiah zu han ni a. A va han mak kher em.

Ka mak ti lutuk chu ka phu zawk a, ka mittui a tla nghal zawih zawih a.

Nghet tak a thlalak chu hum in tap pur chung hian, " Thlalak a mipa hi ka pu ania, heta damdawiin a ka lo awmpui kha ania." ka ti chhuak thei hram a.

Chutia ka sawi lai mek pawh chuan ani chu a maimitchhing a, thil tam tak a ngaihtuah niin ka hria, zawi te hian, " mami, i pu hming chu Chester ani em..? " a ti a. aw tih nan ka lu ka bu nghauh a.

Chu veleh lungchhe tak mai hian a rawn tap chhuak a, rilru na in a rum vawng vawng a.

Ka hrechhuak ta, Ni e, Engkim ka hmuchhuak ta e.
Keipawh chu ka in sum thei bik lo, ka mittui atla a, ka tap pur tawh bawk a.

"Chester- chu enge a an zel a, ala dam tha em, a hriselna te ala tha em.?" ti a a rawn tawngchhuah phei chuan chhan pawh ka chhang thei lo, ka rawmawl chuan ka in hup a, ka tap zawih zawih a.

Tah aw tuau chuan, " ka pi... Ka pu chuan kar hmasa hmasa leh khan min boral san tawh alawm." ka ti a, sawi pawh ka sawi zo thei lo.

"Ka pu khan athih dawn thleng khan alam che a, ala hmangaih reng che asin, la theihnghilh lo che, a theihnghilh ngailo che asin." ka ti a. Chutia ka sawi lai mek chuan a drip khai na leh a oxygen hrui vuah chu a pawt phawi a, thei leh theilo a rawn thu chhuak in min rawn kuah a.

Tap chung hian," Ka hria asin, engtikah mah min theihnghilh dawn lo tih chu, a mah zawng reng reng hian ka nun ka hmang zova, atan ka la rinawm reng asin, aw, Chester, ka va ngai tak che em, ka van khawngaih tak che em." a rawn ti chhuak a. tawng pawh a tawng tha thei lo, a tap reng bawk a. Chutia atih zawh chuan a rawn khuh bawrh bawrh a, chu veleh ka bula nurse nen chuan kan kuai mu vat a, a zi awrh awrh a, thil a fel dawn lo a kan hriat avangin, kan au tuar tuar a. Kan thawm hria chuan nurse duty thenkhat chu an rawn tlan lut thuai a, thawk te pe in buaipui nghal vat mahse chhan hman ani ta chuanglo. Kei pawh chuan mu leh mal ka nei lo, ka khawhmuh a fiah lo tual tual a, ka nurse thiannu chuan min kaihkuah chhuak nghal vat a.

Chumi hnu chuan emgmah ka hre zui ta lo, nikhaw hre lovin ka awm zui ta daih a. Ka han harh chhuah leh meuh chuan damdawiin khum ah ka lo mu a, ka bulah chuan ka nurse thiannu kha alo thu a. Pitar i chu a boral thu leh a ruang chu a tuten an lak thu min hrilh a, an veng hming te min hrilh hnu chuan kan pahnih chuan a vui na ah te kan va tel ve a.

.........................................................................

Kum khat lai aliam ta, ka pu thlan leh ka pi i thlan chu kar tin kar tawp apiangin ka tlawh ziah thin a, ka tifai a, pangpar te ka dah ziah thin...

Chu thu ka ziah lai mek pawh chuan ka mittui a tla reng a, ka ziak rei khawp mai. Ka ziah zawh chuan ka diary chu ka khup thawk a, nghet tak mai hian ka pawm vawng vawng a.

Ka khua a har ngei mai, ka thutna atang chuan thovin tukverh bul ah chuan ka ding leh reng a.

Van chung sang lam chu thlir in zawite hian ka phun sep sep a. Ni e, ka pu leh ka pi tan chuan ka tawngtai thin a, ka tawngtai reng bawk thin ang.

Kum tamtak pawh liam mahse Ka pu leh pi te chu ka theihnghilh ngailo vang a, ka dam chhung hian ka theihnghilh theih pawh ka in ring lo.

An in hmangaihna ropui zia leh thuk zia kha engtikah mah ka theihnghilh ngailo vanga, ka hrereng fo thin ang.

'Aw, ka pu leh pi duhtak, Chester leh Judy, mittui ina a far hnan aia hmangaihna thuk zia a awm ngailo tih min hrilh avangin ka lawm e.'

..THE END..